TRABALHADOR NO FUTEBOL

TRABALHADOR NO FUTEBOL

Hosi: C. Oliveira

Tebebola hanesan pratika desportu ida nebe ema barak gosta liu iha mundu. Iha Timor Leste, ema Timor mos iha paizaun bo'ot ba tebebola. Tamba ne'e maka hafoin tiha Ukun rasik-an mosu kedas FFTL. Ikus mai, mosu LFA.

Iha Inglaterra, Timoroan sira nebe hela no servisu iha Inglaterra, oras ne'e daudaun uza tebebola hodi bele halibur malun, hametin amizadi no promove dame.

Tuir hau nia observasaun, houri uluk kedas mosu klubes tebebola nebe hari'i hosi Timoroan sira nebe maioria dedika sira ninia tempo moris hanesan trabalhador iha Inglaterra. Klubes tebebola sira ne'e, balun mosu ho karakter hanesan klubes profissionais, i, balun mosu ho karakter hanesan meios ida "apenas" atu  halibur i tebebola hamutuk.

Desde tinan 2015 komesa mosu ona jogo amigavel entre klubes tebebola nebe namkari iha Reinu Unido. Objektivu hosi jogo amigavel sira ne'e maka atu kria AMIZADI NEBE FORTI NO MOS ATU HAMETIN DAME ENTRE TIMOR OAN SIRA IHA REINO UNIDO. No mos pratika tebebola atu halo lakon stress, atu halibur hamutuk, atu hado'ok-an hosi moris mesak no atu senti moris "fit".

Iha Irlanda do Norte, Crewe, Dover, Oxford, Bristol, Peterborough, Great Yarmouth, Norwich no sidadi seluk2 tan existi klubes tebebola. Klubes sira ne'e hamrik ho inisitaiva rasik no fundus financeirus rasik hosi jogadores sira no membrus komundadi Timor oan sira nebe hela no moris iha Reinu Unido.

Taça 20 de Maio de 2017

Taça 20 de Maio de 2017 hanesan kontinuasaun hosi Taça 20 de Maio nebe halo prmeira vez iha cidadi Peterborough iha tinan kotuk, 2016. 

Iha tinan 2016, komisaun organizadora nebe mai hosi Komunidadi Timor iha Peterborough konsege halibur klubes 16: Irlanda do Norte, Great Yarmouth, Oxford, Cambridge, Norwich no Peterborough. Tinan ida ne'e, 2017 aumenta tan klube ida hosi Dover. 

Objetivu Taça 20 de Maio

1. Atu komemora loron Independensia Nasional Timor Leste 20 de Maio de 2017.

2. Atu halibur Timor oan sira iha Reinu Unido, liu-liu sira nebe iha paixaun ba  tebebola.

3. Atu promove paz, unidadi, solidariedadi, edukasaun no integrasaun Timor oan iha Reinu Unido.

4. Atu buka talentu futebolista Timoroan iha Reinu Unido futuramente bele servisu hamutuk ho Federasaun Futebol Timor Leste, Liga Amadora Timor Leste no klubes sira iha Timor Leste.

  

KONKLUZAUN

Eventu desportivu ne'e hanesan teste ida atu Timoroan sira iha Reinu Unido hatudu sira ninia maturidadi nudar sidadaun Timoroan lao rai nebe diak no fo valor ba amizadi no unidadi.

2ª Taça 20 de Maio de 2017 hetan mos konhesimentu hosi komunidadi tomak Timoroan iha Reinu Unidu, autoridadi lokal iha Peterborough, polisia, Embaixada RDTL iha London no Federasaun Futebol iha Peterborough.

Eventu bo’ot ne’e sei halo iha Embankment Athletic and Sports Arena, komesa tuku 12 to’o tuku 7 kalan, iha loron Sabado, 20 de Maio de 2017.

Ita hotu tenki fo'o ita ninia admirasaun no respeitu profundu ba inisitiva sira ne'e tamba afinal Timoroan sira iha Reinu Unido laos servisu deit maibe sira mos iha preokupasaun atu uza tebebola hodi bele kria amizadi no moris dame.

Hein katak Governu Timor Leste iha interesse atu fo’o nafatin apoio ba eventu sira hanesan ne’e. 

Hotu