Ameasa Foun Iha Timor Leste Maka "Funu Informasaun"

By: Celso Oliveira

Hau hanoin, ohin loron, povo Timor Leste, konsume livre informasaun tamba hau akompanya sirkulasaun informasaun iha internet, liu2 meius sosial por exemplo "Facebook", hau hare'e hanesan amesa foun ba Timor Leste ninia estabilidadi mak informasaun nebe destroi Unidadi Nasional.

Sirkula iha internet: website, blog's, media sosial hanesan Facebook, etc, informasaun oi-oin konaba Timor, espesialmente informasaun konaba Personalidadi Estadu no Hirarkia Igreja. Hau hare'e katak ema barak uza naran ou ID falsu, ema balun subar-an iha grupo ou instituisaun nia okos hodi ataka Timor Leste ninia Personalidadi Estadu no Hirarkia Igreja. Ida ne'e, iha tempu atual, ita bolu guerra informacao ou funu informasaun.

Bele dehan katak diferenti ho tinan 13 liu ba (molok 1999), ohin loron, ho avansa teknolojia, mosu trend oi-oin konaba meius atu sirkula informasaun. Por exemplo: Internet, Facebook, etc. Meius sira ne'e, ida2 iha ninia funsaun. Konserteza, iha funsaun diak no funsaun la diak. Agora, depende ema/grupo ida2 uza. Iha kazu ne'e, hau hare'e Timoroan (privada ou grupo) barak mak sei uza meius sira ne'e ho objektivu atu destroi, kria instabilidadi, etc iha Timor Leste.

Objektivu hosi funu informasaun mak destroi Unidadi Nasional i kria instabilidadi, iha kazu ne'e destroi Estructura Estadu no Hirarkia Igreja Timor Leste, por exemplo: halo kampanya falsa konaba figura A ou B, manipula opiniaun publika, inventa faktus no dadus, publika karikatura kontroversial, publika fotografia nebe polemika, etc...atu nune to'o loron ida ema (povo) lakon konfiansa ba Personalidadi Estadu no Hirarkia Igreja iha Timor Leste.

Ikus2 ne'e, hau hare'e ema ou grupo barak mak ataka maka'as lideransa funu nian hanesan PM Kayrala Xanana Gusmao, PR Taur Matan Ruak no Komandanti F-FDTL Lere Anan Timor. Objektivu hosi ema ou grupo sira ne'e maka atu destroi sira nain tolu ninia forsa moral i konfiansa ba malun, liu2 destroi sira ninia konsentrasaun ba Dezenvolvimentu Nasional.

Funu informasaun laos buat ida foun, maibe, buat antigu ida. Bainhira, ita hakiduk ba kotuk, iha tempu sei funu hasoru Indonesia, bele dehan katak resistensia Timor mos uza informasaun hodi destroi invasores Indonesia ninia kapasidadi politika no militar. Maibe, iha tempu neba, sei kuno ou kolot hela. Ohin loron, funu informasaun moderno tebe-tebes.

Maibe, ida ne'e la signifika ita la bele kontrola. Timor Leste nebe foin sai hosi funu, presija meius diak i profissional atu kombate informasaun nebe buka destroi Unidadi Nasional i kria Instabilidadi iha ita nia rai doben Timor. Fim

Relasiona ho artigu ne'e:
1. http://www.celsooliveiratimor.blogspot.co.uk/2012/10/funu-informasaun.html?m=1
2. http://forum-haksesuk.blogspot.co.uk/2013/01/presiza-matan-kroat-ba-buatus.html?m=1