PREZIDENTE REPÚBLIKA SEI HALO INTERPRETASAUN SISTEMÁTIKU MOLOK FOTI DESIZAUN

                                           Deklarasaun Nai PR Hafoin serimónia loron F-FDTL ba dala-18. iha Fatuhada,Dili, Sabadu ( 02.02.2019)/foto*     

                   Dili, 2 fevereiru 2019

Prezidente Repúblika Francisco Guterres Lú Olo sei halo interpretasaun sistemátiku ba Konstituisaun molok foti desizaun. Horseik, Prezidente Repúblika simu tiha ona Orsamentu Jerál 2019 husi Parlamentu Nasionál hafoin reapresiasaun husi deputadu sira.

Hafoin serimónia loron F-FDTL ba dala-18, Prezidente Repúblika hateten:

“Ha’u tenke estuda liuhusi interpretasaun sistematiku ida kona-ba artigu 145 konstituisaun no 95 númeru 2 no3 no artigu 88 númeru 3 atu bele aplika artigu 88 númeru 1.”

Parlamentu Nasionál halo reapresiasaun ba Orsamentu Jerál Estadu 2019 ne’ebé veta husi Prezidente Repúblika. Reapresiasaun ne’ebé hala’o iha 31 janeiru 2019 Prezidente Repúblika informa katak orgaun soberanu rua iha korespondénsia ba malu iha aspetu ida ne’e.

Iha mensajen Prezidente Repúblika bainhira veta Orsamentu Jerál Estadu husu Parlamentu Nasionál atu halo reapresiasaun hodi bele hadi’ak fila fali realokasaun orsamentu ba setór sira ne’ebé importante tebetebes ba povu nia moris hanesan agrikultura, edukasaun, saúde, bee moos no saneamentu báziku. Prezidente Repúblika hein katak reapresiasaun ba Orsamentu Jerál Estadu 2019 sei kontempla kestaun sira ne’e.

Prezidente Repúblika veta Orsamentu Jerál Estadu 2019 ho montante $ 2,132 biloens. Hafoin reapresiasaun husi Parlamentu Nasionál Orsamentu Jerál 2019 ne’ebé aprova ho montante $ 1.482 biloens. Redusaun ba Orsamentu Jerál Estadu ne’e tanba hasai tiha ona $ 650 miloens ne’ebé aloka ba sosa asoens partisipasaun husi kompania ConocoPhillips no Shell. Parlamentu Nasionál hasai alokasaun orsamentu ba sosa asoens partisipasaun tanba kontempla tiha ona iha Lei Atividade Petrolíferu ne’ebé promulga tiha ona husi Prezidente Repúblika.

Veto ba Orsamentu Jerál Estadu, la’ós foin akontese iha 2019. Iha tinan-2015, Prezidente Repúblika Taur Matan Ruak, atuál Primeiru Ministru, veta Orsamentu Jerál Estadu 2016 ne’ebé kestiona sustentabilidade no despeza ba setór públiku hanesan saúde, edukasaun no agrikultura ne’ebé ki’ik.

*Fonte:Mídia PR!