Deputadu nebe laos deputado diak

(os deputados que não são bons deputados)

Celso Oliveira*

I

Notisia STL, loron 5 fulan Junhu hakerek nune: Lei Tributaria Pasa, Vensimentu US$ 500 Mai Karaik Livre Impostu

DILI – Parlamentu Nasional (PN), liu husi sesaun plenaria, Kuarta (4/6), aprova ona lei tributaria ho rezultadu votasaun 31 afavor, 14 kontra no 4 abstensaun. Lei nebee hatoo husi governu nee pasa hafion halo debate konstrutivu durante semana ida nia laran.

"Husi proposta nebee mak hatama husi governu la iha alterasaun signifikante. Iha deit alterasaun ba iha klasifikasaun de taxa ba kareta luxu. Montante artigu 10 ho anexu I, nebee nia definisaun konaba kareta luxu ho folin $ 20.000 altera ba $ 70.000, hafoin deputadu sira halo analiza no komparasaun ba atual. Tanba situasaun agora kareta segundu maun mos bele hetan folin too $ 20.000".

"Hafoin votasaun xefi bankada Fretilin, Aniceto Guterres nebee vota kontra lei nee hatete, lei nee sei kria deit mafiozu barak iha nasaun nee. Tanba, sei lai ha benefisia boot mak povu hetan, maibe atu fo han deit ba emprezariu sira husi rai liur". STL, 5/6.

Hare hosi titulo, (vensimentus US$ 500 mai kraik livre impostu), halo ita kontenti tamba lei tributaria ida ne'e sei favorese ema kiik i kiak, alias "kelas bawah" sira, por exemplo: professores, i, seluk-seluk tan. Maibe, konaba proposta atu uza kareta luxo ho folin 70.000 dollar US maka selu taxa, presija halo komentariu.

Parlamentu Nasional aprova tiha ona lei tributaria nebe governu haruka, iha 4/6 liu ba, maibe, konaba taxa hosi kareta luxu nebe hetan alterasaun, sei favorese liu grupu ou ema balun i sei prejudika grupu ou ema seluk.

Se karik ohin loron ema hotu-hotu bele sosa ona kareta ho folin 70.000 dollar USA, entaun, ita lalika koalia tan ona konaba desempregu, miseria, i, injustisa iha Timor Leste. Tamba osan nia valor (70.000 dollar USA) signifika rai riku, ema mos riku. Iha Timor Leste, aktualmente, se maka bele sosa kareta luxu ho folin 70.000 dollar USA, so empresariu bo'ot i ministru ou deputado balun deit. Maibe, se karik, iha realidadi nia laran maka ministrus, deputadus i empresarius (bo'ot ou kiik), hotu-hotu, sosa i uza kareta luxo ho folin 70.000 dollar USA, entaun iha nasaun nia laran laiha ona ema kiak maibe hotu-hotu mesak ema riku, alias "kelas atas".

Kareta luxu ho folin 70.000 dollar USA maka selu taxa, signifika katak, ema riku maka iha konsiensia nasional i responsabilidadi hodi selu taxa ba Estado, enkuantu ema kiik i kiak hatene uza deit. Se hanesan ne'e bei-beik, loron ida ita hotu sei kanta knananuk "governo meu, vou subir. Governo teu, sobes tu."

Lei tributaria sei kria justisa sosial iha Timor Leste, depende iha ninia implementasaun. Se karik la aplika didiak iha pratika nia laran, lei tributaria sei loke espasu bo'ot entre ema nebe riku, sei riku liu tan, i, ema nebe kiak sei sai kiak liu tan.

II

Uluk, iha avo sira nia tempu , kuandu to'o ona loron halo exame/testing/ujian, alunos sira komesa ba reza iha igreja ou sunu lilin ba matebian sira hodi husu tulun. Iha tempu neba, ita hanoin katak, hahalok hanesan ne'e maka sei halo ita sai "ema matenek". Iha tempu avo sira nian, ita hanoin nune: "lalika estuda maibe reza ou sunu deit lilin ba matebian sira halo ita sai matenek ona ou "lulus" iha exame". Hahalok ne'e sai hanesan toman ida ba ema Timor. Talves, importanti atu ita muda hahalok hanesan ne'e, alias- lori estuda ou vontade atu buka hatene, por exemplo le, vizita biblioteka, seluk-seluk tan, maka sei halo ita sai matenek. Badak lia fuan, laos lori deit reza ou sunu deit lilin ba matebian sira maka halo ita sai matenek.

Aktualmente, mosu demonstrasaun hosi estudanti universitariu kontra planu presidenti PN, Fernando de Araujo Lasama, atu sosa kareta luxu ba deputadu 65. Ideia atu sosa kareta luxu ba deputadu ida-ida, bele konsidera hanesan ideia ida diak tamba ho objectivu atu fasilita knar deputadu sira nian. Maibe, tuir hau nia hanoin, ideia ne'e la koresponde ho realidadi aktual. Ohin loron, ema Timor sei moris iha kondisaun kiak (laos fraku maibe kiak). Tuir imprensa hateten katak iha Timor, loron ida ema ida moris ho dollar ida. Ne'e duni, se karik deputadu sira senti katak sosa kareta luxu hodi fasilita knar sira nian hanesan direitu deputadu sira nian, entaun, povo mos iha direitu atu ejiji katak ema ida tenki iha uma ida ou ai-han labele falta ba povo hanesan direitu fundamental ba povo nia moris. Tamba, se karik direitu politiku hanesan fundamental, entaun direitu atu hetan ai-han no hela fatin (uma/tempat tinggal), fundamentu liu tan.

Bele dehan katak legal ou lejitima demonstrasaun nebe estudanti universitariu sira halo dau-daun hodi kontra politika presidenti PN, Fernando Lasama. Importanti maka demonstrasaun ne'e labele hetan influensia politika hosi partidu opozisaun sira seluk. I, deputadus sira tenki koriji-an hodi halo alterasaun konaba proposta atu sosa kareta luxu ba deputadu ida-ida. Tamba proposta ne'e "importanti maibe laos emerjensia". Emerjensia sim, kuandu koalia konaba atu hadia povo nia moris.

Bispo Carlos Filipe Ximenes Belo, hakerek artigu diak ida iha Forum Haksesuk (FH) i STL konaba oinsa evita korupsaun i nepotismu iha Timor Leste. Vitor Tavares, Antonio Ramos Naikoli, Felix de Jesus, i, Arlindo FAF hakerek artigu diak iha Forum Haksesuk konaba problema relasiona ho kareta luxo nebe deputadus sira hakarak sosa. Ema sira ne'e laos specialista konaba politika anti korupsaun, maibe sira representa voz hosi sociedadi civil nebe preokupa ho realidade aktual iha Timor Leste.

Alegasaun konaba "korupsaun i laiha transparensia" maka sai akuzasaun forti hosi partidu opozisaun Fretilin kontra governu AMP. Buat ne'e devia sai hanesan lisaun bo'ot ba governu AMP.

Hau mos la konkorda ho deklarasaun hosi deputada Maria Paixão nebe dehan katak estudanti universitariu sira imaturo, laiha edukasaun tamba hateten a'at deputadus sira. Iha fulan hirak liu ba, ita hotu asisti violensia fizika iha Parlamentu Nasional nia laran entre deputadu Fretilin, David Ximenes, ho deputadu CNRT, Aderitu Hugo da Costa. STL hakerek notisia ida ne'e, i, ema barak senti tristi tebes (balun hamnasa). Parlamentu nasional hanesan fatin ida hodi halo debate sem konfrontus. Iha PN nia laran, akontese tiha ona konfrontus fisiku. Oinsa maka estudanti sira bele hatudu respeitu ba deputadu sira se propriu deputadus sira la respeitu malun i la respeitu lei demokratika iha PN nia laran?

Iha rai demokratiku nia laran, ema hotu-hotu iha direitu fundamental atu expressa sira nia hanoin no hakarak, desde que la estraga seguransa publika i ema nia moris privada.

* Poeta i hakerek nain Timor oan, hela iha England