FUNDADOR DO ESTADO: Conceito filosófico iha pratica política

FUNDADOR DO ESTADO:

Conceito filosófico iha pratica política

Martinho G. da Silva Gusmão

Docente da Filosofia Política, Ética Fundamental no Hermenêutica

iha Instituto Superior de Filosofia e de Teologia (ISFIT)

Dom Jaime Garcia Goulart, Dili

Tópico FUNDADOR DO ESTADO hamanas debate iha media online, tan ha’u temi de’it Nicolau Lobato no Kay Rala Xanana Gusmão nia naran. Ha’u la’os nicolauista, la’os xananaista! Maibe, husi debate sira ne’e ha’u seidauk hatene didi’ak tan sa mak ema balun hakarak atu ha’u mos reconhece Dr. Mari Bim Amude Alkatiri nu’udar fundador hotu. Afinal, ha’u hatur de’it conceito filosófico konaba fundador do estado. Husi conceito nebe ha’u hatene, ha’u bele de’it sukat Nicolau no Xanana. La iha pretensão (maksud) atu inaugura ema ruma nia posição iha historia. Filosofia la hare ba “verdade conclusiva” iha historia nia laran hanesan saída mak CVA/ KKP dehan! Se filosofia halo verdade conclusiva, ne’e katak nia dada iis ikus nian no mate ona!

Husi biban seluk, iha TVTL Dr. Alkatiri rasik dehan “Ha’u mak fundador do Estado; Ha’u mak fundador FRETILIN; Ha’u mak fundador FALINTIL ... sira seluk sei buka hela sira nia estatuto ... ha’u nian metin ona!” Nia rasik mak halo autoafirmação (mengakui diri sendiri) ba nível prestigioso ida ne’e. Tan sa mak ema sira be alkatirista la hakerek rasik? Hodi proclama an rasik, Alkatiri nega mata-matak Nicolau no Xanana.

Iha filosofo ida dehan, “whereof one cannot speak, thereof one must be silent” (cf., L.Wittgenstein, Tractatus Logico-Philosophicus: 7). Wainhira konaba buat ida ema ida labele ko’alia, konaba buat ne’e ninia nonok tiha. Wainhira ha’u la ko’alia konaba Dr. Mari Alkatiri, nune’e ha’u nonok! Estranho (aneh) tebes, ha’u ko’alia tiha konaba Nicolau Lobato no Xanana Gusmão, maibe ema hakarak haksesuk malu fali konaba Alkatiri. Liu tan, sira la defende Alkatiri, maibe hanoin fali katak katak ha’u iha “problema pessoal”; balun dehan “perseguição intelectual”, “discriminação”; ka “racismo”! Lae! To’o Sr. Alkatiri rasik mos dehan ha’u halo “perseguição política” ba nia. Mos lae hotu! Filosofia la importa sentimento infantil hirak ne’e maibe hakruk ba argumento critico atu loke debate! Se ha’u ko’alia de’it konaba Nicolau no Xanana, matenek sira matenek karik, sira haksesuk de’it konaba ema rua ne’e: tebes ka lae sira ne’e fundador do estado?

Pergunta simples: bele ka lae ema halo autoafirmação konaba ninia estatuto rasik iha historia rai ida nian? Resposta mos kman: bele de’it! Loron ohin Dr. Mari Alkatiri nian, loron oin ema seluk naklosu sai mai ... ninian fali ona! Se dehan “HA’U”, ema seluk oinsa? Ami Macassae sira hatan dehan, “tara nau gere, tara nau gini” (ida-idak hanoin, ida-idak halo ninian ba)! Maibe, ho pergunta nebe todan liu oituan, FUNDADOR DO ESTADO ne’e “factum historicum” ida ka “facientes historicus” ida? Ho ida ne’e, ha’u tau sasukat filosófica, liu-liu hakesi-an ba filosofia G.F.W. Hegel no Karl Marx nian. Belun José Maria Guterres ninia liafuan iha fórum-haksesuk.blogspot dehan “aproximasaun mudansa/ transformasaun ou pendekatan perubahan” mos la sala. Maibe, hau nia iis mak filosofia hegeliana no marxiana nian hodi hatur “hermenêutica da continuidade e descontinuidade”. Ho Hegel nia liafuan “reality in working”. Ho Marx nia liafuan, “a pratica é critéria da verdade”.

Liafuan “factum” mak halo ema balun hanoin katak fundador do estado ne’e hanessan jusnaturalista sira nebe fiar ba “imutabilidade da natureza humana” (sifat alamiah manusia yang tidak boleh diubah): saída mak “ha’u” halo iha tempo ida, nia metin nafatin ona, “verdade eterna” (kebenaran abadi), “valor absoluto” (nilai mutlak) no sai ona “racionalidade de todo o universo” (daya nalar seluruh gagas semesta). Ema ida labele bok no sukit tuir “ha’u” nia liafuan. Husi biban seluk, “facientes” katak ema nebe mosu iha historia no halo fama ida morin “per experimentum et probationem” (mai husi experiencia no provas da vida; melalui pengalaman dan pengujian). Ho Presidente Nicolau Lobato nia liafuan karik, “... reconstruir com o seu próprio suor, com o seu próprio sangue”! Atu hanoin konaba Nicolau Lobato no Xanana Gusmão nu’udar “fundador do estado”, ema barak bele de’it la simu ha’u nia hanoin.

Definição: saída mak “fundador do estado”?

La hatene atu contra ka atu suporta ha’u nia hanoin, ema balun posting iha FB, no ha’u lê definição katak “founding fathers ... people who were credited with establishing their nation. National founders are typically those who played an influential role in setting up the system of governance (i.e., political system form of government, and constitution), of the country. They can also be military leaders of a war of independence that led to the existence of the country” (https://en.wikipedia.com). Iha conceito nebe haka’it malu: “father of the country”, “father of the nation” no “founding fathers”. Tuir wikipedia, liafuan hirak ne’e “incomplete” no “redirect”.

Ho liafuan “were credited” (passive voice) katak fundador do estado ne’e ema seluk ka povo mak hatudu no fo fiar. La’os na’in rasik mak haklaken no foti-an. Nune’e mos, povo fiar tan nia “played an influential role” (past active voice), halo no iha knar nebe bo’ot no luan tebes husi hun too rohan. Ikus liu, “militar leaders of a war of independence”, nia kaer kilat hodi halo funu atu hada’u independência. Husi definição ne’e, ha’u descobre de’it ema na’in 2 iha historia Timor Leste nian nebe durante ne’e povo fiar tomak nu’udar Presidente da República, Presidente do Conselho da Resistência, mos Comandante em Chefe das FALINTIL: Nicolau Lobato no Kay Rala Xanana Gusmão. Iha ema seluk ruma mak tama iha critéria wikipedia.org karik, ha’u kala la hatene duni. Desculpa!

Maibe, halo nusa ba mos liafuan fundador do estado ne’e hanesan americanização ba história iha política estado foun sira nian. EUA mak iha historia konaba “founding fathers”. Iha 1639, grupo ida husi New England Puritan Fathers koko atu halo constituição hodi afirma katak América nia governo mai husi Maromak, tan ne’e “in God we trust” (hakerek iha osan tahan dólar América nian). Hare didi’ak ba: liafuan “fathers” ne’e hatudu ba “pastor” (protestante) sira ka “padre” (anglicano no católico) sira! “Puritan Fathers” (pastor/ padre) hakarak atu hari’i nação ida nebe celebra liberdade religiosa nu’udar direito fundamental, no (maibe) Nação América ne’e tenki Cristã (rai sarani nian). Tuir mai, liafuan “founding fathers” ne’e hatudu ba líder sira nebe mosu iha tempo Revolução americana (1775-1783), liu-liu sira be tama iha Federal Constitutional Convention (1787). Husi ne’e, Presidente EUA tenki foti juramento hodi Maromak nia Naran no tau liman Biblia nia leten. Nia sai símbolo ba unidade nacional. Founding fathers mak lori Estado 51 nia naran atu halibur hodi hari Estados Unidos América! Ne’e duni, “founding fathers” ne’e halo ema hanoin ba “fatherS” (pluralismo), la’os “father” (individualismo).

Liafuan “fundador do estado” la dun konaba Europa! Política clássica Europa tomak, hanesan mos Portugal nian, moris ona iha “regnocentrismo” Cristão nian! Estado sira iha Europa hare sira nia historia iha rai ne’e hanesan lalatak lalehan nian; hanesan Maromak ida mak ukun lalehan, nune’e mos Imperador ida mak ukun rai ne’e; hanesan “Aman Lalehan” mak sai Liurai ba Universo tomak, nune’e mos Imperador sai “aman iha rai laran” ne’e. Nune’e fundador do Estado mak imperador! Nação hanaran “fatherland” ka “pátria” (mai husi “pater” ka “aman”). Iha século barak, Eropa hakesi-an ba “regnocentrismo” ho sistema político “Pai Nosso que estais no céu” nebe “vem a nos o Vosso Reino, seja feita Vossa Vontade” iha rai ne’e liu husi Imperadores (Kaisar), Reis (Raja) no Príncipes (Pangeran)! Ninia negativo mak mosu caesaropapisme: “caesar” (der Kaiser) no “papa” (santo padre) hamutuk ukun rai ne’e hodi lalehan nia kbiit. Dramaticamente, Imperador Louis XIV husi França (nação católica) dehan, “L’etat c’est moi” (Estado mak ha’u); ka empresta Mari Alkatiri nia liafuan “Ha’u mak hari’i Estado”. Nune’e, “Ha’u” ida ne’e sente an hanesan proprietário (pemilik) husi Estado; no estado sai hanesan “Ha’u” nia rikusoy” tan “Ha’u mak hari’i Estado” ne’e ho “Ha’u nia ran rasik, ho ha’u nia kosar wen rasik”. Sasukat mak “HA’U”. Ne’e duni, ohin ha’u hakarak sai executivo, aban hau tur iha legislativo ita lalika kokotek ka kokorek, tan ninia resposta mak EGP (emang gue pikirin?!); mentalidade monarquismo ho ninia triunfalismo autoritário tradicional katak “iha ne’e ha’u mak manda, ponto no vírgula ida mos la muda”!

Maibe, iha Europa, liu-liu hahu 1789 mosu Revolução Francês atu sobu imperialismo Luis XVI no hari “Nova República”. Husi ne’e ba oin, Estado la’os ona aristocrática ka oligarquia monárquica maibe husi Junta de Salvação Publica! França sai duni “primeiro nação-estado” iha Europa. Ida be naran bo’ot liu mak Maxmilien de Robiespierre nebe mak kaer tomak ukun iha 1793 to’o 1799. Maibe, nia la’os fundador do estado moderno França nian. Tuir mai, general Napoleão Bonaparte mak hamorin França nia naran, maibe, nia la’os fundador do Estado.

Iha 1917 mosu revolução Bolshevik (October Revolution) hodi hatun tiha Tsar Russia nia império. Vladimir Lenin harii USSR (Union of  Sovyet Socialist Republics). Joseph Stalin hatutan. Maibe, sira foti-an nu’udar “founding fathers”. Nune’e mos Mao Tse Tung halo revolução iha China, nia lakohi sai fundador do estado! Tan sa? Lakohi tabele tuir gaya EUA.

Exemplo seluk mak iha Portugal, iha Revolução 28 de Maio de 1926, Ministro Salazar hari’i “Estado Novo” (1932-1933 to’o 1969). Nia hakarak hametin nacionalismo político, económico no social nebe halo estado metin no forte, halakon tiha multipartidarismo no monta fali partido único hodi hametin “União Nacional”. Hau la dun hatene klean história política iha Portugal, maibe ha’u hanoin katak Salazar la’os “fundador do Estado” ba Portugal moderno. Sa tan, wainhira nia mate nia husik hela Portugal iha condição miserável (mukit/ ki’ak rabat rai) ida.

Banati tuir historia EUA nian, rai barak iha Asia, África no América Latina koko atu defini sira nia estatuto político no Estado hodi haketak-an husi “motherland” Europa nebe coloniza sira! Exemplo besik liu, iha Indonesia, ita hatene mak Soekarno–Hatta nu’udar “Bapak Pendiri Bangsa” ka “Bapak Proklamator 1945” tan sira mak assina texto ba proclamação atu Indonesia ukun rasik-an. Hahu 1955, Soekarno ukun mesak to’o monu iha 1968. Wainhira halo discurso político, nia proclama nia an nu’udar “Paduka Yang Mulia Tuan Presiden, Panglima Tertinggi Angkatan Perang, Pemimpin Besar Revolusi dan Bapa Bangsa”, no haruka protocolo temi naran hirak ne’e tomak iha cerimonia oficial! Nia halo nune’e atu foti sae dignidade Indonesia nian iha nação barak nia oin! Soeharto kaer fali ukun, hahu 1968 to’o 1998 hodi foti-an nu’udar “Bapak Pembangunan” no “Jendral Besar”. Titulo sira ne’e Majelis Permusyawaratan Rakyat (MPR) mak fo atu hetan legalidade. Keta haluha – titulo ne’e mosu, tan pressão política. Barak ka oituan, Soekarno no Soeharto halo politica “buti kakorok talin” atu MPR halo tuir de’it sira nia hakarak.

Originalidade: “inconfundível consciência nacional”

Oinsa ita hare ba “fundador do estado” iha Timor Leste? Iha 1974, mosu PARTIDO sira hanesan UDT, FRETILIN no APODETI. Sira hotu hakarak “autodeterminação” ka “independência” atu hari’i nação ida, maibe ida-idak ho sira nia metodologia rasik. FRETILIN halo proclamação unilateral ba independência, 28 de Novembro de 1975. Surpresa bo’ot tebes, katak, fundador FRETILIN ida hanesan Dr. José Ramos Horta dehan katak nia la concorda ho hahalok ne’e, maibe nia la rejeita Comité Central FRETILIN nia decisão! Hanesan mos UDT no APODETI ikus mai husu integração ho Indonésia. Historia naruk. Ita hatene pedasuk ida-idak!

Maibe, neneik ita hare, katak, fundador FRETILIN sira, UDT no APODETI halo mudança iha sira nia hanoin no hahalok. Sira be halai ba Portugal no Australia to’o Moçambique hahu fo sala ba malu to’o tama iha “amnésia” – katak, haluha tiha Timor Leste ninia “autodeterminação”. Saída mak sira halo iha rai liur, oinsa mak sira luta, ita la dun hatene (pelo menos ha’u la hatene). Lori timor oan nia terus no tanis iha rai laran ne’e mak to’o ona 25 de Abril de 1998 mak hafoin sira hotu halibur malu iha CNRT (Conselho Nacional da Resistência Timorense), Peniche/ Portugal.

Maibe, iha rai laran mosu fenomena balun nebe ita labele haluha: Gubernur Timor Timur Abílio Osório (uluk APODETI) halo declaração ida iha media nacional Indonesia nian dehan – “Integrasi bukan berarti orang dari Sabang sampai Merauke memasuki dan mencari kerja di Timor Timur. Hakekat integrasi itu adalah rakyat Timor Timur yang harus mencari pengalaman di 26 propinsi. ... kita ini integrasi atau dijajah kembali?” (Jawa Pos 27.07.1993). Fohin mak sai governador fulan balun, nia halo ona statement ne’e. Ikus mai, Abílio Osório ba tama “dadur” Penataran P4 iha BP7 iha Jakarta (fulan 7) atu “fase ninia kakutak” oituan. Barak ka oituan, infraestrutura Timor Leste ohin loron mai husi Abílio Osório nia kosar wen no kolen! Molok ida ne’e, Gubernur Timor Timur Ir. Mário V. Carrascalão (uluk UDT), mate-an los hamutuk ho Dom Carlos F.X. Belo SDB atu simu visita Papa João Paulo II hodi nune’e bele loke odamatan no janela ba ema liur hodi hare Timor nia situação. Infelizmente, “independentista” sira (hamutuk ho Padre balun) mak halo abaixo assinado atu rejeita Santo Padre nia visita mai Timor. Governador Carrascalão mos loke ninia gabinete iha “Jum’at” atu rona ema mai halerik no tane liman ba situação injustiça loro-loron nian. Nia mos halo programa “beasiswa” ba Timor oan sira atu sai ba escola barak liu tan (maski sai de’it sarjana “supermi”) iha rai seluk iha Indonesia. Husi biban seluk, líder FRETILIN barak mak la “kokotek no kokorek” iha rai liur no sira nia espírito “revolucionário” hahu agonia ona! Dom Martinho da Costa Lopes hisik kosar wen no mata-wen barak atu husu ba sira atu luta maka’as, maibe saugati de’it. To’o nia mate “is one of exile and loneliness” (R. Lenox).

Ha’u haktuir buat oan sira ne’e atu hatudu “the most notable blind spot” (cf. F. Cooper, Colonialism in Question: Theory, Knowledge, History, 2005: 3) iha ita nia historia wainhira luta atu ukun-an. Dala barak ita bele hare katak tama iha grupo nebe hari’i FRETILIN no FALINTIL, la significa sira hotu merece sai “fundador do estado”. Nune’e mos, hari’i UDT ka sai ema APODETI nian la significa sira la hadomi Timor Leste nia “autodeterminação”. Iha ne’e Carlos Slfr Saky nia obra konaba RENETIL hatudu oinsa mak Carrascalão nia mehi ba Timor Timur bele mos fo espaço ba foinsae sira hamoris “nacionalismo” foun ba Timor nia destino. Husi Fernando La Sama de Araújo to’o Rui M. de Araújo, ministro/a sira no deputado/a sira to’o professores doutores iha universidade sira Timor Leste ohin loron – la sala – mai husi esforço ema na’in 2 nebe importante: Mário V. Carrascalão no Abílio Osório! Bele ka lae ita hare sira nu’udar fundador do estado?

Iha ne’e mak doutrina política Nicolau Lobato nian konaba “inconfundível consciência nacional” hetan ninia incarnação iha Mário Carrascalão no Abílio Osório! Presidente Nicolau Lobato nia liafuan mak ne’e: “... todos quantos vivendo embora nas vilas ocupadas pelo invasores indonésio ... começam a tomar a consciência ... a consciência da justiça da causa de libertação do povo de Timor, simpatizam com a nossa luta ... isto também fazem parte da luta ... têm lugar na fileira da revolução”. Iha hermenêutica karik, nia ko’alia konaba “consciência da determinação histórica” ka iha lian original alemã: Wirkungsgeschichliches Bewußtsein (cf. Martinho G. da Silva Gusmão, Hans Georg Gadamer, 2013: 111-114. 250). Nia formula consciência nacional ka nacionalismo ida ne’e ho liafuan original nian: “Timor Leste é realmente do Timores”!

Los duni saída mak Senhor José Maria Guterres hakerek iha fórum-haksesuk.blogspot nune’e, “Tamba la iha Akta Fundadores no bazeia hanoin nebe’e konsidera katak ema nebe’e kontribui ninia ideias ka pensamentu hodi prepara kriasaun estadu maka alem de figura prinsipal rua, Francisco Xavier do Amaral no Nicolau dos Reis Lobato diretamente, primeiru membrus do governu RDTL 1975 no 19 pesoas husi CCF konsidera nudar mos Fundadores do Estadu. 19 pesoas nebe’e sei moris mak Dr. Marii Alkatiri, Dr. Jose Ramos Horta, Abilio Araujo, Ali Alkatiri, Jose da Costa (Mauhunu), Alarico Fernandes, Feliciano Alves, Octavio Araujo, Filomeno Paixao, Abel Ximenes (Larisina) no Jose Luis Guterres (Lugu)”. Ha’u la tau duvida katak sira sai duni “iniciador”. Maibe, atu fiar katak “Timor Leste é realmente do Timores”, ha’u sente Mário Carrascalão no Abílio Osório mak maka’as liu sira be lista laran ne’e!

FRETILIN hahu ho “partidarismo” no hakarak sai “partido único”. Ninia nacionalismo ne’e partidária no sectária. Nicolau Lobato mak hahu ko’alia konaba “inconfundível consciência nacional”. Nia mesak mak aten brani hodi taka tiha historia FRETILIN no FALINTIL husi página “partidarismo” hodi loke fali página foun “nacionalismo”. Se ita rona didi’ak ninia discurso 1978, Nicolau Lobato la usa liafuan “Partido FRETILIN”. Iha discurso tomak, liafuan “partido” la mosu! Ninia vocabulário mak “nação”, “pátria”, “consciência nacional”, “unidade nacional” no “nacionalismo”. Dala ida tan: la iha liafuan “partido”. Nia mak defini katak “a FRETILIN identifica-se com o POVO, a FRETILIN tornou-se POVO ... porque realmente a FRETILIN é o POVO que luta”. Infelizmente, Nicolau Lobato mate iha 31 de Dezembro de 1978.

Nacionalismo sai hanesan Estado ninia klamar no fuan! Estado ida labele hamrik metin wainhira la iha consciência nacional ida ne’e. Ne’e duni, Nicolau Lobato mak hahu formula “nacionalismo” nu’udar crença política, nu’udar ideologia da luta! Keta haluha – iha luta laran. Iha 1975 to’o 1999, Estado sei iha Portugal nia liman (de jure) no Indonesia nia liman (de facto). 1999-2002 iha transição nia laran, ONU mak kaer!

“Ideological Turnround”

Iha discussão ha’u ko’alia konaba “ponto de viragem” ka hanesan Xanana dehan konaba “ideological turnround” (cf. The Autobiography: 129-136). Tuir nia hanoin, moris ho “partidarismo” (sa tan partido único) halo ita nia luta taka-metin no la iha interação ho dinâmica foun. Comemora tinan 4 ba revolução nian (1978), Nicolau Lobato halo apelo ba “consciência nacional” no “unidade nacional”. Hare ba luta nebe todan no fakar ran barak, nia koko atu hare ba “necessidade de corrigir os erros” no “remover os obstáculos”.

Iha 1987, Xanana Gusmão hakerek konaba “ideological turnround” dehan,

Ø  Reconhece sala barak nebe aswain funu na’in sira halo uluk ona, hodi nune’e processo ba libertação hahu namtate ona;

Ø  Hatudu ba mea culpa (Xanana foti husi liafuan sira missa nian dehan “hau beik sala”) katak ita nia analisa nebe la los, halo ita nia politica hanesan los labarik sira;

Ø  Processo gradual atu halo correção;

Ø  Husik tiha conceito rígido iha política.

Ida ne’e hatudu momos katak, Xanana hatutan Nicolau ninia estrada! Saida mak “ideological turnround” ne’e lerek? FRETILIN halo proclamação unilateral, no hakarak sai partido único. Ida ne’e sai obstáculo político atu luta hasoru Indonesia. Opção FRETILIN nian ba ideologia “leftist” (esquerdista), tuir Xanana, lori ema barak nebe lakohi fo liman ba nia. Sa tan ABRI mai ho kedas doutrina ida – FRETILIN ne’e comunista. Indonesia (Soeharto) odio no vingança maka’as ba comunista. Tan ne’e wainhira militar Soeharto nian tun iha Dili, sira tiru mate de’it ema hotu nebe associa ho partido ida ne’e. Atu labele mate mohu, la’os FALINTIL mak mak tiru hasoru ABRI. Padre sira no catequista sira mak lori we no masin atu sarani ema hotu. Nune’e, Igreja Católica sai abrigo ba povo no padre sira nia batina sai símbolo ba “unidade nacional”. Hanesan Ben Anderson hakerek, “…a popular Catholicism has emerged as an expression of a common suffering … This Catholic commonality in some sense substitutes for the kind of nationalism … Moreover, the decision of the Catholic hierarchy in East Timor to use Tetun, not Indonesian, as the language of the Church, has had profoundly nationalizing effects” (Monash University, 1992). Igreja Catolica ho povo Timor Leste ne’e ida de’it.

Tuir Xanana, ninia encontro ho Dom Martinho da Costa Lopes iha Mehara (Lospalos) sai hanesan “ideological turnround” duni. Se Ben Anderson nia liafuan los, então Xanana mak halo ita nia “nacionalismo” ne’e nu’udar “cultural artefacts ... profound emotional legitimacy” (cf. Imagine Community, 1983: 48).

Iha ne’e mak ita nia historia: FRETILIN hili comunismo nu’udar ideologia, maibe la iha capitalismo nu’udar contra-partida. FRETILIN hakarak sai partido único, maibe la iha Estado ida mak acomoda. Husi ne’e mak mosu alternativa: nacionalismo. Husi “consciencia nacional” (Nicolau Lobato) to’o fali Xanana nia “volta” nu’udar “terceiro nacionalismo ... que ressurja ... um nacionalismo marcado exactamente pela reacção histórico-cultural ao ‘imperialismo’ colonizador (= Portugal e Indonésio), i.e., um nacionalismo anticolonial e que, à semelhança do que vimos ... também por reacção àquele que percebe como o inimigo, o opressor ou o ocupante” (A.M. Bessa & J.N. Pinto, Introdução à política, 80-81).

Luta armada: Nicolau no Xanana

Tuir matenek na’in sira, katak, “terceiro nacionalismo” hanaran mos “nacionalismo anticolonial”. Dala ruma lori to’o iha “nacionalitarismo” husi rai colonial sira hodi foti kilat atu luta. Nicolau no Xanana hatene katak luta hasoru Indonesia ne’e todan no susar. Maibe, Nicolau Lobato dehan, “sabemos, podemos, e devemos vencer ... a vitória é certa!” (ohin loron liafuan hirak ne’e sai baratu los wainhira halo campanha eleitoral, no lakon hela de’it). Nune’e nia hatutan, “o preço da nossa libertação esta na ponta do fuzil”. Nia hatudu duni katak ita nia independência nia folin mak iha bala tutun. Nia mate atu sosa independência ida ne’e. Xanana Gusmão hatutan ho ninia teoria guerrilha “resistir é vencer!” Wainhira TNI/ Kopassus kaer nia (1992), Jendral Besar TNI A.H. Nasution (fundador Tentara Indonesia) dehan, “jika seorang komandan gerilya bisa bertahan lebih dari 5-6 tahun, berarti dia didukung oleh rakyat”. Xanana agoenta funu to’o tinan 16 (Nicolau Lobato agoenta funu iha tinan 4 laran, no mate tan traição balun). Wainhira Nicolau mate, Jendral TNI M. Yusuf rasik mak mai hare! Wainhira kaer Xanana, Jendral TNI Try Soetrisno rasik mak mai hare (Jendral Besar Nasution fo  reconhecimento profissional). Ne’e duni, fundador FALINTIL mak Nicolau Lobato no Xanana Gusmao, tan sira mak sai Comandante, maibe mos Presidente iha funu laran, brani hola risco! La’os kaer “senapan angin” tiru coelho ka kako’ak mos fundador hotu. FALINTIL tenki iha prestige, fama no dignidade.

Conclusão

Ita usa liafuan “fundador do estado” ka “founding fathers” atu tuir de’it moda no história americana nian. La buat ida. Maibe, dala barak ita rasik la hatene le ita nia historia. Ema hakerek. Ita la hatene le. Ha’u hanoin, husik ba geração foun mak estuda no hakerek historia ho profissionalismo. Ema sira nebe especialista iha historia, teoria no filosofia politica, mak halo debate no critica atu to’o iha critéria científico.

Maibe, ita mos aprecia katak Dr. Mari Alkatiri “fanu” ita hodi hanoin luan no klean konaba ita nia historia. Ba ha’u, wainhira líder ida ko’alia, nia la’os hanesan labarik ki’ik ida nebe ninia chupeta lakon tan ne’e haklalak tun sae! Lider ida ko’alia, nia contempla ideia ida nebe sério no fundamental. Ba político na’in sira be “kasta” baibain de’it, saida mak Dr. Alkatiri ko’alia ne’e la folin buat ida; simplesmente kala be-doko sae ka moras psicológico ruma. Maibe, ba político na’in sira ho “kasta” as no analista no pensador iha área política nebe sério, liafuan hirak ne’e fo implicação teórica no pratica política nebe maka’as duni. Tan ne’e, Alkatiri merece hetan apreciação no recepção ho nível nebe mos prestigioso: nível intelectual.