Feto no Siguransa

FETO NO SIGURANSA

(Horseik, Ohin no Aban)

Husi: Helder Moniz Alves

Introdusaun

Feto ou mulher lia fuan mai husi latim muliere, ema moris adulto ida nebe nia sexo feminina. Kuando iha infansia , normalmente ita hanaran labarik feto e, iha fali vida jovem ka vida adolesente hanaran menina ou feto klosan. Signifikado feto ou mulher uja atu indika buat barak destinsaun biologika kuando iha papel sosio-kultural.

Atu enkuadra e hatur diak artigo ida ne, dahuluk aborda kestao igualdade de genero e relasaun poder iha sociedade e mos instituição de defesa e seguransa. Objektivo final ida tan atu to mak analisa konseitos ligado ho kestao género e poder feto Timor nian iha kontexto sosiedade ninian rasik . Hau fahe realidade ne tuir observasaun ba parte tolu: Parte I. Natureza feto iha pasado. Parte II. Natureza feto iha tempo presente e Parte III. Mak prozeksaun feto nia papel iha aban bain rua no hau tensiona mos atu halo leitura kik oan ida ba realidade feto Timor leste nia papel iha seguransa, iha proseso funu de libertasaun nacional e mos pós-funu.

Parte I

1.1- Hahu observasaun ne, hau labele ses an atu ho koriosidade antes refere evolusaun e papel feto nian iha kontexto sivilizasaun hirak liu ba, nune bele hetan perfil atu trasa ser ema feto nia existensia iha sosiedade. Iha espesie ema moris, existe ema moris mane e mos ema moris feto. Reprudusaun ba espesie humana so bele hetan e akontese ho partesipasaun husi seres espesie rua refere ne liu husi dalan relasaun e permanente konvivensia. Sosiedade ema moris nee historika, muda konforme o padraun de desenvolvimento ba produsaun dos valores e normas sosiais. Nune, iha kedas tempo kotuk (entre 8.000 a 4.000 anos liu ba), iha período neolitiko hahu tiha ona definisaun papel feto e mos papel mane nian iha tarefas esplorasaun agrikulas. Iha sosiedade agrikula iha divisaun ba trabalho, kapasidade reprodutora feto nian, markada desde sempre, o fakto ema feto sira tau matan ba aktividade domestika trasforma tarefa ida ba base importante iha vida, independentemente ho serviço iha leten tenik, feto mos iha tempo neba partesipa makas iha serviço kuda sasan e mos hakiak e hein animal.

Mosu sosiedade ema moris nebe divisaun makas tebes, iha tribus e mos aldeias. Iha fase pré-kapitalismo modelo família sai hanesan modelo multigerasional ne katak, hotu2x serviço iha unidade ekonomiko de produsaun ida deit. Mundo trabalho e mundo domestiko realidade rua nee koinsidentes hotu deit. A reprudusaun ba espesie, ke nebe kabe ba feto, favorese tiha nia margem subordinasaun ba ema mane. Ho realidade ne, ema feto nia natureza mais frako, feto inkapaz atu assumi direksaun e mos chefia ba grupo familiar.

Ema mane, assosia ideia de autoridade tamba deit nia iha forsa fisika e mos poder atu manda, mane assume nia poder iha sosiedade. Nune mak mosu sosiedade patriarkal, fundada husi poder mane nian ba chefe da família. Hahalok posse sasan ou bens, e mos garantia heransas ba gerasoens futuras, loke tan dalan atu reforsa mane nia interesse atu assume papel paternidade. Natureza mane mosu nune mak, sexualidade feto nian kada vez mais submetida iha interesses ema mane, feto pasa ser mane “nian” e ect. Realmente sosiedade patriarkal permanese kleur, mesmo iha sociedade industrial, iha sosiedade industrial o mundo trabalho devide tiha ho mundo domestiko. Familias tradisionalmente multigerasionais mihis neneik e forma fali famílias nuklear (pai, mãe e oan). Poder patriarkal nafatin moris iha família, maske iha mudansas oituan iha feto nia papel musu foun ho sira nia prezensa iha servisos hanesan fabrikas. Iha sekulo XVIII e XIX ho papel foun feto (mãe) sira nian nebe serviço iha fabrikas e dok husi uma kontribui ba konsikuensias ba vida oan no labarik sira nian e mos seguramente efeito ba kontexto sosial seluk tan.

Ho efeito revolusaun indistrial inkorpora tiha trabalho feto nian ho mundo das fabrikas, hetan separasaun husi trabaho demostiko ho trabalho remunerado fora husi lar ou uma. Ho mudanças paradigma fo mos efeito ba kontexto social, existe lutas boot entre feto ho mane trabalhadores iha prosesso revolusaun industrial ne rasik. Kestao de género sai hanesan ponto de impasse iha konsiensia klasse trabalhador. Nune mak mosu luta feto nian atu exige melhores kondisoens iha serviço, iha sekulo XIX mosu mos movimento ba feto atu refevendika direito trabalhista, igualdade e sst.

Sekulo XX feto hahu makas tan sira nia luta liu husi organizasaun nebe diak atu defende sira nia direito. Luta feto nian kontra formas de opresaun, melhoria infra-estruturas social. Iha tempo neba, feto nebe mak momento desempenha funsaun hanesan lideransa ba defende direito feto tomak nian, sira nia imagem sai la dun diak (mal-amada), ba feto maluk balun nebe kontra tamba divisaun interna entre feto maluk no liu-liu ba mane sira. Luta feto nian buka dalan ho valores social, buka moral sosial seluk e mos kultural. Luta nebe buka pratika demokrasia bele moris entre igualdade ba ema feto e ema mane, nebe ho nia bandeira final bele evolui e atinzi entre ema hotu-hotu bele konsome ideologia nee rasik.

Parte II

2.1- Hanesan tuir realidade ita tomak observa ona iha anterior (parte I), katak kombate ba exklusaun sosial ema feto nian tem ke ho hahalok luta ho determinasaun e buka atu implementa tuir dalan los no ilas Direito nian. Dalan los no ilas Direito hakarak mak feto sira tuir liberdade na responsabilidade tem ke mehi dunik e mehi nee tem ke lao ho asaun. Realidade hatudo ona katak, iha vida moris ema hotu bele iha Visaun, se la iha asaun buat hotu simplesmente mehi ida. karik asaun mak la iha fali visaun, buat hotu simplesmente pasa tempo deit. Mas visaun ho asaun mak lao hamutuk bele muda mundo. Ho tempo e espaso ema feto nia kbit ba revendika (direito) sira nian ohin loron sai realidade, feto manan obstakulo lubun boot iha historia, maske la ses an katak, realmente iha planeta mundo ne sei existe desafio barak iha matéria ida ne. Ohin loron existe konvensoens ou tratados ou deklarasaun nebe defende direitos e mos deveres ema feto nian hanesan koponente base ida tao importante iha vida moris ba desenvolvimento e kresimento social. Ho movimentos feto nian, deklarasaun, konvensaun e leis nebe mosu no barak atu asegura Direitos ba feto e mos hodi regras nebe los kontra anti-deskriminatorio, nune misaun leis iha nia objektivo hanesan tuir mai, nebe importante iha konstrusaun feto nia Direito: (Instrumento jurisdisaun Internasional)

• Declarasaun Universal dos Direitos do Homem (1948): Art. 2º - idem ao anterior.


• Deklarasun ba eleminasaun ba violensia kontra ema feto, ONU (1993): Expressa nia sentido “violensia kontra ema feto” entende kualker asaun nebe baseada iha violensia de género nebe resulta hetan baku e kanek fisiko, sexual, psikologiko, sofrimento ba ema feto, inkluindo ameasas. Propria Deklasaun Viena (1993) refere mos katak Direito ema feto nee direito inalinaveis, integrais e mos indivisível parte ba Direitos Humanos Universal. Partesipasaun ema feto iha vida politika, ekonomika, sosial e kultural iha nível regional, nasioanl e internasional. Eradikasaun de formas hotu-hotu deskriminasaun iha terreno sexo, nebe konstitui prioritários ba komunidade internasional.


• Carta das Nasoens Unidas (1945): Art. 8º nebe refere igualdade ba ema feto no ema mane; Artº. 55º nebe kompromete atu promove respeito universal ba direitos humanos fundamentas nebe la existe distinsaun rasa, sexo, releziaun ou lian.


• Konvensaun direito politiko feto nian (1952-1954): Nebe rekonhese katak ema moris hotu-hotu iha direito atu hola parte iha governo iha nia rain moris fatin rasik nem ke seja husi forma direkta ou mos indirekta, eskolha livremente nia representantes e mos direito hanesan atu livre aseso ba serviso publiko iha nia rain moris fatin, mos satisfasaun entre ema feto no ema mane iha exersisio direito politiko.


• Konvensaun eleminasaun ba formas hotu-hotu de deskreminasaun kontra feto (1979): Instrumento ida importante: a) Preokupa tebes ba deskriminasaun ba ema feto; b) Define deskriminasaun (Art 1º) nebe refere sobre importansia medidas espesias temporárias; d) Bolu atensaun ba Estados ba multiplas asaun; e) proibido diskriminasaun tanto ba ema publiko e mos ema privada. Mas prinsipal karakteristikas ba konvensaun entende maka tradisionais papel ema feto no ema mane komo faktor de deskriminasaun (Art. 5º). EUA é unika nasaun desenvolvido nebe la halo parte ba membro e la retifika ba konvensaun (1979), ida nee.


• Konvensaun do Belem Pará-Amerikas (2003): Nebe refere, prevensaun, punisaun e eradikasaun (erradicação) ba violensia kontra ema feto. (Instrumento Jurisdisaun regional)


• Prototokolu de Maputo-Afrika (2003): konsidera texo ida nebe mais avansado “provisório”: Integra prespektiva de género iha desizaun politika, iha legislasaun, iha programa e aktividade esfera vida moris nian; prevene aksaun positivas e mos korrektivas iha áreas nebe deskriminasaun tanto iha áreas leis nian, apoios inisiativas nasional, regional, lokal direksionada ba eradisaun (erradicação) ba formas deskriminatoria kontra ema feto. (Instrumento jurisdisaun regional)


• Organizasaun Estados Amerikanos-Komisaun inter-Amerikana ba feto (Organizasaun Internasional ou ONG)


• Human Rights Watch (Organizasaun Internasional ou ONG)


• Amnistia Internasional (Organizasaun Internasional ou ONG)

Konseito “igualdade genero” nia laos deit atu trata sobre aman ou inan, feto ga mane. Konseito Genero nia raiz mak torna hahalok hanesan maneira indika “konstrusaun sosial” ou kriasaun inteiramente sosial ideias sobre papel ema feto e mos ema mane, atu komprende importansia sosiedade ho objetivo final diminuisaun hahalok eskluzaun sosial ba ema feto.

Ho efeito e proseso barak liu husi dalan tempo e espaso no revolusaun barak iha ponto de vista ekonomiko halo kom ke existe dunik impulso no mudansas iha area politika e mos kultural. Poder ema feto kada vez forte liu tan, feto nia presensa fisika afirmativo iha esfera partidos politikos, iha empresas, iha ONG, iha instituisaun forças e defesas e mos esferas seluk-seluk tan.

Maske iha evolusaun favorável ba ema feto nia dignidade, ita tomak mos hatene katak iha kualker klase, regiaun ou nasaun, violensia ba feto sei permanese, dados ikus mundial nebe ita hetan, expresa katak: 1,3 milhoes ema moris sei kiak e ke 70% husi 1,3 milhoes nee mak ema feto; maior parte refugiados iha planeta mundo mak ema feto; numero analfabetos iha mundo nee ema feto komparando ho ema mane; ema feto e labaraik feto klosan sira sei kontinua merkadoria ba indústria pornografia e milhares ema feto sei hetan violensia domestikas.

Hare fali husi sikun koredor seluk, orgulho boot ba ita sira nebe asiste e konsome historia sekulo XX e mos sekulo XXI. Iha agenda historia mundo nian nebe hakerek naran heroina lideransa feto sira nebe desempenha funsaun hanesan responsavel politiko e seguransa, e mos balun simplesmente aktivistas, hanesan: Aung San Suu Kyi (Birmania), Rosa Muki Bonaparte (Timor leste), Megawati Soekarno Putri e Ibu Kartini (Indonesia), Benazir Butto (Pakistan), Corazon Aquino e Gloria Arroyo (Filipinas), Margaret Thatcher (UK), Dilma Rousseff (Brasil), Angela Merkel (Alemanha), Cristina Kirchner (Argentina), Hillary Clinton e Michelle Obama (EUA), Sonia Ghandi (India), Yingluck Shinawatra (Tailandia), Joyce Banda (Malaui), Sheika Al Qasimi (Arabes unidos), Guler Sabanci (Turkia), Golda Meir (Israel), Michelle Bachelet (Chile) e sst (seluk-seluk tan).

Mudansas estrutural nebe refere liu ba divisaun sexual do trabalho. Feto iha pasado historikamanete reféns iha sira nia espaso domestiko, komesa manan tan ona terreno atu bele serviço iha diferente forma, feto bele hetan maior insersaun iha vida sosial, liu-liu iha vida trabalho ou serviso. Ho numero signifikativo ba insersaun sosial e mos okupa espasos, prinsipalmente iha trabalho, ke antigamente fo deit ba mane, bele ohin loron fasilmente ita hetan e verifika iha ita nia vida kuotidiana: Papel feto barak mos serviço iha pedreira, piloto, motorista, engenheiras, forsas de defesa e seguransa e mos entre profisaun seluk-seluk tan.

Parte III

3.1- Ho aktividades foun nebe mak feto sira konkista, espaso desizivo nebe liga direktamente ho área defesa e seguransa merese tebes atu destake, tamba deit razão tradisionalmente área nebe identifikado e pertense ba universo ema mane nian.

Ohin loron Timor leste realmente hanesan nasaun soberano. Sagrada Vitoria boot ida nee laos deit ba mane mas, mos ba feto maluk Timor oan hotu, liu-liu (avo feto sira, ita nia inan sira, ita nia feton boot sira e mos alin feton sira), ba sira nebe mehi no fiar katak la iha bala ida atu bele oho no borus ba povo ida nia hakarak ba liberdade, e sai rai nain ba nia destino rasik, forsa povo liu husi nia direito mais elementares atu konstroe komunidade politika.

Hare fila ba passado resente iha proseso pós-funu feto Timor nia desempenho makas e as tebes. Feto sai hanesan komponente importantisimo no parseria ba mane maluk, atu hamutuk konsentra hanoin, deskute, hakerek e implementa modelo foun proseso ida pos-funu. Feto Timor hatene katak Independensia nebe sosa ho terus, tanis, kosar wen, hamulak e rihun rua resin klamar nebe lakon hodi sosa ukun rasik an, feto barak mos halo parte sosa ukun an nee ho ran no ruin. Pos-funu, feto Timor leste nia papel hatene katak iha independensia laos buat fim, mas realidade foun ida ke permite hare ba proseso foun ida mos. Feto sira hatene katak realidade proseso foun nee laos fasil, tamba hahu estrutura Estado nian, hanesan:

1. Modelo atu konstroi demokrasia
2. Sustentabilidade próprio Estado
3. Konvivensia entre forsas politikas e mos forsas tradisionais
4. Problemas gerasaun nebe pró ba objektivo naruk atu alkansa
5. Problema trabalho, seguransa, desigualdade, saúde, edukasaun e sst

Feto nia papel iha proseso foun sira iha leten tenik ne, sira hatene katak frágil demais nasaun ida foin ukun an hanesan Timor leste. Historia hatudu mos ona katak buat barak ita konstroi ho tempo naruk bele sobu iha menuto ida deit kuando ita hakarak destroi.

Feto Timor leste nia kontribuisaun ba libertasaun no independensia nasaun ida ne as tebes, hare ba historia nasaun ida ne, durante iha luta tinan rua nulu resin hat nian laran faktos hatudu katak feto aktivo makas duni atu suporta mane maluk sira iha area strategia barak nebe fo risko as mos ba sira nia seguranca pesoal hodi ohin loron hamutuk ita hetan duni ukun rasik an. Maibe, ohin loron independensia iha ita nia liman laran, feto luta makaas, hakilar ba sira nia direito no buka atu kapasita sira nia an hodi involve iha parte hotu iha nasaun foun Ida ne.

Ohin loron feto nia adesaun atu sai elementos ba instutisaun F-FDTL, PNTL e servisos seluk nebe liga ho seguransa e defesa kada vez ho nia numero kresente. Timor leste e povo hatudu dala ida tan ba mundo nia konkista dunik pratika demokrasia, feto kontribui ba nasaun liu husi area seguransa no defesa hakas ann atu kapasita sira nia an hodi hadia no hasae sira nia k’bit nudar feto atu servisu tuir papel no prosesu dezenvolvimentu siguransa nebe maka sira hola parte ba atu servi ba area siguranca. Atu hetan paz duradoura iha sosiedade nesesario tebes termo igualdade entre mane e feto atu nune hetan ekilibrio nebe saudável bele dudu desenvolvimento, prevene resulusaun konflito e mos konsolidasaun ba paz nee rasik. Partesipasaun feto iha tomada desizaun benefisia plano envolvimento iha esforsus feto nian iha manutensaun ba paz e seguransa.

Sa ida mak konseito seguransa? Iha kontexto global siguransa signifika katak, livre husi tauk,husi presaun, intimidasaun, no livre atu goja ida-idak nia vida mas ho responsabilidade. Iha paradigma foun kona ba siguransa umanu (human security) feto nudar elementu ida husi nasaun kumunidade nebe marese hetan nia direito nebe hanesan atu hetan siguransa nomos fo kontribusao ba nasaun, hodi hari’i no fortifika siguransa nasional ida metin no forte. Hamutuk ho mane sira atu trata matéria seguransa ho néon naruk, luan no klean.

Existensia plano nasional ba seguransa e defesa nebe hakuak tema refere maka hatur los, sei desisivo ba real integrasaun ho dimensaun igualdade genero iha politika defesa e seguransa interna e mos koperasaun ba desenvolvimento ba Estado. Sai instrumento chave ba implementasaun politika nee rasik e mos deseminasaun ba preokupasun “negativo” feto seguransa e paz. Iha tinan 2000 liu ba, konselho Seguransa adota liu husi unanimidade resolusaun nebe inovadora sobre feto, paz e seguransa (Resolusaun 1325), nebe husu ba membros Estados atu aumenta e representa feto nia papel iha nivel tomada desizaun ba prevensaun, gestaun e mos resolusaun konflitos. Husu ba Secretario Geral ONU atu nafatin nomeia feto ba kargos espesias e enviados atu expande e fortifika liu tan papel feto nian iha operasaun da paz- ONU.

Hare ba historia libertasaun nasaun Timor Leste, feto hatudu duni sira nia dignidade atu bele hamrik hanesan mane sira maski iha funu laran. Sira fo aten brani fo sira nia vida atu bele harii no defende nasaun para futuru jerasaun bele goza liberdade no halao dezenvolvimentu iha rai kiik ida ne’e. Maski hetan ameasas barak, feto ho laran tomak simu responsibilidade hanesan mane hodi contribui ba seitor siguransa atu ita ukun rasik ann. Heroi feto hirak nebe sai hanesan mata dalan, intrega sira nia vida ba libertasaun maka hansan exemplo: Matebian Isabel Bareto Lobato, Matebian Rosa Muki Bonaparte, Matebian Zelia Alves, matebian Norberta Lobato (Naroman), Matebian Melu Alves, Matebian Judit Pereira (Bikiak) Matebian silvina namuk e seluk-seluk tan.

Hare fali ba Timor leste pos-ukun an, feto nia presensa iha servisos publikos e privado makas tebes, bele dehan katak nasaun ida ke foin moris iha sekulo XXI mas nia politik nebe defende feto nia desempenho e promosaun igualdade “satisfaz” komparando ho rai barak. Ita bele hare fali ba mapa representantes feto iha uma fukun desde Primeiro governasaun to agora feto nia dinamika makas tebes iha esfera politik uma fukun RDTL nian. Ita bele observa tan katak iha parte koredor justisa nian feto mos halao nia knar, iha parte defesa e seguransa, iha parte exekutivo desde primeiro governo to VI governo konstitusional nebe lidera husi maun boot Kay Rala Xanana Gusmão, ita tomak hanesan povo siviko e aktivo iha dunik impressaun katak realmente feto Timor oan nia desempenho e luta, responsabilidade, liberdade, integrasaun e dedikasaun ba esfera komposisaun exekutivo ho nota ida “favorável” maske iha senario politik (ke é normal), Timor leste nian resente akontese tiha ona e loke ema barak ou opiniaun publik nia néon, kritikas hodi kestiona tebes sua excelensia Presidenti da Republika TMR nia preokupasaun ba nomeasaun listas naran nebe mak realmente Dra. Micato Fernandes Alves atu assume papel hanesan Ministra da Defesa e Seguransa RDTL iha VI Governo. Tuir hau nia hare preokupasaun maun boot TMR nee tan deit no pano fundo kestao “lasus de konfiansa” estrategik politik defesa e seguransa e laos kestaun fundamental nebe toka ba termo habilidade. Maibe hanesan Timor oan, ita orgulho boot nafatin tan hare husi servisos estatais nebe liga ho seguransa e defesa, ita sei iha Dra. Lurdes Bessa nebe desempenha funsaun hanesan presidente bankada partido PD nian iha Parlamento nasional e Presidente mos ba komissaun Parlamentar nebe trata assuntos relasionado ho Defesa e Seguransa RDTL.

Antes hau remata e mos ita boot sira nia leitura ba tema ida ne. Hau hakarak dala ida tan relembra katak realidade historika feto ne nakonu ho historia opresaun, dominasaun, violasaun de direito. Mas historia ida nebe mobiliza mos luta feto ba direito foun. Razoe fundamental sira ne halo hau hakarak lansa perguntas hirak tuir mai atu hau, ita boot e ita tomak hamutuk halo tok reflesaun: Tan sa mak ita tem ke refere makas los Direitos Humanos ba feto nian? Diskriminasaun formas de violensia? Leis sira nee serve ba buat ruma? Violensia nee forma de deskreminasaun ou deskriminasaun e forma ida violensia?

Não há uma ação transformadora nesse país que não tenha a cabeça, o braço e o coração da mulher… (Clara Charf)

Fontes:

• Pesquisa: http://pt.wikipedia.org/wiki/Mulher e outra
• Azevedo, Luís Carlos de Estudo Histórico Sobre condição Jurídica da Mulher no Direito Luso-Brasileiro. São Paulo, 2001
• Aymard, Andre e Auboyer, Jeannine. O oriente e a Grécia Antiga. História geral das civilizações. Europeia: São Paulo 1962.
• Duarte, Rodrigo. Dialéctica como liberdade de expressão. Veritas, Porto Algarve, 1999
• Matos, Ricardo Jorge Bragança Dos maus tratos à Conjugue à violência domestica: Um passo à frente à tutela da vitima? Revista do Ministério público, 2006
• Mary Robinson, HCHR, 2000. Extraído dos slides da aula
• Jerónimo, Patrícia. Os direitos do homem à escala das civilizações. Editora Almedina
• Tradução livre