Deklarasaun Politika Bancada Democratica iha Abertura OGE2015

PARLAMENTO NACIONAL
GRUPO PARLAMENTAR DO PARTIDO DEMOCRÁTICO
Rua Formosa Dili – Timor Leste
Tlp : 77178135/77266765

DEKLARASAUN POLITIKA BANCADA PARTIDO DEMOCRÁTICO IHA ENCERRAMENTO DEBATE ORSAMENTU JERAL ESTADO 2015

“Kaer Metin Ukun Rasik An, no Hari Nasaun Hosi Baze”

Excelentissimo Sr. Prezidente do Parlamento Nasional, Vise Prezidente sira,
Sua Excelência Sr. Primeiro Ministro, Dr. Rui Maria de Araujo
Maluk Deputado sira Membros do Governo, Publiku tomak no Povu Timor-Leste tomak, mak ami hadomin.

“Kaer Metin Ukun Rasik An, no Harii Nasaun Husi Baze”

Ba dala uluk, Bancada Partido Democrático hato’o bem vindo ba VI Governo Konstitusional nebe mai iha Uma Fukun Parlamento Nasional hodi aprezenta Orsamentu Jeral du Estadu foun ba tinan 2015 hafoin formasaun du governu VI konstitusional.

Excelências

Bancada Democrtática apresia teb-tebes esforsu VI Governo Konstitusional nian nebe iha tempu badak konsegue prepara orsamentu foun ba tinan 2015 hafoin aprovasaun programa VI Governu Konstitusional. Bancada Democrática konsiente katak Orsamentu ida ne’e importante tebes, tanba OGE halo hodi responde ba nesesidade povu nian no atualiza an ho dinamika merkadu internasional nian, liu-liu adaptasaun ba fluktuasaun folin mina nebe la tuir ona previzaun de receitas Timor-Leste nian.

Excelencias sira,

Bancada Democrática hakarak fo hanoin hikas ba ita tomak katak Orsamentu Jeral do Estado hanesan instrumentu indispensável Governo nian nebe halo ho objektivu atu maksimiza benefisius ba povu no nasaun husi despeza, no buka minimiza kustus hodi hametin sustentabilidade fiskal ne’e rasik. Ho razaun ida ne’e, maka Bancada Democrática enkoraza VI Governo Konstitusional atu kompromete nia politika no disiplina ho rigor hodi hala’o politika ida nebe efisiente, efikaz, transparente no responsável, banune bele responde duni nesesidade povu no nasaun nian.

Excelencia sira,

Ita bele sente orgulho tamba ita hahu daudaun polo dezenvolvimento balun iha Oekusse liu husi Zona Especial de Economia Social de Mercado (ZEESM) no Projeto Tasi Mane. Polo de dezenvolvimento sira ne’e, sei ijiji ita hotu nia responsabilidade hodi aloka osan boot iha orsamentu anual. Tamba ne’e, Bancada Democrtática fo hanoin ba ita hotu katak nesesariu halo estudus nebe diak hodi bele iha garantia de viabilidade no sustentabilidade no hetan ninia retorno ekonomiku, finanseiro no sosial. Estudu sira ne Governu tenke fahe mos ba Deputadu sira. Tanba ne’e, OGE tenki reflekte prinsipio ekuidade de dezenvolvimento, banune, Timor oan tomak bele sente katak dezenvolvimento ne’e to’o duni iha famila ida-idak hosi nasional ba to’o knua. Ne’e signifika distribuisaun rikeza Estado nian tenki fahe hanesan iha Timor laran tomak hodi atinje ekuidade de dezenvolvimento nasaun nian.

Excelencia sira,

Ho esperansa boot ba VI Governu Konstitusional nia kompromisu, kapasidade téknika no intelektual no sensibilidade politika maka Bancada Parlamentar do Partido Democrático deklara nia pozisaun ba publiku katak Partido Democrático sei akompaina prosesu de debate ida ne’e ho nia pozisaun kritika maibe konstrutiva.

Obrigada wa’in

Dili, 1 de Abril de 2015

Lurdes Bessa
Presidente da Bancada Democrática.