Foho Matebian

Foho Matebian

FOHO MATEBIAN

Foho Matebian, Foho Matebian
Sa-be boot liu O? Sa-be toos liu O?
Se-be aswa’in liu O? Se-be tahan liu O?
O tahan ba bomba, morteiru, kainaun, roket ho bazuka
Husi lalehan, tasi no rai





Foho Matebian, Foho Matebian
Iha O tutun aswa’in sira tuba
Iha O lolon aswa’in sira sadere
Iha fatuk ko'ak oan sira helik-an                                                                                  
Hodi haktahan Timor nia ukun-rasik-an

 Foho Matebian, Foho Matebian
Se-be brani liu O? Se-be hamrik metin liu O?
Sa-be maka’as liu O? Sa-be aas liu O?
Sa-be kro’at liu O? Sa-be lulik liu O?
Morteiru, kainaun no bomba lahamout O

Foho Matebian, Foho Matebian
Iha O tutun ruin naklekar lemorai
Iha O lolon ran suli lemorai
Iha O leet matan wen turu lemorai
Hodi harii ukun-rasik-an ba Timor

Foho Matebian, Foho Matebian
Iha O tutun simu loron-matan nakfera
Husi O leet naroman tuda lemorai
Hodi leno dalan ba ukun-rasik-an
Haneban laek, susu-bokur laek, terus no mate laek

Kilat hotu sebaa we matan ida
We-matan Matebian sai sasin lulik
Kilat tarutu ran nakfilak ba we
O oan sira hemu we ran hodi tuba
Tuba hasoru ema aat sira husi li'ur

O oan sira toba hako'ak au-doras
Iis laek sadere iha fatuk ho rai
We ho ran suli-mutu iha fatuk leet
Leut ran bahat iha fatuk ho rai
Hatadak dalan funu todan ba ukun-rasik-an

Hader simu loron matan foun!
Hakat nafatin ba oin!
Tuir naroman ho lialoos!
Hako’ak ita rain ho ukun rasik an!
Kaer rasik ita moris ho ukun!

Foho Matebian, Foho Matebian
Se-be fakar ran liu O? Se-be matan wen suli liu O?
Se-be terus liu O? Se-be halerik liu O?
Lori terus, ran, matan wen ho mate
Hodi sosa ukun-rasik-an

Hader Matebian oan bei-oan sira!
Fo liman ba malu! Tula kabaas ba malu!
Hamutuk satan anin no udan boot!
Hakotu fahe malu! Hakotu terus ho mate!
Hodi harii ita Rain. Timor ba Timor oan tomak!

F.R. Saky
Dili, 7 Dez 2013