PN - Governu Konkorda Gasta FP 1.386,7 Miloens

DILI – Komisaun Eventual Parlamentu Nasional hamutuk ho Governu iha ona konkordansia katak, governu bele gasta osan husi Fundus Petroliferu (FP) hamutuk1.386,7 miloens no restu 260 miloens, governu bele uza bainhira ezekuta ona too 84%.

Deputadu Bankada FRETILIN, Aniceto Guterres, hateten, alterasaun ida-idak husi 1.7 biloens mai iha 1.6 biloens nee tamba konkordansia entre Komisaun ho Governu, hasai tiha 150 mil. Tamba nee maka mosu numeru nee, no husi testu 1.647,519 miloens Governu so hetan autorizasaun gasta 1.386,7 miloens, restu nebe por volta 260 miloens, governu bele uza bainhira ezekuta ona 84% husi 1.386,7 miloens ho informasaun previa mai iha PN. Ida nee konta iha artigu 4 numeru 2.

“Husi 1.647,519 miloens hamutuk ho governu hasai tiha 31 miloens hodi atende proposta nebe maka tama, atu hateten mos katak husi alterasaun ida nee maka hamosu implikasaun hamutuk mos alterasaun ba artigu 2, liu-liu koalia kona ba montante iha kada rubrika no kada entidade iha anexu 2, 3, 4 no 5. Nee maka alterasaun Komisaun Eventual aprova,” hateten Deputadu Aniceto iha Debate OJE 2013 ba Espesialidade iha Uma Fukun PN Dili, Kinta (14/02/2013).

Tuir Aniceto, Komisaun Eventual konsege duni halo diskusaun no hola desizaun liu husi konsensus, entre membru Komisaun Eventual ho Governu kona ba alterasaun dokumentu orsamentu final 20013 nebe governu submete mai iha PN.

“Ami hanoin katak alterasaun sira nee fo implikasaun ba mudansa boot ida ba dokumentu nee, tamba hanoin katak presizamente alterasaun nee agrupa hamutuk iha testu substitutivu ida nebe ohin Vice Prezidenti lee tiha ona mai ita hotu,” hateten Aniceto.

Nia sente orguillu boot ida, liu-liu ba Parlamentu ida nee, tamba Bankada Parlamentar haat (4) nebe kompostu husi CNRT, FRETILIN, PD no Frenti Mudansa, subskreve testu foun ida nee hodi submete ba iha plenariu atu hetan diskusaun no votasaun iha diskusaun espesialidade OJE 2013 nian.

“Hau hakarak halo esplikasaun uitoan para bele hetan kumpriensaun diak liutan. Ita hare iha testu anterior, liu-liu kona ba total estimadu ba despezas OJE 2013 nian husi 1.197,519 miloens dolar Amerikanu sai fali 1.647,519 miloens, ita apar ho testu anterior iha mudansa uitoan,” tenik Nia.

Nia haktuir, iha mos alterasaun nebe implika mai iha transferensia husi fundu petroliu ninian nebe hare iha artigu 4 nee. Uluk iha testu anterior nee laiha numeru 1 no numeru 2, maibe iha testu foun nee iha numeru 1 no 2, iha testu foun nee transferensia U$ 787 miloens nebe iha testu anterior nee 1.1 miloens dolares.

Plenaria PN, tuir Aniceto, soberanu, needuni deputdau sira iha direitu individual atu hatoo proposta iha diskusaun ida nee, maibe ezersisiu ka esforsu nebe maka Komisaun Eventual halo hamutuk ho governu masimu maka ida nee ona.

“Tamba nee maka ami hanoin katak ida husi 31 miloens nebe konsege atende proposta nee, laiha osan seluk atu atende tan. Proposta masimu maka ida nee, dala ida tan hau hateten, plenaria nee maka soberanu, tamba nee ita boot sira iha direitu tomak atu koalia no aprezenta proposta,” dehan Aniceto.

Entretantu Deputada Bankada PD, Maria Lourdes Bessa, hatutan, proposta 104 nebe maka hatama husi depotadu sira husi komisoins, individuais no husi bankada, hetan husi analiza husi ida ba ida no hetan konsiderasaun. Needuni sei iha tan espliksaun tamba saida maka aprezenta ka la aprezenta.

“Ami iha komisaun hamutuk ho governu analiza ida ba ida, katak laiha ida maka ita la tau atensaun,” hateten Bessa.

Bessa esplika, Komisaun Eventual servisu hamutuk ho governu maka hare liu-liu ba efisiensia no efikasia debate nian, para hetan rezultadu orsamentu ida nebe realistiku hodi simu salva guarda, mezmu tempu knaar fundamental Parlamentu nian ba fiskalizasaun hodi hare ba implementasaun no ezekusaun governu nian.

Nunee mos Bankada CNRT ho Frenti Mudansa laiha komentariu, maibe entrega ba plenaria atu deside, tamba plenaria ida nee soberania.

Proposta Lei no 2/III (1a), Passa Ho Votus Maioria Iha PN

Proposta Lei no 2/III (1a) nebee maka subskreve husi Bankada 4 iha PN, passa ho votus maioria. Iha proposta lei nebe subskreve husi bankada 4 nee nia forma katak dotasaun orsamentais sismtematizada ba Salariu no Vensimentu iha $ 160,531, Bens Servisu $ 441, 530 ba Transferensia Publika $238,985 miloens, Capital Menor $49,595 miloens no ba Kapital Dezemvolvimentu iha $756,877 miloens.

Ida nee eskluindu ba servisu no fundu autonomos no fundu espesifiku iha emprestimu, ho total dotasoens orsamentais iha $877,547 miloens dolares. Jin/Lia

Fonte: Jornal STL - Suara Timor Lorosae

Data: 15 Fevereiru 2013 (http://suara-timor-lorosae.com)