Prezidente Republika Kestiona MDSN no Maun Alin iha Membros V Governo Konstitusional

         * CNRT  deskontente konaba posisaun Independentes iha Governu

Dili. Forum Haksesuk (FH). V Governu Konstitusional ne’ebe sei toma pose iha loron 08 Fulan Agosto tinan 2012 lidera husi PM Kay Rala Xanana Gusmao, entrega ona ba Prezidente Republika lista kompletu membrus Governu iha segunda-feira (06/08/2012) iha Palacio Aitarak Laran Dili.

Tuir Jornal Timor Post katak, ”iha biban ne’eba mos Prezidente Republika kestiona konaba Ministerio Defesa no Seguransa Nacional (MDSN) ne’ebe lidera husi Maria Domingas Fernanades Alves alias "Micato". Tuir mos informasaun ne’ebe mak FH hetan husi Palacio Aitarak Laran katak, ”Prezidente Republika mos kestiona konaba Maun alin mak okupa fatin barak liu iha Ministerius balun”.

Listas V Governu Konstitusional,iha maun alin sira ne’ebe okupa fatin iha pastas Ministerius mak: Emilia Pires, nudar Ministra Finacas no Alfredo Pires, nudar Ministru Enerjetiku no Rekursus Naturais, José Luis Guterres, nudar Ministro Estadu Negosiu Estranjeiru no Isabel Guterres, nudar Ministra Solidariedade, Pedro Lay, nudar Ministro Transporte no Komunikasaun no Francisco Kalbuady Lay nudar Ministro Turismu.

    

CNRT kestiona Independente

Husi parte Partidu CNRT mos kestiona konaba membrus Governu mai husi ema independente, hakerek Jornal Independente iha edisaun Tersa-Feira (07/08/2012), ”Lider CNRT balun deskontente ho Dezisaun Xanana”. Tuir membru Komisaun Politika Nasional (KPN), Maria da Camara Bisoi haktuir ba Jornal Independente, ”nudar pessoal, ladun kontente ema independente ne’ebe barak mak tur iha estrutura Governu”. Hatutan, ”figura balun halo ita tensaun sae, tanba nia ba tur iha governu nia familia mak halo demostrasaun hasoru governu”, tenik Bisoi.

Membrus Governu Independentes mak:

Emilia Pires nudar Ministra Financas, Pedro Lay nudar Ministru Transporte no Telekomunikasaun, Isabel Guterres nudar Ministra Solidariedade, Maria Domingas Fernandes Alves nudar Ministra Defesa no Seguranca, Avelinho Coelho nudar Sekretariu Estadu Konseilu Ministru, Santina Cardoso nudar Vice Ministra Financas no Roberto Soares nudar Sektretariu Estadu ba ASEAN.

Fonte: Timor Post no Jornal Independente, edisaun  tersa feira, 07/08/2012,pajs.1!