Dala ida tan konaba g7+: “A prática é o critério da verdade”

Dala ida tan konaba g7+: “A prática é o critério da verdade” 

.

 

Martinho G. da Silva Gusmão

Docente filosofia politica

ISFIT, Fatumeta

Hau hahu ho liafuan husi Prof. Franz von Magnis-Suseno, padre jesuíta no filosofo boot iha Indonesia, be dehan “filsuf tidak pernah menghiraukan perasaan orang; filsuf hidup dari debat dan kritik. … sanjungan dan pujian bagi filsuf hanyalah lagu kematian bagi pemikiran kritis” (filosofo la sura ema nia sentimento; filosofo ne’e moris husi debate no kritika ... gaba no foti-as ba filosofo ida ne’e hanesan hananu requiem nian ba ema pensamento critico). Risku husi pensamento critico mak ema hanoin katak filosofo ne’e gaba-an ka foti-an! Lae! Filosofo boot sira Immanuel Kant, G.W.F. Hegel, Karl Marx no Sigmund Freud hanorin katak “kritik” ne’e hatudu ba ita nia capacidade atu bele tetu, sukat no husu tuir lia (problematiza) saida de’it atu halo klean liu, luan liu no kmanek liu.  

Wainhira hau hakerek artigo “teoria maka’as, praxis namlele”, iha hau nia ulun laran ne’e mosu Karl Marx nia hanoin konaba “Kritikideologie” – katak, hare husi praxis mak tetu no sukat teoria. Tuir Nicolau Lobato nia liafuan karik “a prática é o criterio da verdade” (praxis mak sasukat ba lia-los). Senhor Helder da Costa PhD hakerek: “Diferensia boot entre ami nain rua nia argumentu makne: MG foka liu ba dimensaun dezafiu iha rai laran (inward-looking) hare ba problemas rai laran, enkuantu hau nia pozisaun, hare liu ba rai liur hodi partilha ita nia experiensia (outward-looking) ajuda rai seluk iha konflitu ka pos-konflitu hodi sai husi fragilidade hodi hakat ba resiliência”. Hau la hare diferencia. Tan, wainhira dehan “partilha ita nia experiencia” ne’e hatudu duni “praxis” – katak pratica sira nebe ita halo iha Timor-Leste hodi tulun rai liur atu sai husi problema tama ba resiliência.

Hau nia resposta ne’e hatur iha assunto 3 nebe importante atu hatan (1) konaba “defesa de honra”; (2) fila hikas ba lia konaba teoria no praxis. Ikus liu (3) tetu hikas Senhor Helder ninia “fallacy” liu husi falibilism theory rasik!

“Defesa de honra”

Iha artigo nia laran, hau la hateten aat ema ida. Hau temi Dr. Helder; Maun Helder no Au-wa’i Helder. La iha “adjective” no la iha “substantive” seluk iha hau nia frase tomak. Hau halo check and recheck ... hau la hare liu liafuan nebe iha conotação ka refere ba buat seluk nebe contra “ser humano”. Simples e puro – hau hatoo de’it argumento.

Nudar Timor oan, bolu naran ho titulo (Doutor) ka usa liafuan “Maun Boot” ka “Maun” hatudu nível no grau konaba “sentimento de respeito”. Liu-liu wainhira hau usa “Au-wa’i”, ne’e hatudu “primordial sentiment” atu karega relação nebe besik liu (“lebih akrab”; “mais próximo”). Tan Reino Venilale ho Reino Fatumarto (Bercoli) ne’e aliado hori uluk hori wain kedas. Ita nia bein-alak sira Venilale-Fatumarto (Bercoli) ne’e “ran liu-rai” no “lisan dato”, hatudu liu husi liafuan no hahalok respeito. Tan ne’e Helder ho hau “wa’i-wari”.

Siniku? Sarkastiku? Lae! Bele dehan “stylistic”. Hau ho Dr. Helder da Costa mai ho identidade nebe claro, tur iha fórum ida nebe “public” nunee ema hotu hare, no hakerek artigo ho naran nebe claro nune’e ema hotu hatene. Ami na’in 2 la usa ID Falso hanesan iha facebook, sa tan manipula identidade ka personalidade hodi “subar” iha feto nia identidade/ personalidade. Alias uluk, wainhira hetan perseguição husi militar Indonesia, politico sira subar hotu iha padre sira nia “batina” laran; agora hau, padre Martinho Gusmão, la halo perseguição ba sira, maibe ema ida ka rua (grupo oan ida) ne’e ba subar iha “saia laran” ka “vestido laran”. Ne’e degradação personalidade.

Tan sa mak Dr. Helder da Costa usa fali liafuan “defesa da honra”, liu-liu atu defende “atakes ba altas personalidade sira seluk”? Uluk nana’in (1) hau la defama Helder da Costa, ka lori identidade falso atu halo insulto iha publico. Tan ne’e hau la hare necessidade atu halo “defesa de honra”. Tuir mai (2), hau temi duni “altas personalidade sira seluk” – hau hare didi’ak tiha afinal hau temi de’it Kay Rala Xanana Gusmão, Ramos Horta, Emilia Pires, Tomas Cabral. Hau la sente katak hau contra Maromak nia Ukun-Fuan 10 – “keta jura falso, keta temi let Maromak nia Naran”. Senhor Helder hakerek fali hanesan “alta personalidade” na’in 4 ne’e Maromak be ita labele kedas temi let sira nia naran! Ba Helder, temi let sira ne’e hanesan “penistaan agama” karik, ne’e be “kelompok sumbu pendek” mos rame-rame halo “demo” iha facebook!  

Hare husi pensamento freudiana, “defesa de honra” hanesan “depth hermeneutic” ida. Saida mak “depth hermeneutic”? Ida ne’e katak, Dr. Helder da Costa hakarak halo “defesa da honra”, maibe iha kotuk ne’e nia haksumik hela (subar hela) buat balun. Hanesan hau nia belun, Prof. João J. Vila-Chã, SJ (husi alma mater Univ. Gregoriana) hakerek katak S. Freud hamosu hanoin ida atu oinsa mak ita sukat no sukit sai husi ema nia inconsciente (alam bawah sadar) hodi hare lolos “suas relações mais obscuras com o instinto” (Revista Portuguesa da Filosofia, vol. 59/ 2003: 307).

Oinsa mak ita sukit sai tiha “inconsciente” ida ne’e? Hau hatudu facto – iha facebook ema hira mak posting foto aat, no hatama comentário sira nebe halo aat no hewai los Kay Rala Xanana Gusmão, Ramos Horta, Emilia Pires, Tomas Cabral ka Taur Matan Ruak, Mari Alkatiri, Lere Anan Timor to’o Lu-Olo. Hau sedauk hare kois (hau mak sala karik), katak Dr. Helder da Costa hakerek ho tonalidade “defesa de honra”. Tuir lolos ida ne’e mak halo Maun Helder ho ninia supporter sira iha CNRT ka AMP ou Fretilin tenki halo “defesa de honra” maka’as liu. La’os tur nonok de’it.

Iha oin hau kritika sira. Iha kotuk hau reza ba sira. Liu-liu iha domingo ho loron santo, hamutuk ho sarani sira hau (ami padre sira) tenki reza (obrigatório) ba “na’i-ulun sira” ka “ukun nain sira” atu “ukun ho di’ak”, “justiça” no “lia los”; hases sira husi “babeur aat”; “hatudu naroman”, no seluk tan. Hau sugere, imi sira be insulta hau ne’e labele tan falta misa hodi rona katak, independentemente husi politica partido nian, Padre sira “wajib” atu reza ba ukun-na’in sira. Ema sira be halo comentário “miring” hasoru hau, “pasti” la ba misa! Nune’e sira la hatene katak Na’ilulik nia politica iha Igreja laran mak reza ba Na’iulun (inclui, “terpaksa” reza ba koruptor sira atu sira nauk karik “naton”).

Hau hatene katak “defesa de honra” ne’e conditio sine qua non iha ita nia moris. Hau sente ida ne’e wainhira ema hakerek iha facebook ataque hau nia personalidade, insulta dehan “bulak feto”; “bosok-ten”; “sente matenek liu” too “arrogância intelectual”. Maibe, hau hanoin insulto hirak ne’e la todan. Baibain ema dehan “biasa tiha de’it, Amo”!

Sai “sofrimento” boot liu iha “solidão” (kesepian) no “amargura” (kepahitan, perasaan pahit) mak wainhira ukun-na’in sira usa “poder Estado” nebe boot liu hau nia capacidade, atu obriga julga hau iha Tribunal Distrital Dili! Afinal, “crime” (corrupção) nebe hau halo hodi prejudica Estado mak “empresta kareta” atu halo festa Bicentenário (tinan 200 Santo Antonio, Manatuto). Halo nusa ba mos “legalmente” hau nia caso absolvido; maibe moralmente hau “tama dadur vida tomak” (penjara seumur hidup). Único padre no único ser humano iha mundo nebe husu ajuda ba Estado/ Governo (frágil?) atu halo buat di’ak (peacebuilding?), maibe ikus mai hatan tribunal. Hau banati-tuir Papa Francisco dehan “Pecador, sim! Corruptor, não!” – ema lekar hau nia pecado ne’e la’os buat todan, maibe julga hau nudar corruptor (estraga Estado nia osan ba beneficio próprio hamutuk $532, 38) ne’e halo kanek fitar iha fuan ba nafatin.

Hau lalika halo “defesa de honra” hasoru Estado/ Governo, tan sira nebe halo ba hau la’os ema nebe iha “honra” no “digno”. Sira simplesmente “detentor do poder” (penguasa lalim) nebe la iha “sentimento de justiça”. Ou, tuir Senhor Helder nia liafaun karik sira nee sofre hela “state of fragility”. Konaba insulto “bulak feto”, ema barak iha facebook mak rame-rame ataka ona sira (hau sente desmoralizado; maibe psicologicamente hau diak hela; hela aat liu mak dehan “padre bulak mane” ba hau). Hau hanoin, ema sira be insulta hau la iha duni personalidade; sira mesak tauk ten nebe subar iha identidade falso, liu-liu sira “la mane” tan usa identidade feto sira nian.

Hau so sente “estranho”, katak, Dr. Helder da Costa ka “suporter politik” sira nunca hakerek artigo ka halo entrevista ruma hodi halo “defesa de honra” ba “altas personalidades”, wainhira ema posting foto ka hakerek aat iha facebook.  Keta halo hau mak sala! Maibe, hau sente liu katak Maun Helder da Costa falun aan iha liafuan “defesa de honra” ka “temi let altas personalidades seluk” atu nune’e labele kritika hasoru Helder da Costa, PhD rasik.

Iha depth hermeneutic hau bele hare oituan katak la’os artigo “teoria maka’as, praxis namlele” mak provoca Maun Helder nia pensamento, maibe temi nia naran fila ba fila mai no “alta personalidade” ne’e mak choque ninia sentimento!

Iha Maun Helder da Costa nia posição nudar “public figure”, lalika gasta tempo demais ba “defesa de honra”. Se lae, ita hakerek artigo dala ruma la sama iha rai, maibe semo iha kalohan. Hau hanoin, nudar académico ka eis-academico, ita lalika “cengeng” (ita nia lian dehan “me-ana”) konaba “defesa de honra” maibe halo “camradship of philosopher” (Aristoteles), katak lori hanoin ba hanoin, lori argumento ba argumento, lori artigo ba artigo mak atu hatan malu! Sa tan iha “camaradagem” ida ne’e, sasukat mak dehan “it is finner and more godlike to attain it for a nation or for city-state” (Aristoteles, EN 1094b10). Ne’e duni, ita hotu halo debate ka critica hanesan serbi Nação no Estado, ne’e hahalok “mais nobre” (lebih mulia) no “mais divino” (lebih ilahi). Ba Helder da Costa PhD, hau foti liafuan husi São Paulo be dehan: “So now have I become your enemy by telling you the truth” – “apakah saya telah menjadi musuhmu karena mengatakan kebenaran kepadamu?” (Galatians 4, 16).

“Kritikideologie”: A pratica é o critério da verdade

Hau hanoin, “teoria maka’s, pratica namlele” sei los hela! Helder da Costa PhD nia artigo seidauk sobu hanoin ida ne’e! Hakerek artigo hatan ba malu, tuir ita nia líder carismático Nicolau Lobato dehan: “... A nossa unidade ideológica proclamada só será autentica quando a materializamos na pratica. Muitas vezes há necessidade de rever o caminho e rectificar os erros. Outras vezes é preciso juntar grande forças para removerem enorme obstáculos”. Liafuan hirak ne’e atu halo klean liu tan saida mak ita baibain habadak ho liafuan “a pratica é o critério da verdade”.

Hau aprende filosofia marxista tinan 3 iha Roma. Hau hanorin filosofia marxista iha Dili tinan 12 ona. Tuir hau nia leitura, liafuan hirak be Nicolau Lobato ko’alia ne’e hanesan resumo ba “kritikideologie” Marx nian (cf., Theses on Feuerbach) no “phronēsis” (= katak, teoria-praxis hamutuk) husi Aristoteles (Nicomachean Ethics, Book VI). Nicolau Lobato ninia hanoin mak hatudu iha liafuan chave sira: “verdade” (lia-los) sikat hamutuk ho “autentica” (husi hun no abut); lalika tauk ko’alia konaba “praxis” nudar sasukat ba lia-los; no liu-liu aten brani atu bele “rever” (hare hikas), “rectificar” (tetu hikas) no maka’as liu atu “removerem” (hasai tiha) buat hotu nebe taka ita nia dalan hodi luta ba “ukun rasik-an”.

Tan sa mak hau tenki temi Nicolau Lobato ho nia liafuan “a pratica é o critério da verdade”? Husi ne’e mak hau hakarak hatudu ba Dr. Helder, katak “Diferencia boot entre ami nain rua” hare tun sae ba, afinal, la iha diferencia liu. Hare ba debate iha TVE no www.forum-haksesuk, hau nota katak wainhira Helder ko’alia konaba “outward looking” la mai husi teoria (ka, “definição”) maibe “praxis” iha rai-liur (Guine Bissau, São Tome e Principe, Sudan). Saida mak Dr. Helder dehan konaba ba hau nia “inward-looking” mos mai nafatin husi “praixs”, maski klot hela de’it – husi Lospalos to’o fronteira, husi Jaco ba Atauro no to’o de’it Oe-Cusse. Ne’e duni, Wa’i Helder hare husi “pratica” iha rai-liur nudar “criteria da verdade” (sasukat ba lia-los), hau mos hare ba “pratica” iha rai-laran nudar “critério”. Ne’e duni, keta hanoin “outward-looking de’it mak wow”; hau dehan “inward-looking mos wauw mak ne’e!”

Tuir hau nia hare, Dr. Helder da Costa dehan katak hau nia hanoin la los tan la halo “definição”! Ida ne’e los duni, hau la halo definição. Wainhira halo “definição”, katak, ita usa ona “deductive method” – tur iha teoria leten mak hatun lia atu hakat tuir iha lalaok loro-loron nian (Helder nia liafuan “experiencia husi rai-liur”). Nune’e, inconscientemente (secara tidak sadar), Maun Helder hakarak hametin lai ninia “teoria” husi “outward-looking” (teoria husi rai liur?) mak hakarak mai sukat rai Timor-Leste! Hau hakat husi “inductive approach” – hare moris loro-loron nian iha Timor-Leste mak buka oinsa fahe experiencia ba rai liur.

Se ida ne’e mak Sekjer g7+ ninia “point of departure” (teoria), hau la iha duvida atu simu buat hotu nebe nia explica iha ninia artigo. Too Helder nia adepto sira iha fb dehan hau KO kedas mos los hotu. Oinsa mak hau bele contra, se ninia “definição” tuir “ahli” husi rai-liur. Hau iha de’it rai laran! Lalehan mak defini rai-klaran, la’os rai-klaran mak manda lalehan. Nune’e, buat hotu nebe hatur iha New Deal For Engagement in Fragile States (Busan, Korea 2011) no oinsa mak Helder da Costa formula sasan hirak ne’e iha ninia artigo los hotu kedas! Be definição mak mai uluk ne!?

Hau lembra, dala ida Dr. Helder da Costa ba ko’alia iha Manatuto konaba g7+ (tempo neba hau sei sai hanesan pároco iha Manatuto)! Laos Manatuto de’it, maibe iha “safari politik” haleu Distrito sira seluk.

Situação sai paradoxal tebes – wainhira equipa g7+ halo explicação hotu tiha, mosu sessão “husu-hatan” (pergunta-resposta). Saida mak mosu? Povo/ sarani sira iha Manatuto husu konaba estrada, be mos, ahi, ai-moruk, hahan, escola, ... no buat rihun-rahun oan sira be loro-loron Povo Timor hasoru! Ninia resposta halo hau kabun dulas – g7+ la hare ba buat hirak ne’e. Wainhira Sekjer g7+ explica katak sira nia serviço mak atu fahe experiencia konaba oinsa mak ita nia Maun Boot hakarak ajuda nação mukit sira iha liur atu hakat liu crise, hau nia ema sira iha Manatuto mos nonok de’it ona.

Experiencia ida ne’e mak Maun Helder dehan “inward-looking” karik? Atu sai honesto, hau moris loro-loron nian hare duni husi uma-laran. Nudar padre no académico, hau labele dehan katak saida mak Povo Timor ko’alia bisu-bisu malu ne’e buat mesak furak, funan-renda. Labele! Hau hatene katak Povo Timor-Leste moris iha incerteza nia laran; Partido Politico sira moris iha impasse nia laran; Lider sira (liu-liu “altas personalidades”) halo filme “Tom and Jerry”. Ho liafuan badak, praxis iha Timor ne’e hanesan “moris namlele”.

Ho limite nebe hau iha, hau koko fo contribuição constructivo! Hau organiza festa Bicentenario Santo Antonio (1815-2015) iha Manatuto. Hau husu tulun ba Ministerio hotu-hotu, instituição sira hanesan F-FDTL no PNTL, inclui Presidencia da Republica too Parlamento Nacional atu fo tulun ba “peacebuilding” ... Soru motu Rentau Anan ba dame! Festa boot. Transmissão Direta husi TVTL! “Rentau anan” (Manatuto oan) sira iha rai liur, sira nebe serviço iha Inglaterra mos lakohi lakon lerek – sira foti oin mak haruka kedas “lilin” ba Ama-Bein Santo Antonio iha Manatuto (mai kedas ho sira nia “duta besar” lori “amplop lilin”); sira nebe iha Indonesia (Atambua-Kupang-Bali-Jawa) mos lori “liman etun” ba Amo Deus Koronel Santo Antonio. Ida ne’e hatudu ba Dr. Helder da Costa ho ninia aliado “sumbu pendek” sira iha Partido laran katak praxis “peacebuilding” iha Manatuto ne’e constructivo no educativo. Hau implementa hela CAVR no CVA nia ideia; hau halo hela g7+ nia hanoin konaba peacebuilding.

Iha TVE hau sukit kois “peacebuilding” ne’e, no husu Sekjer g7+ nia hanoin – oinsa mak nia hare konaba julgamento iha TDD (2017-2018) wainhira hau hetan tulun atu halo programa “peacebuilding” ne’e nudar corrupção? Hau “kesewa” liu hare Dr. Helder doko ulun de’it ...! Wow mak ne’e!

Maibe agora hau compreende, katak, “Senhor Martinho Gusmão la hatudu definição”, inclui konaba “peacebuilding”. Kala ida ne’e mak halo katak programa be hau halo hodi involve ema barak husi Portugal, Inglaterra ho Indonesia ne’e sala boot! Ka, tan Padre Martinho Gusmão mak halo ne’e la vale, so ami sira be serviço iha Estado ka Partido mak maka’as?

Hau hare katak Dr. Helder hakarak subar iha “definição” ka “compreensão” ka “outward-looking” nia laran atu halo “deductive approach” konaba “statebuilding” no “peacebuilding”. Sekjer g7+ koko atu injeta hela “kesadaran palsu” (Romo Magnis-Suseno, SJ) ka “false conscience” (Karl Marx) ka “enganadoras por utópicas” (Nicolau Lobato) iha debate no artigo nia laran.

Ita bele hare iha Helder ninia artigo – wainhira hau dehan “tecnocrático”, nia la simu, maibe nia gosta liu temi “tecnocrata”. Tuir lolos, ida ne’e Ato Lekinawa da Costa mak husu: “ita boot ne’e diplomata ka contratado”? Husi ne’e mak Helder dehan “tecnocrata”. Uluk nana’in, wainhira ko’alia iha TVE, iha hau nia ulun laran mosu liafuan “technocratique” (francês), atu tau ba bahasa Indoensia “teknokratik” maibe la sai hela de’it. Nune’e, iha situação “darurat” mosu mai mak liafuan “tecnocrático”! Hau la dun intende didiak saida mak “tecnocrata” (hau hanoin – technocracy?). Ne’e duni hau mak hetan confusão.

Iha artigo, hau usa liafuan “tecnocratique” (iha ulun laran mosu Martin Heidegger no Hans Georg Gadamer ninia analisa; hau hakerek livro ida publica iha Indonesia konaba sira na’in 2 ne’e) atu hatudu ba matenek na’in nebe hatene ciência teorética ho técnica hodi hetan posição importante iha governo (Estado) nia laran atu bele halo gestão ba problema técnico sira. Iha posição ida ne’e mak hau hanoin katak Helder da Costa ne’e “technocratique” – katak, académico ida nebe domina área técnica “poder” nian. Claro, Dr. Helder da Costa la’os especialista iha aviação ka marina, oinsa mak hadi’ak makina sira. Maibe, oinsa mak halo “social engineering” (hanesan projecto Lenin nian). Iha ne’e mak hau “siniku” ka “sarkastiku” oituan ba nia! Ho liafuan “technocracy”, wainhira Estado ida hili ninia programa politico atu haboot no habelar teknologia (hanesan uluk B.J. Habibie hakarak halo iha ninia presidência). Hau la hatene wainhira Dr. Helder dehan nia “tecnocrata” ne’e hatudu ba “tecnocratique” ka “tecnocracy”?

Fallibilism theory: Misterio doloroso g7+

Dr. Helder halo observação critico hodi hare “fallacy” hat (4) iha hau nia artigo laran. Liu husi “falsificacionismo metodológico” (Karl R. Popper), hau hakarak hatudu hikas mistério doloroso 5 (lima) iha g7+ nia laran.  

Misterio doloroso dahuluk (1), Helder husu atu hau halo definição konaba nationbuilding/ peacebuilding. Hau hare, iha ne’e mosu ona falsificacionismo “dogmático” – katak, wainhira hau la apresente “definição” nune’e ideia konaba “nationbuilding” hanesan de’it “fallacy” ida. Hare husi Popper nia hanoin, “definição” sai tiha hanesan sasukat ka “caso falsificador”. Definição mak la los, nune’e realidade Timor-Leste falso! Maibe, Maun Helder la temi katak iha TVE hau dehan conceito “nationbuilding” la tama iha g7+ nia hanoin. Hau mos dehan, conceito “peacebuilding” hatama no hatan ona ideia konaba “nation” nia agenda iha g7+ laran! Agora konaba “peacebuilding” ne’e cabe ona ba g7+ mak defini! La’os hau. Hau defini “statebuilding”, la defini tan ona “nationbuilding”. Buat nebe hau gosta hatene mak oinsa ka tan sa mak “nationbuilding” la tama iha g7+ nia agenda, nune’e lakon husi “advocacy”!

Iha dalam klaran, Dr. Helder halai fali ba asunto foun, acusa hau dehan ba “minimiza panelisa seluk, inclui hau [Helder] ho Sr. Antonio Araujo husi MNEC”. Wow mak ne’e ... panelista seluk mak Ato Lekinawa da Costa de’it. Hau le sala, ka, Dr. Helder mak hakerek sala? Afinal “panelista seluk” ne’e ko’alia malorek oituan konaba we-manas ahi-tukan Timor-Leste nia kolen no terus nebe g7+ la sura. Hau hanoin, problema “definição” ne’e Dr. Helder da Costa halo sai tiha “mistério” foun ida, maibe “doloroso”. Tan sa? “Definição” ne’e hanesan suku tiha faru mak tesi ema tuir faru, la’os tesi hena tuir sasukat ema nian mak suku faru ba ema! Uluk iha bahasa Indonesia hau aprende “jangan menggunting orang sesuai ukuran baju, tapi guntinglah baju sesuai ukuran orang”!

Misterio doloroso daruak (2), konaba g7+ ne’e tama iha MNEC ka PM ka Ministro seluk? Tuir lolos, pergunta ne’e Ato Lekinawa da Costa mak halo iha TVE. Hau foti hatur hikas iha hau nia artigo! Resposta husi Sekjer g7+ halo hau surpresa boot: “Timor-Leste atua hanesan paiz antifrã (uma nain), pioneiro, fundador no doador”. Liafuan rua – “anfitrã” no “doador” ne’e mak sai “mistério” daruak, - doloroso nafatin. Uma nain iha Dili, uma na’in iha Lisboa, uma na’in iha Washington, uma na’in New York. Se Timor-Leste mak “doador”, membro g7+ sira seluk sai “beneficiário” ga? Se ita mak “doador”, katak, ita la’os Estado Fragil to? Ne’e be “doador” sira husi USA ka EU nia paradeiro iha nebe? Misterio tan fali ona! Hau hanoin ida ne’e mak “falsicabilidade” – katak, Dr. Helder ninia explicação la fo naroman maibe liu husi resposta ne’e nia nain rasik falsifica tiha g7+ nudar Estado frágil.

Misterio doloroso datoluk (3), atu sai nafatin “falsicáveis” (bisa dipalsukan), Maun Helder koko hatudu katak Timor-Leste sai husi “circulo vicioso” (baibain bahasa Indonesia dehan “lingkaran setan”) ba “circulo virtuoso” (bahasa Indonesia – “lingkaran kebaikan”). Maibe, Dr. Helder ninia manias sai fali ona hodi halo saida mak Karl Popper dehan “afirmações estreitamente universais” (afirmasi yang langsung bersifat umum) – nia dehan “paiz trankilu, hakmatek, bele atrai investidores mai investi iha ita nia rain, fo servisu ba maluk Timor oan sira, no sst.”! Los duni, “outward looking” ninia resultado mak ne’e ona! – Hau hanoin, Dr. Helder ba ninia office g7+ iha Palacio do Governo nia sorin ne’e iha kalan boot, ahi mate, kareta vidru metan – nia la hare liu kedas Embaixada Portugal besik 50 metros iha neba. Tan sa mak ita nia jovem barak mak halai ba Portugal atu liu ba Inglaterra? Hau atu hamnasa maibe fuan kanek, hau atu tanis maibe salut ho foinsae sira ninia “perseverança” (tahan banting). Maibe, hau dehan ba Maun Helder, g7+ la haloooo ba Timor-Leste! Ita mak agora “investe maka’as” ba ema seluk ... trabalhador foinsae sira ba fila liman no fera ulun iha ema nia rain.

Hau entusiamo tebes rona se karik Sekjer g7+ iha plano halo “advocacy” konaba sosa aksaun ConocoPhilips no Shell. Ida ne’e bele “atrai investidores mai investi iha ita nia rain” ka ita mak ba “investe” osan iha ita nia tasi laran rasik? Hau la dun compreende: tasi no mina ita nian tiha ona, depois ita ba sosa fali ita nia sasan ho ita nia osan ba ema liur nebe tur iha ita nia toos laran? Husi sikun “inward-looking” (hare husi uma laran), AMP dehan “Kadoras mai TL, hatama reseita boot ba Estado”. Husi fali “outward-looking”, hau le iha internet ka website lubuk ida no hau rai hamutuk liafuan sira hanesan “complete absence of supportive technical” (ita nia tekniku sira atu suporta ne’e la iha liu kedas); “financial evidence” (bukti keuangan) mos la iha; “technical risks and costs” (risku ba tekniku no osan) too ikus mai sira dehan “government is playing a dangerous game of chicken with public funds” (governo ba dadauk futu manu nebe bahaya boot hodi taru fundo Estado nian); ita mak sei hasoru “lost of sovereingty” (lakon soberania) too “impoverished nation’s economy” (halo kiak nasaun nia economia). Ema liur halo analisa naruk no liu husi dados, numero no tekniku. Ita nia noticia sira ba conta fali historia luta nian no hamoris “super-state” ida iha “fragile state” nia laran. Koko took ba Maun Helder, ita halo “advocacy” hodi “trust” nia naran.

Hau bele deit dehan: Astagafirullah aladziim!!! Los duni: nudar Padre, ami halo misa intenção hodi reza ba suksesu Xanana Gusmão. Maibe, nudar dosente filosofia politica, hau hare ba lalehan no mosu “Super star” iha Estado nia leten, composta husi “caesarist dictatorship” (Max Weber; Hannah Arendt) ida, no ema hotu-hotu loke ibun, nonok! Parlamento Nacional, yes women (hau tau “women” la’os “yes men” de’it, tan grupo “ID feto” iha fb mak ataca bebeik hau; resultado husi “promoção ba igualdade género humano feto”???); PR jelado, PM congelado. Maibe, liu-liu hau desafia to’ok se g7+ bele halo “teoria” foun “kutu loncat” husi “Fragile State” ba “Super State”.

La hatene oinsa mak Dr. Helder halo “salto mortal” iha ninia logica, nia mai kedas ho liafuan “Maibe, iha prosesu trajetória desenvolvimento Timor-Leste nian, ita infrenta dimensaun fragilidade lima [a] Fragilidade Seguransa (security fragility); [b] Fragilidade Politica (political fragility); [c] Fragilidade societal (societal fragility); [d] Fragilidade ekonomika (economic fragility); no [e] Fragilidade ambiental (environmental fragility)”.

Exemplo: hasoru “environmental fragility”, União Europeu (EU) hari’i fundo multilateral atu ajuda MAP (Ministerio Agricultura e Pescas) hodi halo sira nia programa, liu-liu halo “conservação we-mos” hanesan resiliência hodi hasoru mudança climática. Sekjer g7+ la temi kedas liafuan ruma – projecto ida ne’e hanesan parte ida husi “advocacy” g7+ nian lori projecto mai ita nia rai laran, ka, “doador” sira husi Eropa rasik mak hakarak monta sira nia politica no “policy” foun atu ajuda Estado Fragil? Hau lalika ulun moras atu buka resposta, tan Maun Helder rasik dehan ... realidade ita sei sai husi fragilidade ba resiliência! Tuir mai, desesperadamente (dengan rasa putus asa) nia hatutan: “bainhira los, ita la hatene tan prosesu desenvolvimento pais lori tempo naruk”. Oh, Misterio doloroso!? Hau nia logica hanesan los “ema tau haleu ai-tarak iha Jesus Cristo nia ulun”. Pergunta hau nian – “Timor-Leste sei frajil ka sai ona husi fragilidade”? – hela nafatin hanesan “entre os esplendores da luz perpetua”.

Misterio doloroso dahaat (4) – konaba “inward-looking” (hau hare de’it uma laran) – Dr. Helder hatan ho liafuan moral no espiritual – “ita hotu preocupa duni situasaun ne’ebe lao iha iserteza nia laran”! Ida ne’e hatudu katak Maun hatan duni “praxis namlele”? Hau la hatene! Tan, ida ne’e mistério doloroso seluk tan – lori kruz todan iha kbaas leten. La iha membro g7+ mak sei ajuda ita. Ita la’os “frágil” maibe “doador” ba fragilidade – ba rai liur ita fo osan, mai uma laran ita gaba-sola an! Dr. Helder dehan “kestoens interna Timor-Leste nian, nebe paiz seluk mos laiha direitu atu mai halu interferência”.  Be ita ba halo saida iha Guine-Bissau no São Tome e Principe ka Sudan? Dr. Helder hatan “bazeia ba konvite no kolaborasaun”. AMP husu karik – “carta convite iha nebe?” – ita hatan “... ida-idak ba halo pedidu”. bingo!

Misterio doloroso dalima (5) – hau bele mateeee!!! Dr. Helder dehan “se MG iha ideia progressivu atu servisu hamutuk ho g7+, hodi promove dialog, seja bemvindo, mai ita servisu hamutuk, fo lisuk ideias, no fo enerjia positivu hodi fo tulun ba malu, kontribui ba prosesu desenvolvimento ita nia rain nudar post-konflitu”. Hau hare ba hanesan fali Dr. Helder hakerek musika Koes Plus nian – “terlalu indah dilupakan, terlalu sedih dikenangkan”! Exemplo ida de’it – hau promove peacebuilding lori halo programa boot iha Manatuto 2015, hau ba para kedas iha Tribunal. Tinan ida tomak hau sai “arguido” (6 Outobru 2017 – 9 Outubru 2018). Ba hau, liafuan “arguido” ne’e hanesan humilhação (penghinaan) no violação ba direitos humanos, tan MP iha ona “target” atu “castigo” hau. Ida be serviço grátis no husu tulun oituan de’it, hau han ona pancada. “Serivisu hamutuk” ho osan boot, kala hau foin mak mosu iha g7+ nia Secretariado, borgol hein kedas! Lalika ida, ... hau “fo lisuk ideias” de’it.

Konkluzaun

Tuir hau nia hare, Maun Helder da Costa hatudu posição hanesan “a dictatorship of relativism”. Ne’e katak, saida mak di’ak no los wainhira tuir Helder nia gosto ka ninia adepto sira; wainhira la monu ba sira nia laran, ne’e la los ka la compreende! Tan ne’e, nia halo tiha analisa politica konaba advokasia g7+ nian, maibe ikus mai foti konkluzaun moralista no espiritualista. Nia la’os ona loke dialogo nebe franco no amigável, maibe nakonu ho insinuação. Ninia liafuan mak ne’e – “MG la iha espiritu solidariedade maibe hatudu arrogância intelektual”.

Solidaridade ne’e saida? Dom Helder nia hanoin, solidariedade katak wainhira hau hare buat ruma la’o naksalak ka kudeuk, hau kous no tane aas nafatin nia karik? Iha Igreja Catolica, liu-liu husi kedas Papa João Paulo II nia hakerek (encíclica Laborem Exercens [1979], Solicitudo rei socialis [1989]; Centesimus annus [1990]), hanorin katak “solidariedade” hanesan dalan ida atu fo liman ba malu liu-liu hare ba bem-comum (bem-estar material e espiritual). Nudar Timor oan, hau fo hanoin ba Dr. Helder katak ita nia CRDTL 2002 iha Preambulo mos ko’alia konaba “construção de um país justo e próspero e o desenvolvimento de uma sociedade solidária e fraterna”. Ne’e duni, solidariedade hatudu ba hau nia rain, hau nia povo rasik. Timor-Leste ne’e sai lai “sociedade solidaria”. Tuir mai Timor-Leste ne’e sai lai ita nia uma, ita nia horik fatin, simu malu iha “fraterna” nia laran. Hau gosta traduz liafuan “fraterna” ne’e ho liafuan “firaku” (fi + raku; wainhira “fi” katak “ita” + “raku”/ “bada” katak maun-alin/ belun) ka “kaladi” (mai husi Melayu antigo kaka + ade = maun ho alin).  

Ba académico ida, la’os “arrogância intelectual” mak sukat, maibe sura mak “better argument” atu ita hotu to’o iha “claims to truth” (tuntutan pada kebenaran) no “claims to rightness” (tuntutan pada ketepatan). Hau la “tersinggung” se Dr. Helder da Costa dehan MG la compreende buat ida, LA LOS, ka arrogante no seluk tan. Nudar docente filosofia, hau sadere nafatin ba saida mak Aristoteles dehan konaba “camradship of philosopher” (Aristoteles) – katak, ita nia amizade baseia ba pensamento, hatur iha “principio justo, método correcto” (Nicolau Lobato).

Hau nia principio katak ita la’os “cendekiawan abdi dalem” (Gus Dur nia liafuan). Maluk sira nebe uluk escola iha Yogyakarta no Surakarta/ Solo hatene se no saida mak “abdi dalem” ne’e – katak, ema hirak nebe loro-loron tur haleu “keraton” tanat iha neba hein “Ngarso Dalem” (Nai Liurai) hateten atu sira halo tuir de’it. Iha Timor antigo nian karik “abdi dalem” ne’e hanesan Liu-rai nia atan sira.

Nudar Brini-lale anan, hau mos sujere ba hau nia Maun Helder da Costa PhD, lori liafuan husi Ita Na’i Jesus Cristo: “Seja este o vosso modo de falar: Sim, sim; não, não. Tudo o que for além disto procede do espirito do mal” – atu imi koalia karik buat ruma: los, los, lae, lae. Buat seluk be liu ida ne’e mai husi maharere-buisole-makame sire (Mateus 5, 37; Tiago 5, 12). Liu-liu nudar “tecnocrata” – tau bebeik pergunta ne’e iha fuan no laran – “... será que as resoluções que tomo são puramente humanas, de modo que haja em mim o ‘sim’ e o ‘não’ ao mesmo tempo?” - ... adakah aku membuat rencanaku itu menurut keinginanku sendiri, shingga padaku serentak terdapat “ya” dan “tidak” sekaligus? (2Corinto 1, 17).