VISAO MISAO OBJECTIVO HAKSESUK BOLA FH KKN HOME FH LPV ARTIGOS FH MUZIKA LIA MENON FH RESPONDE

20190408

In Memoria Saudozu Companheiro Helder Manuel Pires de Piedade

In Memoria
Saudozu Companheiro
Helder Manuel Pires de Piedade


Hosi Carlos da Silva L.F.R. Saky

Saudozu Helder Pires
Companheiro Helder Pires laiha ona, nia iha ona mundu seluk. Nia husik hela de’it ain-le’ut funu nian, funu ho liman mamuk, funu liu hosi dalan dame nian ba libertasaun nasional Timor-Leste nian.

Iha tinan 24 resin liu ba, iha vespera Simeira APEC (Asia-Pacific Economic Cooperation), iha 1994, Jeneral Hendropriyono, Komandante Boot Militar Jakarta nian, responsavel ba seguransa APEC nian, halo ameasa atu tiru iha fatin se de'it mak koko estraga Simeira APEC: “Ema ida labele koko hamosu disturbiu durante sorumutu APEC nian iha fulan oin mai. Ami hatene buat hotu-hotu. Ami iha ajenti seguransa hamutuk 5.000 prontu salvaguarda sorumutu APEC. Ema ida labele koko uza situasaun ne’e hodi dezakredita nasaun Indonezia iha mundu nia matan liuhusi organiza manifestasaun, fahe panfletu ho kartaz ka halu greve. Ami sei trata sira hotu nebe provoka disturbiu durante APEC la’o, la’os hanesan kriminozu sira baibain maibe hanesan traidor sira nebe ninia nivel patriotizmu ho nasionalizmu to’o pontu ida ki’ik liu hotu eskala nian… durante APEC la’o, la iha ema ida halu manifestasaun, see mak halu manifestasaun sei tiru iha fatin.”

Biar jeneral Indonezia ne’e halo ameasa fila-fila ona,  estudante no jovem sira iha RENETIL nia okos, avansa nafatin ba Jakarta hodi kumpri missaun ida nebe bolu “Operação Trepe”, operasaun ida nebe trasa hosi RENETIL. Asaun ida ho risku aas, sai dadur ka mate. 

“Operação Trepe”, doko duni Indonezia nia fuan, tanba ataka kedas iha rejime Soeharto nia fuan. Biar estudante barak mak militar sira kaer molok to’o iha Embaixada, maibe na’in 29 konsegue eskapa no to’o duni iha fatin asaun. Sira halo manifestasaun lais ida iha Embaixada Amerika nia oin no haksoit lutu. Haksoit lutu nebe aas,  tama no okupa Embaixada Estado Unidos da America durante loron sanulu resin tolu. Asaun ne’e halo iha loron 12 fulan Nuvembro 1994 hodi fo hanoin ba mundu kona-ba massacre Santa-Cruz 1991 no hodi internasionaliza problema Timor-Leste nian ba mundu. Asaun ida hodi atinji objetivu ka estratejia boot rua nebe RENETIL defini antes ona: “Indonesiação no Internacionalização do Conflito de Timor-Leste”.

Haksoit Lutu Embaixada Amerika iha Jakarta
Haksoit lutu la’os de’it halo iha Indonezia, maibe mos iha Madrid, Espanha, iha 1995. Estudantes na’in hira nebe sai ona ba li’ur ne’e, hamutuk ho jovens no estudantes Timor oan no portugues balun, iha 1995, haksoit tama iha Indonezia ninia Embaixada iha Madrid, hatun Indonezia nia bandeira, lori sai mai li’ur, les no sunu mutuk.

“Operação Trepe” hetan susesu boot la’os de’it tanba hetan kobertura hosi jornalistas internasionais hamutuk 2.000, maibe obriga mos Prezidente Estados Unidos da America, Bill Clinton, hakarak ka lakohi koalia duni problema Timor-Leste nian ho Soeharto, biar antes, xefe Estado rai membro APEC sira, aseita malu ona atu labele koalia problema Timor-Lorosa’e nian iha Simeira APEC. Jornalistas internasionais sira ne’e mai iha Indonezia atu halo kobertura ba Simeira APEC iha Bogor, maibe ho okupasaun Embaixada Estados Unidos da Amerika nian iha Jakarta, dada hotu jornalistas sira ba Jakarta hodi halo kobertura ba okupasaun Embaixada Amerika, no la fo importansia ona ba Simeira APEC.

Susesu operasaun ida ne’e hetan mos apresiasaun hosi Komandante Konis Santana: “Elite intelektual Rezistensia timoroan nian mai protagoniza asaun luta politik ida nebe matenek liu no estratejikmente difini ho di’ak! Ho objetivu fundamental ‘indonesiação do conflito  de Timor-Leste’, estratejia politik ida nebe RENETIL hatene lori la’o ba oin, halu luta ida implacável hodi defende direitu politik fundamental povu Timor-Lorosa’e nian, direitu ba autodetreminasaun ho independensia nasional … estudanti sira halu asaun korajoza sira liuhusi manifestasaun sira iha dalan, no halu okupasaun ba embaixada sira, no ida nebe  importanti liu mak okupasaun embaixada Amerika nian iha Jakarta iha vespera [menjelang] sorumutu APEC nian, asaun ida ne’e konsege ona projekta kestaun Timor-Lorosa’e nian iha arena internasional ho vizibilidadi nebe boot liu, nebe to’o iha ne’e nunka hetan.”

Hendropriyono, biar hatudu ninia forsa sira ho kilat modern oioin no halo ameasa oioin, nia la konsegue asegura Jakarta. Nia dehan nia hatene buat hotu-hotu, maibe estudante sira halo asaun teki-teki ida iha nebe nia la konsegue deteta. Soehato sente humilhado no moe, liu de’it semana hira, tebe sai Hendropriyono hosi ninia pozisaun.

Toba iha garajen, iha Embaixada Amerika, iha Jakarta
Companheiro Helder Pires, estudante ida hosi estudante na’in 29, nebe konsege fera Hendropriyono ninia seguransa nebe metin no doko Indonezia nia fuan iha ninia uma laran rasik.

Sei lembra hela, iha tinan 24 resin liu ba, iha loron 11 fulan Novembru 1994, sai hamutuk hosi Surabaya ba Jakarta, hodi halo la’o “Operação Trepe”, operasaun nebe konsideradu nudar operasaun ida ho susesu boot tanba ninia impaktu mediatiku ba rai membru APEC no Komunidade Internasional tomak.

Sei lembra hela, iha loron 12 fulan Novembru 1994, sai hosi komboiu iha Pasar Senen, Jakarta, oinsa polisia no militar Indonezia sira kaer estudante sira, balun konsegue eskapa hodi kontinua lori la'o misaun ba oin. Sei lembra hela, oinsa haksoit lutu, besi kro’at sona no les estudante sira nia kalsa, les sira nia kelen no keixu ka hasan. Sei lembra hela, militar no polisia Indonezia sira kaer no dada Valerio Trindade iha lutu sorin.

Sei lembra hela, tratamentu aat hotu-hotu nebe simu iha Embaixada laran, la hetan bee no hahan iha loron dahuluk. Iha loron daruak, meio dia ona, foin hetan direitu ba etu mutin no bee mutin. Etu mutin no bee mutin sai hahan lorloron durante loron 10 resin iha Embaixada Amerika. Sei lembra hela, loron dahuluk konsumu bee foer, bee fase kareta nian, nebe nakonun ho ular oan sira. Sei lembra hela han pepsodente hodi hamate hamrok. Unika buat nebe diak iha embaixada laran mak garante liberdade de expresaun, estudante sira livre koalia ba jornalista sira no livre halo manifestasaun iha Embaixada laran.

Sei lembra hela, oinsa diplomata Amerika sira, haruka estudante sira tuur iha alkatraun leten no dada tali hadulas sira. Tuur iha alkatraun, auguenta manas hosi alkatraun no manas hosi loron. Sei lembra hela ropa tahan ida iha ida-idak nia isin. Hatais fila ba mai, laran ba li’ur no li’ur ba laran bainhira foer. Sei lembra hela haris sein sabonete durante iha Embaixada laran. Sei lembra hela matan ku’ak ho isin krekas sira iha embaixada laran.

Manifestasaun iha Embaixada Amerika iha Jakarta
Sei lembra hela, semente, alkatraun no bataku sira mak sai kama no biti. Sei lembra hela, isin sira toba sein lipa ka lensol no liman sira bubu tanba susuk sira tata. Sei lembra hela, estudante balun lori kaixa ka jornal rohan sira halo ba lipa hodi taka an. Sei lembra hela, oinsa Companheiro saudozu Helder Pires lori papel hiegenico hodi babar iha nia ulun, kakorok no liman sira atu evita susuk tata. Sei lembra hela, estudante balun moras atu mate iha embaixada laran tanba susuk, no ida ba para iha Hospital.

Sei lembra hela, diplomata Amerika sira halo presaun psikolojika hodi obriga estudante sira atu abandona Embaixada hodi labele estraga sira nia relasaun ho Indonezia.

Sei lembra hela, ema sivil Indonezia sira nebe hamrik no forma nadodon iha lutu sorin, inkluindu militar Indonezia balun, hahuu iha simpatia ba estudante sira nia luta no sofrimentu iha lutu laran. Sei lembra hela, jornalista internasionais rihun sira nebe hamrik no monta sira nia kamera aponta ba embaixada laran hodi halo kobertura ba asaun estudante sira nian. Sei lembra hela jornalistas internasionais balun koko ajuda fo bee ba estudante sira, maibe militar Indonezia sira hadau.

Sei lembra hela, militar no polisia Indonezia balun halo ameasa hosi lutu sorin atu tesi estudante sira nia kakorok bainhira sai hosi embaixada. Sei lembra hela Brimob sira nebe tama ba embaixada Amerika nia laran hodi hadau spanduk no kartajens sira hosi estudante sira nia liman. Felizmente sira la kaer estudante sira iha embaixada laran tanba seguransa embaixada, militar amerikanu ida halo intervensaun hodi dehan ema ida labele halo buat ida iha embaixada laran. Sei lembra hela, Pemuda Pancasila sira halo ameasa atu assalta estudante sira iha kalan hodi kaer no oho estudante.

Sei lembra hela, Indonezia haruka senhor Francisco Lopes da Cruz no Senhor Clementino dos Reis Amaral, ba iha Embaixada atu konvense estudante sira atu sai hosi embaixada hodi labele hamoe Soeharto no estraga Simeira APEC.

Sei lembra hela militar Indonezia haruka katuas eis-FALINTIL ida iha Jakarta, iha kalan nakukun, koko bolu ninia bei-oan ida iha Embaxada laran, bolu hosi lutu sorin, maibe ninia bei-oan reziste, lasai hosi Embaixada. Indonezia halo buat hothotu hodi fahe estudante sira maibe sira la konsegue.

Polisia Indonezia kaer Valerio Trindade iha 
Embaixada Amerika iha Jakarta nian oin
Sei lembra hela, oinsa Companheiro Helder hamutuk ho kolega sira seluk tahan buat hirak ne’e hotu. Sei lembra hela, Companheiro Helder nonok no lalamenta ba presaun, terus no susar oioin iha Embaixada laran, tanba hotu-hotu hatene, Timor oan barak sofre no terus liu ida ne’e.

Estudante sira arriska nia an, ho hirus matan mamuk hasoru militar no polisia sira Indonezia nian, arriska an haksoit besi kro'at, toba iha rai, tahan moras hosi kanek, tahan loron manas Jakarta nian hosi leten no manas alkatraun hosi okos, tahan udan no susuk, tahan hamalaha, tahan presaun no ameasa hosi diplomata amerikanu sira ka hosi polisia no militar Indonezia sira.

Estudante sira hotu, nebe ema kaer no nebe tama iha Embaixada laran, sira hotu aseita halo sakrifisiu hodi liberta sira nia povo ho sira nia rain hanesan saudozu Comandante Nino Konis Santana dehan: "Pela Pátria não haverá sacrifícios que se possa recusar”.

Sei lembra hela, komunidade Timor oan sira iha Portugal, simu estudante sira iha Portela, aeroporto Portugal nian, ho ai-funan no viva sira. Sei lembra hela, sai hosi rai ida ho klima manas tebes, teki-teki tama iha rai ida malirin tebes, malirin sukun tama iha kakutak no ruin. Sei lembra hela susar no terus sira hela sa’e malu iha Carnexide, Potugal. Terus no susar sira ne’e nudar memoria sira nebe sei lahaluha no passa hamutuk ho Companheiro Helder Pires.

Estudante sira iha Embaxada Amerika, iha Jakarta, nia laran
Hosi ohin ba oin, laharee ona companheiro ida tau okulu, le livru ka jornais sira ho sigaru iha liman. Ba oin laharee ona Companheiro ida hader kalan tomak sani livru sira. Ba oin, lahalo ona diskusaun ruma ho nia, la sani ona ninia artigo foun sira, buat hirak ne’e hotu hela de’it iha memoria.

"Api Perjuangan Tidak Akan Pernah Padam: Tanggapan Untuk DR M. Amien Rais" ka “Ahi Funu nian Sei La Mate: Hatan ba DR. M. Amien Rais, artigu ida, hakerek hosi Companheiro Helder. Artigo ida expressa ninia ispiritu, ninia determinasaun, dediksaun no abnegasaun hodi luta ba Timor-Leste nia ukun-rasik-an. Nia defende justisa ba Timor-Leste hodi kritika Doutor Amien Rais, ninia dekanu no Professor, nudar intelektual  “delek” no “bobarten” nebe trai ona ninia matenek rasik tanba de’it interesse politika pessoal ida.

Companheiro Helder, ema ida monok, ladun koalia barak, maibe ema ida kritiku no hakerek mak barak. Koalia uituan, maibe ko’alia sempre sustenta nia hanoin sira ho argumentu sira fundamentadu, lojiku no rasional. Nia nudar ema ida nebe gosta konfronta ideia intelektualmente liu husi hakerek.

Ohin loron, Companheiro Helder nonok rohan laek iha ita nia leet, maibe ninia hanoin ho ninia liafuan sira nebe haktadak iha ninia hakerek sira moris nafatin iha surat tahan sira, moris iha fuan ema hotu nebe kuinese no hamutuk ho nian iha momentu sira difisil.

Estudante sira to'o iha Lisboa, Portugal
Helder Pires, Companheiro ida nunka ijiji buat ida ba Nasaun no Estado atu fo buat ruma ba nia. Nia ijiji de'it libertasaun no ukun-rasik-an ba nia rain no nia povu. Nia ema ida terus na'in no funu na'in ida. Biar nia moris iha susar nia laran, iha moras todan nia laran no tama sai sala operasaun to'o iis ikus, nia la ijiji buat ida ba Estado hanesan ema balun ijiji, tanba nia konsiente katak, ninia partisipasaun iha luta tanba ninia konsiensia no ninia obrigasaun rasik nudar povu oprimidu nia oan. Nia la ijiji buat ida atu Estado selu nia terus ho nia kolen. Nia hatene nia an, nia la'os “mercenario” ka “tentara bayaran”. Nia mos hatene katak se nia ijiji ba Estado selu nia terus ho nia kolen ba rai ida ne’e, mak nia lakon autoridade moral atu koalia kona ba rai ida ne’e. Tanba buat hirak ne’e hotu mak lori nia la ijiji buat ida. Nia ijiji de’it se mak ukun rai ida ne’e, ukun ho didiak no tau matan ba povu tomak. Povu moris diak signifika diak mos ba nia, maibe nia mesak mak moris diak, la signifika povo moris diak.

 Se ohin loron, ninia Companheiro sira nebe sei moris, husu atu Nasaun no Estado nebe nia tuir liberta atu halo tratamentu dignu ida ba nia nudar ema funu na'in ida, tanba nia merese hetan rekuinesimentu ida ne’e. Rekuinesimentu la’os sinonimu ijiji Estado atu selu nia kolen, maibe Estado atu halo tratamentu ida digno ba nia hanesan kombatente ka veteranus sira seluk, merese halot nia iha fatin nebe nia merese.

Durante moris nia la ijiji buat ida, ohin nia toba nonok no kontinua lahusu buat ida ba Estado. Se Estado iha konsiderasaun ruma ba nia nudar kombatente ida, la'os tulun atu lori fila deit nia isin mai Timor, maibe halot nia isin mate iha fatin nebe nia merese, hanesan sinal pozitivu ida. Lori fila nia isin mai iha rai nebe nia moris ba, rai ida nebe nia tuir defende ho isin no klamar tomak, atu ema ruma labele sama tan.

Triste boot bainhira rona Companheiro Helder hosik hela ita hotu. Triste liu tan, nudar Companheiro no irmão da luta, labele vizita no haree nia bainhira nia moras no toba iha uma ka iha Hospital, tanba tasi no rai haketak ita.

Haksoit lutu Embaixada Indonesia iha Madrid no hatun bandeira Indonezia nian
Tanba luta, Companheiro Helder la hasai kursu, laiha titulo/gelar, hanesan mos saudozu La Sama ho sira seluk, maibe sira nia sakrifisiu, dedikasaun, determinisaun no abnegasaun hodi luta ba libertasaun no ukun-rasik-an ba Timor-Leste, folin boot liu dok duke titulu akademiku ida. Sira nudar ema nasionalista isin no klamar loloos no tau duni iha pratika filozofia RENETIL nian: “Antes sem título, do que sem Pátria.

Companheiro Helder desde sai ba rai-li’ur iha 1994, nunka fila mai Timor to’o iis ikus. Hafoin restaurasaun independensia, saudozu ho kondisaun ida moras, muda ba Reinu Unidu atu buka serbisu, no halibur osan atu loron ida fila hikas mai Timor-Leste. Maibe tanba ninia kondisaun saude la permite, saudozu labele konsentra iha ninia servisu. Durante tempu naruk hafoin nia to’o iha Reinu Unido, saudozu sofre komplikasaun moras fuan no diabetes, ne’ebe obriga nia hela nafatin iha Reinu Unidu hodi halo tratamentu mediku. Infelizmente, ninia mehi lasai realidade. Nia lafila ho vida mai iha Timor atu assiste Timor-Leste ida independente ona, Timor-Leste ida nebe nia tuir luta ho determinasaun no abnegasaun ba ninian ukun-rasik-an. Nia fila mai la goza no la senti anin liberdade no ukun-an iha ninia kulit, tanba fila mai ho isin mate nebe la haree no la sente ona buat ida. Triste tebes bainhira lakon kombatente ida nebe nunka ijiji buat ida ba Nasaun no Estado nebe nia tuir luta ba ninia ukun-rasik-an. Kombatente exemplar no jenuinu.

Ohin saudozu Helder laiha ona iha ita hotu ninia leet, liuliu iha ninia familia sira no familia boot RENETIL nia leet. Lakon boot ida ba ita hotu, ba povo no rai Timor-Leste, maibe, ninia luta, ninia dedikasaun, determinasaun no abnegasaun ba luta hodi liberta Timor-Leste hosi okupasaun Indonesia nian sei hela metin iha ita hotu nia memoria. Valor sira luta nian nebe saudozu Helder no saudozu aswa’in sira hotu nebe laiha iha ona iha ita nia leet komunga, sei la mate, sei kontinua hosi jerasaun ba jerasaun.

Sunu bandeira Indonezia iha Embaixada Indonezia nian iha Madrid
Companheiro Helder, ohin loron hakmatek ona, livre ona hosi moras, susar no terus oioin. Adeus irmão e companheiro da luta! Hato'o hela ami nia hako'ak boot ba irmão e Companheiro La Sama, Calisto Doutel Sarmento ho irmão no companheiro sira hotu nebe imi hamutuk iha mundo seluk. Ami labele tau matan ba imi tanba imi iha mundu invisível, maibe imi mak tenki tau matan mai ami, tau matan mai povo no rai ida nebe ita hamutuk liberta.

Deskanse ho dame Companheiro! Adeus, ate sempre Companheiro da Luta!

Sem comentários:

Enviar um comentário

Nota: só um membro deste blogue pode publicar um comentário.