PR bolu AMP harii IV Konstitucional

Dili, Forum-Haksesuk (FH). Prezidente Republika (PR), José Ramos Horta (JRH), ohin tuku tolu tempo Timor LoroSae (TTL) sei hatou lian tatoli ba Emar Timor oan tomak konaba "IV Governo Konstitucional", nebe tuir fonte FH iha Dili katak sei bolu AMP.

Tamba PR, halao tuir Konstituisaun RDTL nian nebe tuir artigo 106 bolu partido nebe manan eleisaun iha loron (30/06) maka Fretilin ka AMP. Tamba Fretilin manan ho maioria simples neduni labele garante ba estabilidade governativa tamba la hetan maioria parlamentar. Neduni hili AMP nebe tau hamutuk kadeira Partido sira nebe maka halibur hamutuk iha AMP hamutuk kadeira 37 nebe koresponde ba maioria iha Parlamento. AMP bele governo ho suporta husi Maioria parlamento, teste nebe maka AMP hatudu liu husi hili Prezidente Parlamento Nasional (PN) iha loron (30/07), Fernando Lasama, Prezidente Partido Demokratiku (PD) nebe manan ho votus 41 (37 AMP + 3 PUN + 1 UNDERTIM) kontra Aniceto Guterres husi Fretilin 24 (21 Fretilin + 2 KOTA/PPT + 1 UNDERTIM).

PR iha ninia dada lia ho Jornalista Adelino Gomes iha Jornal Público (edisaun 26/07) katak "nia sei ba halo tuir Konstituisaun RDTL (in Publico,26/07)". Iha biban seluk, "PR dehan fila fila katak cenariu eleisaun anticipada odamatan la nakloke".

Neduni PR bolu AMP maka harii Governo no hili PM foun ba periudo (2007/12). Tuir AMP iha surumutuk nebe halo iha semana kotuk katak sei hili Xanana Gusmao maka sai nudar PM foun no Vices PM nain rua (2), ida maka Mario Carrascalao (PSD) ba kaer areas hanesan: Administrasaun i social no vice ida ba kaer area ekonomika no financeira, vice ida ne bele fo ba ekonomista sira nebe husi koligasaun AMP nian!