VISAO MISAO OBJECTIVO SPORTIMOR FH KKN HOME FH LPV ARTIGOS FH MUZIKA LIA MENON FH RESPONDE

segunda-feira, 8 de junho de 2015

Fernando La Sama de Araujo: “Hau nia dignidade, la aas liu dignidade nasaun nian”

PARLAMENTO NACIONAL
GRUPO PARLAMENTAR DO PARTIDO DEMOCRÁTICO
Rua Formosa Dili – Timor Leste
Tel : 77178135/77266765
PD - Partido Democratico
Sua Excelência Sr.Presidente da República
Sua Excelência Sr.Presidente doParlamentu Nasional
Excelentíssimo Senhor Vice Presidente do Parlamento Nacional
Sua Excelênsia Sr. Primeiro Ministro
Sua Excelência Reverendíssima Senhor Bispo da Diosese de Maliana
Maluk Deputado sira, Membrus do Guvernu, publiku no Povu Timor Leste tomak, mak ami hadomi.

“Hau nia dignidade, la aas liu dignidade nasaun nian”

Ida ne’e mak lia fuan murak hosi Companheiro Fernando La Sama de Araújo, hodi inspira nia an, inspira nia famila, no famila bot Partido Democrático, banune, bele servi povu no nasaun Timor-Leste.

Excelência Sira,

Nudar povo ai-leba no ain tanan nia oan, Companheiro Fernando La Sama,moris husi susar no terus nia laran, hahu hosi ki’ik to’o nia bot. Nia inan no aman, la konsege kuinese alfabetu, to’o sira husik hela mundu ne’e, tanba la hetan biban iha tempu kolonial Português. Nunemos, tamba sira rua la’os liurai nia oan, nebe bele hetan asesu ba eskola. Nudar agrikultor nia oan, bainhira La Sama sei ki’ik, nia sempre ajuda nia inan-aman, hodi hamos du’ut iha to’os no natar, du’ut kafe nian, no dala ruma sai karau atan, hafoin sai hosi eskola.

Hafoin ida ne’e, iha tinan 1975, bainhira hakat ba idade tinan 12, Companheiro La Sama, komesa hatene terus no sofrimentu povu nian, nudar impaktu hosi okupasaun no batalha iha terrenu. Nia sai sasin ba nia familia 18 (sanulu resin ualu), nebe mate iha militar Indonezia sira nia liman. Hahu hosi ne’e, Companheiro La Sama manan konsiensia, no sente revoltadu hasoru opresaun ba direitus umanus, hasoru tortura fizika, no psikolojika, terror, no injustisa.

Fernando La Sama, sai nudar líder ida, nebe ho hanoin dok tebes, no halo asaun ho aten brani duni, iha kampo de batalha. Fernando La Sama ho nia companheiro da luta nain sia (9), deklara “Insurreição Política dos Estudantes de Timor Leste” iha loron 20 de Junho tinan 1988.Fernando La Sama,hamrik no hakat ba oin ho palavra de ordem ida deit “antes sem título, do que sem Pátria”. Ho ispiritu ida ne’e, Companheiro Fernando La Sama,hili nia dalan hodi dedika nia tempu tomak ba luta, no tau ba kotuk nia interese pessoal, atu hetan titulu akadémiku hosi Universidade nebe nia estuda ba. Fernando La Sama, sai nudar soldadu fiél ba Xanana Gusmão, nebe konsege halo expansaun funu, hahu hosi Timor Leste, to’o ba iha teritóriu Indonésia, ho dala gerilha politika, hodi hakbesik an no hamoris solidadridade povu Indonésia, ba problema Timor Leste nian.

Companheiro Fernando La Sama de Araújo, hatudu duni nia lideransa, dezempenho no dedikasaun total ba luta libertasaun Timor-Leste nian, tanba ne’e, Fernando La Sama de Araújo nia amigo boot, Professor Jubiladu António Barbedo de Magalhães deskreve La Sama hodi dehan: “Era esse o espirito de serviço e total dedicação à Causa que o lider máximo da RENETIL, Fernando La Sama de Araújo, imprimia com o seu exemplo. Lider na verdadeira e completa acepção da palavra”. Apresiasaun ne’e mosu, tanba iha tempo nebe militar sira kaer Fernando La Sama de Araújo, iha Denpasar-Bali, nia buka proteje nia membru sira hotu, hodi hatudu nia an mesak, katak nia mak asumi responsabilidade tomak, ba kualker asaun politika iha Indonésia. So ho dalan ida ne’e, mak nia companheiro da luta sira seluk, bele kontinua luta, hodi expande ba iha provinsia sira seluk, iha teritóriu Indonésia nia laran.

Excelência sira,

Vida moris pasadu nebe haktuir iha leten, mak sai nudar mata dalan ba Fernando La Sama de Araújo, hodi transforma nia an, nudar líder ida nebe simples no umilde, maibe brani no determinndu, líder ida nebe kalma no pasiente, maibe firmi no disciplina ba prinsipiu da luta, iha prosesu libertasaun povu hosi kiak no mukit. Fernando La Sama, sai nudar líder transformador, nebe konsege formula modelu de dezenvolvimentu foun ba Timor-Leste, hanaran; “Kaer metin Ukun Rasik an, no hari nasaun hosi base”.Fernando La Sama, fiél ba prinsipiu da luta iha prosesu libertasaun povu, hodi assumi knar oi-oin, banune, bela realiza dezenvolvimentu nacional.Tamba ne’e mos, mak Fernando La Sama, sai nudar modelu liderança ba jerasaun foun. Figura nebe inspira no motiva jerasaun foun, atu liberta povu hosi kiak no mukit, iha nasaun foun ida ne’e.

Fernando La Sama de Araújo, sai nudar modelu liderança ba jerasaun foun, tamba nia afirmasaun, determinasaun no dedikasaun, nebe haklaken iha nia mensajen hodi dehan “hau nia dignidade, la aas liu dignidade nasaun nian”. Lia fuan ida ne’e, fo signifikadu ba modelu lideransa foun, hodi sai identidade úniku, iha prosesu libertasaun povu, hosi kiak no mukit. Lia fuan ida ne’e, significa katak, Fernando La Sama, hakarak dedika nia moris tomak, hodi serve povu ho nasaun, tuir nia mehi no nia asaun rasik. Tamba ne’e, Fernando La Sama, lakohi buka moris diak ba nia an no famila, enkuantu povu sei moris iha susar, terus, kiak ho mukit nia laran. Fernando La Sama, haktuir katak, dignidade nasaun nian, la’os sukat ho ninia dignidade no títulu akadémiku, maibe dignidade nasaun nian, sukat ho dignidade povo Timor Leste nian, nudar povu nebe ukun rasik an, hodi moris iha dame, domin no prosperidade nia laran.

Determinasaun ida ne’e, mak hatudu katak, Fernando La Sama, hakarak tau uluk interesse estado nian, iha nia hanoin, iha nia lia fuan no nia hahalok, duke interese pessoal ka grupu nian, iha prosesu de dezenvolvimentu nasional. Iha konsolidasaun ikus Partido Democrático, iha loron Domingu, 31 de Maiu 2015, iha postu administrativo Maubisse, Presidente Fernando La Sama, fo instrusaun ikus ba kuadru no militantes PD nian hodi dehan: “Ita labele halo partido ho riku, enkuantu povo barak sei kiak no mukit hela”.

Excelência sira,

Fernando La Sama, iha hanoin rasik, iha nia planu no nia estratéjia lubun ida, nebe nia hakarak dedika, ba povu no nasaun ida ne’e. Maibe, infelizmente, ohin, loron 5 fulan Junhu tinan 2015, Companheiro Fernando La Sama de Araújo, labele kontinua tan, nia mehi no obra hirak nebe nia defini ona. Fernando La Sama, mate nudar mártir ida, mate iha misaun de servisu nia laran, mate iha povu sira nia let, no mate iha labarik estudante sira nia oin, hodi haklaken modelu liderança foun, no servi povu hosi baze. Tamba ne’e, selebrasaun loron mudial labarik nian, nakfilak ba loron tristeza, no loron despedida Ministro Edukasaun Fernando La Sama de Araújo, ho nia estudante sira, professores no diretores sira iha baze, iha postu Administrativu Suai, Municipio Covalima.

Durante evakuasaun hosi Ospital ba aeropoto Suai, no molok nia monu iha inkonsiensia, Companheiro Fernando La Sama de Araújo, Presidente do Partido Democrático, figura jerasaun foun Timor Leste, haka’as-an ho lian kotu-kotu, hodi dehan: “Imi haree malu ba, hodi dezenvolve ita nia rain, tanba Nasaun presiza ita”. Bancada Democrática considera katak, liafuan ikus nebe Companheiro Fernando La Sama haktuir, molok nia hakotu is, sai nudar instrusaun ka ordem ikus liu ona, hanesan líder transformador, hanesan figura jerasaun foun, no hanesan presidente Partido Democrático, ho nia signifikadu rua: 1) Companheiro Fernando La Sama de Araújo, hakarak husu ba Timor oan hotu-hotu, atu iha unidade nafatin, hodi dezenvolve ita nia rain, tanba sem unidade, sem paz no domin, dezenvolvimentu sei la la’o ba oin, hodi responde nesesidade povo nian, nudar sosiedade ida, iha nasaun ukun-rasik-an; 2). Mensajen Companheiro Fernando La Sama, mos sai hanesan instrusaun ka orientasaun ikus, nudar presidente Partido Democrático, ba kuadro no militantes hosi nacional to baze, atu hamutuk nafatin, hodi hametin no haboot liu tan, Partido Democrático, maske, laos ona iha nia liderança nia mahon, banune, Partido Democrático, sai nafatin nudar dalan ida, hodi servi povu no nasaun Timor-Leste.

Hodi tau iha neon ho laran, ami, kuadros no militantes Partido Democrático, hahu hosi nacional to’o baze, deklara ba públiku katak, ami, kompromete atu hahi no hana’i nafatin, mensajen lulik hosi ita bot, ordem ikus hosi presidente Partido Democrático, líder transformador no figura jerasaun foun Timor Leste, iha ami ida-idak nia moris no moris Partido Democrático nian.

Maske haksumik an ona hosi ami hotu nia matan, ami hotu konsiente katak Companheiro Fernando La Sama de Araújo, kuda ona fini liderança transformador, hodi hamoris no haburas modelu liderança ida ba jerasaun foun, hodi hatutan ukun hosi resistência no funu, ba iha dezenvolvimentu vida humana povu nian, no dignidade nasaun ukun rasik an.

Maske haksumik an ona hosi ami hotu nia matan, ami fiar katak, naran bot Fernando La Sama de Araújo, ho nia hanoin no hahalok tomak, espiritu servi povu no nasaun hosi baze, no obra humana nudar presidente Partido Democrático, Vice Ministro dos Negócios Estrangeirus, Presidente do Parlamento Nacional, Presidente da República interino, vice Primeiro Ministro no Ministro do Estado Coordenador dos Assuntos Sociais no Ministro da Edukasaun, sei la haketak ita to’o rohan laek.

Ami, kuadru no militantes Partido Democrático, hosi nacional to Baze, ho laran todan no susar, hato’o deit ba maun, ba kompanheiro no ba Presidente Fernando La Sama de Araújo, Adeus, Adeus, Adeus para sempre.

Dili, 5 de Junho de 2015

Lurdes Bessa
Chefe da Bancada do
Partido Democrático 

Sem comentários:

Enviar um comentário

Nota: só um membro deste blogue pode publicar um comentário.