VISAO MISAO OBJECTIVO SPORTIMOR FH KKN HOME FH LPV ARTIGOS FH MUZIKA LIA MENON FH RESPONDE

segunda-feira, 24 de fevereiro de 2014

Laiha Jerasaun Foun no Jerasaun Tuan, iha maka Jerasaun Timorense ne’ebe iha Abilidade hodi Ukun

LAIHA TRANZISAUN UNTAET DA-DAUK NO LAIHA JERASAUN FOUN NO JERASAUN TUAN, IHA MAKA JERASAUN TIMORENSE NE’EBE IHA ABILIDADE HODI UKUN

Husi: Carmelindo da Silva Caetano*

Asuntu sosial politika dala ruma halo ita tilun manas tiha no iha prekupasaun oi-oin maske ita moris hanesan povu bai-bain, intensaun ida ne’e klaru tamba ita nudar ema hakarak moris  hakmatek nomos ho prosperidade iha estadu ida no lakoi terus tan ho hahalok individual balun ne’ebe ladun produtivu hafalun an iha knar estadu ou publiku. Atu sai ema boot laiha eskola espesializa formal maibe depende ba ida-idak nia esforsu, vontade ka ho laran, spiritu heroismu, patriotismu, abilidade tekniku, sorti (panggilan nsst) inklui prense rekezitus politika demokratika nian ba ukun. Prosesu poder iha ita le’et dala barak mosu lia fuan tranzisaun, lia fuan jerasaun foun no jerasaun tuan ba kaer ukun sai famoza teb-tebes, tempu tranzisaun UNTAET liu ona iha tinan 2002 maibe ita rona maka tranzisaun hela deit - ne’e kona ba tranzisaun saida nian?  durasaun tranzisaun ka peralihan kaer ukun ne’e temporariu deit. Ita soberanu kaer estadu rasik ne’e kaer tebes laos peralihan temporariu fali maibe tuir mandatu konstitusional, laiha katak tranzisaun no sei fo poder ba jerasaun foun, lae! buat ukun ne’e qualker mudansa ka asaun tenki tuir prosesu politika hotu no natureza ka kodrat umanu. Tan ne’e ita lalika kualia demais atu hanesan Toke ne’ebe sempre temi naran rasik, hau maka jerasaun foun ou hau maka jerasaun tuan maibe buat sira ne’e ita la temi mos historiadores sira sei hakerek barak kona-ba ida ne’e, tamba ita hotu hatene katak nasaun ne’ebe boot ne’e nasaun ida ne’ebe respeitu nia heroi, nia historia no kultura rasik, prevene diskriminasaun nsst, prosesu respeita heroi mos laos kualia deit, ba implementasaun buat balun iha ita oin ona ho positivu maske teknika balun maka namdores hela.

Iha tinan kotuk liu ba iha inkontru Maubise I, II, ne’e kada lider politika sira hamutuk ho lider espiritual para prevene konflitu nomos atu prepara lider jerasaun foun aban bainrua nian (Jornal Independente, 23/4/2011), da-dauk ne’e mos ita rona dala barak kona-ba termus jerasaun foun, jerasaun foun atu kaer ukun nsst, sa tan ho informasaun maun boot Xanana atu rezigna an husi Primeiru Ministru, buat ne’e sai debat publiku no hamosu buat dehan expert sira (asesu TVTL) nomos mosu pergunta no persepsaun oi-oin, fasilitador sesaun koko hela deit husu panelista sira oinsa kriteria PM foun? Iha debate tuir Sr. Deonizio Babo katak nia lakoi Maun boot Xanana rezigna an maibe ita respeita nia rezignasaun no jerasaun foun pronto hodi halao governu no bazea ba konsensus politika hodi ukun, Sr. Aderito de Jesus katak hare husi perspetiva kontitusionalidade liga ba art 106, liga mos ba knar konselhu estadu, Sr. Joao Cansio katak ne’e sei hamosu seistu governu no hare liu ba efikasia governu, Sr. Aniseto katak iha ona mudansa politika Fretelin ba unitariu li-liu liga ba interese nasional, Sr. Manuel Tilman katak rezignasaun Xanana signifika Governu monu, Sr. Lu olo liga ba art 102 nu 3 alinia b konstituisaun, Sr. Mario Viegas Carasakalao katak rezigna an duni presija kria elisaun antisipada, Sr. Estanislau S, la presija rezigna an bele halo re-strutura, temi mos konstituisaun art 112 letra b nsst.

Kualia kona-ba abilidade ukun, ladun importante atu hare ba jerasaun foun ka jerasaun tuan maibe ba jerasaun Timorense ne’ebe iha  kualidade no tuir prosesu politika hodi ukun (Foun ka Tuan sei presija serve estadu ida ne’e), alende ne’e mos laos limite deit ba iha kapasidade tekniku deit nin iha espiritu patriotisme, maibe buat kapasidade inklui patriotisme ne’e identiku inklui tuir prosesu politika konstitusional, signifika katak tenki mete partidu politika ruma ou  independente ne’ebe kuinesidu ho nia matenek no meritório/berjasa ba estadu. Mudansa ita atu infrenta ou halao ne’e eskrita hotu ona tuir prinsipiu legalidade hanesan buat balun konsagrado husi aspeitu konstitusionalidade husi expert temi ho esplikasaun jeral acak-acakan. Husi buat sira ne’e hotu jeral orienta ita ba kualker servisu ho abilidade - se ita temi abilidade inklui ona mos disiplina ba buat hot-hotu, no ita tenki servisu hamutuk ba asuntu interese nasional, ezemplu se estrutura governu boot superior atu re-modela para ladun gasta osan demais entaun ita tenki tau konsensia - hases tiha individualista ka partidaria, hases tiha sentimentu ne’ebe la profesional, tau figur ida ne’ebe servisu produtivu laos servisu halimar ou mai estuda fali, ita sei presija figur hanesan maun boot Xanana maibe se karik atu rezigna an duni lakika hakat liu ba opsaun ultimatum sira hanesan elisaun antisipada ka referendum tamba buat sira ne’e mos osan hotu - objetivu estadu haharak progresu/maju, progresu oinsa se ladun poupa orsamentu no utiliza efisiente, se hakarak muda sistema estadu balun mos iha solusaun hela - liu ona tinan neen ita bele halo revizaun ka amandemen ba subtansia konstituisaun balun tuir artigu 154 numeru 5 no 6, alende ne’e mos autor politika sira presija nafatin konsidera asunto sosio- ekonomiku nsst relasionado ho interese nasional hodi kria politika ida ne’ebe konsensual no tenki liu husi Konselhu Estadu no Parlamentu Nasional. Hau fiar katak ho abilidade no espiritu patriotismu ita mantein hakat tuir legitimasaun lei ba kualker mudansa kondisaun sosial politika iha ita rain sai progresu hanesan nasaun sira seluk. 

*Carmelindo da Silva Caetano                                                                                  
Hela Fatin, Dili, Timor-Leste                                                                                                 
Contaktu: 7734158, Email: lindolindo20022002@yahoo.com

Sem comentários:

Enviar um comentário

Nota: só um membro deste blogue pode publicar um comentário.