Intervensaun Deputado Adriano do Nascimento

INTERVENSAUN VICE PREZIDENTE BANCADA DEMOCRATICO DEPUTADU ADRIANO DO NASCIMENTO IHA LORON DARUAK, 10-12-2018, IHA DEBATE GENERALIDADE OGE 2019.

Sua Excelensia Sr. Presidente Parlamento Nasional

Sua Excelênsia Sr. Primeiro Ministro,

Maluk Deputado sira, Membrus do Guvernu, no Povu Timor Leste tomak, mak ami hadomi.

“Kaer Metin Ukun Rasik An, no Harii Nasaun Husi Baze”

Iha intervensaun ida ne’e, hau koloka kestaun importante rua kona ba elaborasaun konseitu polítiku no OGE 2019:

Primeira kestaun, mak kona ba governu nia programa prioridades prinsipais. VIII governu propoin atu dezenvolveprograma prioridades prinsipais hitu hanesan: agrikultura, edukasaun, saude, infraestrutura, partikularmente be mos, saniamentu, tuirsmu, desentralizasaun administrativa no setor privadu (Planu Asaun Anaul pájina 4, versaun Tetum).

Hafoin analiza no tetu planu asaun anual no orsamentu, hau nia pensamentu lójiku no sensibilidade polítika haktuir katak, VIII governu halo Planu asaun annual no orsamentu 2019 laiha koerensia no konsistensiaentre planu asaun anual no orsamentu, nune’e, OGE 2019 la refleta prioridade prinsipais hirak ne’ebé define tiha ona. Iha razaun nen mak hodi fundamenta hau pensamentu lójika ne’e: 1). Ba prioridade numeru 1 hatur iha setor agrikultura, hodi garante produsaun agríkula, siguransa alimentar no hamenus malnutrisaun, maibe governu aloka deit orsamentu 1.5% ho total orsamentu $ 27,553 milioens; 2). Ba prioridade numeru 2 hatur iha setor edukasaun, hodi promove edukasaun no formasaun ho kualidade ne’ebé orienta ba merkadu, maibe governu aloka deit orsamentu 7.7% ho total orsamentu $ 140,017 miloins; 3). Ba prioridade numeru 3 hatur iha setor saude, hodi konsolida servisu saude ho kualidade, maibe governu aloka deit orsamentu 4.2% ho total orsamentu $76,387 miloins; 4). Ba prioridade numeru 4 hatur iha infraestrutura, liuliu iha setor bé mos no saneamentu hodi hadi’a povu nia moris, maibe governu aloka deit orsamentu 1.1% ho total orsamentu $ 19,789 miloins; 5). Setor petroleu no minerais ne’ebé la tama iha prioridade 1-4 ka prioridade hitu nia laran, maibe governu aloka kedas orsamentu 21% ho total osan $ 380,364 miloins; 6). Iha livru planu asaun annual hakerek prioridades prinsipais hitu, maibe iha livru panorama hakerek deit prioridades prinsipais nen.

Bazeia ba dadus numérikus no perspetiva polítika ne’ebé hau haktuir iha leten, maka hau iha pergunta hitu ba Señor Primiero Ministro: 1). Tamba sa mak iha planu asaun anual governu hakerek prioridade prinsipais hitu, maibe alokasaun orsamentu ho másimu 1 to’o 7.7% deit?; 2). Tamba sa mak governu la hatur setor petroleu no minerais nudar prioridades principal númeru 1 iha orsamentu 2019, maske governu aloka orsamentu to’o 21% ho montante $378,747 miloins? 3). Oinsa governu atu aumenta produsaun agríkula, garante siguransa alimentar no hamenus malnutrisaun, se governu aloka deit osan 1.5%?; 4). Sera ke governu la kohi dezenvolve setor agrikultura tamba hakarak sosa deit fos no nesesidade bázika seluk hosi rai liur?; 5). Oinsa governu bele hadi’a kualidade edukasaun hodi orienta ba merkadu, se governu aloka deit osan 7.7% ba ministériu rua no edukasaun iha municipiu 12 ho RAEOA?; 6). Oinsa governu atu resolve povu nia halerik kona bé mos no saniamentu iha uma kain ida-ida, iha eskola no fatin publiku, se guvernu aloka deit osan 1.1% ba bé mos no saniementu?; 7). Tamba sa mak governu hakerek prioridade prinsipais hitu iha livru planu asaun anual, maibe iha livru panorama orsamental hakerek deit prioridade prinsipais nen, prioridades prinsipais ida ne’ebé mak los liu, iha livru Planu asaun annual ka iha livru panorama orsamental?

Segundakestaun, mak kona ba impasse polítiku prolongadu iha ita nia nasaun. Hau nia pontu de vista haktuir katak, impasse polítiku ne’e hamoris no hatur ona faktus polítikus hat iha ita nia nasaun: 1). Durante kampañe no depois eleisaun, liu hosi media elektronika, media sosial no jornal lubun ida,lider polítiku sira satan malu no hatun malu, sura sira nia kole ba funu no la valoriza malu, haketak malu tuir relijiaun, étnia no seluk-seluk tan; 2). Hafoin formasaun governu, AMP vota kontra programa no orsamentu retifikativu hosi governu Fretilin no PD; 3). VIII Governu ho Presidente da Repúblika seidauk iha intendimentu no finalizasaun kona ba kandidatu ministru lubun ida, hodi lidera ministériu ne’ebé existi tuir lei orgániku governu nian; 4). Parlamento Nacional dala hat tui-tuir malu, blokeia vizita estadu Presidente da Repúblika ba rai liur, inkluindu atu hasoru Amu Papa nudar líder másimu sarani katolika, ne’ebé Timor-Leste sai maioria katolika 90 e tal %.

Ho faktus politikus empírikus hirak ne’e, hau nia perspetiva polítika haktuir katak, impasse polítiku ne’e mosu, tambá fatores rua: 1). Maioria versus minoria hodi satan malu no hatun malu entre AMP ho Fretilin-PD iha tinan 2017-2018 tamba poder; 2). Diverjensia ba aplikasaun prinsipiu boa governasaun no justisa, hodi combate korupsaun, kolusaun no nepotismu versus egoismu polítiku grupuismu no partidária, hodi defende ida-idak nia onra no dignidade polítika.

Ho faktus polítikus no perspetiva polítika ne’ebé hau haktuir iha leten, mak lori preokupasaun tolu ba hau hodi haklaken baSr. Primeiro Ministro noba públiku: 1). Polítika hatun malu ho aktus halibur minoria sai fali maioria iha PN ho razaun konstitusional, hodi la fo biban ba partido mais votadu atu ukun, mak kuda ona preseden ida ne’ebé la furak iha prosesu konstrusaun estadu iha nasaun nurak ne’e. Nune’e, aktus hirak ne’e sei bele inspira pensamentu no asaun hosi grupu ka partido seluk, atu banati tuir hodi satan malu no hatun malu iha futuru; 2). Polítika satan malu no hatun malu, hamosu ona estagnasaun receitas doméstika no makroekonómiku nasaun nian iha loron ohin no ba futuru, nune’e, bele hamate dezenpeñu setor privadu no empregu, hatun receitas doméstika no habot inflasaun, hakiík padraun moris povu nian no habot numeru kiak iha ita nia nasaun; 3). Polítika satan malu no hatun malu, mos sei desvia pensamentu lojíku no asaun estratéjika ukun na’in sira nian, hodi buka solusaun alternativa ba redusaun receitas petrolíferas no hasa’e receitas não petrolíferas. Basaiha parte ida,dezenvolvimentu no produsaun gas iha greter Sunrise, sei gasta osan barak iha investimento capital no despeza operacional,maibe sei hatama receitas iha tempu naruk.Iha parte seluk, produsaun gas iha bayu undan besik maran ona,no receitas estadu nian tun ba bebeik,nudar haktuir iha previzaun receitas livru panorama pájina 14, versaun Tetum.

Bazeia ba perspetiva polítika no preokupasaun hirak ne’e, hau iha pergunta hat ba Señor Primeiro Ministro: 1). Bainhira los mak Señor Primeiru Ministru hamutuk ho líder orgaun sira seluk, bele rezolve empasse polítiku ho dimensaun vertical no horizontal, ne’ebé hatur nasaun iha incerteza nia laran?; 2). Bainhira los mak señor Primeiru Ministru atu hatur lolos, ita bot nia governasaun ho plenu poderes hodi viabiliza politika nasaun nian,atu kompleta membru governu inkompletu tuir lei orgániku governu nian? 3). Sera ke Señor Primeiru Ministru atu kontinua deit, ita bot nia governasaun ho ministériu sein ministru, no ministru ida deit sai ministro ba ministériu hotu-hotu?; 4). Oinsa Sr. Primeiro Ministro atu garante ba públiku kona ba dezenpeñu pessoal no institucional hosi ministério hirak ne’ebé halo knar sein ministro?

Sr. Primeiro Ministro! hau konsiente katak, governu sei la hatan hotu hau nia pergunta hirak ne’e, hanesan hatudu ona iha debate OGE 2018, maibe hau nudar reprezentante povu no hosi partido opozisaun, hau hal’ao deit hau nia dever hodi hatutan povu nia halerik, no sensibiliza governu ba preokupasaun no nesesidades povu no nasaun nian. 

Obrigadu.

Dili, 10 de Dezembru 2018

Adriano do Nascimento, S.Pd.,MM

Vice Chefe Bancada Partido Democrático