VISAO MISAO OBJECTIVO HAKSESUK BOLA FH KKN HOME FH LPV ARTIGOS FH MUZIKA LIA MENON FH RESPONDE

20131209

Dalia Kiakilir Selebra Hamutuk Ho Xanana Gusmao Iha Evento Reinaugurasaun Fatin Leitura Iha Sentru Kultura Xanana

AFAF/FHM

Xanana Gusmao, Kirsty Gusmao ho Dalia Agostinho
Hamutuk promove Lia Inan
Iha Sentru Kultural Xanana
Sentru Kultural Xanana Gusmao reativa hikas espasu ba timor oan sira atu hariku-an iha kultura leitura no aquisição conhecimento iha área barak. Iha evento ne’e, Xanana reinaugura fatin ba Biblioteka, instalasaun Komisaun Nasional UNESCO nian no Fundasaun grupu kultural Le-Ziaval.

Iha Xanana nia intervenção destake importância fatin ne’e ho objetivu “motiva hatoman-an iha leitura, aumenta conhecimentos no aprendizagem”. Xanana sei dehan tan katak “Ne’e fatin ida para ita hotu aprende”, nebe nia termina lokraik furak ne’e ho sani aiknanoik ida ba labarik oan sira mak prezente iha evento ne’e.

Tuir Kirsty Gusmao, objetivu sentru ne’e atu promove habito ka toman ba leitura, edukasaun no estimula kriatividade jovem sira ho varias actividades, inklui mos matéria relacionada ho matematika no física.

“Iha Timor laiha kultura ba leitura, principalmente iha kultura tradisaun oral nebe mak importante atu protege, maibe importante liu mak ema sira manan domin ba leitura, kultura no identidade nudar timoroan”, afirma Kirsty Gusmao, responsável ba projecto refere.

Performance Dalia Kiakilir
Knanuk "Hafurak Lisan Haburas Dalen"
@Foto: FHM/Arkivu
Inaugurasaun ne’e apresenta mos aktuasaun kultural husi grupu Le-Ziaval no especial performance husi artista internacional Dalia Kiakilir ne’ebe mak lori muzika rua, ida konaba ba Lian Materna no seluk nudar lia menon ba ita nia rain Timor Leste. Hananu nebe mak Dalia apresenta, ida mak “Ita Nia Rain”, nebe haklaken apelu ba unidade no perspektiva ba Timor nia futuru. “Hafurak Lisan Hafunan Dalen”, ne’e knanuk seluk nebe nia (Dalia) hetan fiar husi UNESCO hodi hakerek no kanta ba promosaun no valorizasaun Timor nia Dalen Materna ka Lia Inan.

Ba editor Forum Haksesuk muzika nian (FH/Muzika), Kiakilir hateten katak sente Haksolok no orgulhu tebes ho nia prezensa iha evento ne’e, tamba bele realiza nia mehi nebe hahu kedas wainhira sei ki’ik, mak muzika no hakarak kontribui netik buat ruma ba nia rain doben Timor Leste.

“Furak!”, liafuan dahuluk mak nia temin wainhira kolia ho FHM. Iha cumplicidade keramaian Dalia hatudu nia senteminentu ksolok dehan “hau haksolok tebes tamba mehi hau nian sai duni realidade e hau agradece”.

Nia mos aproveita biban ne’e hodi hato’o agradecimento klean ba organizasaun UNESCO, no especial ba mana Kirsty Sword Gusmao no maun bo’ot Xanana Gusmao, nebe hetan convite especial hodi partisipa iha selebrasaun evento ne’e, nebe iha ocasião ne’e hetan hakuak domin husi maun Xanana ho mana Kirsty no aplauso “basa-liman” husi publiku prezente ba nia performance iha palku.

“Obrigada Barak ba organizasaun UNESCO ho mana Kirsty Sword Gusmao no maun bo’ot Xanana nebe realiza hau nia mehi hodi bele participa iha reinagurasaun ba fatin Biblioteka no Sede Komisaun Nasional UNESCO iha Centro Cultural Xanana ohin (08/12/2013) iha Bidau Lecidere, Dili”.

Iha biban hanesan Dalia nebe ho naran Timor nian Kiakilir la haluha mos hato’o agradecimento wa’in ba grupu tokador Le-Ziaval sira nebe disponível acompanha nia knanuk iha “palku” Fundacao Cultural Le-Ziaval.

“Hau contente no agradece, bele conhece sira (tokador Le-Ziaval) no bele kanta ho sira nia acompanhamento nebe furak tebes”, dehan Dalia ho apresia antes nia husik hela fatin ami dadalia nian.

Grupo muzika Le-Ziaval & Dalia Kiakilir
iha Sentru Kultural Xanana
Foto @Foto: El Cars in FB
Tuir programa nebe mak FHM hetan asesu, ita nia cantora no hakerek-na’in ne’e sei ba performance iha palku CRESCENDO iha Sabadu ne’e, 14/12/2013. Entretanto, iha mos realizasaun seluk nebe dadauk hala’o hela ho equipa reportagem nian ba programa TV, episodio Magazine Timor Leste Contacto RTP nian, protocolado ho RTTL iha Dili. Reportagem ne’e sei halo liliu konaba Dalia nia percurso ligado ho nia Grupo Cultural Recreativo e Desportivo “Tata Mai Lau” Timor, nebe moris iha tinan 1984 iha Portugal iha sidade Setubal, hosi nia aman-inan rasik, Sr. Carlos da Graça Agostinho no Sra. Maria do Socorro Pereira da Silva Agostinho, hamutuk ho komunidade timoroan sira iha Setubal. Tata Mai Lau nia kontribuisaun mos maka'as iha tempu funu ba promosaun Timor nia kultura no haklaken Causa Timor nia luta ba mundu rai klaran. Tata Mai La nia registo balun bele akses iha ne’e http://tata-mai-lau.blogspot.com/.

Iha episodio ne’e, sei aborda mos parte talento Dalia nian iha materia muzikal no vocasao iha hakerek (escrita). Atu conhece diak liu tan bele akses no hare iha Dalia Muzika http://forum-haksesuk.webs.com/dalia-muzika.html no hakerek iha Kiakilir http://www.kiakilir.blogspot.com/.  

Planu la’o tuir expectativa, tuir responsável sira nebe hein hametin “relação próxima” ho Comissão Nacional da UNESCO hodi la’os deit sadik maibe insentiva no motiva publiku timor oan sira atu envolve-an liu-tan iha inisiativa criativa sira iha loron oin mai.

Marka prezensa iha serimonia ne’e varios membros Governo nian no corpo diplomático sira. Iha dadalia FHM ho membro governu balun, hotu-hotu lia ida katak “fatin cultural ne’e importante tebes ba ita nia sociedade no passo “neneik maibe bebeik” ba ita nia desenvolvimento cultural no hamanu”. Sira balun mos la nega sira nia admirasaun no curiosidade konehece besik Dalia Agostinho nebe dalaruma rona deit nia muzika no liliu sempre sani nia obra hakerek iha website Kiakilir. “Nia mos kanta furak, e Ela está de parabéns”, dehan sira balu.


FHM, Dili, 8 Dezembru 2013

Sem comentários:

Enviar um comentário

Nota: só um membro deste blogue pode publicar um comentário.