VISAO MISAO OBJECTIVO HAKSESUK BOLA FH KKN HOME FH LPV ARTIGOS FH MUZIKA LIA MENON FH RESPONDE

20160207

500 ANOS – TINAN ATUS LIMA: Kapítulu 47 – Governador portugés (1918-1945)

500 ANOS – TINAN ATUS LIMA  Emar Timor Ho Malae Mutin Hasoru Malu  
Dom Carlos Filipe Ximenes Belo

Kapítulu 47 Governador portugés (1918-1945)

Funu Manufahi remata tiha, governu Kolónia Timor buka atu hala’o dezenvolvimentu iha dame no progressu nia laran. Maibé, iha Portugal, governu sira mos troka malu la biban. Iha tinan 1926, militare sira halo revolusaun hodi estebese ordem no estabilidade hodi no bolu Dr.  António Oliveira Salazar ba Ministro de Finanças. Iha 1933, regime foun hahú periodu Estado Novo, ne’ebé ema balu bolu  Ditadura ka Fascismo. Governdor sira troka malu, dezenvolvimentu material no ekonómiku mos la dun la’o.

Bainhira governador Filomeno da Câmara fila ba Portugal (1917), ukun kolonia de Timor, hanesan encarregado, ema hirak ne’e: Cesar Augusto Rocha Abreu; José Machado Duarte, Luís Augusto Oliveira Franco (capitão), Manuel de Jesus de Meneses Fernandes Costa; sira ukun la keur ida, tan nee, eskritor portugés ida dehan: ne’e hanesan “inflação de governantes”. Ikus mai, governu sentral iha Lisboa hili duni governador, ne’ébé naran tuir mai ne’e:

Manuel Paulo Sousa Gentil, capitão-tenente da Armada, (1919-1921)

Iha nia tempu komando militar sira nakfila ba Circunscrição Civil. Komando militar tolu mak sai Circunscrição Civil: Liquiçá, Maubara no Baucau. Bainhira nia fila ba Portugal, ukun Kolonia Timor hanesan Encarregado do Governo: José de Paiva Gomes, ema doutor ida (médico); Manuel José de Meneses Fernandes Costa; Humberto dos Santos Leitão, Tenente de Armada. Tenente Humberto Leitão, ikus mai sai istoriadór boot; nia hakerek livru importante rua kona ba Timor: Os Portugueses em Solor e Timor de 1515 a 1702 (Lisboa, 1948), Vinte e Oito Anos de História de Timor (1698-1725), Lisboa, 1952.

Raimundo Enes Meira, coronel, (1924-1925)

Nia hasai tiha komando militar Batugadé hodi integra ba komando militar Bobonaro. Nia haruka kuda au (Bambue) iha tasin ninin; estabese imposto ba prédio (uma hada ho fatuk no taka ho kalen ka telha); hahú, feira anual ka basar ida iha Dili, tinan iha loron 5 Outubru; Bainhira nia fila ba Portugal, ukun Timor, hanesan Encarregado: Eduardo Rodrigues Areosa Feio.

Teófilo Duarte, tenente, (1926-1928)

Bainhira nia hahú ukun, iha Timor iha populasaun hamutuk, ema na’in  451.604; iha Dili laran populasaun hamutuk, ema na’in 8.137. Nia haruka loke liuron ka estrada, Dili-Liquiçá. Iha setór ensinu ka edukasaun, iha tinan 1926, iha eskola estadu nian ho professor na’in 7, no alunu na’in 200. Eskola Misaun Katolika nian: amo lulik (hanorin iha eskola) na’in 15, no na’in 10 mestre, alunu na’in 500. Iha tinan ne’ebá, ema nain 1.822 mak hatene lee no hakerek. Governdor Teofilo Duarte hakerek livru kona ba Timor: Colónia Portuguesa de Timor Hongkong, (1928); Timor, Ante Câmara de Inferno (1930); Colónia Portuguesa de Timor: Aspectos de Administração (1930), O Rei de Timor (1931), Ocupação e Colonização Branca de Timor, 1944. Teófilo Duarte, sai Ministro das Colónias.

Abel Teixeira da Costa Tavares, coronel médico (1928-1929)
Cesar Augusto de Almeida Viana, coronel, (1929-1930)

Iha nia tempu hala’o divizaun administrativa: Concelho de Dili, ho Ataúro; Circunscrição Civil: Liquiçá, Manatuto, Baucau. Comadu Militar: Bobonaro, Cova-Lima, Manufahi. Suro, Hatolia, Motael (Aileu), Viqueque, Lautem e Oe-Cusse. Tuir mai, Concelho, Circunscrição civil no Comando Militar nia área fahe ba Postos Administrativos. Encarregado do governo: Abel Teixeira da Costa Tavares.

António Batista Justo, coronel, (1930-1933)

Iha periudu ne’e, Governo Central iha Lisboa publika Carta Orgânica da Colónia de Timor. Tuir Carta ne’ebá, Rai Timor sai hanesan “divisão administrativa do império colonial português”. Instituisaun ne’ebé koordena kolónia sira mak Ministério das Colónias.

Iha tempu ne’e hahú mosu iha Portugal ema balu ne’ebé la konkorda ho rejime “Estado Novo”. Ema hirak ne’e, governu haruka dadur no lori ba desterra. Balu ba Timor, hanesan Manuel Carrascalão (Eng. Mário Carrascalão nia aman), no Francisco Horta (Dr. José Ramos-Horta nia aman), no sira seluk tan. Desterrados sira ne’e, balu sei hala’o dezemvolvimentu Timor nian iha setór oin oin.
Encarregado do governo: Miguel dos Mártires Dias.- José de Fontorura Sequeira (capitão).

Raul de Antas Manso Preto Mendes Cruz, major, (1934-1936)

Governador nia inisiativa mak transforma ka muda Comandos Militares ba Circunscrições civis. Nia mos haruka ema selu impostu; ema n’ebé funsinariu selu impostu  pataka 16; ema ne’ebé bolu asulear (auxiliar)  pataka 11. Labarik mane ho tinan 18, tem ke selu impostu. Atu bele selu impostu ema fa’an kuda, karau, bibi, fahi, hare no batar atu hetan osan no bele selu; la iha karik balada, tem ke ba serbisu ba estadu hanesan asulear, mainatu eh kriadu, eh matroz.

Iha  tempu ne’e, governu entrega ba Missão Católica eskola primária sira. Iha tinan 1934, iha cidade do Porto (Portugal) hala’o Exposição Colonial ida. Kolónia Timor haruka sasan balu atu tau iha Exposição nee. Nune’e mos haruka delegasuan ida. Iha delegasaun ne’e tam liurai Dom Aleixo Corte real (Suro/Ainaro), no Liurai Carlos da Costa Ximenes (Baucau).Encarregado do governo: Eduardo Bernardo Lapido Loureiro (capitão).

Álvaro Eugénio Neves da Fontoura, major, (1937-1939)

Governador ne’e haruka hatur imagem ka estátua Nossa Senhora nian iha foho Ramelau nia tutun. Nia assiste inaugurasaun Uma kreda matriz Dili nian no uma kreda boot iha Ainaro (Suro). Iha nia tempu, governu haruka ema hananu  Hino Nacional Portugal nian (Herís do Mar, nobre povu…) iha eskola sira no bainhira dada sa’e bandeira ka iha serimónia seluk. Iha Dili, mosu Klube Sport Lisboa e Dili (Benfica). Mosu mos Klube Sporting. Iha tinan 1939, Govenrador Fontoura fila ba Portugal. Nia hakerek livru, ho títulu O Trabalho dos indígenas de Timor (1941); no husik Album ida ho retratu ema timor nian no retratu uma no paisajem. Encarregado do governo: António Jacinto Magro (capitão).

Manuel de Abreu Ferreira Carvalho, capitão, (1940-1945)

Iha nia tempu mak tropas hosi Austrália, Holanda no Japão tama Timor Loro sáe. Soldado japonês hakarak ataka Austrália, no hili rai Timor hanesan baze. Atu hasoru sira, soldadu australianu no olandés sira tama Timor hodi halo gerrilla, hasoru japonês. Governador Manuel de Abreu Carvalho buka atu sai neutral. Japonés sira okupa no ukun Timor portugés iha tinan tolu nia laran. Governador fila ba Portugal bainhira funu boot remata.

Dom Carlos Filipe Ximenes Belo
Premiu Nobel Paz 1996

Sem comentários:

Enviar um comentário

Nota: só um membro deste blogue pode publicar um comentário.