MEMORIA FURAK HO O (Parabéns ba Kuadrus, Militantes no Simpatizantes)

Memória furak ho o

(Parabéns ba kuadrus, militantes no simpatizantes)

Aban ita sei selebra aniversáriu PD ba dala XIX. Ita ida-idak sei selebra aniversáriu ne'e ho ita ida-idak ninia memória furak ho PD. Iha istória komik no hamnasa ne'ebé halo ita kontenti haksolok, istória triste no tauk halo dezanimadu, istória domin, no istória seluk-seluk tan ne'ebé kompleta ita nia viagen hamutuk ho PD. Lia-fuan mak ne'e, ita nafatin urgulhu nudár FAMILIA BO'OT PD.

Ha'u sei lembra hela memória balun antes hakat ba ofisializa PD iha loron 10 fulan Juñu tinan 2001. Iha jovens resisténsia balun hari'i Institute for Democracy and Peace (INDP) ne'ebé partisipa mós kampaña edukasaun sívika iha tempu UNTAET. Joven sira ne'ebé mak ha'u sei lembra Ir. Mariano Assanami, Augusto Junior, SE, Nino Pereira, SE, Rui Meneses, SE no Jose Pedro Camões, SH, Eustaqui SP Guterres, SH, Miguel G.Martins, SiP, Ir. Julio de Castro Pereira, no balun tan (ha'u la lembra ona). Sira hamutuk mak forma INDP ne'e.

Iha fulan Abríl 2001, INDP organiza treinamentu konaba demokrasia no lideransa iha Dare ba partidu polítiku. Iha treinamentu loron ikus partisipa mós Dr. RAMOS HORTA. Iha tempu ne'e kedas, ho halimar no hamnasa ami aprezenta Partidu Demokrátiku ho Sekretáriu Jerál maka Jose Camões.

Liu hosi halimar no hamnasa ne'e, ami komesa sériu atu aprofunda liu tan oinsa maka konkretiza tiha ideia ne'e. Tan ne'e hothotu hahu buka kontaktus hodi halo ligasaun privada/individual no  organizasoens nuné bele hetan tan opinioens ba planu hari'i PD.

Lider resisténsia hosi FPI (Frente Polítika Interna) no  organizasoens resisténsia juveníl oin-oin, hanesan Renetil, Ojetil, Opjelatil, Fitun, Sagrada Familia, Dpp Impettu, Dsmptl, UJTL, Forsarepetil no orgaun seluk tan, sira apresia tebes ho ideia ne'e.

Kontaktus no ligasaun kontinua nafatin to'o termina loron deklarasaun nian. Iha loron ida ami halibur hamutuk iha sede Renetil hodi hili naran ba partidu ne'e. Iha naran oin-oin ne'ebé mak aprezenta mak hanesan partidu verde, partidu libertasaun nasional, partidu dezenvolvimentu, inklui partidu demokrátiku. Tan naran barak los entaun deside halo aklamasaun. Sorte iha tempu nebá barak mak hakarak los ho naran PD.

Momentu nebá mós rona ona mensagen hosi MBKRXG katak atu desolve CNRT iha dia 9 Juñu 2001. Tan ne'e, ami nain hira iha ekipa ida ne'ebé lidera hosi Rui Meneses no Metódio C.Moniz, prepara hela draft ba Estatuto Orgánico PD nian. Draft ne'e ami prepara iha kompañeru Metódiu uma iha Kuluhum. Iha tempu ne'e mos halo kedas modelu bandeira, no lia-fuan ba marcha PD.

Ho esforsu oin-oin no ho vizaun ne'ebé mós hodi hateke ba fururu nasaun Timor-Leste, iha loron 10 fulan Juñu tinan 2001, hola fatin iha Salaun Balai Prajurit Bebora, Dili, PD deklara ofisialmente ba Estado RDTL. Deklarasaun ne'e hato'o hosi Fernando La Sama de Araújo nudár Presidente no Mariano Assanami nudár Sekretáriu Gerál.

PD, iha ema lubun mak hahoris o,
PD, iha ema barak mak kuidadu o,
PD, iha ema barak mak tane o,
PD, iha ema barak mak hadomi o,
PD, iha ema balun mós mate tan ba o,
PD, iha ema barak mak gosta o, iha mós ema balun la gosta,

Maibe, o nafatin rikusoin RDTL nian,

Ami kontinua HANOIN, HARI'I NO HAMETIN O, IHA POVU RDTL NIA FUAN ❤❤❤

962020
NP (Nino Pereira)

https://www.facebook.com/