Hanorin ‘Língua materna’: Benção ka Maldição (I)

Resposta husi: Kay Rala *

I parte

Lolós, ha’u nia resposta nia título mak: subjectivismo ka ignorância?

Tan sá? Tamba Pe. Martinho la ko’alia kona ba assunto ‘Língua materna ninia aplikasaun’! Ko’alia seluk fali, ko’alia bobar fali, ko’alia fali kona ba conceito ‘língua científica’ no ‘ciência linguística’.

Né katak, Pe. Martinho la hatene buat ida kona ba Aplikasaun Lían Inan – né, ita temi iha psicologia, katak ‘ignorância ba matéria ida né’. Iha ai-laran, iha ami nia debates kona ba Ciência da Guerra, ami dehan ba malu nuné: ‘quem não sabe da matéria, não tem direito a palavra’, katak, ‘sé mak la hatene didiak assunto ida, lalika ko’alia’. Tan sá? Tamba problema la ós ona nia kria konfuzaun boot ba nia-an rasik, maibé liuliu nia konfunde ema seluk.

Tamba ko’alia arbiru, iha parte nebé Pe. Martinho temi kona ‘ciência linguística’, iha pontos HAT nia laran, iha mós psicologia, ita temi ‘subjectivismo’ – katak, la iha objectividade de análise ba assunto né! Iha ‘ciência linguística’ ha’u nian (nudar conhecimento linguístico), ha’u mós bele dehan: ‘salah tempat, dong!’ ka ‘omong sembarangan, deh!’

Tamba sá mak ha’u dehan né hotu? Tamba, lolós Pe. Martinho buka hatene uluk responde ba nia pergunta rasik: ‘Ha’u nia pergunta iha fundo mak né: proposta no projecto ba língua materna’... mak sa-ida?

1 – ‘Torre Babel’

Komparasaun ‘torre Babel’, komparasaun desgrasada tebes ida! Tan sá? Tamba, intelectual no socialmente, ita hotu moris hela iha módulo Torre de Babel... loro-loron!!!

Iha Parlamento rasik, ita bele rona Tetum, ‘bahasa’, ‘pretuguês’, no ‘inggris’! Iha SD, SMP, SMA (alunos barak no inan-aman sira, liuliu iha foho, seidauk hatene dehan pré-primária, primária, pre-secundária ka secundária), iha Universidades ka Instituições Ensino Superior nian, ita koalia ‘bahasa’, tetum, ‘pertuguês’ no karik inglês mós. Bain-hira ita loke jornais sira, ‘tore de Babér’!

Karik mós Biblia muda tiha ona nia versaun, tamba uluk la konta katak Torre monu hodi oho ema ‘dodok tiha hotu’. Uluk, dehan katak, tamba la kompreende malu, sira la konsegue harí torre né.

Ha’u fiar katak, tamba Ângela Merkel mós lê ‘Babilonisch Sprachverwirrung’, ikus-ikus né, bain-hira Chanceller alemã né ba reuniões (quase semanais) ho Presidente francês Nikolas Sarkozy no Comissão Europeia, Senhora né lori ona tradutor, tamba nia la ko’alia francês no inglês. Foin semana kotuk, Merkel iha China, ko’alia nia lian ho tradução simultânea, hodi nuné Hu Jin Tao no Wen Jia Bao bele hatene katak nia husu apoio ba China atu sosa dívidas (tusan) iha Europa, hodi nuné bele salva Europa husi crise económica. Merkel ko’alia alemão, Hu Jin Tao no Wen Jia Bao ko’alia chinês – sira la mate, sira buka salva Europa, tamba europeus barak servisu la iha no sira nia governos osan la iha!

‘Torre Babel’ mós mak ita bele haré, bain-hira iha Parlamento Nacional, ukun-na’in sira koalia kona ba língua materna, husi ida-idak nia perspectivas.

Balun dehan fahe povo, halakon Unidade Nacional (haktuir ‘Sociedade Civil’ nia liafuan), haburas ‘sukuismu’ (liafuan ida né merece katak ‘ciência linguística’ tenki fó definição). Balun fali dehan katak, iha Austrália mós, hanorin ona lian china ho indonésia iha Universidade – katak, iha Austrália sira la’o ba oin, ita mak hakiduk!

Ita nia kakutak, ita nia matenek ... iha hela módulo ‘torre de Babel’. Maibé, perspectivas sira né hotu hatudu deit: subjectivismo no ignorância ba matéria!

2 – ‘Desacralização’ ba UNTL

Forum Académico ka Instituto Académico, hanesan UNTL, bele fali fó fatin atu koalia kona ba língua materna!!! Hanesan fali pecado boot ida!!! Perspectiva nebé sala liu!

Ha’u dehan sala, tamba sá? Tamba hanoin fali katak ‘forum académico’ atu ko’alia deit kona ba tecnologia no ciência! Atu ko’alia deit karik kona ba ‘WWW’ – nebé ema barak iha Inglaterra. América no Austrália, la hatene tan sa-ida mak né...

Ita bele hetan conclusão katak, iha Timor... avançado duni! Inglês la ós ita nia língua materna, maibé ita hatene ona ‘www dot com’, ita hatene ona ‘internet’, ita hatene ona ‘apple’, ita hatene ona ‘sms’, hatene mós ‘facebook’, hatene ‘I-Pad’, ‘I-Phone’, ‘twitter’ – núdar ‘língua científica’, hodi hanoin katak, lolós, iha UNTL... ko’alia deit buat sira né!

Consciência/hanoin hanesan né mak fanun ha’u kona ba fenómeno ida seluk – conceito do património! Ita balun kontenti, tamba malae sira mós contente, bain-hira ita define Património Cultural, atu rekupera ka reabilita:

a) ‘gereja tua’ sira, hodi nuné ita temi katak ita hotu católico;

b) Prisão, ohin loron ita temi ‘komarka’, nudar símbolo kapaz tebes ida ba ita nia identidade, tamba malae sira hatama ita nia aman sira, abôn sira no bei-ala sira iha nebá, nudar dadur, sai to’o oho;

c) Castelos ka muralhas – nudar parte identidade ita nian, tamba malae sira hela iha nebá ukun ita, no mós iha nebá maka sira defende-an hasoru rebeliões husi ita nia abôn sira no bei-ala sira.

Ita sinti ‘proud’, ita sente ‘bangga’... tamba ita iha património... atu hatudo ba Mundo... kona ba ita nia Identidade!

Iha Parlamento, balun temi exemplo Cabo Verde! Ha’u bá Cabo Verde, iha 2000! Sira mós hatudu Fortes no Prisões, tamba uluk Cabo Verde sai nudar fatin concentração ba escravos (ka atan), nebé kaer husi Continente africano, atu lori ba Brasil... atu kuda algodão, kuda café no buat seluk tan! Cabo Verde, uluk liu, rai mamuk – sira nia história hanesan ‘torre de babel’ kiik ida – iha nebá mak hamosu ‘crioulo’, tamba hotu-hotu tenki aprende ko’alia pretuguês! Ita bele kompreende, iha tempo ocupação indonésia, ita hotu obrigado ko’alia ‘bahasa’ – até Analfabetos sira nebé ita hanorin hela atu lê no hakerek, (‘paling tidak’... sira nia naran)... hotu-hotu ko’alia ‘bahasa’ corrente, ne’ebé la ós duni ‘bahasa’ akadémiku ka sientítiku! Lós duni, ‘bahasa’ académico ka científico, né propriedade ita nia ‘kaum’ intelectual sira nian!

Maibé, ha’u triste tebes! Intelectuais timor-oan sira atu despreza tiha ‘lian inan’, moe atu reconhece ‘lian inan’... nuudar Património Cultural, nuudar Abut ba ita nia Identidade lolós!

Karik tamba balun lê ona livros ho lian ‘german’ deit, balun keta livros ho lian ‘prancis’ ona, ou keta tamba barak maka ko’alia ona ‘english’ ho nanál naktelok ona... maka ‘lian inan’ nebé ita nia inan uza ba ita, bain-hira sira ko’us ita, fó susu ba ita, hamós ita nia foer, kanta ba ita hodi hamaus ita atu hán, atu hari’is, atu toba... – Ida né, LIAN INAN né... mak desacraliza fali... Forum Académico no kakutak académico husi intelectuais sira!

Na realidade, ita desacraliza ita nia AN RASIK!

Iha acontecimento iha UNTL, feto maluk balun nebé, ho histerismo ‘luar biasa’ (ida né fó dalan atu hetan mós ‘penghargaan utk keberanian dalam demokrasi’!!!), hanaran-an nudar representantes sociedade civil, hakilar kona ba fakar-ran, terus no mate. (Ha’u mós hakfodak, tamba ha’u la conhece, iha 2000 no 2001, ema balun nebé participa ba reconsiliação iha fronteira, hodi lori refugiados sira fila – de repente, rona sira mós iha nebá, hodi fó hanoin ba problemas nebé mosu daudauk iha Lista Veteranos sira, nebé balu-balun mosu ho critérios nebé la lós!).

Balun fali temi liafuan ‘maubere’, komparasaun ida nebé hatudu momós, ema sira né kakutak mamuk no la iha duni compreensão kona ba história. Ohin loron, qualquer ema ida, foti-an hanesan sira maka hatene história lolós, tamba sira maka halo! Iha psicologia pós-conflito, fenómeno ida né mosu... iha fatin hotu-hotu! Ita tomak mak tenki enfrenta problemas socio-político-psicológicos sira né!

‘Maubere’ sai hanesan referência ida ba ita nia an rasik, nuudar kolonizado, tamba malae sira aplika liafuan ‘maubere’ ba timoroan sira hotu nebé foer, hatais hakfolik ka lipa, la hatene português, la ko’alia tetum, ain-tanan, mama malus, fuma batar kulit nebé dois. ‘Maubere’ liafuan pejorativo, katak hodi hakribi. Iha África, malae sira bolu ‘preto’ ka ‘negro’. ‘Maubere’ liafuan ida hodi hatudu hakribi ba ita, timor-oan. Ohin, ita hakribi ita nia-an rasik.

Ita hatene koalia ona português, ita matanek ona, ita hatais vestido ho tacão ás, ita uza ona ‘lipstick’, ita uza ona gravata no ‘kaijaku’, sa’e ona kareta, ba pasiar ona iha tasi balun, mak ita... bele hakribi ona ita nia-an rasik!

Ita desacraliza ona ita NIA KLAMAR MAUBERE!

3 – ‘Herodes no Belém’

Komparasaun Herodes no Belém... la sientífiku liu! Nem husi ponto de vista religioso, ita bele aproveita! E Pe. Martinho nia sala mak kahur ciência ho religião! Hanesan Intelectuais balun no Ukun-nain sira balun kahur fali política ho ciência!

Sociologia, ciência ida nebé la ós exacta. Se ema ida hakarak estuda ‘behaviour’ ka comportamento ka hahalok ema/sociedade timor, iha tempo descobrimentos, timor-oan nia hanoin no hahalok diferente liu no tempo iha ona administração política portuguesa nian, to’o II Guerra Mundial. Bain-hira mós hakarak estuda fali 24 anos ocupação indonésia, hanoin no hahalok timor-oan nian la hanesan tempo uluk, bain-hira ita hahú funu. Tempo ohin loron mós, iha mudanças ba hanoin no hahalok iha ita nia sociedade laran.

Sociologia, ciência pragmática ida. Intelectuais timor-oan sira hatene ida né... liu ha’u, nebé SMA ka Liceu deit. Karik seidauk esforça-an atu aplica, karik seidauk kadi kakutak atu haré ho diak. Karik sei dekór maten deit, sa-ida mak uluk sira aprende iha ‘Universitas’.

Iha ai-laran, bain-hira ami estuda no discute FUNU, nudar Ciência ida, ami aprende Leis Gerais kona ba Guerra. Ami mós aprende, husi livros oi-oin, Funu nia desenvolvimento husi tempos medievais (bain-hira sei uza espada ka surik to’o diman no rama, bain-hira uza mós kuda hodi halo funu, to’o bain-hira ema inventa ona pólvora), to’o kilat husi manual ba automático, no tanques de guerra no avião ba morteiros, canhões no mísseis. Estudos sira né atu orienta deit ami nia hanoin, hodi hetan compreensão geral ida. Ami mós aprende distingue funu ka guerra convencional ho funu ka guerra de guerrilha. Ba Guerra rua né, leis gerais hanesan, la muda! Lós duni, maibé leis gerais!

Ami mós buka estuda no aprende kona ba guerrilha iha fatin oi-oin, husi China ba Vietnam, husi Guiné Bissau ba Cuba, husi Moçambique ba África do Sul – Lei importante ida ami kaer, mak né – Funu evolue ho tempo! Ciência Funu nian... EVOLUE... hanesan ciências sociais seluk!

Processo hotu-hotu kona ba sociedade, tenki ser processo dinâmico... Labele sai processo estático! Mesmo iha ciência exacta, ba iha tecnologia sei la iha avanço... se estático, katak buat nebé hetan pára ona iha né! Quanto mais (ka liuliu, ka ‘apalagi’) iha ciências sociais.

Pedagogia mós ciência social ida. Se estática, sei la avança! Mundo académico ka Forum académico, iha Timor Lorosa’e doben né, tenki buka harí kultura hadomi ita nia IDENTIDADE!

Ha’u nia apelo ba intelectuais timor-oan sira – labele estático iha aprendizagem nebé ita boot sira lori husi ita boot sira nia Curso oi-oin. Buka hanoin nafatin, buka aprende nafatin, tamba mundu mós evolui, ho diak no aat!

Lolós, iha UNTL bele hanoin hahú mós ‘ciência linguística’, hodi timoroan bele aprende semântica husi ita nia línguas maternas. Ha’u bele garante, riku tebe-tebes!!!

Iha II Parte, ha’u sei ko’alia kona ba ‘Aplikasaun língua materna iha Ensino (Básico) Pré-Escolar’ no iha III Parte kona ‘Pedagogia - Experiências iha Rai barak no experiência iha Timor-Leste kona ba ‘Escola Foun’ ’.

* Ema balun hakerek surat, mai ha’u, nuné: ‘Ba Seu Silêncio Peremeiro Menistro José Alexandre Gusmão, aliás Xanana’. Ha’u hakarak atu informa ba público katak, ha’u muda tiha ona ha’u nia naran, husi Registo iha Igreja no Civil. Uluk, iha português nia tempo, labarik nebé atu sarani no bele tama escola, tenki lori naran português, husi santo ida nia naran ka figura histórica Portugal nian ida (hanesan Afonso Henriques, Nuno Álvares, Bendito Sávio, João Bosco, no sst). Kay Rala, ha’u nia avô husi ha’u nia Inan. Nuné, formalmente, husi kedas 2000, Kay Rala mak ha’u, José Alexandre pertence deit ba arquivo ona.