Marcha da paz hodi lori Mari Alkatiri fila ba Poder

Iha hakerek konaba «Oinsa maka Mari Alkatiri to´o poder», STL hatun iha fulan Agosto 2005, koalia konaba, Mari Alkatiri to´o poder liu husi processo ida, laos tur-tur Mari Alkatiri simu poder, maibe tenke liu husi luta ida. Iha hakerek nebe maka STL no Forum Haksesuk (FH) hatun fali iha edisaun 30 Agostu 2007. Hare fila fali MA ninia luta ba kaer ukun, to´o ukun maibe halis fali husi ukun. Tuir hakerek «Oinsa maka MA to´o poder», hare ninia pontu no.7) To´o topo no dekliniu husi poder:

(…) “Wainhira to´o iha "topo poder” Dr. Mari Alkatiri halao estrategia politika oinsa maka bele assegura ninia governasaun. Kuandu iha topo poder ona, Mari Alkateri ninia konsepsaun ba poder maka “Poder tuir definisaun klasika”: Nudar ulun bot ka Ukun Nain ne tur iha «topo da pirâmida» nia leten no hodi manda sira iha kraik ka «base»”. Adopta estrategia politika “Top Down” no ladun fo hanesan atensaun ba politika “Button Up”. Katak poder ne husi leten hatun ba kraik, laos husi kraik maka hasae ba leten. Tamba ita hare ba natureza emar rai Timor LoroSae ninia konsepsaun ba poder maka ne «Iha Reino maka Iha Ukun Nain, La Iha Reno la Iha Ukun Nain sira». Tamba fiel deit ba ninia konsepsaun konaba Poder no ninia materializasaun liu husi: Ladun promove dialogo ho Oposisaun, ladun fo hanesan atensaun ba kritiku sira, no utiliza diskursu sira hanesan “hau maka PM hau maka manda, ami povo maka hili hodi Governo (Maibe Timor seidauk halo tok Eleisaun Legislativa)”, eleisaun iha maka eleisaun ba Assembleia Konstituinte ho mandatu fulan sia hodi hakerek Ukun Fuan Inan (UFI) (in STL, 17,18 i 19, Agosto, 2005) no Forum Haksesuk (FH, 30/08/2007)”.

Iha Mari Alkatiri ninia ukun, maka mosu krise Politika no militar iha tinan 2006, resultado eleisaun suku iha tinan 2004/5, Fretilin ninia votantes monu ba 46%, iha presindenciais 2007, Kandidatu Fretilin la ultrapassa 30% no legislativa votasaun F nian to´o deit 28%, maske manan maibe Fretilin ninia % lato´o atu harii Governo mesak, buka hetan koligasaun ho partido seluk. Se ida uluk la konsegue, neduni konta ho hipotese ida seluk, maibe Fretilin la konsegue atrai partido seluk hodi ba halo koligasaun pós-eleitoral.

Ne´e tan saida? Hare fali ninia perkursu oinsa maka to´o poder, neduni partido seluk lakohi koliga ho Fretilin MA. Neduni MA ho F buka halo refleksaun bo´ot ba sira nia-an rasik, liu husi kongresso extraordinario. Maibe nem halo analise ba resultadu eleisaun sira nebe maka Fretilin hetan derrota bo´ot, Mari Alkatiri ho Fretilin buka dadauk dalan fila ba poder ka kaer ukun liu husi «Marcha da Paz». Tuir lolos troka naran ne´e «Marcha pelo Poder». Tamba Marcha ninia objektivo maka: Mari Alkatiri ho ninia grupo fila ba poder. Paz ne´e tuir ninia definisaun katak” «Ausência de conflitos ou guerra», wainhira promove marcha da paz tamba ita iha funu laran, maibe hare realidae Timor la funu (sentido funu ho kilat).

Propaganda

Fretilin mos agora halo mobilizasaun oinsa maka lori emar barak ba tuir «Marcha da Paz», atu lori emar barak ba tuir aksaun nebe lideransa husi Fretilin nian organiza, sira buka foti issu ruma nebe bele lori atrai ka mobiliza emar barak. Tuir Vicente Maubocy ninia hakerek iha Forum Haksesuk katak: “Ita hotu hatene, base makas FRETILIN, maka Baucau, nebe FRETILIN manang ho margem bo´ot, kompara ho partidus politikus sira seluk. Deputadus FRETILIN balu, ba duni Baguia, Quelikai, Baucau, Venilale, mas infelizmnte la conssegue konvence militantes barak atu simu sira nia convite. Tamba suporters hussi Baucau la iha interesse maka komissaun organizadora, muda fali centro de concentrasaun ba Distrito Ermera (FH,10/09/2008)”.

Muda husi Baucau ba Ermera, tenke buka mos lansa issu ruma nebe sensivel maka bele hodi kapta apoiantes. Tamba ne´e maka propangada nebe promotores Marcha da paz nian halao dadaun iha base hodi dada adeptos ba tuir maka ne´e: AMP mesak nakonu ho otonomistas no foti fila fali issu etniku. Ho issu rua ne´e promotores ba Marcha da Paz ka marcha pelo poder buka lori adeptos liliu husi parte Distritu sira husi parte «oeste» ba adere ba aksaun ne´e.

Hamosu issu rua (2) otonomistas ho etniku, ne´e desafia husi esencia no definisaun konaba ba Marcha da Paz ne´e rasik. Sira ninia objektivo maka, oinsa maka kria fila fali «instabilidade politika no sosial» iha rai laran, atu nune hafoin bele anula sucesso nebe Governo AMP alkansa iha kampu social no resolve ona problemas sira nebe maka Governo Mari Alkatiri kria hela hanesan: Problemas Peticionarios; Problema deslokadus Internus no rekonyecimentu ba papel Kombatentes ba Libertasaun Nasional, fo mos subsidios ba katuas ferik no sira nebe maka la iha possibilidade (invalidos). Hatudu katak Governo AMP no PM Xanana Gusmao buka duni dalan ba lian sira nebe maka Governo Mari Alkatiri husik hela.

Tuir Filipe Rodrigues Pereira ninia hakerek konaba «EKSISTENSIA GOVERNU AMP VS ISSU OTONOMISTA NO ETNIKU», hatun iha Timor Post (08/08) no Forum Haksesuk (FH, 26/08), tuir autor ninia hakerek dehan katak: “Governu ida nebee lidera husi Xanana Gusmao hetan resistensia politika kontitusional husi partidu Fretilin nudar partidu opozisaun no interest group balun. Resistensia hasoru IV Governu nee sei haduir nafatin ho issu oi-oin. Issu nebee mak sei ‘hamanas’ fali situasaun mak issu otonomista no issu etniku (in TP,08/08 no FH,26/08)”.

Foti issu rua (2) nebe sensivel tebes ba ita nia povo, atu nune bele lori ema barak ba hakilar iha Dili Hatun Governo AMP no PM Xanana. Fretilin no Mari Alkatiri, lansa issu rua (2) nebe maka sira rasik lansa iha biban krise Politika no Militar iha Tinan 2006. Fretilin ho Mari Alkatiri hatudu liman ba Xanana maka fahe Timor ba rua (2) Lorosae vs Loromono, sira nia argumento ne´e maka agita apoiantes no simpazantes Fretilin iha parte distrititu 3, Baucau, Viqueque no Lospalos hodi kontra Xanana. Ikus mai Mari Alkatiri ho Fretilin maka uja issu etniku hodi ba mobiliza massa husi Distritu sira Loromono. Hatudu momos katak "Kakutak ka ideologo ba fahe Timor ne´e maka Mari Alkatiri ho ninia grupo Maputo”. Tamba Mari Alkatiri sira hakarak harii Timor, maibe buka sobo rahun tiha hafoin harii fila fali, tamba ne´e maka Mari Alkatiri dehan iha biban seluk haktuir katak “Timor la iha lisan” no wainhira Presidente Republika la bolu Fretilin ba harii IV Governo Constitucional, militante Fretilin sira sunu uma Lulik iha Manufahi. Hare komentario no pratika koresponde ba malu, “Mari Alkatiri iha eleisaun Presidencial 2ª volta nia deklara nune: Timor la iha Uma Lisan. Oras ne´e dadaun sira nia militante Fretilin tau dadaun ona iha Pratika, oinsa maka halo hotu uma lisan sira, horseik kalan (12/08/2007), iha Babulu, Same, Militante Fretilin sira ba sunu Uma Lulik ida, Uma Lulik naran Uma Bo´ot, iha Suku Uma Leurai, Ailok-laran. Hatudu katak Mari Alkatiri ninia tese tau dau-daun ona iha Pratika (hare FH, 13/08/2007)”.

Mari Alkatiri demite ka resigna-an

Tuir Mari Alkatiri iha deklarasaun foin dadaun katak “Se Militante Fretilin la tun ba participa iha Marcha da Paz ka Marcha da paz transforma ba violencia, nia demite ka resigna-an husi Sekretariu Jeral (in DN,12.09.2008). Ba militante Fretilin sira, Mari hakarak hatudu katak Fretilin maka nia deit, nia maka matenek no nia maka esperto, neduni se imi la tuir marcha hau (nia) sai husi SJ. Mos MA hakarak hatudu ba militante sira katak Fretilin maka MA, la iha nia Fretilin ne´e monu ba Xanana nia liman. Tamba sira nebe maka tuir MA, kuda iha sira nia kakutak katak FRETILIN ne maka Mari. Ho Mari maka F bele kaer ukun, la iha tan ema seluk bele kaer Fretilin, tamba MA sukat emar Timor ninia matenek la to´o ninian, ema Timor mesak Maufehuk no supermi deit. Ida hatudu momos ambisaun ka hamrok ba poder Mari Alkatiri nian. Maibe seidauk mos fiar katak Mari Alkatiri resigna tuir kondisaun rua (2) nebe nia hato'0. Se Marcha lao diak, Mari Alkatiri sei mosu mai hodi dehan katak nia maka makas duni no nia maka bele hatun Xanana. Se marcha lao ladiak no transforma ba «Violência», Mari Alkatiri sei halai ses husi responsabilidade, nia mosu mai dehan ne´e responsbilidade ba militante sira nian. Hare faktos deit: Wainhira Presidente bolu AMP ba harii Governo no hili PM, militante Fretilin sira balun laran nakali ba sunu uma Beacukai nian, Mari Alkatiri ba TVTL dehan “Sunu la iha buat ida, tamba ne´e Fretilin maka halo (hare TVTL, Agosto 2007). Militante balun ba sunu uma estado nian no Colegio madre sira nian. Militante sira balun ba sunu uma lulik iha Same. Militante sira, executa deit plano no orientasaun nebe maka Mari Alkatiri haruka, maibe ninia konsekuensia, Militante sira nebe executa deit plano no orientasaun maka ba tama kadeia, Mari Alkatiri sira diak hela. Sira moras ba trata iha Portugal, Australia ka Malaysia. Hare situasaun ladiak lori familia ba rai tiha iha Mozambique neba.

Ba militante Fretilin no simpatizante sira, wainhira sira komisaun organizadora ba tuku imi nia odamatan hodi ba tuir Marcha da Paz, buka litik mos sira: Marcha hodi lori fila fali Mari Alkatiri ba Poder ka marcha hodi kria fali «instabilidade nasional».

Mari Alkatiri ho ninia grupo fila ba poder lalais

Mari Alkatiri ho nia grupo, buka oinsa fila ba poder lalais, tamba sira iha kumprimisu barak, politika, ekonomika, social, sst. Sira ninia ambisaun maka:

Kumprimisu Politika:

Sira buka oinsa maka fila ba poder lalais, labele husik Xanana ho AMP ukun to´o tinan 2012. Se Xanana la monu agora, mukit witoan atu hamonu iha 2012. Neduni ho atentado 11/02/2008, Mari Alkatiri ho ninia grupo intensifika presaun no influencia Presidente Ramos Horta, oinsa maka bele konvoka eleisaun antecipada iha tinan 2009. Kumprimisu ho Ramos Horta, tenke fo buat ruma hanesan ninia garantia ba nia. Ramos Horta mos ikus-ikus ne´e lakohi ona re-kandidato ba 2º mandato Presidente Republika. Tamba Ramos Horta mos hatene katak nudar Presidente, ninia ambisaun la bele konkretiza. Hare deit Ramos Horta ninia frustrasaun ho Governo AMP wainhira la hakerek iha Orçamento Geral do Estado (OGE) 2008 hodi financia ba «Programa Combate Pobreza». Iha ne´e hatudu ona Ramos Horta ninia frustrasaun ho Governo AMP. Neduni Ramos Horta ho Mari Alkatiri besik, no hamutuk iha estrategia no plano ida deit, dalan maka ne´e konvoka eleisaun antecipada ba tinan 2009, Fretilin manan, hili Ramos Horta maka PM, Mari Alkatiri maka Ministro ba Mina Rai no Rekursus Naturais. Iha ne´e sira nia plano no interesse bele konkretiza ona.

Kumprimisu Ekonomiku:

Hola decisaun politika ruma, tamba iha influencia husi aspekto ekonomiku mos. Objektivo ba Mari Alkatiri ho ninia grupo ne´e oinsa maka domina Minarai liu husi sira nia empresas sira hanesan Tafui Oil, lda. Tuir informasaun nebe hakerek nain hetan, molok krise politika no militar 2006, poço Mina rai Timor nian, sira fahe ba malu ona. Fahe ba familia Mari Alkatiri nian, Rogerio Tiago Lobato no Ramos Horta.

Kasu seluk, Bayu Gas, iha governo Mari Alkatiri maka iha ona pre-akordo ho empresa Thailandia nian ida, hodi explora parte Gas. Maibe akordo seidauk to´o final, so finaliza akordo ho Governo foun. Se maka halo presaun ba Governo Xanana atu assina akordo final? Presidente Ramos Horta, tamba pre-akordo halo ona iha Mari Alkatiri ninia tempo. Maibe problema maka ne´e, empresa ida atu investe ka tanam ninia modal ka saham, tenke kumpri requizitos nebe iha, ida maka tenke iha garantia Bankaria, ninia infra-estrutura, rekursus humanos, no sst. Maibe empresa ida ne´e la garante ninia propriedade bancaria, fornece fali hepoteca ba fontes ka garantia ba estado Timor maka rai ka terra (T). Ironika maka ne´e, empresa Thailandez nian maka fo fali garantia ba ninia kapital (K) financeira la iha maibe maka kapitla T. Lojika, ita dada ligasaun deit: Se maka assina pre-akordo no se maka halo Presaun ba Governo AMP hodi assina. Neduni eleisaun antecipada, laos tur-tur hakarak konvoka deit, maibe iha mos ninia motivo ekonomiku.

Neduni Marcha da paz, sai hanesan instrumentu ida hodi konkretiza deit ambisaun grupo oan ida nian, lori organizasaun ka partido historiku ida nia naran hodi atingi ba sira nia objektivo final: Lori fila fali Mari Alkatiri ba Poder!

Lisboa, 23-09-2008

António Ramos Naikoli

Referencia ba hakerek ne´e:

Artigos konaba Marcha da Paz:

Marcha da Paz: Vicente Maubocy
http://forum-haksesuk.blogspot.com/2008/09/marcha-da-paz.html

Marcha da Paz: tamba sa? Husi: Vitor Tavares
http://forum-haksesuk.blogspot.com/2008/09/marcha-de-paz-tanba-sa.html

Oinsa Maka Mari Alkatiri to´o poder: António Ramos naikoli
http://forum-haksesuk.blogspot.com/2007/08/oinsa-maka-marie-alkateri-too-poder.html

Eksistensia Governu AMP vs Issu Otonomista no Etniku: Filie Rodrigues Pereira
http://forum-haksesuk.blogspot.com/2008/08/eksistensia-governu-amp-vs-issu.html

Mari Alkatiri maka Ideologo konaba Violência: António Ramos naikoli
http://forum-haksesuk.blogspot.com/2007/08/mari-alkatiri-maka-ideologo-konaba.html