VISAO MISAO OBJECTIVO SPORTIMOR FH KKN HOME FH LPV ARTIGOS FH MUZIKA LIA MENON FH RESPONDE

quinta-feira, 1 de agosto de 2013

Remodelação ba Bloco Governo Coligação: política ka psicologia?

Remodelação ba Bloco Governo Coligação: 
política ka psicologia?

Martinho G. da Silva Gusmão

Liu husi sala redação TVTL nian (09/08/2012), ha’u dehan ona katak Governo Bloco Coligação (BGC) ne’e “mais psicológico do que político”. Wainhira jornalista husu se ita bele hadi’ak hikas governo ne’e karik? Hau hatan: husik sira serviço! Tan, wainhira ita muda lalais, ida be mai foun ne’e mos la iha garantia atu sai di’ak liu fali.

Liu tiha tinan 1, ita rona kedas liafuan remodelação. Ha’u hanoin nafatin katak remodelação ne’e hanesan hatudu de’it political therepeutic ida. Katak, membro governo ne’e isin todan no liman ain mamar, tan ne’e iha netik shock-therapy ida atu halo sira hakfodak no bok-an lalais. Idéia husi PM Xanana Gusmão kona ba remodelação halo ha’u hanoin saida mak Prof. Norberto Bobbio, hatudu iha Teoria Geral da Política: A Filosofia Política e as Lições dos Clássicos (2000), katak, ukun-na’in sira buka atu foti solução ka hatudu netik dalan atu oinsa mak bele hari’i sociedade di’ak ida, tan sira hanoin katak sira mak ai-rin no uma mahan. Maibe, sira rasik dala ruma mangame de’it, tan “... o problema do bom governo perdeu muito a sua atualidade ... ao fato de que o problema foi se deslocando do bom governo para a boa sociedade ...”! Ohin loron, ema baruk ona rona ka hare kona ba governo diak nian. Tan, ema hakarak hare liu ba moris diak no la hateke ba governo diak. Nune’e Bobbio hatutan, “... o mondo moderno ... não acredita mais que, para mudar a sociedade, baste mudar o regime político, como era possível acreditar quando o Estado era tudo e a sociedade fora do Estado era nada”. Ema moderno ohin loron la fiar ona katak, atu hadi’ak sociedade nia moris, hadi’ak lai regime político. Hanesan uluk ema fiar katak Estado bele halo buat hotu; no ema nebe la iha Estado nia laran folin laek liu. Maibe, ohin loron lalika hanoin tan katak Estado all round.

Iha idéia chave ruma nebe ha’u hakarak foti hikas atu hatudu kona ba remodelação. Uluk nana’in (1), ha’u sei hatudu katak remodelação ne’e hakesi ho “bom governo”, maibe, dala barak la’os ona “boa governação”. Tuir mai (2), ha’u sei hatudu oinsa mak issue kona ba remodelação ne’e hatudu ona oinsa mak mosu discretio intelectual ida nebe ha’u hanaran “crise xananaismo”. Ikus liu (3), ha’u sei hatudu katak remodelação hanesan fenomeno “xananaismo”, maski hamosu de’it “politik dagang sapi” (ha’u hola liafuan husi KH Abdulrahman Wahid ka Gus Dur nia liafuan). 

(1) Bom governo ka boa governação?

Iha debate TVTL tinan liu ba ne’e, ha’u hanaran “governo óleo pesado”. Tan sa? Tan, atu ukun de’it Nação ida ho população 1,1 milhões, ita monta Ministro, Vice no Secretario do Estado to’o kedas 55. Seidauk sura membro PN hamutuk 65 atu halo decisão no fiscalização política. Iha ne’e, GBC hetan sucesso hodi taka oposição nia posição; hatama sira iha coabitação metin ida. Seidauk sura tan ita nia tribunais, membro PNTL no FFDTL. Ikus liu, ita iha tan PR. Ho maquina Estado nebe boot nune’e, MF Dona Emilia Pires sai “duta besar keliling” atu ko’alia kona ba Estado frágil. Irônica.

Iha psicologia dala ruma mosu liafuan “megalomania”. Liafuan ne’e mosu fou-foun atu hatudu ba Imperador Alexandre o Grande husi Macedônia (Grécia antiga). Mai husi “megalo” = “grande”, “gigante”, “great”, “giant”, “besar”, “raksasa”. Ho “mania”, tuir lian macassae karik “gira-gira”, “bulak”. Megalomania hatudu ba fase ida iha Alexandre nia estado mental, wainhira nia hada’u no hatun reino barak husi Babilônia to’o Egipto no Índia hodi hari’i Magna Grécia: império nebe luan no boot. Alexandre kaer mesak no kumu hamutuk poder hotu, no hamosu idéia mesak bo’ot de’it. Nia “bulak” ba idéia bo’ot no halo sasan barak! Maibe neneik, nia ukun la metin tan ema barak nebe hale’u nia ikus mai hada’u malu riku soy no fahe malu reino (região) atu ukun rasik ho sira nia mater plan oi-oin. Alexandre mate, Magna Grécia mos hakoi neneik.

Neineik, filosofo Bertrand Russel no psicólogo analítico Sigmund Freud mak usa megalomania atu hatudu ba estado mental ida: bulak de’it ba boot no barak. Iha ema hotu-hotu nia moris, husi ki’ik kedas ita mehi ona atu sai boot no iha buat barak.

Politicamente atu dehan, ita nia governo husi FRETILIN mai AMP to’o GBC ne’e ukun rai ki’ik ida, maibe ho mehi mesak boot de’it no monta ema barak iha instituição ida nia laran. Ita iha estado mental ida, hanoin katak, governo ida be di’ak ne’e mak oinsa mehi buat mesak boot no hatama ema barak iha governo nia laran. Maibe, “bom governo” ne’e hanesan tebes ho “boa governação” ka lae be?

Tuir ha’u nia hare, “bom governo” hatudu ba instituição ka órgão Estado nian; “boa governação” hatudu ba sira nia ação ka operação! Ha’u hatudu to’ok ninia aspecto balun. Uluk liu (a), governo hanesan “sede do exercício”, hatudu ba fatin atu ema halibur hamutuk atu hanoin no hakotu lia. Ne’e mak hatudu ba Conselho dos Ministros; hamutuk 17 (PM no Vice PM ho Ministro sira); husi ne’e mak lori decisão ba vice ministro sira hamutuk 11; secretario do Estado hamutuk 26. Iha caso ida ne’e, Parlamento Nacional mos sai hanesan sede do exercício, tan ne’e inclui mos bancada da oposição.

Tuir mai (b), “sede de apoio” hatudu ba direção no departamento sira, liu-liu função publico nu’udar técnico. Infelizmente, ita nia técnico sira barak liu mak halo política. Sa tan wainhira técnico sira ne’e sente an luta-na’in aswa’in ka veterano nia oan no bei-oan sira, wow ... kaer la metin. Ne’e sira mak manda fali hanesan Ministro. Liu-liu, wainhira sira kaer tan liafuan “pro-otonomi” ka “integracionista” mak kaer fali ukun, situação sai complicado liu tan. Bele mosu desobediência.

Ikus liu (c), “sede efectiva” hatudu ba ema hirak nebe tan sira nia capacidade intelectual no técnico foti ba knar assessor. La’os ona segredo katak assessor sira barak mak mai husi social know how, katak mai husi nomeação política, mai husi belun no parente. Maski, sira la dun iha technical know how. Tan ne’e mak dala ruma Ministro rasik balun dehan “desemprego intelectual”: ema nebe iha integridade no competência la hetan fatin; ema nebe “ijazah” ba sosa de’it iha Indonesia mak kaer fali pasta assessor ba ministro. GBC monta ona Secretariado do Estado do Fortalecimento Institucional (SEFI), maibe to’o ohin loron nia la iha “armada intelectual” (ka, camada intelectual) nebe nia hili ka recruta ona fornece ba governo hodi hala’o “sede efectiva”.

Hanesan óleo pesado be boot liu (energia barak) liu, maibe la usa didi’ak no lolos mak sei mosu circuito (korsleting). Tuir hau nia hare, liu tiha tinan 1, ita nia governo circuito bebeik. Sei nune’e hela, ita nia oposição mos mate lakan. Tan ne’e governo boot, governação todan no oposição piska-piska.

(2) Crise Xananaismo: dualística iha mundo político

Ita hadomi ka ódio, ita simu ka rejeita, ita hakarak ka lakohi: Kay Rala Xanana Gusmão mak centro ba governo óleo pesado ida ne’e. Ema seluk bele hare ninia figura eminente iha historia política Timor Leste nia laran! Ha’u hare katak idéia kona ba remodelação ne’e hanesan hamrik iha óleo nia laran: nakdoko no namdoras. Tan sa? Tan, idéia ida ne’e hatudu de’it figura dualística impenitente husi Xanana rasik. Iha parte ida nia hakarak “valor” governo ne’e di’ak no furak, iha parte seluk nia hare “fato” katak governação mak circuito hela de’it (oposição piska-piska); nia moris iha situação ida katak iha tinan ida nia laran ona mosu bebeik “promessas não-mantidas”; conflito internal partido sira nebe la nahas hodi nune’e Timor Leste tomak hanesan fali moris haketak malu iha “céu dos princípios” no “terra onde se encontram os corpóreos interesses” nia let (foti husi Norberto Bobbio nia liafuan sira). Wainhira Xanana hamrik iha tensão interna ne’e nia laran, então saida mak nia hanoin, ko’alia no halo, sei hatudu de’it “crise xananaismo” (ha’u nia liafuan rasik). Conceito “remodelação”, hanesan mos conceito seluk “descentralização” no “revista CMATS” (Certain Maritime Arrangements in the Timor Sea) no mega projeto Taci-Mane to’o Master Plan Oecusse (MPO) hatudu oinsa mak Xanana sai “one man shows” iha palco político nia leten. Maski ema dehan, MPO ne’e Dr. Mari Alkatiri mak halo, maibe se la simu benção husi Xanana Gusmão, oinsa mak bele “halo lalehan iha rai” Oecusse?

Ne’e duni, ba ha’u, remodelação (hanesan mos conceito seluk nebe temi iha leten) hatudu “crise xananaismo”. Baibain temi “crise”, ita hanoin deit mak problema no conflito. Lae! Liafuan “crise” ne’e mai husi dalen Grego “krisis” (adj.), katak, “decisão”, “condenação”, “sentencia judiciária”; no “krinein” (verbo), iha Portugues dehan “raciocinar”, “julgar”, “pensar”, “distinguir”. Inglês dehan “to reason”, “to judge”, “to think”, “to discern”. Husi “crise” ne’e mak mosu tan liafuan “critica” no “critério”. Tan ne’e, iha filosofia wainhira temi “crise”, “critica” no “critério” ne’e hatudu ba família ida – critical philosophy.

Ho “crise xananaismo” ha’u atu hatudu oinsa mak Xanana halo ema hanoin no hatetu kona ba remodelação atu hadi’ak hikas dalan ba “bom governo” no “boa governação”! Nia ko’alia uluk lai ho membro governo iha sorumotu MNE. Depois, nia bolu CNRT atu halo conferencia nacional. Ema barak mak hanoin katak membro governo balun sei katik. Conferencia CNRT ne’e, bele dehan, hanesan shock therapy ida ba membro governo no parlamento husi partido ida ne’e. Maibe, ikus mai sira hotu “fahe malu namkari hodi Cristo nia paz”! Buat nebe ita bele dehan katak crise xananaismo hanesan hahalok ida atu bolu hikas ita nia hanoin no neon ba qualidade moris ida, nebe vale a pena ita hatur hikas.

Ne’e duni, atu dehan lolos karik, remodelação sei la mosu iha tempo badak, tan Xanana sei sukat hela “conflito interno”. Remodelação bele la’o, wainhira besik ona eleição atu hamosu “competição interna”, hodi nune’e membro governo no parlamento (liu-liu CNRT) atu serviço maka’as.

(3) “Politik Dagang Sapi”

Maibe, se remodelação ne’e la’o iha dalan klaran karik, oinsa? Tuir ha’u nia hanoin, remodelação bele la’o iha dalan klaran, wainhira situação sai todan ona, maibe ho dalan “politik dagang sapi”. Liafuan ida ne’e sai famoso wainhira KH Abdulrrahman Wahid ka Gus Dur ko’alia kona ba processo “reformasi 1998” iha Indonesia. Iha ambiente Gus Dur nian, “sapi” (karau) ne’e importante ba “daya guna” (uso) lubuk ida: “karapan sapi” (desporto hodi soran karau dikur malu no halai taru); “Idul Adha” (ambiente religioso ba Islam sira) no atu hala’i natar (agricultura). Karau nia folin depende ba ninia “uso”. Gus Dur usa liafuan “politik dagang sapi” atu descreve situação “reformasi” nebe – em vez de hadi’ak no corrige Orde Baru Soeharto nian – hetok sai conflituoso liu no problemático. Tan sa? Tan recrutamento ba ema nebe atu tama iha política la liu husi technical know how (ninia capacidade intelectual no integridade pessoal), maibe ba liu social know how (relação familiar ka social, grupo, suku no religião). Ninia resultado político sira sai tiha hanesan fa’an “karau” ba malu – sosa hira, folin hira.

Tuir ha’u nia hare, ita nia política mos “dagang sapi”. Recrutamento político iha Governo no membro PN la iha balanço entre social know how no technical know how. Remodelação nebe mosu mos sei kude’uk, tan “dagang sapi” entre CNRT, FRETILIN, PD no FM. Agora hela ba “karau atan” Xanana Gusmão atu tama iha “mercadoria política” (marketing politic). Maibe, ita bele ona hafuhu cenário tuir mai.

Ida uluk (i), hare husi “sede do exercício” – Xanana hakarak hili “bom governo” nebe bo’ot no barak, ka, “boa governação” nebe bele hamenus tan membro balun maibe eficaz no efetivo? Ha’u nia intuição dehan: Xanana defende nafatin composição nebe iha ona, tan nia kolen atu buka ema foun. Ema foun bele lori problema foun tan! Ou, nia hatama tan ema foun, hodi nune’e sai tiha “Kabinet 100 menteri” (hanesan uluk Soekarno iha 1967, atu hatan ba golpe do Estado ka G30S/ PKI). Maibe, liu-liu “sede do exercício” sei la iha mudança, tan Xanana Gusmão sei sukat hela “mercado político” ho CNRT, FRETILIN, PD no FM. Molok atu forma governo ida ne’e mos, “mercado”manas ona: FRETILIN husu atu tama hotu, PD no FM mos halo contrato ketak. Ikus mai Xanana fo “kios” balun ba PD no FM; atu labele hamosu conflito, nia loke tan mercado político ida iha Oecusse ba oposição. Ne’e duni, husi “sede do exercício”, la iha ona “modal” foun ka “produto” foun atu tama iha “mercado político” nia laran. Susar ona atu hatun sasan nia folin. Fácil liu atu aumenta. Ne’e duni remodelação iha “sede do exercício” katak aumenta membro do governo. Karik!!!

Tuir mai (ii), hare husi “sede de apoio”, ninia sasukat mak technical know how. Baibain hanaran tecnocrático. Remodelação mos tem que halo iha ne’e. Iha instituição 2 nebe bele tulun malu, maibe bele mos halo confusão ba malu – Comissão da Função Publica (CFP) no Instituto Nacional da Administração Publica (INAP). Ida ne’e sei kahor malu ho Secretariado do Estado do Fortalecimento Institucional (SEFI). Oinsa mak CFP no INAP hala’o knar, ita la dun hatene. Maibe, hare husi funcionário publico nebe hala’o knar, ita bele dehan katak “sede de apoio” sei rungu ranga. Dala ruma, iha instituição balun ita la hatene se mak bo’ot se mak ki’ik. Ita hare momos kedas oinsa mak ethos of work la la’o; serviço publico ki’ak tebes. Ha’u hanoin, remodelação bele mos kona da’et ba sira.

Ikus liu (iii), hare husi “sede efetiva”, SEFI iha knar importante. Ha’u fo ona sugestão dala barak ba SEFI atu nia sai hanesan “deposito intelectual”, halo recrutamento no fortalecimento kona ba “assessor nacional” ba ita nia instituição hotu-hotu. Iha SEFI nia gabinete mak ministério sira halo pedido kona ba assessor sira. SEFI bele mos hamosu Conselho ba Código de Conduta ida (Dewan Kehormatan) atu bele halo avaliação ba instituição hirak nebe la funciona didi’ak. Remodelação iha área ida ne’e importante tebes. Ate chave ida. Tan, wainhira ita nia Estado no Governo la iha “think tank”, ita sei moris iha new colonialism nia laran. Liafuan “new colonialism” (Max Weber) hatudu ba moneterização  no burocratização nebe hametin sistema ida nune’e hases ema seluk. Uluk colonialism hatudu ba malae sira nia ukun. Ohin loron, colonialismo foun hatudu ba malae-minded”: ita fiar katak malae deit mak iha kakutak, malae de’it mak iha hanoin. Sira ukun liu husi sistema nebe hanaran “international standard” (ka, padrão internacional). Tuir ha’u nia observação – iha analisa barak nebe malae sira halo, maibe “atrazado” ona. Exemplo – kona ba “estado frágil”. Idéia ida ne’e mosu iha 1994. Ohin loron la serve ona nu’udar teoria social no analisa política. Seluk: kona ba língua-materna; iha Timor Leste pratica língua materna ne’e nanis ona (biasa tiha ona), maibe derepente dehan sai prioridade governo nian. Ida todan liu mak negociação kona ba fronteria marítima – ita lakon tan malae sira halo espionagem. Seluk tan. Ne’e duni, remodelação iha nível “sede efetivo” ne’e todan tebes, tan ita sukat liu ba descolonização mental no intelectual.


Liu husi dalan naruk ida ne’e ha’u hatudu katak remodelação nebe parcial de’it: troca ministro no monta ministro sei la resolve problema. Maibe, atu halo remodelação integral mos la’os kman. Tan, wainhira troca membro governo sei hamosu confusão. CNRT, FRETILIN, PD no FM sei halo contrato oi-oin, la’os de’it iha “mercadoria política”, maibe mos iha “party based economy” (habosu no habokur família liu husi partido). Husi biban seluk, idéia kona ba remodelação nebe PM Xanana Gusmão lansa bele mos sai hanesan shock therapy (halo membro governo sira atu serviço diak liu tan), maibe mos bele megalomania – estado mental ida atu halo Estado nia maquina boot liu tan no belar liu tan.

*) Docente Filosofia ética, política, ateísmo contemporâneo no hermenêutica moderna iha Instituto Superior de Filosofia e de Teologia (ISFT) Dom Jaime Garcia Goulart, Fatumeta - Dili, Timor Leste.

Sem comentários:

Enviar um comentário

Nota: só um membro deste blogue pode publicar um comentário.