Presidente Lu´olo: Señor padre (Martinho Gusmão) ha'u bele hatete katak ita boot konsege halo moris fali Nicolau Lobato

Foto GPR 2018

"Señor padre (Martinho Gusmão) ha'u bele hatete katak ita boot konsege halo moris fali Nicolau Lobato. Ha'u hanoin katak ho livru ida ne'e, ba oin ita hotu sei estuda ho kontente ho onra boot tebtebes atu ita bele koñese, ita-nia lider boot Nicolau dos Reis Lobato,"

Francisco Guterres Lú Olo

PREZIDENTE RDTL

---------------------------

DISKURSU HUSI SUA EXELÉNSIA PREZIDENTE REPÚBLIKA DR. FRANCISCO GUTERRES LÚ OLO IHA SERIMÓNIA LANSAMENTU LIVRU AUTORIA PADRE MARTINHO GUSMÃO KONA-BA PENSAMENTU POLITIKU NICOLAU DOS REIS LOBATO NIAN

Palásiu Prezidensial Nicolau Lobato, 30 Novembru 2018

Tinan haat nulu liubá, ita-nia maun doben Nicolau dos Reis Lobato, enkuantu halo funu daudaun, hetan tiru no mate ho onra no glória, ho kilat iha liman.

Permite ha’u hato’o lai ha’u-nia sentimentu pesoál. Iha istória foin liubá, Nicolau mak oan murak liu Timor-Leste nian. Iha istória ohinloron nian, figura aas liu iha ita-nia Pátria mak Nicolau mós. Tanba ne’e, ha’ u hakarak fó parabéns ba Reverendu Padre Martinho Gusmão tanba lori mai ita, ba ita hothotu, obra foun ida, ne’ebé fó-sai pensamentu/hanoin polítiku husi Nicolau dos Reis Lobato, líder ne’ebé haree burus no dook. Bainhira nia hetan tiru no mate, ho kilat iha liman, nia kaer hela kargu nu’udar Prezidente FRETILIN no Prezidente ba ita-nia Primeira Repúblika.

Ha’u aproveita oportunidade ida ne’e hodi agradese instituisaun rua, Centro Nacional CHEGA no Fundaçåo Dato Siri Loe II, ne’ebé tulun hodi hamosu obra ne’e.

Ha’u halo apelu ba hothotu, iha livru ne’e, atu ita hotu estuda, liuliu tinan ida ne’e, hanoin klean, mesa-mesak ka nu’udar grupu, kona-ba kontribuisaun sukat rohan-laek, ne’ebé Nicolau husik mai ita. Legadu ne’e murak loos no ita presiza estuda duni.

Reverendu Señor Padre simu apoiu no hatene onra kontribuisaun sira ne’ebé simu, hodi halo peskiza, entrevista ema no halibur buat sira ne’ebé importante liu atu ita estuda Nicolau Lobato no buat ne’ebé nia husik hela ba ita hothotu.

Ha’ u fiar katak ita sei bele estuda mós kona-ba kompañeiru-sira, feto no mane, ne’ebé mate iha loron sorte-at ne’e, 31 Dezembru 1978, hamutuk ho ita-nia Prezidente doben Nicolau dos Reis Lobato.

Exelénsias

Maluk timoroan sira

Haree ba artigu 11 Konstituisaun RDTL, hau kondekora iha 28 Novembru liubá ne’e, iha loron aniversáriu proklamasaun independénsia ba tinan hat nulu resin tolu, kombatentes libertasaun nasional 46, inklui matebian erói lima.

Erois, naran laiha, rihun ba rihun mak mate ba ita. Iha ita-nia luta ne’e liubá ne’e, ita lakon ema babeibeik, mane no feto. Ita kontinua lakon ita-nia ema iha Timor-Leste independente. Bainhira ita lakon ema ida, ita lakon mós istória nia rohan-kiik ida.

Ita katuas no ferik babeibeik no nune’e ha’ u sadik ita-nia ema, liuliu joven sira. Halo entrevista ba, hakbesik-an ba, buka tuir sira ne’ebé fó-an tomak ba ita-nia Pátria doben. Ita halo kestionáriu hodi husu tuir saída mak mane no feto sira liuhusi sira-nia terus, sira-nia kosar-been, sria-nia sakrifísiu rohan-la’ek. Na’in-hira loos mak fakaar raan ba rai ida ne’e!.

Exelénsias

Maluk timoroan sira

Biar ha’ u la sorte hetan onra no previléjiu koñese pesoalmente ita-nia líder doben Nicolau Lobato, nu’ udar luta-na’in iha Frente Armada, ha’u aprende kona-ba ninia hahalok no nia kbiit, oinsá nia kontribui hodi hamanas ita-nia ema no lori ita-nia luta la’o ba oin no metin babeibeik.

Nicolau mak inspira ita, ita hothotu, iha tempu susár sira susar liu no bainhira bazes apoiu hetan atake maka’as no rahun.

Horiuluk, hori wain Nicolau ita-nia fonte inspirasaun. Rikusoin boot liu Nicolau husik mai ita mak ninia ezemplu ho forsa maka’as.

Ita ida-idak iha dever atu kontinua hala’ o obra Nicolau nian, liuhusi servisu badinas babeibeik no di’ak liután ba ita-nia Povu. Ida ne’e mak ita -nia kompromisu. Katak ita bele no tenke fó onra ba Ita-nia ERÓI boot ida ne’e no ba hothotu ne’ebé fó-an tomak to’o mate, ba ita-nia Pátria no ita hothotu.

Obrigadu.

Fonte:
http://presidenciarepublica.tl/2018/11/lansamentu-livru-autoria-padre-martinho-gusmao-kona-ba-pensamentu-politiku-nicolau-dos-reis-lobato-nian/?fbclid=IwAR2bcAoBnuIDqq8RBGGOvwF3WKMvTbWAHw1oW63BFYp4H4WdsYH9Gk6mTzA