Mari: “Mudança postura nudar dever historiku”

Forum Haksesuk Hatan

Marí: “Mudança postura nudar dever históriku”

Foin dadaun ita assiti onda foun iha atmosfera politika Timor nian ho mudança atitude de repente nebe maka ema barak la espera mai husi liderança politika partido históriku Fretilin nian. Haré ba postura foun ne, naturalmente mosu dúvidas no interpretasaun oi-oin husi se deit maka akompanya ho atensaun situasaun politika rai laran desde inisio kedas. Nudar cidadaun ida iha país nebe respeita liberdade de expresaun hanesan Timor, ida-idak iha direito halo interpretasaun ba fenómeno sira ne. Balun halo deit iha kotuk e balun prefere hatun nia hanoin ba públiku e ida ne maka editores Fórum Haksesuk sira tenta halo.

Nudar reaksaun ba interpretasaun hirak ne, Dr Marí hato nia resposta indirektamente liu husi nia pagina facebook nebe maka bazikamente hakarak hateten deit katak nudar parte husi gerasaun 75 nian, ida ne hanesan dever historiku para atu halo mudança no lori rai ida ne ba oin “antes entrega ba jerasaun foun sira”. Se ida ne maka intensaun lolos duni, hanesan gerasaun foun no cidadaun nebe maka hakarak hotu Timor Leste livre husi korrupsaun no mukit so bele congratula deit Fretilin nia coragem.

Husi pontu de vista politiku, mudança de postura ida ne hetan kedas resultado iha nível táktiku tambá ho atitude nebe moderada konsege kria intendimentu ho governo sobre Orcamento Geral de Estado ba tinan ida ne, buat nebe maka difícil tebes atu hetan ho postura anterior. Iha nível estratégico, sei prematuro demais para avalia nia resultado tambá haré liu ba longo prazo mas, o que certo, sempre diak liu adopta atitude moderada hanesan agora duque hanesan uluk. Hanesan qualquer partido iha país democratiku sira, nota final ba atitude foun ne só povo rasik maka sei avalia iha urnas. Eleisaun 2017 sei dok hela, tambá né espera deit katak postura foun ne sei konsistente nafatin nuné to iha nebá.

Olivio de Deus

Editor Forum Haksesuk

1. Mari: "Mudança postura nudar dever historiku"
   http://forum-haksesuk.blogspot.com/2013/02/mari-mudanca-postura-nudar-dever.html


2. Forum-Haksesuk Responde!
   http://forum-haksesuk.blogspot.com/2013/02/forum-haksesuk-responde.html


3. Mari Alkatiri vs Forum Haksesuk
   http://forum-haksesuk.blogspot.com/2013/02/mari-alkatiri-vs-forum-haksesuk.html


4. Tamba saida mak Mari Alkatiri hakbesik ba Xanana?
   http://forum-haksesuk.blogspot.com/2013/02/tamba-saida-mak-mari-alkatiri-hakbesik.html