Kargu CEMG no Komandante Komponente sira F-FDTL Kontinua iha Interinidade no Inserteza

Foto: Prezidente Republika

Mandatu ba kargu Chefe Estado Maior General FALINTIL-Força de Defesa de Timor-Leste (CEMG F-FDTL) Major General Lere Anan Timur ramata ona iha loron 6 Outobru 2018. Hahu husi data ne’e, liu fulan tolu ona kargu CEMG F-FDTL kontinua interinidade. Iha kazu ne’e Fundasaun Mahein (FM) haree katak Governu ho Prezidente Repúblika husik Forsa Armadas nia lideransa a’as liu CEMG iha inserteza nia laran. Nune’e Major General Lere Anan Timur ne’ebé daudaun ne’e kontinua asume kargu CEMG iha inserteza juridiku nia laran. Portantu to’o agora seidauk iha desizaun atu halo rekondusaun ka halo nomeasaun foun ba kargu CEMG nian. 

Iha tempu hanesan mandatu ba kargu Komandante Komponente sira ramata ona iha loron 17 Novembru 2018 (Dekretu Prezidente Repúblika nian N.o 46/2016 loron 23 Novembru). Iha kazu ida ne’e presiza halo nomeasaun foun ka halo rekondusaun tuir n.o 1 no 2 artigu 75 Decreto-Lei N.o 28/2016 de 13 de Julho Primeira Alteração ao Decreto-Lei N.o 7/2014, de 12 de Março (Estatuto dos Militares das F-FDTL) nia haruka. Iha ne’ebé exersisiu ba kargu Komandante Komponente sira iha durasaun maxima tinan rua no halo renovasaun dala-ida deit. Maibe to’o agora seidauk halo nomeasaun foun ka rekondusaun. Nune’e kargu sira Komandante Komonente nian kontinua iha interinidade mos. 

Situasaun ida ne’e to’o agora kontinua iha nonok nia laran no lolos Governu tenke toma inisiativa hodi hahu prosesu nomeasaun. Iha ne’ebé Ministériu Defeza hahu halo audisaun no konsulta ho Konsellu Superior Defeza Militar ne’ebé prezide husi Ministru Defeza rasik. Hafoin audisaun no konsulta ho Konsellu Superior Defeza Militar, Ministru Defeza lori ba Konsellu Ministru hodi hetan aprovasaun. Prosesu ikus husi ida ne’e proposta aprovasaun husi Konsellu Ministru hato’o ba Prezidente Repúblika nomeia tuir Dekretu Prezidente Repúblika nian no públika iha Jornal da Repúblika (Decreto do Governo n.° 6/2016, de 11 de Maio Regimento do Conselho Superior de Defesa Militar). 

Portantu tambasa to’o agora Governu liu husi Ministru Defeza seidauk hahu prosesu ne’e? Karik prosesu ne’e hahu ona no submete ona porposta ba Prezidente Repúblika tambasa to’o agora seidauk toma desizaun? Karik interinidade no inserteza ida ne’e hanesan konsekuensia husi empase polítika ne’ebé daudaun ne’e la’o entre Prezidente Repúblika, Parlamentu Nasional no Governu? 

FM rekomenda presiza dialogu hodi hetan solusaun ba situasaun Forsa Armada nian no opsaun seluk Prezidente Repúblika presiza konvoka enkontru Konsellu Superior Defeza no Seguransa hodi diskute ba asuntu ida ne’e. Tamba kargu lideransa Forsa Armada nian labele husik iha situasaun interinidade no inserteza iha kadeia komandu F-FDTL nian. Bainhira kadeia komandu ida la klaru difikulta ofisiais F-FDTL nian hodi hala’o sira nia servisu ka la iha kbiit tuir lei no prosedementu sira ne’ebé vigor. (Fundasaun Mahein (FM), 21 de Janeiro de 2019)