Election Related Challenges in Young Democracy (2) Multipartidarismo: Husi “Democracy” ba “Democrazy”?

Election Related Challenges in Young Democracy (2)

Multipartidarismo: Husi “Democracy” ba “Democrazy”?

Martinho G. da Silva Gusmão

Tópico ida seluk nebe conferencista sira foti (sessão 2^o) mak “Creating representative government: electoral systems and political party regulation”. Iha rai hotu-hotu, órgão eleitoral moris iha conflito no confusão ida: independente ka governamental. Hanesan Timor Leste, represtante governo iha órgão eleitoral iha 2 kedas: comissário 3 iha CNE nia laran, no STAE tomak. Nune’e, bele dehan ita hakat liu ona idéia kona ba representação proporcional. Iha sessão ida ne’e nia laran, panelista 3 mak ko’alia: Dasho Kunzang Wangdi (comissário Bhutan), Erdenebileg Gerelt-Od (UNDP Mongólia), Dr. Malek Twal (Assessor ba PM Jordânia).

MULTIPARTIDARISMO & “DEMOCRAZY”

Dr. Gerelt-Od Erdenebileg (UNDP Mongólia) dehan katak, iha democracia nia laran partido político sai hanesan “... the soul and heart of democracy”. Hasai tan husi wikipédia.com nebe dehan, “A political party is a political organization that typically seeks to influence government policy, usually by nominating candidates with aligned political views and trying to seat them in political office. Parties participate in electoral campaigns and educational outreach or protest actions. Parties often espouse an expressed ideology or vision bolstered by a written platform with specific goals, forming a coalition among disparate interests”.

Uluk nana’in (1), nu’udar organização política, partido iha knar bo’ot atu influencia governo ninia policy (estratégia, plano no programa). Influencia bele halo iha laran, bele mos halo husi liur. Halo husi laran, katak ema nebe tama iha partido bele sai candidato no hetan mandato/ cadeira política ruma. Ema nebe tam ona iha partido ida (ka coligação atu kaer governo) buka atu contribui ba governo. Dala ruma iha duni deputado balun nebe halo politica ulun tun ain sae, wainhira tama iha iha coligação, maibe ataca fali husi laran.

Tuir mai (2), partido político mos halo “educational outreach” katak sira iha vocação ida atu hanorin kona ba democracia. Sira nia liafuan no hahalok hakruk ba linha global no geral democracia nian. Iha conferencia Mongólia ne’e, participante (comissário sira) hato’o sira nia experiência kona ba educação eleitoral no educação política. Desafio nebe mosu, katak, osan ba educação politica nebe partido sira hetan barak liu; maibe osan ba educação eleitoral oituan liu. Balun la iha liu kedas. Educação politica la’o di’ak, wainhira partido político iha duni sira nia ideologia no plataforma politica. Crise no conflito mosu, wainhira hari’i partido ida maibe la iha ideologia no plataforma; hanesan han hahan, maibe la iha masin no budu; hanesan moris karik, klamar la iha moris mos bulelun hela.

Ikus liu (3), partido político mos bele halo protesto. Ida ne’e mak oposição nia knar no kbit. Sira bele fo influencia ba governo “husi liur”. Tan ne’e sira hetan dignidade politica atu hatudu oinsa mak governo halo la tuir dalan. Oposição hanesan akupuntur, sona tama ba isin moras oituan maibe halo di’ak. Oposição hanesan ai-moruk, ema la gosta atu hemu maibe la iha dalan seluk ona se hakarak moris naruk. Democracia nia energia mai husi oposição.

Iha democracia multipartidarismo, governo no oposição mak sai hanesan sasukat. Maibe, iha fatin barak multipartidarismo la hanesan ho partido bara-barak. Maski iha partido oituan, maibe ho qualidade.

“DEMOCRAZY” MULTIPARTIDARISMO

Iha sessão plenária, comissário husi Timor Leste hato’o argumento katak “bele ka lae ita dehan, katak, partido político la’os moris atu fo solução maibe mos parte husi conflito?” (frase husi Timor Leste nebe participante sira usa ba discussão dehan, “... not frequently, political parties which was born to foster democracy in certain circumstances easily become point of conflict).

Interessante liu mak experiência husi Jordânia. Rai ida ne’e mos bele hatudu figura tomak partido político sira iha Árabe nian. Tuir Dr. Malek Twal (assessor político iha Primeiro Ministro Jordânia nia gabinete) nia hare, katak, partido político hotu-hotu iha Árabe sai ona hanesan “monarquia” ida (oligarquia ho anomalia). Chefe do Estado barak iha Árabe mak família real (kerajaan) no seluk ho sistema “syeikh”. Ba sira, eleição ne’e hanesan momento ida atu tampa tun tampa sae hena governo nian nebe nakles bebeik. Eleição antecipada ne’e sai ona hanesan “langganan tetap”. Balun fulan 3 de’it, mosu ona eleicao antecipada; balun to’o tinan 1; no sorte di’ak liu ona mak too tinan 3 fohin halo eleicao antecipada. Tan sa?

Uluk nana’in (1), estrutura partido depende ba “familiarismo”. Lealdade no militância partidária la depende ba estatuto ka regulamento partido nian (lei partido político mos la iha) no ideologia, maibe depende ba “oportunidade” nebe família ida hetan. Ne’e duni, tuir Dr. Twal, maioria iha rai Árabe, se mak sae ba Presidente do Partido ka Secretario Geral, nia sei hatutan ba nia oan no bei-oan. Ne’e duni, iha estrutura partido nian, se mak eleito ba cargo ida ... ninia fatin ne’e iha ona herdeiro (pewaris tahta). To’o ohin loron, conflito barak hatudu de’it violência no massacre, tan “família” sira iha partido laran lakohi lakon “uma”. Democracia iha Árabe tuir Dr. Twal nia hanoin: simu de’it resultado wainhira manan. Basa, wainhira lakon sira sente hanesan fali “a pervassive sense of cosmic homelessness”, katak, iha moris tomak hau sente hanesan uma la iha, fatin la iha ka moris todan. Idéia ida ne’e mos hetan suporta husi Tunísia, Morocco no liu-liu Lybia.

Tuir mai (2), hanesan iha Filipinas, la iha partido político tuir conceito moderno. Iha de’it “clan”. Ne’e duni, se mak sai candidato ba Senador ka Deputado, mai husi suku (= etnolinguistico) no “reinado” (lura’an). Importante atu ita hare, katak etnolinguistico (língua materna) sai hanesan sasukat ba identidade politica – ba partido no ba candidatura. Hanesan Rene Sarmiento – comissário husi Filipina nian – haktuir katak the Philippines Comission on Election hato’o ona proposta ba Parlamento no Supreme Court atu hamosu “Bill” ida hodi halakon tiha “clan of politics” iha sira nia rain. Maibe, difisil oituan tan Filipina moris tuir sira nia “língua materna” nebe hametin de’it “isolamento político” husi etnolinguistico dominante no elimina neneik suku sira nebe nia língua materna sei minoria ka hela iha periferia politica.

Nune’e mos (3), Árabe sira (hanesan mos Filipinas), partido político no candidato sira iha rasik sira nia “milícia” (grupo armado) atu assegura “vitoria”. Rungu ranga nebe mosu iha Egipto, Suriah, Yemen no Lybia hatudu de’it katak estado labele controla kilat, tan político na’in sira mos “fahe kilat” atu ameasa “eleitor” (votante). Nação sira nebe adora democracia mak sai ona “democrazy”. Tan sira defende democracia, maibe sira nia nação mos fa’an kilat atu partido/ regime ditadura kaer hodi tiru malu fali. Caso Suriah sai hanesan exemplo. To’o ohin loron la hetan solução, tan la iha condição atu halo eleição. Sei la iha solução, karik. Iha caso ida ne’e, Timor Leste sai duni “espelho”. Iha 1999, Timor Leste hala’o referendum. Maski ninia resultado hamosu sofrimento barak to’o sai akudesan, maibe iha duni processo democrática atu hetan legalidade no legitimidade. Iha 2006, mosu duni crise politica partidária to’o militar, maibe resolve ho dalan rasik. Comissário husi Timor Leste hatudu processo ne’e, no ba Árabe ... historia ne’e furak tebes atu tama iha fantasia “1001 malam”. Maski nune’e, comissário sira husi Árabe (liu-liu Lybia) hare katak Timor Leste “furak demais” atu bele lori ba Árabe.

Ikus liu (4), tan partido barak liu, no fahe “cadeira” la to’o. Confusão sai boot liu tan wainhira constituição la iha. Ne’e duni, Presidente do Partdio ka Secretario Geral partido nian mak sai tiha hanesan encarnação husi constituição no lei. Sira monta ema nebe sira confia, tau fiar atu kaer “pasta” executivo nian, maski la iha capacidade. Conflito hahu mosu, wainhira ema balun nebe iha capacidade maibe “parkir” hela iha liur. Nune’e sira la tulun malu atu harii estado.

Timor Leste hatudu parte ida nebe interessante ba participante sira. Katak, iha Timor Leste – nação ki’ik no ki’ak – maibe riku tebes ho ema nebe hakarak hari’i partido. Atu to’o ba eleição, partido de’it hamutuk 26, ba eleitor hamutuk 600.000 resin. Ne’e la’os ona “democracy”, maibe bele mos “democrazy”. Husi biban seluk, povo Timor Leste hatene oinsa mak hasoru “democrazy” liu husi “democracy”: resistência moral. Simplesmente, povo baruk no kolen atu halo violência bebeik.

*) Hakerek-na’in, comissário CNE representante Igreja Católica, comitê ba EDUCAÇÃO ELEITORAL, delegado ba conferencia iha Mongólia.