VISAO MISAO OBJECTIVO HAKSESUK BOLA FH KKN HOME FH LPV ARTIGOS FH MUZIKA LIA MENON FH RESPONDE

20151126

Tinan Atus Lima: Kapítulu 30 – RELATÓRIU Padre Frei Gregório Maria Barreto, O. P. nian kona ba Missões iha Timor (1856) – (Parte daruak)

500 ANOS – TINAN ATUS LIMA  Emar Timor Ho Malae Mutin Hasoru Malu  
Dom Carlos Filipe Ximenes Belo

Kapítulu 30RELATÓRIU Padre Frei Gregório Maria Barreto, O. P. nian kona ba Missões iha Timor (1856) – (Parte daruak)

Haktuir tiha situasaun uma kreda no sarani sira iha reinu ida idak, amo lulik Gregório Barreto hato’o ba Governador konklusaun ne’ebé, tuir nia nia hanoin, importante tebes:

1) Traduz Katesismu ba lia Tetun no ba lia Baikenu, atu nune’e, sarani sira hatene no hadook aan hosi kostume ka lisan timor nian ne’ebé padre temi iha lia portugés “fetichismo” no “superstições”. Atu halo Katesismu ne’e, amo Gregório fo sujestaun atu Governu hodi harii komisaun ida ho ema na’in lima: ema na’n rua ne’ebé hatene no koalia didiak Tetun ho Baikenu; ema na’in rua ne’ebé hatene gramátika, no amo lulik rasik.

2) Padre Gregóriu mos hato’o katak importante tebes foti Bispu ida atu hela iha Timor no hili “um prelado responsável” ne’ebé zelozu, ema ho isn diak no kbiit mak’as, no iha kriatividade; iha pasiensia atu hanorin doutrina no hahalok no moris diak nian; bele karik, governu haruka amo lulik sira atu hela metin iha fatin ida, laós atu la’o ba la’o mai (ambulante).

3) Padre Gregorio mos hein atu amo lulik sira ne’bé serbisu iha Timor, bele karik, ema timor oan (indígenas); la iha amo lulik rai na’in karik , bele haruka padres sira hosi Goa, maibé, haruka ema ne’ebé diak liu (os melhores); misionariu ne’ebé haruka ba Timor, laós atu ba buka osan no riku soin seluk, maibé, atu serbisu ba ema nia salvasaun. Nia dehan iha portugés: “verdadeiros pastores e não vis mercenários, cobiçosos de torpe lucro”.

4) Ikus mai, tanba nia mos idade ona, padre Superior Missão Timor nian, husu atu hili “Superior da vara” seluk atu troka nia, tanba nia matan mos malahok no isin mos fraku ba daudaun.

* Simu tiha Relatóriu ne’e, Governu hosi Lisboa, ho “Portaria de 17 de Dezembro de 1856”, haruka atu halo tradusaun Katesismu ba Tetun no Baikenu. Maibé, ikus mai, tradusaun ne’e nunka halo.

Amo lulik Gregório da Virgem Maria Barreto mate iha loron 3 fulan Abril tinan 1867. Entretantu, iha tinan 1868, to’o iha Dili, amo lulik Luís Xavier de Mesquita, ema hosi Goa, Índia Portugesa, ne’ebé ikus mai, sei sai Superior ba “Missões Católicas” iha Timor.

Iha tinan 1864, to’o Timor, amo lulik timor oan padre Jacob dos Reis e Cunha. Nia sei kiik ba estuda iha “Seminário Patriarcal”, iha Santarém, Portugal; ikus mai ba kontinua iha “Seminário das Missões Ultramarinas”, iha Cernache do Bonjardim.

Iha tina 1874, Santa Sé foti desizaun atu hatama “Missões Catolicas da Colónia de Timor” ba Dioseze Macau. Ita bele dehan iha sékulu XIX (1801-1900), amo lulik timor oan na’in rua deit: padre Gregório da Virgem Maria Barreto no padre Jacob dos Reis e Cunha.

Dom Carlos Filipe Ximenes Belo
Premio Nobel Paz

Sem comentários:

Enviar um comentário

Nota: só um membro deste blogue pode publicar um comentário.