VISAO MISAO OBJECTIVO HAKSESUK BOLA FH KKN HOME FH LPV ARTIGOS FH MUZIKA LIA MENON FH RESPONDE

20080613

FORUM-HAKSESUK: HAMENO

FORUM-HAKSESUK: Lia Menon Husi Forum-Haksesuk kona ba Estado atu Suporta Kareta ba Deputados nen nulu resin lima (65).

Ami husi klibur Fórum-Haksesuk preokupadu tebes ho kontroversia desizaun politika iha Parlamento Nasional nudar Fukun ba Demokrasia no Justisa Sosial iha Nasaun RDTL. Ami nian preokupasaun karik hanesan mos sidadaun selu-seluk nian preokupasaun, kona ba estado atu suporta kada deputado iha PN ho kareta ida, ho razaun katak atu fasilita deputados sira halo sira nian knaar fiskalizador. Ho razaun mos katak deputados sira bele hala’o sira nian funsaun nudar fiskalizador ho efisien no efektivo durante sira nian mandatu nudar deputado.

Ami nian duvidas nebe lejitimamente hakarak hato’o mak nee :

1. Será ke ho apoio nebee estado fo ba deputados 65 atu hala’o sira nian funsaun nudar fiskalizador bele muda difikuldade ruma nebee ejiste iha área hotu-hotu nebee afeta Povo nian moris?
2. Situasaun bele muda signifikativa nebe koresponde ho investimento iha kareta nee?

3. Karik deputado ida la sai tan deputado iha PN iha mandatu tuir mai, kareta nee sei hela nafatin iha deputado nee nian liman ka estado dada hikas kareta nee?

4. Osan hira mak estado sei gasta ba kareta 65 iha tinan ida ka iha mandatu ida ba manutensaun, ba kombustivel, ba seguro?

5. Se mak responsável ba kareta bainhira kareta nee hetan dezastre ka asidente mortal ruma ka kareta at hodi hatan iha justisa?

6. Será ke ho investimentu (gastus) nebee estado halo ba deputados sira nudar fiskalizador bele kontrola ka neutraliza hodi halakon korupsaun, nepotismu no konivensia iha Nasaun Timor-Leste?

7. Se karik buat ruma la muda k ala iha ekilibiru entre investimentu nebee estado halo ho rezultado nebee hetan bainhira mandatu remata, PN nian responsabilidade ba Povo Timor oin sa kona ba investimentu iha kareta ba deputados sira?

8. Se mak kontrola deputados sira bainhira uza kareta estado nian, ba interesse Povo nian ka ba interesse partikular no kontrola oin sa?

Perguntas walu (8) iha leten nee hanesan duvida boot nebee ami iha hodi husu ba na’i ulun sira atu tetu hodi esklarese, la’os deit mai ami maibe liu-liu ba Povo nebee deputados sira reprezenta iha Uma Fukun.

Tanba husi ami nian haree katak sei la iha rezultadu ruma nebe konkretu haree husi efetividade, efisiensia husi estado nian suporta kareta 65 ba deputados hotu iha PN atu hala’o sira nian funsaun nudar fiskalizador, no mos sei la efikaz atu kombate problemas boot barak nebee Rain no Estado RDTL hasoru iha prezente no mos iha médio prazu. Basa, ami prevê katak kuaze imposivel kada deputado ida hala’o nian funsaun ka hala’o fiskalizasaun ho frekuensia nebee boot durante nian mandatu tomak. Enkuantu deputadus sira iha PN representa eleitores sira, atu koalia netik Povo eleitores sira, atu tulun Povo sira nebee deputados sira reprezenta, atu rezolve Povo eleitores sira nian problemas, maibe iha realidade karik dever deputados sira nian nee apenas iha surat tahan deit. Ida nee hanesan funsaun bazilar husi deputados sira, alem de nudar membros orgaun lejislador no fiskalizador.

Se atu hala’o deit funsaun fiskalizador ba ezekutivo, tuir ami nian hanoin deputados sira na’in 65 sei la ba hotu terreno loron-loron ka semana-semana ka fulan-fulan, nem desloka loron-loron ba ministerio hodi kontrola governo nian aktividades. Nunee, tuir ami nian haree katak durante mandatu tomak deputado ida susar tebes atu hala’o ninian dever nudar fiskalizador ka halo tuir nian kompromisu ho eleitores sira, katak atu rezolve sira nian problemas ho 70 ka 100%, hodi bele hetan balansu nebee pozitivu entre investimentu (uza kareta estado/povo nian) ho hala’o funsaun fiskalizador.

Husi ami nian haree mos katak deputado ida halo deslokasaun ba iha Povo eleitores nian leet atu rona Povo hodi fo solusaun ba sira nian problemas maximu nebee bele halo karik la liu dala 10 iha sira nian mandatu tomak. Mesmo kada deputado ida bele hala’o nian funsaun nudar fiskalizador ba distritu ka sub-distritu ka aldeias hodi fiskaliza implementasaun programas husi governo nian iha fatin hirak nee, maibe susar tebes atu hetan balansu nebee ekilibriu entre hala’o fiskalizasaun ho investimentu nebee estadu halo ba deputados sira. Razaun seluk nebe halo ami to’o konkluzaun ida nunee mos katak imposivel deputados 65 nee uza kareta nee ba halo fisaklizasaun ho distansia nebee naruk (distrito, sub-distrito no aldeia) loron-loron ka semana-semana ka fulan-fulan. Karik metade deit husi deputados 65 nebee hetan apoio kareta mos la halo deslokasaun ba aldeias ho frekuensia nebee razoavel atu atinji efisiensia, efetivu no efikaz.

Halo kontas kona ba despeza nebee estado sei halo ba sosa kareta ba deputados 65 :

Kareta ida kusta p.e. US$30.000,00
Manutensaun mensal kada kareta US$ 1.000,00 (media)
Kombustivel US$ 600,00 (media)/fulan
Despesa seluk US$ 150,00/fulan

Rezultado :
US$ 30.000,00 x 65 = US$ 1.950.000,00
US$ 1.000,00 x 65 = US$ 65.000,00
US$ 600,00 x 65 = US$ 39.000,00
+ US$ 150,00 x 65 = US$ 9.750,00
______________________________
Total despeza mensal inisial = US$ 113.751.95,00

Despesa manutensaun anual = US$ 65.000,00 x 12 = US$ 780.000,00
Despesa kombustivel anual = US$ 39.000,00 x 12 = US$ 468.000,00
Despesa anual seluk = US$ 9.750,00 x 12 = US$ 117.000,00
____________________________________________________
Total despesa anual = US$ 1.365.000,00

Total husi despesa nebe estado sei halo :
(despesa inisial) = US$ 1.950.000,00

(despesa anual) = US$ 1.365.000,00
____________________________
Total = US$ 3.315.000,00

Deputados sira folin aas demais !

Estado RDTL mos sei suporta deputados sira ho Pensaun Vitalisia depois de deputados sira goza durante aktivu nudar deputados sei goza mos iha tempo nebee la sai ona deputados.

Hare Lei ba Pensaun Vitalisia haktuir iha Lei Nº 1 / 2006, Pensão Mensal Vitalícia artigo 1º alinea 1; Artigo 4º, alinea a,b,c,d, no e kona ba Regalias seluk nebee mos ex-deputados sira atu hetan.

...enfim, Estado RDTL bele gasta sasan barak demais ba klase sosial ida deit iha Timor-Leste...?

Sujestaun:

Em vez de estado hasai osan ba deputados sira atu sosa kareta, sura tuir ema nian ulun, nusa la sura tuir komisaun A, B, C, D, E etc., hodi koresponde grupo de trabalho komisaun ida-idak tuir ninian ramo ba intervensaun nudar orgaun fiskalizador etc. hodi nunee bele halakon mos diskriminasaun proporsional tuir reprezentatividade iha PN.

Bele mos distribui kareta tuir bankadas parlamentares, maibe em termus kuantitativus iha distribuisaun nebe la ekilibriu bainhira hare husi proporsionalidade reprezentativa.

Tanba, tuir ami nian hanoin PN bele kria presedente nebe aat, hamosu rai kuak nebe luan hodi fahe entre klase elite ho Povo terus na’in sira, hamosu desigualdade sosial nebee boot, hamosu injustisa sosial, hamosu laran moras (kecemburuan) sosial, hamosu deskonfiansa Povo ba nian representantes sira, klase politikus sira bele lakon fiar husi Povo, hamosu diskriminasaun iha estatutu sosial, enfim, hamosu buat aat oi-oin deit do ke plano ida ho nian vantajem estratejika nebee boot ba desenvolvimento fisiku no moral Ema Timor hodi liberta Povo Timor husi susar no terus no mos atrazadu.

Tanba sa la halo investimento nebee bele resolve problemas estruturante nebee ejiste iha PN, hanesan formasaun hodi hasa’e profisionalizasaun no hasa'e rendimento husi representantes sira iha hala'o sira nian knaar nudar deputados?

Portugal, 12 Junho 2008
António Ramos Naikoli
Arlindo FAF
Felix de Jesus
Victor Tavares

Sem comentários:

Enviar um comentário

Nota: só um membro deste blogue pode publicar um comentário.