500 ANOS – TINAN ATUS LIMA Emar Timor Ho Malae Mutin Hasoru Malu (Kapitulu 3)

500 ANOS – TINAN ATUS LIMA  Emar Timor Ho Malae Mutin Hasoru Malu  

Dom Carlos Filipe Ximenes Belo

KAPÍTULU 3.º - Frei Cristóvão Rangel, frei Rafael da Veiga, no Frei João das Chagas

1 – Frei Cristóvão Rangel, O. P. (Ordo Praedicatorum)

Iha tinan 1633, amo lulik dominikanu frei Cristóvão Rangel, sai hosi Solor ba Timor. Nia haree katak iha rai seluk-seluk iha ona amo lulik, maibé, Timor nebé rai boot no iha populasaun wa’in tebes, la iha amo lulik. Ne’e duni nia sa’e ro ba tun iha Silawan, iha Timor ocidental, besik Mota ain no Batugadé.

Iha Silawan, nebé malae sira temi Silavão ou Silbão, frei Cristóvão hasoru nahas liurai, nia husu atu hanorin doutrina ba povu no dato sira; nia mos harii igreja ida iha knua laran. Liurai Silawan ne’e konverte no  sarani ho naran Dom Cristóvão. Maibé, iha Silawan no Kowa, ema relijiaun islam barak. Sira la konkorda atu relijiaun katolika tama iha rai nebá. Loron ida sira tau veneno iha há-hán hodi fo ba padre Cristóvão. Ema rai na’in mak salva amo lulik hodi fó fali aimoruk kontra veneno. Amo lulik dominikanu ne’e wainhira haree katak  nia isin tun  ba beibeik, nia hola desizaun atu fila hikas ba Malaca, no ikus mai, liu ba Goa (India). Maibé, la kleur deit nia mate iha nebá. Nia mak amo lulik ba dala rua, nebé, ofisialemnte, tama Rai boot Timur (Timor).

Atu troka padre Cristóvão, superior dominikanu iha Larantuka s haruka padre Bento Serrão, O. P., ba hela iha Silawan. Tam ba amo lulik ne’e hakark liu halo kontratu ho ai-kameli,  liu ba tá no, governu haruka sai hosi Timor hodi  fila ba Portugal.

2 – Frei Rafael da Veiga, O.P.

Iha tinan 1636, padre Superior dominikanu iha Larantuka haruka amo lulik dominikanu naran Rafael da Veiga atu assiste sarnai sira iha ilha (pulau) Savu (Sabo).  Iha fatin ne’e, rai manas, moras malaria maka’as, no ema feto sira buka hela de’it amo lulik. Frei Rafael, ema  relijiozu ida ke diak no missionariu badinas, nia husik Savu, rai aat nakonu ho tentasaun no sala,  nia liu ba rai boot Timor Ocidental. Nia ho labarik mane ida sa’e  ro ba tun iha tasi ibun iha knua  Batu Putih (Fatuk mutin). Ema rai na’in sira hakfodak haree amo lulik ne’e, tanba nia hatais batina metan, ho ho liman loos  kaer kruz. Sira lori nia ba hasoru liurai iha Amabi nebé simu nia ho laran diak. Iha Amabi, nia mos hanorin doutrina hodi sarani ema. Ikus mai, frei Rafael loke eskola ba labarik sira no harii igreja ida. Nia mos liu ba reinu Amarasi, hanorin doutrina ba dato no povu kiik. Liurai Amarasi konverte, simu sakramentu batizmu. Nia naran mak Dom Agostinho. Tanba situasaun la dun diak (kurang há-hán, rai manas, etc.), amo lulik Rafael sai moras no ikus mai mate iha Amabi no hakoi iha Batu Putih. Liurai no povu la husik amo lulik seluk lorin isin mate ba Larantuka. Nia amo lulik nebé mate iha Timor ba dala uluk.

3. Frei João das Chagas,O.P.,  missionariu ba dala uluk iha Kupang. 

Iha tinan 1634-1635, to’o iha Cupão (Koepang, Kupang), amo lulik dominikanu Frei João das Chagas. To’o tiha Solor, padre superior frei Miguel Rangel haruka niba serbisu iha Ende (ilha). Nia rona katak iha Timor, ema barak converte atu sai kristaun. Nee duni, nia tun ba iha Cupão, rai nebé ema sira mesak jentiu no adora lulik (animistas).  Loron ida, tan ba rai manas demais amo lulik husu be atu hemu. Ema Rai nai’n sira, la fo be, maibé, fo fali tua muitn kahur ho veneno. Tuir mai sira lori nia soe iha kuaak naruk ida. Liu tiha tina ida, dominikanus seluk hetan nia isin, no lori ba hakoi iha Larantuka. Atu troka fali padre João das Chagas, padre superior haruka amo lulik seluk ba Cupão, hanesan padre frei António de São Domingos ho padre António de São Jacinto.

Porto, 22 de juñ de 2015

Dom Carlos Filipe Ximenes Belo