STL - PM Xanana La Konkorda “Estadu Failadu”, maibe Estado Fragil

http://www.suaratimorlorosae.com/details.php?id=12374&now=2008-04-01


DILI- Primeiru Ministru (PM) Xanana Gusmao, la konkorda ho persepsaun husi liur, nebee dehan Timor Leste sai estadu failadu ona.

“Hotu-hotu ohin komprende katak TL laos estadu failadu, maibe estadu frajil, estadu ida sei muda konseilu hotu atu hadia,” hatete PM Xanana ba jurnalista sira hafoin inkontru ho Embaixador TL ba nasaun liur iha edefisiu Ministeriu Negosio Estranjeiru (MNE), Markoni, Dili, Segunda (31/3).

Inkontru ho embaixador TL iha nasaun estranjeiru nee hodi hatene kona ba preokupasoens husi konsuladu ho embaixador sira nebee mak servisu iha nasaun liur no hatoo mos kona ba programa governu nian.

“Politika eksterna governu nian ba ita nia rejiaun maka paz no progressu,” dehan PM Xanana.
Ministeriu Negosiu Estranjeiru (MNE) durante loron tolu halao enkontru anual ministeriu nian atu koalia kona ba estratejia no planu politika ekterna nian.

“Nee enkontru anual koordenasaun nebe iha estrutura lei organika MNE nian hateten katak tinan-tinan ami bolu embaixador no konsuladu hot mai hamutuk hodi deskuti asuntus politika eksterna. Sira mos mai iha oportunidade nee koalia ho membrus governu, PM hau rasik no ho NGO sira atu hare dezenvolvimentu iha TL lao oinsa, politika governu lao oinsa, nunee mos atu halo planementu ba tinan foun mai,” hateten Ministru Negosiu Estranjeiru Zacarias Albano da Costa.

Nia dehan, ASEAN hanesan objektivu prioritariu nebee sai objektivu boot iha politika ekterna TL nian.

“Ita hakarak tama iha ASEAN 2012, ita tenki prepara komesa agora, tanba atu sai membrus ASEAN tenki loke embaixada iha nasaun membrus ASEAN,” hatete MNE Zacarias.
Nia propin katak governu seidauk halo estudu ida kona ba hira mak TL presiza investe atu tama iha ASEAN. “Ita hanesan membership fee osan nebee ita tenki selu hanesan iha organizasaun nee besik US$ 1 milaun, depois loke embaixada, ita mos presiza diplomata iha neba no fo treinu ba sira.”

Iha ASEAN, kada tinan-tinan reuniaun kuaze 700, nebee TL tenki partisipa iha reuniaun nee hotu. TL mos tenki iha kapasidade organiza reuniaun boot sira nee. agi