VISAO MISAO OBJECTIVO HAKSESUK BOLA FH KKN HOME FH LPV ARTIGOS FH MUZIKA LIA MENON FH RESPONDE
 

domingo, 16 de setembro de 2018

Mensájen ba Parlamentu Nasional no ba País hosi Sua Excelência Prezidente Repúblika, Dr. Francisco Guterres Lú Olo



    Diskursu Nai PR iha PN, Díli, 17  Setembru  2018 (Foto Especial)!


Exelentísimu Señor Prezidente Parlamentu Nasional,
Arão Noé de Jesus da Costa Amaral,
Exelentísimu Señor  Primeiru-Ministru,
Taur Matan Ruak,
Señores Deputadus Parlamentu Nasional,
Dignus Magistradus,
Señores Membrus  VIII Governu Konstitusional,
Señores Membrus Korpu Diplomátiku,
Señores Reprezentantes Konfisoens Relijiozas,
 Señoras no Señores,
Buiberes no Mauberes,
Povu Timor-Leste

Ha’ u ko’alia ba maluk timoroan ida-idak, ba maluk hothotu, sidadaun doben hothotu, ba ilustres Reprezentantes Povu nian,  ba Membrus Governu Repúblika Demokrátika Timor-Leste, iha sesaun solene ida ne’e hodi loke sesaun dahuluk ba V Lejislatura Parlamentu Nasionál, ohin, loron 17 setembru 2018. Hanesan mós sesaun solene sira hala’o horiuluk, Parlamentu Nasionál ninia sesaun lejislativa ba dahuluk hahú mós ho mensájen ida husi Prezidente Repúblika.
Tuir artigu 86, alínea d) Konstituisaun Repúblika, Prezidente Repúblika iha kompeténsia atu “hato’o lia-tatoli ba Parlamentu Nasional, ba Nasaun”.
Nune’e, ho laran-haksolok tebtebes mak ha’u simu konvite husi Prezidente Parlamentu Nasionál atu partisipa iha abertura sesaun lejislativa ba tinan parlamentar tuir mai.

Señores Deputadus bele laran-metin katak, ha’u sente honradu tebtebes mai Parlamentu Nasionál hodi ko’alia ba Ita-Boot sira, ba ita-nia Nasaun. Tamba ha’u prezide horiuluk Assembleia Magna ida ne’e, ha’u sente hanesan ha’u mai vizita ha’u-nia família nia uma-ka’in. Relasaun espesiál ida ne’e, hamutuk ho ha’ u-nia kbiit konstitusionál, lori ha’u akompaña, ho laran-ksolok liután, oinsá Parlamentu Nasional hala’o ninia knaar.

Mai ko’alia iha Uma Fukun ida ne’e, sai ona atu simbóliku, polítiku baibain ida, no tama ona iha ita-nia tradisaun institusional,  iha ita-nia relasaun ba malu, nu’udar órgauns soberania. Di’ak tebtebes ba ita-nia demokrasia katak Parlamentu Nasionál foti inisiativa simu Prezidente Repúblika, ho sentidu unidade Estadu, ne’ebé  respeita ita-nia relasaun ba malu, nu’ udar órgauns soberania ne’ebé presiza tulun malu atu hala’o  hamutuk Estadu no interesses nasionais, ho ida-idak ninia kompeténsia rasik.

Nune’e, ha’u hakarak saúda Señores Deputadus tamba simu misaun parlamentár aas tebtebes, misaun ida ne’ebé ezije Ita-Boot sira tenke reprezenta  Povu Timor-Leste, hala’o Parlamentu Nasional ninia knaar lejislativu no fiskalizadór.

Ha’u fiar katak ita-nia relasaun  institusionál ne’e hatuir regras demokrasia nian, tuir ita-nia Konstituisaun haruka. Nune’e,  órgaun soberania ida-idak bele hadi’a-an babeibeik, atu lori benefísiu ba sidadaun sira no dezenvolvimentu ba ita-nia País.
Parlamentu Nasionál hala’o dadaun ninia knaar ho deputadus sira ne’ebé mai husi koligasaun partidu sira ne’ebé manán eleisaun antesipada, iha maiu 2018. Oitavu Governu Konstitusionál mai mós husi eleisaun lejislativa nasionál, livre no demokrátika ida ne’e. Prosesu polítiku tomak ida ne’e no sira ne’ebé halo horiuluk hafoin eleisaun 2017, hodi harii VII Governu Konstitusionál no disolve Parlamentu Nasional, iha Janeiru 2018, hala’o tuir regras demokrátikas no tuir Konstituisaun Repúblika haruka.


Hare’e ba prosesu no eventu polítiku hothotu ne’ebé mosu iha ita-nia rain hosi horiuluk to’o ohinloron, ita bele dehan katak ita hakat dezafiu hothotu no konsege hasees-an husi krize ho impaktu ladi’ak, hanesan ida ne’ebé akontese iha tinan 2006. Ita-nia Povu ninia maturidade, ninia partisipasaun polítika maka’as,  liuliu iha prosesu eleitorál sira, nia vontade atu tanen pás hametin koezaun sosiál, hamutuk ho unidade Estadu nian, atuasaun di’ak husi Forsas Defeza Seguransa, mak garante ambiente hakmatek ba públiku tomak, fó esperansa katak ita bele hakat dezafiu foun hothotu.
Ita presiza hamate impaktu negativu hosi konflitu kiik sira ne’ebé mosu durante eleisaun antesipada, buka-hetan solusaun ba problema sira ne’ebé ita hasoru ohinloron hodi nune’e, hatudu katak ita hothotu foti interese nasionál, interese Estadu aas liu interese restritu partidu ka ema ida-idak nian, bainhira interese sira ne’e tama iha konflitu.
Ha’u hakarak hato’o ha’ u-nia saudasaun ba VIII Konstitusionál tanba Parlamentu Nasional aprova ona ninia Programa. Pasu ida ne’e importante  tamba Programa ne’e fó-sai polítika ne’ebé ukun-nain sira  sei kaer iha tinan lima nia laran.    Programa ne’e mak bele garante estabilidade governativa katak Governu bele ukun to’o mandatu nia rohan!
Hanesan ita-nia maluk timoroan sira seluk, ha’u mós hein katak Programa ida ne’e  la’ os de’ it Deklarasaun Polítika ida, maibé dokumentu programátiku ida ne’ebé sei hala’o duni ba oin, liuhosi lala’ok oioin, sei lori benefísiu ne’ebé hasa’e moris-di’ ak ba família sira, ba komunidade hothotu, iha ita-nia rain doben ida ne’e.
Ho neon nakloken ba ida ne’e, maluk sira bele konta ho ha’u-nia partispasaun nu’ udar Prezidente Repúblika. Ha’u sei hala’o ha’u-nia knaar tuir Konstituisaun haruka, atu ajuda mobiliza, loke sidadaun hothotu nia laran atu simu no tulun programa ida ne’e. Ha’u sei promove no partisipa iha lala’ok  ne’ebé de’it atu garante katak, liuhosi ita hothotu nia esforsu,  povu tomak nia esforsu, ita sei  haburas ita-nia rain no sosiedade tomak ho ekonomia ida ne’ebé buras babeibeik.
Señores Deputadus,
Señores Membrus Governu,
Señoras no Señores.
Iha ha’u-nia mandatu to’o ohinloron, nu’udar Prezidente Repúblika, ha’u sempre foti desizaun polítika atu garante sidadaun sira partisipa iha vida polítika no kaer metin funsionamentu demokrátiku Estadu nian, tuir ita-nia Lei inan, Konstituisaun Repúblika, no lei sira seluk.
Ha’u hakat tuir ita-nia lei sira bainhira kontribui ba harii  VII Governu Konstitusionál, hafoin eleisaun 2017, bainhira ha’u disolve Parlamentu Nasional, bainhira ha’ u marka eleisaun lejislativa, iha 2018, no mós ho formasaun VIII Governu Konstitusionál.
Ho mós dever hatuir loloos deit ita-nia lei sira mak ha’u, nu’udar Prezidente Repúblika, ho kbiit ne’ebé Konstituisaun Repúblika fó,  ha’u nomeia General Taur Matan Ruak, nu’udar Primeiru-Ministru,  indijita husi koligasaun partidus ne’ebé  manán eleisaun lejislativa 2018. Tuir mós Konstituisaun Repúblika, ha’u nomeia no fó posse ba membrus Governu ne’ebé Primeiru-Ministru propoin, hodi nune’e, ha’u garante VIII Governu Konstitusionál harii kedas atu hahú hala’o ninia knaar.

Ho regra hanesan ho mos sentidu Estadu mak ha’u halo diálogu ho laran nakloke ho Primeiru-Ministru, kona-ba nomeasaun no fó posse ba membrus Governu sira seluk. Tuir prosedimentu konstitusionál, Primeiru-Ministru mak propoin membrus Governu. Presidente Repúblika mak nomeia no fó posse.  Tuir  Konstituisaun Repúblika, Primeiru-Ministru de’it mak iha kbiit atu propoin, Prezidente Repúblika de’ it mak bele nomeia no fó posse. Nune’e,  iha prosesu hili membrus Governu,  ita bele haree katak Konstituisaun Repúblika fó dalan ba Prezidente Repúblika, Primeiru-Ministru atu tetu hamutuk kandidatu sira, molok sira kaer sira-nia knaar, nu’ udar membru Governu ba tinan lima.
Husi lista-proposta ho naran hat nulu resin tolu, hato’o husi Primeiru-Ministru,  ha’u nomeia no fó posse ona ba membrus Governu tolu nulu resin rua. Hare’e ba ita-nia relasaun ho responsabilidade institusionál, ha’u la kompreende tambasá mak membru tolu ne’ebé propoin husi Primeiru-Ministru no ha’u nomeia ona, lakoi simu posse!
Ha’u hatete sai fila fali iha ne’e ha’u-nia hanoin, ne’ebé ha’u hato’o ona ba Primeiru-Ministru, iha ami-nia diálogu,  ne’ebé ha’ u halo nafatin ho laran nakloke no moos.  Katak ha’u husu atu tetu/sukat/pondera  didiak kandidatu sira ne’ebé Primeiru-Ministru  propoin maibé ha’u seidauk nomeia.   
Tuir ita-nia Konstituisaun, la iha ema ida mak bele interfere, halo presaun ka ezije  ba titulár ne’ebé de’it husi órgaun soberania sira kona-ba sira-nia kbiit konstitusionál. Importante ba hothotu, maibé hothotu duni, atu kompreende momoos, liuliu líderes husi partidu polítiku sira, Deputadus, Membrus Governu katak, sidadaun hothotu, tenke respeita liberdade ne’ebé Konstituisaun fó ba Prezidente Repúblika atu foti desizaun polítika kona-ba nomeasaun membrus Governu ne’ebé propoin husi Primeiru-Ministru. Prezidente Repúblika foti desizaun hafoin sukat klean, hatene loloos ona katak sei proteje interese nasional no Estadu nian, tuir lei haruka. Interese pesoál ka polítiku-partidáriu la tama iha ha’u-nia desisaun, nu’udar Prezidente Repúblika, atu nomeia ka la nomeia membrus Governu propoin husi Primeiru-Ministru.

Ha’u fiar katak, liuhosi diálogu entre Prezidente Repúblika no Primeiru-Ministru, ne’ebé hala’o iha ambiente polítiku ida ne’ebé ami nain rua hare’e hamutuk oinsá serve di’ak liu ita-nia Povu no Nasaun, tuir órgaun soberania, titulár ida-idak ninia kompeténsia, ami nain rua bele hetan kandidatu seluk ne’ebé ha’u bele nomeia no fó posse atu kompleta VIII Governu Konstitusional. Prosedimentu ida ne’e la sees husi ita-nia Konstituisaun no lei sira seluk.
Hare’e ba ha’u-nia kbiit konstituisionál, ha’ u halo buat hothotu atu  diálogu ne’e iha susesu, la’ós de’it ba ohinloron maibé ba períodu mandatu tomak Governu ida ne’e nian.
Ita labele haluha katak Governu tomak, ne’ebé xefia husi Primeiru-Ministru, tenke  hatán ba Parlamentu Nasionál, tenke  hatán mós ba Prezidente Repúblika. Tamba Governu tenke hatán ba Prezidente Repúblika, ha’u sei tau aas ha’u-nia relasionamentu ho Primeiru-Ministru,  nu’udar Xefe Governu. Tamba ne’e, mak semana-semana, ami nain rua hetan malu hodi haburas relasaun institusionál, liuhosi diálogu, oin ba oin, ami nain rua de’it, iha Palásiu Prezidensiál Nicolau Lobato.

Tamba ha’u mai ko’alia ho Señores Deputadus, ha’u hakarak refere mós kona-ba ema sira ne’ebé uza komunikasaun sosiál, meiu eletróniku sira hodi hatete at no foti lia-bosok hasoru Prezidente Repúblika, la hatudu respeitu ba lia-loos no ba órgaun soberania no ninia titulár sira!

Nune’e, ha’u apela ba Deputadus, ba Governu atu propoin no aprova lejislasaun ruma ne’ebé bele proteje liután órgauns soberania no sira-nia titular sira, inklui Prezidente Repúblika. Importante kriminaliza difamasaun, kalúnia, boatu no  hadi’a mós prosedimentu sira kona-ba imunidade Deputadus no membrus Governu nian. Ita presiza tau atensaun liután ba deklarasaun no atualizasaun ba rendimentus no konsidera mós  obrigasaun ida husi titular sira, membrus órgauns soberania ho sira seluk tan ne’ebé kaer kargu polítiku, atu hato’o  informasaun ba sidadaun sira.

Señores Deputadus,
Señores Membrus  Governu.

Ha’u konsidera no respeita tebtebes kompeténsias órgauns Estadu nian ho titulár sira-nia knaar. Xefia Governu nian no orientasaun ba membrus Governu, oinsá kaer, hala’o polítika públika sira ne’e, tama iha knaar Primeiru-Ministru nian.

Prezidente Repúblika akompaña lala’ok instituisaun públika sira-nian, haree   polítika públika la’o ka lae,  atu garante funsionamentu demokrátiku instituisaun sira-nian, tuir Konstituisaun haruka.

Iha kontextu ida ne’e no mos, atu hala’o duni responsabilidade institusionál Governu nian ho Prezidente Repúblika maka, ha’u sei tau aas ha’u-nia relasionamentu ho Primeiru-Ministru  no, liuhosi Primeiru-Ministru, ha’u sei hetan relasaun ho área proritária sira ne’ebé Prezidente Repúblika bele kontribui ba unidade Estadu nian, funsionamentu di’ak instituisaun sira-nian no lori servisus públikus ba sidadaun sira.
Ita hothotu presiza fó atensaun loloos ba objetivu sanulu ne’ebé tama iha artigu 6 Konstituisaun Repúblika, haree klean oinsá ita hetan ita-nia hakarak sira ne’e. Estadu iha Planu Estratéjiku Dezenvolvimentu 2011-2030 nu’udar instrumentu programátiku ida atu hetan ita-nia hakarak iha prazu badak, médiu no naruk. Ita tenke uza orsamentu ne’ebé ita hetan tinan-tinan atu hala’o lala’ ok sira, tuir Planu Estratéjiku no Konstituisaun haruka.  
Maibé ita-nia instrumentu planeamentu sira ne’e serve duni atu hetan buat ne’ebé ita hakarak nu’udar Povu, nu’ udar Estadu? Ohinloron ita luta ba dezenvolvimentu ba progresu ekonómiku no sosiál no ida ne’e signifika katak ita tenke kontinua harii no hametin sosiedade no instituisaun demokrátika sira.
Ita luta ohinloron atu hamate kiak, hamalaha, han-hemu ladi’ak, analfabetismu, la tama ka husik eskola, moras endémiku no infektu-kontajiozu, inan no oan-kosok mate, no problema sira seluk ne’ebé sátan moris-di’ak ba sidadaun sira no ba família timorense sira.


Demokrasia ne’ebé ita harii dadaun ne’e fó dalan ba ita atu fó-sai no haburas ita -nia povu ninia kultura no vontade polítika, haklean ita-nia identidade nasionál liuhosi esforsu atu haforsa ita-nia Kultura no ita-nia Estadu soberanu no independente. Maibé atu ita-nia Estadu  serve duni  Povu, sidadaun sira mós tenke partisipa iha vida demokrátika  no hothotu tenke hetan benefisius ekonómikus no sosiais atu hadi’a sira-nia kondisaun moris diak.
Loos duni katak poder polítiku mai hosi eleisaun livre, justa no demokrátika, hala’o iha ambiente dame no hakmatek, hatuur tuir lei sira. Prezidente Repúblika, Parlamentu Nasional no Governu hatuur  tuir rezultadu eleisaun ho regras no prinsípius temi iha leten. Maibé la’ ós importante iha de’ it bandeira nasional rasik!

Ita presiza hakaat ba oin liután, hanorin ita-nia an katak prinsípius Soberania Povu nian, Direitu nian no Demokrasia nian, tenke hatudu liuhosi partisipasaun sidadaun sira-nian iha nível hothotu Estadu no Sosiedade nian, ho rezultadu di’ak, ba progresu  ekonómiku no sosiál. Ba ida ne’e, órgauns Estadu eleitus, liuliu órgauns soberania, en-jerál, presiza haburas sira-nia kapasidade no hala’o polítikas públikas, no lala’ok sira ne’ebé fó benefísiu duni ba sidadaun sira, proteje rai no ambiente naturál, atu fó nafatin kondisaun di’ak ba ita-nia moris.
Ita-nia demokrasia haklean babeibeik ho valor istóriku sira ne’ebé ita simu husi ita-nia beiala sira no ita hatutan hamutuk ho valór, métodu no téknika moderna sira,  tamba, bainhira ita hatene tau hamutuk buat hothotu ho nia impaktu di’ak, ita bele  hetan progresu sosiál, liuhosi servisu badinas no produtivu, poupansa, kualidade produtus no servisus nian no rentabilidade ekonómika.
Sidadaun ida-idak, traballadór ida-idak, prestadór servisus ida-idak, komunidade ida-idak, aldeia, suku, vila, sidade, servisu públiku ida-idak no empreza ka sosiedade komersiál, iha dever atu habelar sidadania, katak, nu’udar sidadaun, nia tenke hala’o di’ak liután ninia knaar, sai produtivu liután, kompetitivu liután no hatene dada liután interese merkadu nian.  

Deputadus no Membrus Governu iha devér polítiku atu sai ezemplu di’ak  ba sidadaun sira no  atu mobiliza sidadaun hothotu atu hakaas-an hodi ajuda Estadu hetan objetivus. Ida ne’e mak sidadaun sira hein husi  maluk sira ne’ebé eleitu ka nomeadu ba kargu sira temi iha leten. Ita labele haluha katak sidadaun sempre hein no  husu atu hadi’a sira-nia kondisaun moris, bainhira sira hetan oportunidade atu ko’alia ho ukun-nain sira no ho titulares kargus politikus nian, liuliu ho sira ne’ebé foin eleitu.

Ha’ u haree momoos katak ida ne’e mak povu hein husi maluk sira ne’ebé eleitu husi povu, katak deputadu sira, no mós husi sira ne’ebé  maluk eleitu sira hili atu kaer kargus nomeasaun, katak membrus Governu.
Povu hein ida ne’e tamba nia hametin-an  ho esperiénsia kotuk nakonu ho terus no valor sira ne’ebé nia aprende husi prosesu libertasaun nasionál no, ikus mai, husi prosesu harii no hametin Nasaun Timor-Leste.
Valor sira ne’e mak haforsa esperansa povu nian, hanesan estabilidade, valoriza loloos esforsu sidadaun ida-idak nian, partisipasaun polítika, solidariedade sosiál, justisa, integridade no transparénsia, sustentatibilidade no diversidade ba dezenvolvimentu nasionál, moris-di’ak sosiál no unidade Nasaun no Estadu. Valór sira ne’e mak haforsa ita-nia sidadaun sira atu luta loron-loron hodi hadi’a liután sira-nia kondisaun moris.

Ita-nia demokrasia ninia kualidade depende hosi valor sira ne’e no hosi oinsá ita moris ho valór sira ne’e, loronloron.
Oinsá maioria parlamentar no opozisaun  sira vota iha Parlamentu Nasional iha valór polítiku jeral ho nia impaktu iha edukasaun polítika sidadaun sira-nian. Ita labele haluha ida ne’e. Nune’e,  ida-idak tenke hanoin klean uluk, sá desizaun mak di’ak liu, bainhira tenke vota. Uza kbiit votu nian, ho di’ak, ezije votante atu hatene rekoñese méritu proposta nian,  liuhosi debate klean ida, tuir prosedimentu sira ne’ebé tama iha rejimentu. Liuhosi votu, mak ita hala’ o polítika ne’ebé ita hakarak maibé ita labele sees-an husi étika no legalidade Estadu nian. Kona-ba interdependénsia, katak relasaun  institusionál entre órgauns Estadu nian, bainhira órgaun ida uza ninia kbiit, liuhosi votu, ninia desizaun  tenke  haree liuliu ba kooperasaun, oinsá tulun malu, ba ida-idak ninia kbiit konstitusionál, atu garante funsionamentu di’ak instituisaun sira-nian no hasa’e prestíjiu Estadu nian ba ita-nia povu no ba komunidade internasionál. 
Iha ámbitu relasaun institusionál, la iha órgaun Estadu ida, la iha titulár ida hosi órgaun Estadu nian,  ne’ebé servisu atu buka de’ it hetan buat ruma husi  lala’ok órgaun ka  titulár sira seluk, maibé, tenke servisu atu hasa’e kooperasaun tuir kompeténsia konstitusionál rasik, atu serve de’ it intereses aas Estadu no Nasaun nian.
Biar desizaun tenke foti, liuhosi votu, ita labele hasees-an hosi diálogu, dalan di’ak ida atu buka-hetan konsensu hodi hili opsaun di’ak liu, ida ne’ebé garante unidade, hasa’e motivasaun no kapasidade atu hala’o polítikas no programas Estadu nian.

Señores Deputadus,
Señores Membrus  Governu,
Señoras no Señores.

Iha prosesu harii Estadu no Nasaun, Timor-Leste hili ekonomia nakloke ba merkadu ho intervensaun husi Estadu. Maibé ita presiza hahú hanoin klean se opsaun ida ne’e fó ka lae servisu di’ak ida ba ita-nia sosiedade ho kondisaun no karaterístika ne’ebe ita iha ohinloron.
Ha’u hanoin katak importante haree klean kona-ba saída mak Estadu tenke halo no sá relasaun mak tenke iha ho ekonomia  liuliu, ho merkadu.

 Estadu ida ne’ebe depende de’it ba rekursu ida, minarai no gás, ne’ebé loron ruma sei hotu, ne’ebé uza rekursu ne’e no halo sidadaun  no sosiedade sira sai dependente hosi rikusoin ida ne’e, tuir ha’u-nia hanoin, Estadu ne’e latuir polítika dezenvolvimentu sustentável. Ita-nia sosiedade rasik, ohinloron, hatoman-an dadaun ona atu simu  de’it  benefísiu no simu liután, ohin kedas, husi rikusoin ne’e,  biar dalan ida ne’e ladi’ak ba ita-nia futuru.
Estadu no sosiedade gasta no uza kedas, la hala’o investimentus produtivus, la hamosu rikeza ohinloron,  atu ita bele sustenta-an, ho dignidade, iha tempu tuir mai kedas.

Ita hothotu hatene katak ita harii ita-nia futuru husi lala’ok sira ne’ebé ita hala’ o ohinloron.
Ita tenke haree ba ita-nia an, nu’udar sidadaun ho responsabilidade istórika, atu luta ba kaer metin no haburas babeibeik Estadu no Sosiedade timorense.     
Ita haree momoos hela katak ita-nia Estadu tenke hala’o nafatin knaar importante ba  ita-nia ekonomia. Estadu Timor -Leste presiza garante nafatin bens no servisus públikus ba sidadaun sira, ba empreza sira no presiza  hatama rekursus husu Fundu Minarai iha ita-nia ekonomia. Presiza  harii mós kondisaun sira ne’ebé fó fatin ba haburas ekonomia diversifikada no sustentável, katak mai husi rekursu oioin no ita bele uza babeibeik, atu bele kore-an husi ekonomia ida ne’ebé depende de’it husi minarai no gás.

Kona-ba ba Kontas Nasionais, ha’u nota katak, hosi soren ida, ritmu  kreximentu ekonomia nasional parese iha relasaun maka’as ho volume despezas públikas, liuliu ho orsamentu ne’ebé ita konsegue ezekuta no, hosi soren seluk, sektór privadu formal sei fraku tebtebes no emprega  ema, ho idade servisu, la to’o désimu ida hosi populasaun total, katak, fó servisu de’it ba ema rihun neen nulu resin liu oituan. Ita-nia ema hala’o liuliu servisu agrikultura nian, iha atividade informál ho produtividade kiik no saláriu mos kiik.

Taxa kreximentu Produtu Internu Brutu ka PIB sae ka tun konforme volume despezas públikas. Iha tinan sira ne’ebé volume investimentus aas tebtebes, taxa kreximentu PIB mós bele aas tebtebes, hanesan akontese iha 2016. Nune’e, iha tinan ne’e, PIB naun-petrolíferu  sae pursentu  lima  pontu tolu,  tamba investimentu públiku hetan kreximentu pursentu hat nulu. Bainhira volume investimentus públikus tun, ekonomia naun-petrolífera bele tun tebtebes hanesan akontese iha 2014 no 2015, tamba kreximentu ekonomia sae de’it pursentu hat. Iha tinan 2013, tamba investimentu públiku kiik tebtebes, kreximentu naun-petrolíferu sae to’o de’it pursentu rua ho balun.

Situasaun ida ne’e akontese fila fali iha 2017.  Iha tinan ne’e, ekonomia nasional  tun oituan ho  taxa kreximentu mos tun-sae  entre pursentu tolu no tolu ho balun, tuir estimativas husi Fundu Monetáriu Internasionál no Banku Sentrál.
Dadus ne’ e hatudu katak hatama rekursus husi Fundu Petrolíferu iha ita-nia ekonomia la’ós ona modelu kreximentu ne’ ebé ita bele kaer nafatin. Rekursus ne’ebé ita iha ohinloron sei lató, iha momentu ne’ebé de’it, atu hasoru dezafiu sira ne’ebé ita iha ohinloron atu harii ita-nia Estadu no tau matan ba ita-nia sidadaun sira.
Investimentus públikus la depende de’it husi kapasidade atu gasta osan iha rai-laran maibé depende mós ba oinsá ita uza finansas públikas ba tempu naruk. Importante hatete katak entre tinan 2012 no 2017, hare’e ba exekusaun ne’ebé ita konsegue hala’ o duni, ita gasta dólar amerikanu biliaun hitu, rihun atus hitu,  hitu nulu, husi totál billaun sia, rihun atus ualo no neen nulu resin tolu.
Ezekusaun orsamentál iha períodu ne’e, en-média, to’o de’it pursentu hitu nulu resin sia, tuir informasaun hasai husi Portál Transparénsia Ministériu Finansas. Iha tinan ida ne’e, iha fulan ualo nia laran ho rejime duodésimu, ho rekursus finanseirus ne’ebé ladún iha, kapasidade ezekusaun orsamentál kiik mós, no ita ezekuta de’it, en-média, besik pursentu neen nulu resin lima.
Iha nível munisípiu, taxa ezekusaun kiik liu tamba iha limitasaun iha jestaun finanseira, iha prosesu akizisaun bens no servisus,  iha asesu limitadu ba Internet, no tamba problema seluk-seluk.
Biar hatene katak, tuir loloos, ita exekuta orsamentu tomak, taxa ezekusaun orsamentu Estadu nian hatudu katak ita la iha kapasidade atu hala’o pursentu atus ida.
Fundu Petrolíferu, harii iha 2005, fó ba ita rendimentu ne’ebé permite ita uza ba finansia Estadu ninia funsionamentu no  aplika ba investimetus  ne’ebé ita presiza atu harii kondisaiun sira ne’ebé lori dezenvolvimentu no moris-di’ak ba sosiedade timorense, ho respeitu ba kritériu Rendimentu Sustentável Estimadu.  Maibé, ita aplika osan husi Fundu Minarai  ba despeza sira ho montante  liu fali Rendimentu Sustentável Estimadu. Entretantu, ita la hamosu dalan sira seluk ne’ebé bele garante finasiamentu públiku, investimentu privadu no kapasidade atu hamosu rikeza liuhosi ekonomia diversifikada.

Ha’u refere fali katak, entre 2012 no 2017, Orsamentus Estadu nian sae babeibeik husi tinan ida ba tinan tuir, iha tinan lima nia laran.  
Situasaun ida ne’e hatudu liuliu katak ita-nia sektor produtivu fraku tebetebes  no la iha kbbit atu uza no haburas rekursus ne’ebé aloka liuhosi Orsamentu Estadu.

Ida ne’e signifika katak ita-nia País sustenta-an liuliu ho osan husi Fundu Minarai maibé ladún prodúz  no nune’e, ita-nia ekonomia la’ ós sustentável.
Ita iha de’ it fundu soberanu ida. Mak Fundu Minarai ne’ebé ita harii tuir artigu 139 Konstituisaun Repúblika. Artigu ne’e obriga ita uza  rekursu naturál loloos no hanesan de’ it ba ema hothotu no haruka kria rezerva finanseira obrigatória, hodi rendimentus hosi eisplorasaun, tuir interese nasionál. Lei Fundu Mina-Rai la’o tuir menon sira-ne’e no haktuir objetivus tuirmai ne'e: halo jestaun di’ak ba rekursus idrokarbonetus, fó benefísiu ba jeraşaun ohin-loron no aban-bainrua nian no sai matadalan ba polítika fiskál di’ak.
Hosi Fundu Minarai, ita foti ona dólar amerikanu billiaun sia, rihun atus neen tolu nulu resin tolu. Signifika katak ita foti billaun tolu rihun atus neen liu Rendimentu Sustentável Estimadu ne’ebé akumula ba períodu ida-ne'e.
Ita hothotu hatene katak reseita Fundu Mina-Rai nian tun barak.  Iha tinan 2012, ita iha  dólar amerikanu  billaun tolu rihun neen,  no iha 2017, tun tiha ba  millaun atus hat, rihun rua nulu resin rua. Hosi investimentu barak ne’ebé halo ona, ho osan mina-rai nian, iha ativu finanseiru, tuir estimativa hosi valór ita iha ohinloron, ita bele hetan aban-bainrua dólar amerikanu billaun ida rihun atus lima.
Valór ne’e ladún aas ba Nasaun ida ne'ebé sei hala’o hela dezenvolvimentu. Ita labele haluha katak rendimentu sira hosi investimentu no levantamentu sira ne’e hotu, mak aban-bainrua, sei afekta saldu Fundu Mina-Rai nian, to’o ita hala’o projetu foun seluk-seluk.
Tanba ne'e, atu sai sustentável, ita tenke konta ho ita-nia kbiit rasik no haree mós oinsá ita uza rekursus renováveis, rekursus ne’ebé ita  bele uza babeibeik, la’ós haree de’it  ba rekursus ne’ebé sei hotu loron ruma.
Ita hothotu tenke haree ba ita-nia realidade. Ita labele monu ba tentasaun populizmu iha prosesu preparasaun no ezekusaun Orsamentu Jerál Estadu  ba tinan ida-ne’e no tinan sira tuirmai.
Ita hothotu hatene ona katak mina-rai iha kampu Bayu-Undan besik hotu no ita seidauk hatene looos bainhira mak ita bele hahú esplora Greater Sunrise.
Situasaun ida ne’e obriga Timor-Leste atu uza loloos kapitál Fundu Mina-Rai nian. Signifika katak ita tenke buka hamenus transferénsia hosi kapitál ne'e hodi finansia Orsamentu Estadu. Atu Fundu Mina-Rai hetan rendimentu babeibeik, Estadu tenke uza loloos osan hosi Fundu ne’e, hamenus despeza públika no hahú ka habelar mós fonte finansiamentu seluseluk, labele haree de’it ba indústria estrativa sira.
Ita-nia reseita doméstika kontribui de’ it ho pursentu hitu resin ba PIB. Valór ne'e ki’ik tebes bainhira ita sukat-an ho nasaun pós-konflitu sira seluk. Sira-nia reseita doméstika kontribui ba sira-nia PIB, ho pursentu entre sanulu resin lima to’o rua nulu.

Señores Deputadus,
Señores Membrus Governu.

Ha’u fiar katak ita sei hasoru dezafiu boot ho ita-nia polítika tributária. Ita iha kapasidade oituan liu atu hetan reseitas no  ita seidauk bele hasa’e baze tributável katak ita labele hasae ita-nia reseitas liuhosi kobransa impostus. Setór informál ne’ebé boot tebtebesno hodi fó impaktu ba ita-nia ekonomia nasionál sira, la rejista no la selu impostu ba Estadu.  
Ita tenke buka hamutuk oinsá hakat liu dezafiu ida-ne’e mós.
Ita tenke haree oinsá mak ita bele asegura finansiamentu ba ita-nia despeza públika liuhosi reseitas hosi setór naun-petrolíferu ka liuhosi empréstimu. Maibé tusan ne’ebé de’it labele liu fali kapasidade Estadu nian, atu selu filafali, tuir kompromisu.
Ita presiza buka lalais fonte tributária foun atu hatama osan ba Estadu. Ita bele aplika impostu ba rikusoin no hamosu ka hadi’a sistema atu kobra Impostu Valor Akrexentadu (IVA), taxa alfandegária, reseitas hosi munisípiu sira, nsst.
Ita tenke preokupa maka’as ho difikuldade finanseira Estadu nian, ne'ebé sei boot babeibeik abanbairua.
Nu’udar Prezidente Repúblika, ha’u apela ba “bom senso” hosi hothotu hodi haree oinsá ita asegura taxa retornu ekonómiku no sosiál aas hosi investimentu públiku sira.
Ita-nia ema litik hela kona-ba kualidade despeza públika nian. Ha’u-nia laran-taridu tamba haree no rona reklamasaun hosi ita-nia ema, liuhosi meius komunikasaun social katak estrada, edifísiu no eskola la iha kondisaun di’ak.
Timor-Leste hasoru hela dezafiu boot atu kria kondisaun atu haburas setór privadu, no nune’e, ita bele harii ekonomia diversifikada ida, ho potensiál boot atu buras liután no bele loke tan kampu servisu, liuliu ba ita-nia jerasaun foin-sa’e.
Estadu ninia lala’ok importante tebtebes kona-ba harii infraestrutura bázika, dezenvolve kapitál umanu, harii infraestrutura legál no institusionál ba ekonomia merkadu, moderniza agrikultura no hadi’a ambiente negósiu no promove rejistu ba kompañia sira.

Señores Deputadus,
Señores Membrus Governu.

Kondisaun importante liu atu garante susesu ba ita-nia dezenvolvimentu mak estabilidade polítika no makroekonómika.
Estadu mak kaer responsabilidade boot liu iha ita-nia luta hasoru kiak no dezempregu.

Bainhira Estadu atraza ka la halo loloos ninia knaar, sosiedade mak lakon ninia moris-di’ak, liuliu ita-nia ema sira ho kbiit-laek ne’ebé sei reprezenta maioria populasaun Timor-Leste.
Tuirmai ha’u hakarak ko’alia kona-ba dezempregu.
Ita-nia sosiedade hasoru hela problema boot barak. Ida mak dezempregu. Ita-nia ema sira ne’ebé bele servisu atu prodúz buat ruma no hetan rendimentu rasik, la hetan oportunidade atu servisu.
Dezempregu sai todan boot ida ba ita-nia sosiedade. Sira ne’ebé la servisu,  la kontribui ba produsaun maibé iha nesesidade hanesan ita hothotu. Konsumu boot ne’e, sein produsaun, hamenus sasán ne’ebé ita hothotu presiza no hasa’e sasán sira-nia valor troka.

Dezempregu ne’e la’ós de’it problema ekonómiku. Signifika mós katak ita la uza ita-nia rikusoin boot liu, ita-nia ema. Dezempregu ne’e problema sosiál boot ida ne'ebé hamosu terus, ho impaktu umanu no psikolójiku ne’ebé boot tebtebes no ita la konsege sukat.

Hosi resenseamentu ba Populasaun No Uma-Kain, iha tinan 2015 nian,  ita bele hatene saída mak akontese iha merkadu traballu. Ha’u haree katak situasaun dezempregu, ohinloron, parese ladún muda hosi tinan tolu liubá.
Resenseamentu 2015 hatudu katak iha ema rihun atus tolu ualo nulu resin sia mak servisu iha Timor-Leste tomak; feto porsentu hat nulu. Hosi totál ne'e, ema rihun atus rua tolu nulu resin rua (porsentu 59) servisu iha área rural. Ida ne’e signifika katak, sira-nia rendimentu mai hosi agrikultura subsisténsia.
Ita labele haluha katak situasaun traballadór sira iha setór primáriu, hanesan   agrikultura, purezemplu, la’ós estável, tanba sira bele lakon servisu derrepente de’it, sira laiha seguru no manán saláriu no vensimentu ki’ik.

Ha’u hakarak fó-sai mós ohin katak ita-nia ema na’in-64.919 (porsentu 16) hala’o knaar iha Administrasaun Públika, iha F-FDTL no PNTL, iha Edukasaun no Saúde.
Aleinde ne'e, ema na’in-36.551 (porsentu 9) servisu nu’udar profisionál, tékniku ka ajente seluseluk hosi administrasaun no servisus apoiu.
Ema na’in-32.412 (porsentu 8) servisu iha área komérsiu grosu no retallista, transporte, otelaria no restaurant.
Husi Setór sekundáriu (konstrusaun no manufatura) rejista traballadór rihun 16 (porsentu 4).
Kona-ba setór indústria extrativa, ne'ebé kontribui ho porsentu 46 ba PIB naun-petrolíferu, iha trabaladór 450 resin (porsentu 0,1).
Bazeia ba estrutura merkadu ida-ne'e, ita bele dehan katak traballadór porsentu 27 de’it mak servisu iha setór formal, ne’ebé klasifika nu’udar empregu seguru, inklui sira-ne'ebé servisu ba Governu, empreza sira Estadu nian ka privadu, embaixada sira no organizasaun multilaterál no espesializada sira.
Tanba laiha oportunidade servisu iha rai-laran, ita-nia ema, liuliu ita-nia foin-sa’e sira, buka no hetan servisu iha nasaun belun sira hanesan Reinu Unidu, Koreia Súl no Austrália.
Ita-nia setór agrikultura, ne’ebé kontribui ho pursentu 9,2, iha tinan 2016, sai  fonte rendimentu ba maundeobra pursentu 60. Tamba ne’e, ita presiza fó importáncia maka’as liu ba agrikultura komersiál ba exportasaun, la’ós halo de’it agrikultura familiár. Ita-nia agrikultór kiik sira presiza hetan apoiu hosi Estadu, atu sira bele fa’an sira-nia produtu iha merkadu rai-laran no bele fa’an mós ba rai-liur. Informasaun estatístika hatudu katak ita presiza halo liután, iha setor agrikultura.
Hosi buat ne'ebé hakerek ona, ita bele konklui katak ita-nia polítika orsamentál ka fiskál, liuliu iha tinan neen ikus liubá, kontribui ba hasa’e dezigualdade, no talvéz, hamenus mós igualdade oportunidade. Ida-ne'e hatudu katak ita-nia polítika fiskál ne’e la hetan efeitu ne'ebé ita hakarak hetan, kona-ba loke tan kampu servisu, iha nível nasionál. Situasaun ida ne’e la surpreende. Podér tomak konsentra iha kapitál Dili. Bens no servisus mós. Sira ne’ebé apoia sistema ne’e mós konsentra iha Dili. Ita-nia ema sira ne’ebé moris iha munisípiu, ne’ebé moris ho de’it sira-nia kbiit rasik, hetan atensaun de’it kada tinan lima ba tuir eleisaun!
Impaktu hosi buat ne'ebé ita halo ona no buat sira ne'ebé ita seidauk halo mak hamosu desigualdade sira ne’ebé ita haree entre kapitál Dili no munisípiu sira seluk.

Señór Deputadu sira, liuhosi votu, iha duni podér atu transfere osan públiku hosi leten ba kraik no hosi kraik ba leten. Polítika Estadu nian tenke adapta no fó orientasaun ba forsa teknolojia no merkadu no tenke envolve parte hothotu atu hasa’e moris-di’ak ba sidadaun hothotu. Ita seidauk halo ida ne’e. Diferensa  entre kapitál Dili no munisípiu sira seluk boot tebtebes no ita labele simu situasaun ida ne’e, bainhira haree ba envelope fiskál ho montante aas, ne'ebé  Parlamentu Nasionál aprova tinan-tinan.

Sosiedade sira ho nível aas dezigualdade labele funsiona ho di’ak no sira-nia ekonomia la’ós estável no la’ós sustentável ba tempu naruk.
Ho laran-moos no haksolok mak ha’u halo apelu tuir mai, ba Señores Deputadus V Lejizlatura nian no mós ba VIII Governu Konstitusionál: Bainhira ita ko’alia kona-ba ekonomia diversifikada, nu’udar dezafiu boot ida, ita labele haree de’it ba intervensaun Estadu nian, ne’ebé hasa’e hela de’it despeza públika; ita presiza mós ko’alia kona-ba oinsá organiza intervensaun Estadu nian hosi dalan sira ne’ebé hamenus despeza públika.

Haree ba ita-nia realidade no ba kestaun sustentabilidade, Estadu labele sai de’it fonte ba empregu, liuhosi funsaun públika no sai prestadór bens no servisus, liuhosi servisus no empreza públika sira!
Ha’u lansa dezafiu ida-ne'e atu ita hahú hanoin klean no di’ak liután oinsá muda ita-nia mentalidade no komportamentu, tanba ho mudansa ne’e de’it, mak ita bele diversifika ita nia ekonomia nasionál no dezenvolve setór privadu.
Iha ita-nia luta atu hakaat liu dezafiu ida-ne'e, ita tenke hatene tetu no aprende hosi esperiénsia nasaun sira seluk.
Señores no señoras,
Hare’e ba ita-nia situasaun ohinloron nian, ita hothotu hatene katak, atu hakaat dezafius abanbairua, ita tenke preokupa maka’as ho ita-nia rekursus umanus, oinsá kalifika lalais ita-nia ema sira. Ita-nia populasaun sei joven hela. Investe ohinloron, iha edukasaun, signifika ita manán futuru di’ak. Edukasaun ho kualidade di’ak mak deside oinsá Timor-Leste projeta iha mundu no, liuliu, oinsá ita fó honra ba sakrifísiu ne’ebé ita-nia maun-alin-sira no inan-feton sira simu durante ita-nia luta libertasaun nasionál. Valoriza sira-nia raan, sira-nia sakrifísiu ezije ita prepara didi’ak ita-nia futuru.
Deznutrisaun ne’e problema boot ida iha ita-nia rain no iha relasaun ho produtividade agríkola kiik. Deznutrisaun mós fó impaktu ba rendimentu eskolár no afeta família sira. Investe iha luta hasoru deznutrisaun liuhosi agrikultura kontribui ba hamenus dezempregu no hasa’e família sira-nia moris-di’ak, no nune’e, produtividade laborál no rendimentu eskolár sei aumenta. Kona-ba kombate seluk iha área saúde, ita presiza haree oinsá hasees-an hosi moras no ita bele hetan rezultadu di’ak liuhosi saneamentu báziku no edukasaun kona-ba saúde.

Edukasaun no saúde loke dalan ba sivilizasaun. Ita labele uza ita-nia matenek  bainhira ita hetan moras ka la simu edukasaun. Sentru saúde sira no rede eskolár mak riin nasaun nian ba  dezenvolvimentu ekilibradu.
Ha’u aproveita oportunidade ida ne’e hodi halo apelu tuir mai: orsamentu tenke   ekilibradu no  ita tenke tau atensaun maka’as ba ita-nia ema.
Ita-nia nasaun buras ho valores no ita-nia ema simu fiar relijiozu oioin. Ita rekoñese Konfisaun Relijioza sira-nia knaar iha edukasaun no dezenvolvimentu espirituál povu nian. Estadu sei koopera nafatin ho Konfisaun Relijioza sira hodi haklean liután sira-nia misaun edukasionál, kulturál no sosiál atu hametin no  haburas ita-nia unidade nasionál no ita-nia identidade, nu’udar Povu no nu’udar  nasaun.
Ema mak tenke sai sentru atensaun ba ita-nia polítika públika sira. Ita ida-idak iha direitu ba liberdade, seguransa no integridade. Família, nu’udar riin prinsipál ba ita-nia sosiedade, no kazamentu, nu’udar fonte ba família, tenke hetan protesaun di’ak liután hosi Estadu. Dever seluk Estadu nian mak haree oinsá garante direitu sosiál ba sidadaun hothotu, ne'ebé hatuur iha ita-nia Konstituisaun Repúblika, hanesan:  direitu ba saúde no asisténsia médika no sanitária, direitu ba edukasaun no direitu ba hela iha uma ida, ho kondisaun di’ak.
Tuir lei, sidadaun hotuhotu hanesan de’it. Ita hakarak hala’o duni prinsípiu ida-ne'e, la’ós atu temi de’it iha lei. Sidadaun tenke iha asesu ba lei no justisa loloos, la hasees ka fihir ema ida ka grupu, tuir sira-nia oríjen, seksu, estadu sosiál, lian, pozisaun sosiál ka situasaun ekonómika, konviksaun, relijiaun, instrusaun ka kondisaun fízika ka mentál.
Haree ba prinsípiu sira-ne’e, ha’u hakarak hatete de’it katak importante  tebtebes ba ita-nia sosiedade no Estadu atu haree oinsá hamosu padraun ida ne’ebé haree ba relasaun jéneru, entre feto no mane, ne’ebé justu liu, ekilibradu  no dinámiku liután, iha nivel sosiál, ne’ebé envolve família tomak, hahú  uluk hosi inan, aman no oan sira.
Iha ámbitu ida ne’e, importante ita haree oinsá hakotu violénsia iha uma-laran no ba labarik sira. Problema ne’ e boot babeibeik. Enkuantu ita la halakon problema ida ne’e, ita-nia sosiedade la moris iha liberdade nia laran.    
Ita hein katak loron ruma ita-nia oan sira sei la halerik tan tanba violénsia ka problema sosiál ne’ebé de’it. Bainhira ita-nia labarik sira bele halimar loron-loron ho hamanasa, ita hothotu,  inan, aman no abon sira, sidadaun Timor-Leste tomak,  sei sente livre liután no moris ho laran-haksolok liután, iha Pátria ida ne'ebé ita hothotu hadomi.


Señoras no Señores,
Nu’udar Prezidente Repúblika no Komandante Supremu Forsas Armadas -nian, ha’u akompaña nafatin ho interese boot, asuntu sira-ne’ebé iha relasaun ho Seguransa iha rai-laran no ho Instituisaun Militár sira-nia knaar. Ha’u sei kontribui ba hametin Forsas sira-nia prestíjiu no dignifikasaun, no enkoraja xefia militár atu hala’o reformas hodi haburas no moderniza komponentes hothotu ne’ebé tanen Seguransa Nasionál.

Ha’u hakarak hahi’i esforsu sira ne’ebé Forsas Defeza no Seguransa halo iha sira-nia misaun ba pás no estabilidade, hodi hametin Estadu-de-Direitu Demokrátiku, maibé ita tenke rekoñese katak ita presiza halo buat barak  atu profisionaliza, jere di’ ak liután  ita-nia rekursus no oinsá hasa’e Forsas sira-nia kapasidade  operasionál.
Setór Defeza no Seguransa lao daudaun hela, maibé ita seidauk halo reforma estruturál sira-ne’ebé ita presiza. Ita seidauk adapta lejizlasaun ba ita-nia realidade no seidauk jere  didi’ak ita-nia rekursus umanus, materiais no finanseirus. Ita presiza hala’o lala’ok sira-ne'ebé liga ho estratéjia setoriál ne'ebé hatama ona iha Konseitu Estratéjiku Defeza no Seguransa Nasionál. Ita presiza haree mós oinsá adapta no hatutan konseitu estratéjiku ne’ e, tuir lójika no ita-nia realidade. Halo reforma ne'e la signifka katak ita presiza husu tan meius. Ita presiza hatene oinsá uza di’ak liután rekursus ne’ebé ita iha ona,  ho matenek. Nune’e, importante tebtebes harii lalais Konsellu Estratéjiku Militár ida ne’ebé bele garante dezenvolvimentu F-FDTL tuir Konseitu Estrateziku Defeza no Seguransa Nasional.

Haree ba Estadu ninia vizaun estratéjika globál, ha’u hakarak temi inisiativa furak tebes ne'ebé Institutu Defeza Nasionál hala'o iha fulan-Agostu,  hodi valoriza Tasi no ninia esplorasaun, nu’udar rekursu ekonómiku importante ida ba Nasaun, nu’ udar objetivu estratéjiku nasionál. Ita presiza fó kontinuidade ba projetu ida-ne'e no nune’e, ita tenke  kria estratéjia nasionál ida ba Tasi, ho vizaun integradora ne’ebé bele transforma potensiál Tasi Timor-Leste  nian, ne’ebé lori beneefísiu ba ita hothotu, iha aspetu ekonómiku, sosiál no ambientál.

Señoras no Señores,
Estadu iha mós knaar relevante ba formasaun sidadaun sira-nian, atu fó liman ba malu, tau matan ba malu, no bele  mobiliza  jerasaun foin-sa’e  sira atu promove no hametin  kultura dame no  hasees sosiedade  hosi violénsia.
Tanba ita haree preokupasaun ba kauza públika menus babeibeik, ita-nia ema la haree malu hanesan horiuluk, no sosiedade ninia valores mihis dadaun ona, ha’u hanoin katak Parlamentu hamutuk ho Governu, Instituisaun sira no sosiedade sivíl presiza promove debate polítiku no sosiál  ida kona-ba juventude, pás no seguransa, no haree viabilidade hahú Servisu Síviku Nasionál,  iha Timor-Leste.
La’ os de’it harii Servisu Síviku Nasionál ba jerasaun foin-sa’e sira maibé Estadu iha mós devér no obrigasaun atu fó omenajen ba ferik-katuas sira no ba líder sira ne'ebé fó-an tomak ba Nasaun ida ne’e. Jerasaun tuan sira hanorin, liuliu valór étiku sira, sira-nia matenek prátiku no sira-nia esperiénsia, ne’ebé hariku ita-nia identidade. Relasaun entre jerasaun oioin, iha ita-nia sosiedade ohinloron, husu atu hetan dalan hodi halo tranzmisaun, sosializasaun, formasaun, ensinu no aprendizájen. Ne’ e mak ita-nia dezafiu ba tempu ohin no ba futuru.

Iha loron ita selebra aniversáriu loron FALINTIL nian ba dala hat hulu resin tolu, 20 Agostu, ha’u identifika de’it aspetu balun ne'ebé ita presiza tetu didi’ak atu rekoñese no valoriza Veteranus no Kombatentes Libertasaun Nasionál: sira-nia knaar fundamentál iha prosesu hametin F-FDTL no harii Nasaun; sira-nia apoiu ba diálogu komunitáriu no prevensaun konflitu; no oinsá sira fó kontribuisaun ba País, iha aspetu ekonómiku no sosiál.

Veteranus! Iha veteranus ne’e signifika priviléjiu ida ba Timor-Leste.  Sira sei bele hato’o sira-nia esperiénsia furak ba ita hothotu. Ohin, iha Uma-Fukun ida ne’ebé tanen Demokrasia, ne’ebé Veteranu sira ajuda harii, iha sesaun solene ida ne’ e, ha’u husu ba maluk veteranu hothotu, ha’ u-nia maun-bin-alin doben sira, atu hato’ ba ita-nia jerasaun foin-sa’e, oinsá no tanbasá imi fó-an tomak ba luta ho aten-barani no simu sakrifísiu ne’ ebé de’ it, iha tinan ba tinan.
Ha’u fiar katak Konsellu Veteranus no Kombatentes Libertasaun Nasional bele loke dalan atu valoriza di’ak liután veteranu  no sira-nia família sira!

Señores Deputadus,
Señores Membrus Governu.

Iha mundu globalizadu, la iha nasaun ida mak bele moris mesak. Ita-nia país mós labele moris mesak.
Biar ita hatudu aten-barani durante ita-nia Luta Libertasaun Nasionál, ita mesamesak labele kore-an. Ho apoiu hosi solidariedade internasionál mak ita hetan ita-nia liberdade. Ho solidaridade internasional nia ran kahor hamutuk ho ita nian maka ita manan ita nia soberania.
Importante haree oinsá Timor-Leste integra babeibeik iha mundu no tau atensaun ba saída mak ita tenke halo bainhira ita selebra relasaun diplomátika no ita asina akordu entendimentu ho nasaun sira seluk. Ita asina akordu ho nasaun barak ona.
Molok ukun-an, ita buka hetan apoiu hosi povu no nasaun sira seluk. Ohinloron, iha povu rua ne’ebé presiza tebtebes ita-nia apoiu.  Ida mak Povu Sara Osidentál ne’ebe luta hela atu hetan direitu autodeterminasaun. Ida fali mak Povu Palestina, ne’ebé luta atu hetan rekoñesimentu internasionál ba sira-nia Estadu. Ita labele fila kotuk ba sira-nia sakrifísiu atu moris nu’udar Povu no Nasaun.
Iha prosesu globalizasaun ida-ne'e, ita la hatene loloos saída mak sei akontese; ohinloron, ita la hasoru de’it ameasa baibain maibé ameasa foun oioin, hanesan tráfiku ema nian, kartél droga nian, terrorizmu no dezastre naturál ne'ebé akontese tanba iha mudansa klimátika.
Ameasa foun sira ne'e hamosu konflitu oioin iha país   ne’ebé de’it, labele rezolve de’it ho kooperasaun bilaterál.  Ita-nia País tenke marka prezensa iha fora multilateral. Ita labele hasees-an hosi atividade diplomátika.
Iha kontestu ne'e mak Prezidente Repúblika halo vizita Estadu, vizita ofisiál no vizita traballu.
Ha’u fó-hanoin katak ita-nia Konstituisaun Repúblika fó kompeténsia ba Prezidente Repúblika iha área relasaun internasionál nian. Bainhira Prezidente bá rai-li’ur, nia reprezenta Estadu tomak. Prezidente defende intereses País nian, iha rai-li’ur. Tanba Parlamentu Nasionál iha devér institusionál atu apoia Xefe Estadu ninia misaun institusionál, ita hothotu hein Uma-Fukun ida ne’ e deside Prezidente Repúblika ninia vizita ofisiál no traballu, iha rai-liur.

Señores Deputadus,
Señores Membrus Governu.
Rekursus públikus barak lakon ka la aplika loloos tanba korupsaun. Tanba vísiu ida ne’e, funsaun públika la serve povu tomak maibé ema balun de’it. Susar tebtebes halakon korupsaun, ne’ebé afeta sosiedade en-jerál, liuliu ita-nia Estadu. Korrupsaun la’ós mosu de’it iha órgauns Estadu nian no iha Administrasaun Públika, maibé iha mós sosiedade komersiál no konsesionária sira no iha organizasaun sosiedade sivíl nian. Korrupsaun ne'e akontese liuhosi forma oioin: iha prosesu aprovizionamentu ne’ebé hatudu sasán ka servisus ho folin aas tebtebes no iha hahalok sira ne’ebé liga ho krime liuhosi fronteira, hanesan brankeamentu kapitál, migrasaun ilegál, tráfiku droga, tráfiku umanu no terrorizmu.

Atu luta hasoru korrupsaun,  ita presiza valoriza no kapasita  ita-nia País  atu hala’o governasaun di’ak, inklui fó responsabilidade, harii sistema efisiente, hato’ o informasaun no promove transparénsia, no hala’o investigasaun kriminál ne'ebé di’ak, lais no neutral no aselera prosesu akuzasaun no julgamentu ba kazus korrupsaun.
Ita presiza aplika, ho efisiénsia, lei sira ne’ebé ita iha ona no mós akordu internasionál hasoru korupsaun ne’ebé ita asina ona. Ita tenke hadi’a nafatin koordenasaun no lala’ok instituisaun sira-nian ba prevensaun no luta hasoru korrupsaun, hanesan Ministériu Públiku, Komisaun Anti-Korrupsaun (CAC), Polísia Sientífika no Investigasaun Kriminál (PCIC), Unidade Informasaun Finanseira no Komisaun Nasionál ba Implementasaun Medida sira kona-ba Kombate ba Brankeamentu Kapitál no Finansiamentu Terrorizmu. Ita mós koopera no kolabora nafatin, iha nivel tranznasionál, hodi haree hamutuk oinsá ita luta hasoru fenómenu tranznasionál sira-ne'e, ne'ebé afeta mundu tomak.    
Parlamentu Nasionál, nu’udar instituisaun, no Deputadu sira, nu’udar reprezentantes Povu nian, iha devér koletivu, atu kaer-metin Kompromisu halakon korrupsaun.

Ita-Boot sira hatudu Kompromisu ida-ne'e, iha Konferénsia Internasionál, hala’o iha loron 2 no 3 fulan-Fevereiru 2017, ne’ebé  debate kona-ba oinsá implementa Konvensaun Nasoins Unidas Hasoru Korrupsaun,  ne’ebé ita ratifika tiha ona.  
Nu’udar Prezidente Repúblika, ha’u apela atu haklean liután Ita-Boot sira-nia kompromisu ida ne'e ho inisiativas lejizlativas ho polítika públika, no asaun koordenada oioin ne’ebé fó rezultadu, atu ita bele halo prevensaun, investigatigasaun no sansaun, nudar ita-nia luta hasoru korrupsaun, liuhosi instrumentu legál sira, no meius no mekanizmu institusional sira ne'ebé mak ita iha ona.

Ita presiza halo ona buat ruma,  halo babeibeik ba oin, atu taka dalan ba korrupsaun, atu labele buras babeibeik ho liman barabarak hanesan kurrita boot no forte ida, ne'ebé subar metin, iha fatin hotu-hotu, ho liman naruk no kleuk bá-mai no ita la konsege identifika. Korrupsaun fó impaktu ladi’ak ba ita-nia governasaun no administrasaun públika no ita presiza halakon lalais.
Ita hothotu hatene katak ita presiza buka solusaun jurídika no dalan loloos atu luta hasoru fenómenu ida-ne'e, sein prejuízu ba direitus no liberdades individuais no sosiais, tuir ita-nia Konstituisaun Repúblika haruka, no mós ba akordu

 Internasionál sira-ne'ebé Timor-Leste asina ona. Ita presiza halo lei ida  ne'ebé bele halakon duni korrupsaun - lei ne’e mak Lei Anti-korrupsaun. Ha’ u hatene katak Deputadu sira, hosi V Lejizlatura, hato’o ona projetu-lei ida atu diskute iha tempu badak..
Haree ba ita-nia sistema normativu, importante kontinua ho estudus ba reforma lejizlativa no prepara proposta no projetu lejizlativu sira ne’ebé fó dalan atu hadi’a lei sira, iha ita-nia País. Ita ko’alia beibeik  no hakerek barak ona kona-ba asuntu ida-ne'e.  Órgaun soberania sira ho kompeténsia lejizlativa mak Parlamentu Nasionál no Governu., ita hein katak sei halao asaun lejislativa lalais, liután. Maibé ita labele haluha katak asaun lejislativa ida ne’ebe konsekuente no ba médiu prazu, presiza artikulasaun diak entre órgaun rua ne’e, katak presiza halo akordu ida ba programa lejizlativu ba sira-nia mandatu parlamentár no governativu.
Maibé ita presiza iha konxiénsia katak la‘ós halo lei narnaran de’it maibé ita tenke halo lei ho kualidade no ita bele implementa duni, hodi garante seguransa no serteza ba sidadaun sira-nia expektativa!

 Sosiedade en-jerál, liuliu Estadu, no emprezáriu sira, presiza hatene bainhira mak ita implementa lei sira ne’e, hodi sira organiza-an no halo planu ba sira-nia investimentus ho diak.
Prioridade ba señores Deputadus no membrus Governu atu konsidera kedas mak área regulasaun ekonomia atu loke dalan ba investimentus no kreximentu ekonómiku.
Señores Deputadus,
Señores Membrus Governu,
Señoras no señores,
Iha loron tomada-de-posse, iha 20 Maiu 2017, ha’u jura ho kompromisu atu hatuir Konstituisaun Repúblika, no atu sai Prezidente Repúblika ba povu tomak. Ha’u sei kaer metin kompromisu ida ne’ebe halo ho Povu no ba Povu. Hau  sei hatuir deit Konstituisaun Repúblika no lei sira, tuir hau jura tiha ona!
Ita identifika ona dezafiu sira no ita hatene dalan ida-ne'ebé mak di’ak liu atu hala’o dezenvolvimentu demokrátiku no sustentável ba ita-nia sosiedade.
Ho domin ba ita-nia povu doben Timor-Leste mak ha’u husik hela apelu ida ba Ita-Boot sira: Ita tenke halo buat hothotu atu unidade nasionál, pás, demokrasia no dezenvolvimentu nasionál sustentável.

Ita hothotu, Deputadus no membrus Governu, tenke halo buat hothotu ho unidade, koordenasaun, efisiénsia, efikásia, inkluzaun, transparénsia no legalidade hodi ita  bele hala’o mandatu ne'ebé ita ida-idak simu.
Obrigadu barak!
Viva  República Democrática  Timor-leste!