VISAO MISAO OBJECTIVO HAKSESUK BOLA FH KKN HOME FH LPV ARTIGOS FH MUZIKA LIA MENON FH RESPONDE

20130707

Governu hasai Rezolusaun aprova Extinsaun Grupu Arte Marsial sira

Governu hala’o sorumutu estraordináriu tersa-feira ne’e, iha loron 2 fulan Jullu tinan 2013, iha sala sorumutu Konsellu Ministru nian, iha Palásiu Governu Dili no aprova ona:

1. Rezolusaun Governu ne’ebé aprova Estinsaun Grupu Arte Marsiál sira

Konsellu Ministru determina ona estinsaun grupu Arte Marsiál sira mak hanesan PSHT, KORK no KERA SAKTI, nune’e mós medida lubun ida ne’ebé atu hodi estabelese hikas fali orden públika no hakmatek iha sosiedade, ne’ebé hetan ameasa husi hahalok hirak ne’ebé mak grupu ne’e halo.

Situasaun ne’e dada ba tinan hirak nia laran ona, maske entidade sira Estadu nian fasilita sorumutu barbarak entre grupu arte marsiál sira, dezde tinan 2002. Sorumutu hirak ne’e hamosu deklarasaun susesiva kompromisu nian hodi salvaguarda respeitu ba prinsípiu konvivénsia sosiál, ne’ebé hakotu ho asina dokumentu ida, iha fulan Maiu tinan 2011, ne’ebé mak grupu sira ne’e jura hodi kontribui ba hametin pás no estabilidade iha país. Kompromisu hirak ne’e la fó efeitu di’ak, maibé, hatudu laiha responsabilidade husi líder organizasaun nian hirak ne’e.

Insidente sira foin lailais ne’e mosu iha Dili no iha distritu sira seluk, ne’ebé halo parte grupu Arte Marsiál sira, provoka distúrbiu maka’as tebes, estraga rikusoin, mate no kanek.

Organizasaun balu halo juramentu sira iha solo Indonéziu ho bandeira Repúblika Indonézia nian- ne’ebé mak lasimu husi sidadaun timor-oan sira. Atu hakat liu fronteira, ema hirak ne’e tama ilegál, laiha pasaporte ka vistu. Hatutan tan katak foin dadaun ne’e iha krime omísidu ida ne’ebé, pratika husi grupu hirak ne’e nian ne’ebé hirus malu, iha illa Java nian.

Dala barak, intervensaun husi membru PNTL no F-FDTL nian, hanesan atu fó fali protesaun ba grupu sira ne’e, tanba ne’e mak labele ajuda atu hetan rezolusaun ba konfrontu sira ne’e, iha Dili no iha rai laran.

Nune’e – haree katak grupu balu husi Arte Marsiál sira la respeita ba prinsípiu sira ne’ebe mak estabelese ona iha Lei 10/2008, loron 16 fulan Jullu, Lei Arte Marsiál nian, la kumpri suspensaun temporária ba prátika Arte Marsiál sira ne’ebé estabelese tiha ona iha Rezolusaun sira Governu nian, iha númeru 35/2011 no 24/2012 - ba ne’e Governu rezolve ona atu simu kontéudu relatóriu Komisaun Reguladora Arte Marsiál (KRAM) nian kona-ba envolvimentu grupu Arte Marsiál sira iha hahalok violénsia no distúrbiu, no deside hakotu no halakon tiha Grupu Arte Marsiál sira mak hanaran PSHT, KORK no KERAK SAKTI, ho proibisaun totál ba kualkér atividade hosi arte marsiál nian hosi sira nia membru rasik.

Governu, determina, mós, polítika ba “toleránsia zeru” ba membru sira hotu husi PNTL no F-FDTL nian sira ne’ebe mak partisipa iha atividade grupu Arte Marsiál nian, sira hirak ne’e sei hetan sansaun disiplinar, inklui hasai hosi sira nia instituisaun, tuir estatutu disiplinar ne’e rasik.

Governu determina, mós, katak Komandu F-FDTL no PNTL sei asegura ba kumprimentu Rezolusaun ne’e tomak.

Líder komunitáriu sira tenki partisipa hodi kumpri ba rezolusaun ne’e, iha kooperasaun ho forsa seguransa no ho KRAM nian.

Díli, Loron 2 Fulan Jullu Tinan 2013

Komunikadu Imprensa
Sorumutu Estraordináriu Konsellu Ministru loron 2 fulan Jullu tinan 2013
Prezidénsia Konsellu Ministrus - V Governu Konstitusionál
www.timor-leste.gov.tl

Sem comentários:

Enviar um comentário

Nota: só um membro deste blogue pode publicar um comentário.