AMP lori Naroman ba Timor Loro Sae

Prezidente Republika (PR), José Ramos Horta (JRH) hataou lian tatoli ba Nasaun konaba kompetencia nudar PR nebe defini tuir Ukun Fuan Inan(UFI), hodi bolu AMP no Xanana Gusmao atu ba harii IV Konstitucional (RTP, Lusa i Reuter, 06/08).

Hein to´o Quarta (08/08) atu PM Xanana Gusmao forma equipa IV Governo Konstitucional. AMP hanesan lori naroman foun ba emar no rai Timor LoroSae. PR ninia hahalok, tuir UFI, liliu interpretasaun konaba artigo 106, iha dalan rua (2) nakloke hotu, bolu Fretilin nebe manan ka bolu AMP nebe hetan maioria iha Parlamento Nasional (PN). Hanesan hakerek konaba konstitucionalidade waihira PR bolu AMP harii IV Governo Konstitucional. Hare fila artigo konaba “Coligação maioria parlamentar, é, Constitucional (STL, 10/07), hare mos Forum-Haksesuk (uma-coligao-maioria-parlamentar)”. Tamba PR ninia funsaun nudar mediador, neduni buka halibur partido sira hotu, liliu sira husi sorin Fretilin no AMP, hodi hatou proposta nebe bele halibur hanoin husi parte rua nebe maka envolve, Fretilin maka ukun ka AMP. Neduni PR hatou hanesan proposta «Governo Inklusaun Nasional (GIN)», maibe dalan ba ida ne odamatan taka. Iha PR ninia dada lian ho Jornal Público (JP) edisaun (26/07) dehan katak “PR sei ba halo tuir UFI, hodi bolu Fretilin ka AMP hodi harii Governo(Público,26/07)”. Neduni iha hakerek sira hatun iha Forum Haksesuk (FH) konaba dalan ba PR sei bolu AMP harii IV Governo, hanesan interpreta dalan ba AMP nakloke hela, “Faila GIN, loke dalan ba Governo AMP (Forum-Haksesuk, 24 Julho 2007), hare mos FH (faila-governo-inklusaunloke-dalan-ba)”. Iha mos hakerek nebe buka sik katak PR atu bolu duni AMP harii Governo, hatene katak dalan seluk la iha tan, tamba Fretilin la bele kaer ukun tamba nia minoria iha Parlamento no Governo Fretilin la bele garante ba estabilidade. AMP bele kaer governo tamba nia maioria parlamento no bele garante ba estabilidade politika no institucional. Hare mos hakerek konaba “PR bolu AMP Forma IV Governo Konstituicional (Forum-Haksesuk, 27 Julho), hare mos FH (pr-bolu-amp-harii-iv-konstitucional)”.

AMP harii Governo ne´e tuir UFI no tradus ba vontade ita nia emar nian hodi halo mudança politika, tamba iha tinan lima (5) nia laran Governo Fretilin ho Mari Alktiri ho Grupo Maputo lori Rai Timor LoroSae (RTL) ba ba krise, liliu KPM (Krise Politika Militar) iha tinan kotuk, governa ka ukun deit ba partido no familia,sasan estado nian beneficio deit ba interesse grupos. Neduni PM Xanana Gusmao no Governo AMP buka hadia dalan hodia hadia sasan aat sira nebe maka Governo Fretilin ninia sala, buka habadak povo nia terus no susar, iha biban badak no naruk. Fiar katak Xanana ho AMP bele iha kapasidade hatan ba lian bot sira nebe ita nia emar hasoru. Hanesan hakerek iha artigo konaba “Koligasaun pos-elietoral: Xanana ho CNRT iha kondisaun hodi forma Governo (STL,05/07), hare mos Forum-Haksesuk (koligasaun-pos-eleitoral-xanana-ho-cnrt>)”. Iha biban badak, buat nebe maka Governo atu halao maka oinsa: hasae lian sira refugiado nian, oinsa maka resolve F-FDTL Petisaun ninia lian no oinsa maka Justisa (ça) ba autora moral i material konaba KPM, oinsa maka bele harii auditoriu internasional ba konta Estado nian iha tinan lima nia laran. Ida ne´e hanesan naha todan nebe PM Xanana Gusmao ho IVGoverno Konstitucional sei tutur iha kbas, molok atu hakat ba halao servisu seluk iha biban naruk, hanesan:

- Oinsa maka bele hamenus problemas sociais nebe maka mosu iha ita nia rain, lian servisu fatin la iha,emar servisu la iha áas tebes (desemprego, red), oinsa maka bele kuda fila fali kultura servisu nian ba ita nia emar.

- Plano ekonomika, oinsa maka bele dada invetsimentu ka emar rai liur lori sira nia Osan ba kuda iha ita nia rain, atu nune bele tulun Governo hodi hamenus lian bot sira nebe maka Governo hasoru hanesan: hamenus konflitus sociais iha sociedade, reduz desemprego, harii servisu fatin, hatama osan ba Nasaun.

- Oinsa maka harii sistema Judicial (SJ) nebe nia airin metin, waihira Justisa nia rin metin atu nune bele fo hanesan garantia ba demokrasia no desenvolvimento. SJ nebe laos «obdece» ba poder politika no ekonomika, maibe SJ ba emar hotu. Mos buka desenvolve mos modelo justisa tradicional nebe bele ba hatan konaba konflitu sira nebe ninia dimensaun kiik hanesan: waihira Fahi ba tama han batar, letigio nebe maka envolve batar nain ho fahe nain labele lori ba ba Tribunal buka resolve liu husi Justisa tradicional, bolu lian nain sira mai tesi hodi fo sala ba ida ne´e. Sistema nebe maka huri rai moris kedan ita nia bei ala sira uja hanesan modelo regulamento ba sira nia moris.

- Edukasaun, Governo iha tinan lima (5) mai ne´e buka oinsa maka:hamenus analfabetu iha ita rain, oinsa maka hasae kualidade hanorin husi eskola hun (base, red) to´o ba Universidade. Edukasaun nebe ho vokasaun ba valorizasaun ba ita nia emar, oinsa maka liu husi edukasaun bele kontribui ba desenvolvimentu nebe sustentavel ba aban bai rua.

- Saúde ka kesehatan, estado buka oinsa maka iha tinan lima ka sanulu, iha mediku ida ba emar rihun ida, familia sira bele iha mediku familia. Buka mos valorizasaun ba medicina tradicional, estado buka investe ka kuda mos osan ruma hodi desenvolve iha sektor ida ne´e hanesan komplementar ba medicina moderna.

- Politika rai liur (Política externa, red), oinsa maka bele defini nia an hodi estabelece relasaun ho rai seluk iha mundo rai klaran iha kontextu regional no mundial. Timor LoroSae nudar rai no emar Asia buka hakbesik an ba klibur hanesan ASEAN. Timor LoroSae buka hakbesik ba rai sira nebe maka koalia lian Portugues (CPLP) ka rai sira nebe koalia Lian Inglês,hare ba ninia vantagem no desvantagem. Tamba Politika rai liur ne´e hodi hatutan deit politika sira iha rai laran.

- Politika konaba Komunidade Timor nian iha rai liur. Timor oan mos barak hela iha liur, hela iha liur tamba deit razaun oi-oin, balun politik, balun ekonomika, no sst. Maibe sira hotu mesak Timor oan. Timor oan iha Europa (Portugal, Inglaterra, Irlanda, Holanda,no europa seluk), Timor oan iha Asia (Macau, Indonesia, no rai seluk), Timor oan iha Australia, Timor oan iha Estado Unidos Amerika. Ne´e capitla importancia ba estado no nasaun Timor LoroSae, neduni buka iha programa no orientasaun politika oinsa incorpora Timor oan hotu iha programa ba desenvolvimentu Timor LoroSae nian. Timor sira iha liur, sira balun bele ba kuda sira nia Osan iha Timor, fo tulun ba estado, tulun ba familia no tulun mos hamenus desepemprego. Timor oan sira nebe maka buka matenek, sira bele ba fo tulun liu husi sira nia matenek nebe hetan husi rai seluk, rai nebe maka hakarak lao ba oin buka haknauk husi emar seluk nia matenek. Timor oan sira nebe maka hela iha rai liur, sira mos sai hanesan hatutan no tatolin rai Timor LoroSae ninia «Valores Kulturais» ba emar seluk. Neduni estado mos buka investe iha politika ba komunidade Timor oan iha liur.

- Politika konaba media, Governo buka mos iha preokupasaun konaba media, laos atu kontrala media ka pers maibe buka fo tulun material, harii estrutura ba suporta. Estado ka Governo buka hatene katak mediak ka pers hanesan «parcerio» ba estado,laos hanesan Governo Mari Alkatiri nebe konsidere media ka pers hanesan «inimigo».

Governo AMP oinsa maka sai hanesan Naroman ba Timor LoroSae (Leste)? AMP nebe tau hamutuk partido hat (4): CNRT, PD, PSD i ASDT. Buka tau hamutuk partido ida-idak ninia porgramas no manifesto eleitoral, buka mos loke na ba programas no proposta husi grupos independentes, sociedade Timor oan, tamba Governo laos ba partido maibe ba Nasaun, buat Nasaun buka loke diskusaun ka haksesuk malu ho Timor oan hotu, liu husi promove dialog ho partido politika Oposisaun, Sociedade Civil (SC). Laos banati tuir fali Governo Fretilin/ Mari Alkatiri, nebe monopoli ba razaun, buat hotu partido Fretilin nian, nuat nebe maka laos Fretilin ne sala hotu no tau ba lixo. AMP buka sai hanesan bibi atan diak nebe hatudu dalan diak no naroman ba rai Timor LoroSae (Leste)!

Lisboa,07-08-2008

António Ramos Naikoli