Ximenes Belo: Independensia ba dala 17 ona, maibe ema ki'ak sei barak

Ximenes Belo

Iha loron kmanek ida ne’e, háu hato’o PARABÉNS ba Povo Timor-Leste ne’ebé hanoin hikas loron 20 fulan maio tinan 2002, wainhira iha Taci Tolu- Dili, ema boot hosi rai liur, no rai laran, hamutuk ho timor oan sira, haree bandeira RDTL dada sa’e, no ema hotu hananu hino foun “Pátria, Pátria”; ikus mai iha Palácio Governo nia oin, Primeiro Governo “toma posse”, no tuir mai iha Uma Fukun Parlamento, Deputados sira aprova documentos oin oin atu estabelese” relações diplomáticas no internacionais”. Timor hahú hamriik mesak hanesan nasaun independente iha loron 20 de Maio de 2002.

Hahú ba loron ne’e, Timor-Leste iha “Órgaõs de Soberania” rasik: Parlamento, Presidência da Repéblica, Governo, Tribunais.

Ita agradese ba Nái Maromak tan ba nia domin boot ba Povu Timor Loro Sáe: bele iha rai, iha emar no iha independénsia. Ita fo obrigado ba funu n’ain sira; ba foin sa’e sira, ba aswa’in sira ne’ebé la tauk mate. Ita reza ba ita nia matebian sira.

Tinan 17 ona! Maibé, iha rai laran, ema kasian ka kiak sei barak; barak sei la’o ain-tanan deit, ka lipa no hatais xinelus; ema barak, sira nia uma sei halo ho tali tahan ka kadiru tahan, ka kalen no bebak. Ema barak sei moras malaria, denge, tuberculose, kulit katar, kabun halai, no moras seluk tan.

Ida ne’e ”desafio” boot ida ba ita tomak. Ita sei hadi’a nafatin independénsia hodi serbisu badinas liu tan; ita sei hakiak nafatin dame, diálogo, toleránsia, no respeitu ba malu. Povu timor tenki hala’o inisiativa privadu barak; povu timor tenki hatene “ekonmiza”, dehan katak, rai osan hodi uza didiak; povu timor tenki hatudu ba mundu rai-klaran katak nia laós povu ida baruk-ten, oho-dor ema, ka oho malu-dor, nauk-ten, hirus-malu-dor, laran moras ba malu, hakarak deit funu…Ema dehan ita povu timor sei kuran edukasaun! Ne’e duni ita sei eduka ita aan ba “valores éticos”, ba “Direitos Humanos”, ba “Paz” no “Progresso/Desenvolvimento”. Ho Naí Maromak nia tulun, ho dedikasuan Ukun Na’in sira nian, no ita ida-idak nia serbisu, Rai Timor Loro Sa’e, sei la’o ba oin. Viva Timor-Leste!!!

Porto, 20 de maio de 2019.

Amo Bispo Carlos Filipe Ximenes Belo