VISAO MISAO OBJECTIVO SPORTIMOR FH KKN HOME FH LPV ARTIGOS FH MUZIKA LIA MENON FH RESPONDE

sábado, 7 de dezembro de 2013

Foho Matebian

Foho Matebian
FOHO MATEBIAN

Foho Matebian, Foho Matebian.
Sa-be wa’in liu O? Sa-be toos liu O?
Se-be aswa’in liu O? Se-be tahan liu O?
O tahan bomba, morteiru, kainaun, roket ho bazuka.
Husi lalehan, tasi no rai.

Foho Matebian, Foho Matebian.
Iha O tutun aswa’in sira tuba.
Iha O lolon aswa’in sira sadere.
Hodi hamahan O oan bei-oan sira.
Hodi tahan Timor nia ukun rasik an.
Foho Matebian, Foho Matebian.
Se-be brani liu O? Se-be hamrik metin liu O?
Sa-be maka’as liu O? Sa-be aas liu O?
Sa-be kro’at liu O? Sa-be lulik liu O?
O maka’as liu hotu. 
Foho Matebian, Foho Matebian
Iha O tutun ruin naklekar lemorai
Iha O lolon ran suli lemorai
Iha O leet matan wen turu lemorai
Hodi harii ukun rasik an ba Timor 
Foho Matebian, Foho Matebian
Iha O tutun simu loron matan nakfera
Husi O leet naroman tuda lemorai
Hodi leno dalan ba ukun-rasik-an
La iha haneban, la iha susu bokur, la iha terus ho mate 
Hader simu loron matan foun!
Hakat nafatin ba Oin!
Tuir naroman ho lia loos!
Hako’ak ita rain ho ukun rasik an!
Kaer rasik ita moris ho ukun! 
Foho Matebian, Foho Matebian
Se-be fakar ran liu O? Se-be matan wen suli liu O?
Se-be terus liu O? Se-be halerik liu O?
Lori terus, ran, matan wen ho mate.
Hodi sosa ukun rasik an. 
Hader Matebian oan bei-oan sira!
Fo liman ba malu! Tula kabaas ba malu!
Hamutuk satan anin no udan boot!
Hakotu fahe malu! Hakotu terus ho mate!
Hodi harii ita Rain. Timor ba Timor oan tomak! 
F.R. Saky
Dili, 7 Dez 2013

Sem comentários:

Enviar um comentário

Nota: só um membro deste blogue pode publicar um comentário.