Amu Bispo Ximenes Belo hato’o Boas Festa Idul Fitri ba Komunidade Musulmanu sira

Amu Bispo Ximenes Belo hato’o Boas Festa Idul Fitri ba Komunidade Musulmanu sira

Selebra Idul Fitri, prezidente Lu-Olo hato’o nia mensajen “ksolok” ba komunidade musulmanu sira iha Timor-Leste, i sublinha kontributu sira nudar sidadaun aktivu ba dezenvolvimentu nasional.

“Ho laran-ksolok boot mak ha'u saúda ohin, musulmanu hotu-hotu ne’ebé servisu iha ita-nia rain ohinloron no ita-nia maluk timor-oan sira ne’ebé selebra Idul Fitri, nu’udar komunidade musulmana, iha Timor-Leste. Ha’u fó-hanoin ba povu tomak no ha’u hakarak rekoñese, liuhosi mensájen ida ne’e, komunidade musulmana sira-nia servisu no kontribuisaun maka’as ba páz, estabilidade, ekonomia no dezenvolvimentu Timor-Leste nian”. (Lu-Olo iha nia intervensaun iha loron selebrasaun Idul Fitri, iha Masjid An-Nur, Dili, 25 Junho 2017)

Iha mementu hanesan, iha fatin seluk, Amu Bispo Ximenes Belo, liu husi konta ofisial facebook, hato’o mos Boas Festas ba maun-alin, inan-feton islaun sira. Iha mensajen badak ne’e Amu deseja isin-diak ba sira hotu ho bensa Nai Maromak nian.

“Ha'u ható'o Boas Festas ba maun, alin, no ina feto sira hotu ne'ebe Islaun. Na'i Maromak haraik bensa ba sira hotu no fó isin diak.” (Amu Belo iha nia mensajen facebook, Domingu, 25 Junho 2017)

Idul Fitri, sani, Eid al-Fitr, signifika literalmente tempu ikus jejum nian durante fulan Ramadan. Tempu disiplina espiritual, moral no vivensia relijioza.

Ba irmaun musulmanu sira HAKSOLOK BA, ita hotu hamutuk iha mahun fraternidade, lo’ok-malu valor toleransia no dame no hamtauk ba moris keta-ketak ema seluk nian, iha Timor-Leste no mundu-rai-klaran. AF/FH