LEI KOMSOS la Inkonstitusional

Dili. Forum Haksesuk (FH). Lei Komunikasaun Sosial (KOMSOS) ne’ebe sai nudar polemika nasional mos dait to’o  solidariedade husi Komunidade Jornalista Internasional mos ható sira nia preokupasaun ba Lei ne’e rasik. Mosu argumentus pro no kontra. Parlamento Nacional (PN)  aprova no sai nudar Lei hodi haruka ba Presidente  Republika (PR) Promulga. Maibe tanba mosu duvidas, PR haruka ba Tribunal Rekursus (TR) ne’e nudar orgaun Estadu ne’ebe iha poder ba detekta duni Inkonstitusionalidade ka lae. 

Lei KOMSOS la inkonstitusional, deklara Deputadu Arao Noe, husi bankada P-CNRT, Terça-feira  (23/09/2014) iha Hotel Timor, hola parte iha programa  “Rona Povu Nia lian”, ne’ebe organiza husi IRI. 

Haktuir tan Deputadu Arao Noe, ”iha artigus tolu (3) mak TR kestiona mak artigus 20, 24 no 40, maibe TR la detekta iha inkonstitusionalidade”. Tenik tan Arao Noe, ”iha artugus rua (2)  artigu 20 no artigu 40, TR foti kestaun konaba procedimentus legais maibe la detekta inkonstitusionalidade”.

“Konaba artigu 24 konaba Capital Estrangeiros ka osan husi rai liur, TR nia argumentu katak iha inkompatibilidade ho artigu 16 Constituição RDTL nian konaba principius”. 

Argumenta Arao Noe, deputado husi bankada CNRT, ”iha Sistema RDTL nian, TR mak orgaun ne’ebe mak iha knar ba fiskaliza no detekta Lei ruma iha konstitusionalidade ka inkonstitusionalidade, la iha tan seluk”. 

”Preokupasaun husi Parlamento Nacional nian konaba CE hodi limita ba 30% mak ne’e, ba interese nasional, tanba CE mak domina iha orgauns Komunikasaun Sosial ruma, sira bele mai ho ajenda seluk", defende Arao Noe,husi bankada P-CNRT. 

Husi P-Fretilin, PD no P-Frenti Mudança liu husi Xefis Bankada Aniceto Guterres, Lurdes Bessa no Maria Pires,  iha biban hanesan  haktuir katak, ”sira nain tolu (3)  lian ida  ho Deputado Arao Noe no argumentus sira ne’ebe ható husi Deputadu P-CNRT ne’e mak opiniaun no posisaun Parlamento Nacioal nian “.   

 Hateten tan Deputada Lurdes Bessa, Xefi Bankada PD, ”Lei KOMSOS la iha inkonstitusionalidade no la hamate Demokrasia”.

Deputada Maria Pires husi Partido-Frenti Mudanças haktuir katak, ”subskreve ho Deputado Arao Noe konaba artigu 40, limitasoens ba CE estranjeiras, iha Nasaun barak mak limite CE estranjeiras, atu nune labele monu ba monopoliu husi emar rai liur”. Hatutan  Deputada Maria Pires, ”se 100% CE estranjera bele mos konsidera perigu  ba fuga informasaun”. 

Lei KOMSOS merece debate Pro no Kontra, husi komunidade Jornalistas Nasionais no Internasionais sira ható apelo atu muda Lei ida ne’e, tanba Lei ne’e bele hamate Demokrasia no Liberdade ba imprensa bele kondisionado. Hare ba Preokupasaun sira ne’e  PR  mosu dúvida  no haruka Lei ba TR hodi fiskaliza no detekta duni Inkonstitusionallidade. Ikus TR la detekta Inkonstitusionalidade maibe detekta ba procidementu legais (artigus  20 no 40) no inkompatibilidade artigu 40  (Lei KOMSOS) ho C-RDTL artutigu 16. 

Representante Povu husi bankadas hat (4), P-CNRT, P-Fretilin, P-PD  no P-FM konkorda atu Komisaun A sei hare no konsidere ba preokupasaun sociedade Civil nian . Hodi konfirma fali votu hodi  haruka ba Presidente Republika hodi promulga no Jornal da Republika publika nudar Lei!