Harii AMP iha 2007 la hanesan iha tinan 2017

Lider partido AMP halo kompromisu hodi apresenta alternativa ba VII Governo Constitucional, iha Singapore foin lalais ne´e (GMNTV, 21/1172017)

Dili. Iha esperiensia exercisio Constitucional Timor-Leste nian  interpretasaun ba artigu 106º C-RDTL winhira resultadu Eleisaun Parlamentar (ElPAR) 2007, partidu Fretilin  mais votadu la konsegue forma Governo no  partidu CNRT mak forma Governu liu husi harii plataforma hodi hamosu Aliança Maioria Parlamentar (AMP). AMP mak hahoris ka suporta ba IV Governu Constitucional.

Realidade tinan 2017 partidu mais votadu, partidu Fretilin neébe nudar manan nain ho kadeira 23 no Partidu CNRT hili ba oposisaun. Partido Fretilin hahu desenvolve komunikasaun ho partido 4 seluk nebe iha asentu parlamentar.Partido Fretilin rasik hamosu konseitu 3:koligasaun, Inklusaun no Insidensia Parlamentar.

Tuir observador politica husi Universidade da Paz (UNPAZ) João Viegas katak, "estrategia sira neébe partidu Fretilin foti hodi  desenvolve komunikasaun ho partido sira iha asentu parlamentar no hamosu konceitu 3 ne´e, taka dalan ba posibilidade mosu AMP".

Haktuir tan Francisco Viegas, "partidu CNRT nudar partidu segundu mais votadu mos, afirma iha ninia konferensia inisiu Agosto tinan 2017 katak sei la konvida partidu seluk atu forma governu nune mos sei la aseita convite hodi hola parte iha Governo", defende dosente UNPAZ ne'e.

Tenik tan Francisco Viegas, "Partido CNRT rasik  iha esperiensia insidensia parlamentar iha tinan 2015-2017 tanba Fretilin hola posisaun hodi fó apoio ba VI Governo Constitucional".

"Husi parte PLP mos, inisiu tama ona akordu koligasaun ho Partidu Fretilin ho KHUNTO, hare komunikadu neébe mak hasai husi Secretariadu partidu Fretilin nian iha loron 12.08.2017, convida partidu PLP ho KHUNTO ba forma koligasaun".

Dehan tan Francisco Viegas, "Tanto CNRT ho PLP la iha intensaun atu harii AMP, tanba deit lideransa Kay Rala Xanana Gusmão ho Taur Matan Ruak mos la iha relasaun neébe harmonia molok no hafoin eleisaun Parlamentar iha loron 22 fulan Julho tinan 2017, parte ida. Parte seluk, PLP mos atu kombate hegemonia CNRT no bipolarizasaun poder entre CNRT ho FRETILIN, tanba ne´e mak PLP hafoin hetan resultadu afirma kedan hili «Oposisaun ida dinâmika no edukativu»", argumenta Francisco Viegas.

"AMP mosu hafoin prepara ona atu tomada de pose ba VII Governo Constitucional maibe prazu liu ona, prepara deit batalha ba fulan nem (6) neébe prazu normal hodi hamonu Governo", defende Francisco Viegas.

Lideransa Maximu AMP nian, foin dadaun halo surumutuk iha Singapore hodi rea-afirma sira nia kompromisu alternativu ba Governo dahitu (VII) no husu atu Presidente Republica (PR) kumpri C-RDTL (media Nacional, 21/11/2017).