Deklarasaun Bancada PD

DECLARAÇÃO POLÍTICA BANCADA DEMOCRÁTICO IHA DEBATE BA REAPRECIAÇÃO ORÇAMENTO GERAL DO ESTADO 2019

Excelentíssimo Senhor Presidente do Parlamento Nacional, Vice Presidente sira

Sua Excelência Senhor Primeiro Ministro

Maluk Deputado sira Membros do Governo, no Povo Doben Timor-Leste tomak, mak ami hadomin.

“Kaer Metin Ukun Rasik An, no Harii Nasaun Husi Baze”

Situasaun politika atual halo Timor oan tomak preokupa. Tinan rua ona mak Timor-Leste nafatin moris ho ambiente politika ida nebe preokupante. Governasaun kontinua la-estavel. Relasaun entre orgaun soberanu sira hafalun ho kondisaun oi-oin hodi la kopera ba malu atu hala’o responsabilidade Ukun hodi servi povu. Nune’e Governu kontinua inkompletu tanba PR la hatan atu fo posse ba membrus sira nebe Governu liu hosi PM apresenta; OGE nebe sai nudar instrumentu vital atu halo desenvolvimento ekonomia no desenvolvimento instituisaun no desenvolvimento politika nasaun nian hodi hadia no hasa’e ekonomia nasaun nian hetan veta hosi PR; Projectos estrategikus hanesan Desenvolvimento integradu iha Costa Sul no ZEESM iha RAEO sai fali kestaun de debate maske obra sira ne’e hetan tiha ona nia inisiu ka nia hahu iha governasaun sira kotuk;

 Situasaun politika ida ne’e hamosu ona konsekuensias negativas BOT nebe afeta ona povu kiik nia moris maske Ukun nain la sente no la koko moris, SA IDA MAKA POVO KOKO NO SENTE, ekonomia nasaun nian tun tanba actividade komersiu laiha; actividades importasaun nebe mos fo receita lubun ba estadu hahu menus (deklararaun DG servisus Aduaneirus nian liuba); loja sira nebe fo servisu ba ema HAHU AMEASA TAKA; obras infraestururas sira nebe kria mos empregu ba badaen no trabalhador sira hahu laiha; buat oi oin nebe iha tinan hirak liu ba halo ita sai orgulho nudar nasaun livre e independente lakon; Kultura respeitu malu hahú mihis; prinsipiu unidade no principiu solidariedade ba malu mohu no lakon nia lakon neneik; OGE ida nebe mai hosi Governu atu ezekuta nia programa atu desenvolve ekonomia, fo resposta ba povu nia necessidades hetan tiha VETA hosi Nai PR. 

Sr. Presidente do Parlamento Nacional,

Sr. Primeiro Ministro,

Kolegas Deputadas e deuputados,

Ohin Parlamentu halo fali re-apreciação ba OGE 2019 nebe Nai PR Veta. Bankada Demokratiku iha biban ida ne’e, deklara katak OGE ne instrumentu politiku indispensavel ba Ukun nian. Ho Orsamentu mak Governu bele halao nia knar servi povu hodi hatan ba problemas hotu nebe afeta povu nia moris hanesan, edukasaun, saude, be mos, estrada, electricidade, hadia merkadu atu povu kikk fan sira nia produtu, hamos lixu nebe ita hotu hakribi no kria kondisaun atu servisu sira seluk mos bele lao; BANKADA Demokratiku hanesan mos forsa politika ida nebe hetan konfiansa hosi povu mai tur iha uma fukun Parlamento Nacional ne’e deklara nia pozisaun hodi nafatin fo apoio ba orsamentu ida ne’e no husu Deputadas no Deputadus hotu nia kooperasaun diak hodi ita hamutuk decide hikas OGE ida ne’e hodi fo fali konfiansa ba ita nia povu no hatudu mos ba ita nia lider nacional sira no mos reprezentante Orgaun Soberanu sira ita nia komprimisu komum ba vida nasaun nian no moris sita nia povu nian. ITA hotu decididu katak: LIBERTA ONA PATRIA, HAMUTUK ITA LIBERTA ITA NIA POVU.

SR. PPN!

SR PM MINISTRU

DEPUTADAS NO DEPUTADOS

Nai PR hatudu ona nia preokupasaun ba OGE hodi mos hanoin kona ba sustentabilidade FUNDU MINARAI nudar fundu soberanu Nasaun nian; Nai PR mos preokupa ho sectores chaves sira hanesan Edukasaun, SAUDE, Agrukultura, Turismu nebe hetan osan percentagem kiik;

Preokupasaun Nai PR nian ne importante no los tanba Edukasaun sei iha desafius barak; Labarik sira hahu ona eskola maibe kondisaun infaestruturas barak sei at no falta; Professores sei menus; fasilidades sanitasaun laiha; fasilidades desportativa eskola nian sei falta; Sector Saude sai nafatin preokupasaun laos tanba medikus mak laiha maibe atendimentu publiku mak seidauk diak; aimoruk mak sei nafatin menus; fasilidades hanesan ekipamentus no trasnportes sei kuran; Agrikultura seidauk desenvolve didiak no seidauk orientadu ba merkadu;

Turizmu potensia bot maibe sei TOBA NO HATOBA HELA; Preokupasaun sira ne hotu los! Maibe Bankada PD hanoin katak Governu ida ne’e sei iha hela nia primeiro ano de governasaun. Governu sei iha biban atu decide nia prioridades nacionais iha OGE sira tuir mai. Buat nebe Governu presiza mak husu atu ita fo oportunidade ba nia membrus sira hahu ona sira nia funsaun nune’e sira bele lori dadaun servisu ba povu no rona mos povu nia lian atu hahu haree ba problemas reais sira no buka estratejia lolos hodi hala’o nia aktividades sira.

BANKADA PD hanesan mos uluk, ohin sei nafatin fo nia apoio ba Governu hodi hala’o nia knar. Bankada PD apoia OGE ida ne’e hanesan instrumento ida VITAL tebes, ka importante tebes atu nafatin garante funsionamentu makinas do estadu no halo prestasaun de servisus ba povu e mos promove, dinamiza no desenvolve ekonomia pais nian;

Bankada PD mos husu! Aman Sira nasaun nian tur hamutuk ba, koalia no hanoin hamutuk ba no dehan mai ami Tenki Halo tan saida no ami mos tenki oin sa. Bainhira ami dehan “ami” ami dehan gerasaun sira nebe ohin moris ona iha periudu Ukun Rasik An eh Independensia no hatene Ukun An hosi Istoria maibe karik mos la koko ‘MORUK” eh terus nebe imi Koko hahu kedas hosi imi hakarak atu TL Independente, Imi Luta ba TL atu sai Independente no imi nafatin projecta TL nia Ukun RAsik An Lolos katak NASAUN LIVRE no Nia POVU tenki LIVRE.

Ami laiha Kbit atu hanorin basa Imi nia experiensia sira mak lisaun nebe amo tenki aprende no ami tenki hatutan; Imi nia sakrifisiu mak nafatin fo SASIN los ba ami nia planu ba oin hodi nafatin tane Rai Timor, Tane Herois sira no SERVI POVU, Povu Maubere no povu Asuwain.

Nai Presidente!

Nai PM!

Liu hosi Ita bot nain rua ami tatoli ami nia lian no povu nia lian! Bainhira imi hasoru malu hodi fo hatene ba malu servisu sira nebe halo (entre imi no mos ba Nai PR) hato mos hela ba Nai PR katak Povu nafatin laran metin ba imi, no laran metin ba PR hodi hamutuk hasai sira povu nia terus no sira nia halerik ba buat barak nebe sira wain ba wain buka hela mais seidauk hetan.

Ami Fiar katak hanesan mos Uluk imi bele, ohin no aban imi sei bele liu tan. Se Uluk imi hamutuk ho brani atu liberta Patria, ami fiar metin katak Ohin mos IMI BELE atu hamutuk LIBERTA POVU HOSI KIAK NO MUKIT. Imi nia hamutuk sei hametin TL no hametin povu no sei laiha forsa ida tan EH FORSA LET IDA mak iha kbit atu hafahe imi hosi povu no povu hosi Imi.

Obrigado

Dili, 31 de Janero de 2019

António da Conceição

Presidente Bancada Democrática

--> -->