VISAO MISAO OBJECTIVO SPORTIMOR FH KKN HOME FH LPV ARTIGOS FH MUZIKA LIA MENON FH RESPONDE

quinta-feira, 9 de agosto de 2012

Perspektiva Teorétiku Ida Kona-bá Intelijênsia, Oinsá ho Serviço Naçional de Inteligência (SNI) Timor-Leste?


Francisco Lemos Dos Santos
Hakerek-nain artigo ne'e
Hela Fatin: Suco Motaulun, Sub Distrito Bazartete, Liquica

Iha mundu intelijênsia nian, iha prosessu importante balun ne’ebé estadu no komunidade intelijênsia tenki tau iha konsiderasaun bainhira estabelese sistema intelijênsia ida. Objektivu husi artigu ne’e hodi kontribui perspektiva teorétiku balun kona-bá oinsá estabelese sistema ida diak.Hakerek-nain mos sei kontextualiza teoria sira ne’e iha situasaun Timor-Leste nian liliu kona-bá Serviço Naçional de Inteligênsia (SNI). Maibé, diskusaun iha artigu ne’e sei ladiskuti ho kle’an liu kona-bá SNI tan iha razaun prinsipál rua. Ida, SNI nudar komunidade intelijênsia ne’ebé nia lala’ok tenki segredu, bainhira segredu divulgadu entaun bele kompromete SNI-nia servisu. Rua, ho natureza servisu SNI ne’ebé segredu, hakerek-nain labele sai fali si’ik-nain ida oinsá agênsia ne’e hala’o nia knaar. Tan ne’e, artigu ne’e sei uza teoria intelijênsia balu hodi halo ligasaun deit ba iha Decreto Lei No.3/2009 de 15 de Janeiro, Serviço Naçional de Inteligência.

Definisaun Intelijênsia no SNI

Iha hakerek barak tebes ona kona-bá mundu intelijênsia, maibé, hakerek sira ne’e hotu hetan difikuldade boot hamosu definisaun intelijênsia ida komun ka universal iha mundu ne’e. Tan ne’e, la’os nudar supreza ida bainhira iha definisaun oioin. Hahu husi komunidade intelijênsia sira ne’ebé iha sistema sofistikadu hanesan Mossad, Central Intelligence Agency, MI5 no selukseluktan sempre hamosu nosaun oioin kona-bá sadeit mak konstitui intelijênsia.  

Dahuluk,definisaun intelijênsia ne’e dalaruma refere ba informasaun. Bainhira ita tenta defini intelijênsia egual informasaun, entaun, laiha diferensa entre intelijênsia no sentru informasaun sira seluk hanesan media. Konseitu ne’e laiha klareza, tan ne’e susar atu bele kondus servisu estadu nian.

Daruak, intelijênsia mos, dalaruma defini nudar servisu segredu ida ka servisu klandestina ida. Definisaun nune’e ignora tiha estratejia inteligênsia ne’ebé bele mos hetan informasaun husi open source ka media.
Bainhira hamosu definisaun inteligênsia=informasaun=segredu, ne’e haluha tiha konseitu seluk ne’ebé dehan katak inteligênsia ne’e mos produtu ida no organizasaun ida. Karik nune’e, sadeit mak sai nudar nosaun inteligênsia ida diak ne’ebé kaer ka kapta elementu prinsipál sira ne’e?

Iha literatura barak ona kona-bá intelijênsia, maibé iha artigu ne’e, hakerek-nain hakarak sita deit definisaun ida husi Michael Warner, nia hakerek barak ona kona-bá servisu ne’e. Iha nia-hakerek ida ho títlu: Wanted: A definion of Intelligence, nia defini intelijênsia nudar:

Intelligence is the process by which specific types of information important to national security are requested, collected, analysed and provided to policy makers; the products of that process; the safeguarding of these processes and the information by counterintelligence activities; and the carrying out of operations as requested by lawful authorities”. Tradusaun: intelijênsia ne’e prosessu oinsá informasaun espesífiku ruma kona-bá seguransa nasionál ne’e hetan, analiza no hato’o ba autoridade sira; no produtu husi prosessu ne’e; salvaguarda prosessu sira ne’e no informasaun kona-bá aktividade kontra-inteligênsia; no hala’o operasaun tuir pedidu husi autoridade legítimu/legal sira”,

Definisaun ne’e konsege ona kaer elementu prinsipál tolu kona-bá intelijênsia; intelijênsia nudar prosessu, nudar produtu, nudar organizasaun. Definisaun ne’e tau ênfaze maka’as ba termu ida “informasaun espesífiku ka specific information”, tan atu hetan informasaun ida ho karákter nune’e tenki liu husi dalan, karik nesesáriu, klandestina ka segredu. Intelijênsia hala’o operasaun ho maneira rua covert no overt, nemak halo servisu ne’e diferente ho servisu organizasaun sira seluk hanesan media ka sentru informasaun ka institutu peskiza babain sira.

Iha Decreto Lei No.3/2009/Lei SNI estabelese ona karákter no nosaun oioin kona-bá SNI ne’e saida no sadeit mak SNI sei hala’o. Iha Artigo 2 Natureza  SNI ne’e “um serviço personalizado do estado”, Artigo 3 Atribuição dehan SNI ne’e “o único organismo incumbido da produção de informaçoes...”. Artigu rua ne’e estabelese ona SNI nudar organizasaun úniku tan nia halo servisu ho dalan klandestina, no iha Artigo 5 Competência Material dehan SNI ne’e iha knaar ”promover de forma sistemática a pesquisa, recolha, análise, interpretação e conservação de informações e de dados”. Lei ne’e, jeralmente hatúr ona konseitu báziku kona-bá komunidade intelijênsia SNI nian. Parte ne’e koalia ona kona-bá saida mak servisu intelijênsia, maibé oinsá hala’o servisu ne’e?

 Siklu Intelijênsia

Servisu intelijênsia nian babain ema hanaran siklu intelijênsia ka intelligence cycle. Servisu ne’e ho naran nune’e tan iha intelijênsia sempre no tenki iha interaksaun lakotu entre elementu oioin atu bele hetan evaluasaun ka assessment  ka estimate final molok hato’o ba autoridade sira ka iha termu tékniku bolu “customer” iha siklu ne’e. Modelu siklu hanesan tuir mai ne’e:
Dahuluk, planeamentu ka nesessidade. Iha faze dahuluk ne’e, estadu mak deside objektivu ka informasaun sadeit mak ajenti intelijênsia sira tenki ba buka. Iha parte ne’e, importante tebes atu nota katak orgaun estadu sira mak deside interese estratéjiku, katak, intelijênsia atu ba buka saidá. Iha parte ne’e, tenki defini duni interese estratéjiku nasional, maibé, esperiênsia rai balu hatudu katak iha parte ne’e bele iha tendênsia atu hatúr interese partidária ka individual. Ne’e duni, tenki iha orgaun komun ba servisu intelijênsia tomak, hodi fó espasu ba kada autoridade prinsipál husi kada servisu intelijênsia hodi defini hamutuk interese estratéjiku ka nesessidades. Atu nune’e labele hamosu monopoli husi autoridade ida ba servisu intelijênsia no bele hamosu nesessidade komun. Karik lae, bele hamosu duplikasaun, kompetisaun, konfuzaun iha servisu husi kada organizasaun intelijênsia. Tuir Artigu 5 parte (c), Dekretu Lei SNI, haktuir katak:” elaborar estudos e preparar documentos de acordo com as orientações do Prime Ministro”. Ne’e katak, tuir interpretasaun hakerek-nain, Primeiru Ministru mak defini nesessidade ka informasaun sadeit mak SNI tenki buka hodi ajuda governu foti dezisaun ka aksaun ruma. Maibé, iha Lei Defeza no Seguransa No.2/2010 temi ona kona-bá Sistema de Informações Militar (SIM)no Servisu Informasaun Polísia (SIP). Tan iha ona komunidade intelijênsia tolu iha Timor-Leste, presiza tebes atu kria liña kordenasaun no komunikasaun ne’ebé klaru entre organizasaun sira ne’e. Artigu 28 husi Lei Defeza no Seguransa hatúr ona Commissão Inteministerial De Seguransa, Komisaun ne’e bele hala’o papel nudar autoridade ne’ebé estabelese interese ka nesessidade estadu ba komunidate SNI, SIM no SIP. Experiênsia hatudu ona katak bainhira iha komunidade intelijênsia oioin bele hamosu inkoerênsia. Ezemplu, tuir relatóriu husi The 9/11 Commission, razaun grupu terrorista sira konsege lansa ataka boot iha 11 Setembru 2001 iha Estadus Unidos Amérika, entre razaun seluk, tan deit inkoerênsia servisu, kompetisaun no konfuzaun entre komunidade intelijênsia Amérika nian, tan laiha liña komunikasaun ne’ebé klaru, entaun, bele adia autoridade sira foti aksaun preventiva ruma. 

Daruak, kolesaun ka collection. Iha parte ne’e tama ona ba territóriu intelijênsia nian, katak, komunidade ne’e rasik mak hatene oinsá atu atinji objektivu  oinsá atu hetan informasaun espesífiku ne’ebé estadu hakarak hetan hodi ajuda estadu foti desizaun ka aksaun ruma. Iha aproximasaun oioin ne’ebé intelijênsia uza hodi hetan informasaun espesífiku sira ne’e hanesan ho dalan: nakloke ka open (ka hetan informasaun husi media, intrevista), covert ka klandestina, elektróniku no husi satélite. Atu halo collection ba informasaun bele hetan husi Human Intelligence (HUMINT), katak ema mak ba halo operasaun sira terrenu hodi hetan informasaun espesífiku sira, no husi SIGINT (Signal Intelligence), katak informasaun sira ne’e hetan husi interseptasaun telefone, email, no bele hetan husi vijilânsia ka surveillance satélite. Lei SNI latemi ho klaru kona-bá devizaun HUMINT no SIGINT, nomos laiha klareza kona-bá bele ka lae SNI bele halo intersepsaun telefoni no email. Lei ne’e mos tenki han-malu ho lei kódigu penal no sivil Timor-Leste. Servisu klandestina hamosu ona debate maka’as iha mundu, tan aproximasaun ida halo intersepsaun hamosu implikasaun boot kona-bá akuntabilidade, transparánsia, no privasidade ema nian. Grupu terrorista, mafiozu no seluktan uza ona teknolojia modernu hodi fasilita sira nia servisu estabelese rede no halo operasaun oioin. Entaun debate ne’e hamosu dilemma boot ba orgaun estadu. Tan ne’e, maski foin hahu, governu tenki iha planu fó formasaun espesial ida ba ajente sira oinsá utiliza teknolojia modernu sira ne’e. Presiza mos debate ida kle’an kona-bá norma prinsipál demokrasia nian versus servisu intelijênsia liliu servisu rai-okos ka klandestina nian.

Datoluk, Prosessamentu. Babain, iha informasaun ka dadus barak tebes mak tama husi ajente sira iha terrenu ka husi SIGINT, tan ne’e, susar tebes atu autoridade sira sani/lê dadus ka informasaun sira ne’e tomak, entaun, ne’e mos bele hamosu konfuzaun ba autoridade sira. Tan ne’e, iha parte prosessamentu iha siklu intelijênsia, informasaun ka dadus sira ne’e sei tau iha formatu ne’ebé fasil atu bele kompriende.

Hafoin tau tiha iha formatu simples, parte dahaat mak análiza. Iha parte análiza ne’e, parte ida ne’ebé defisil tebes, tan bele iha problema rua. Ida, analista sira bele koa sai tiha informasaun importante balu ne’ebé ajente sira passa mai ne’e, entaun, bele hamosu analiza ida ne’ebé lakredível ka duvidozu. Atu labele hamosu problema nune’e, babain parte análiza husu tan parte collection no processing hodi buka tan informasaun ka dadus hodi bele kompleta análiza ne’e.

Diseminasaun mak parte ikus iha siklu servisu intelijênsia. Hafoin analiza tiha informasaun ka dadus sira ne’e, parte ikus mak hato’o informasaun rezultadu análiza ne’e ba autoridade ne’ebé defini tiha nesessidade sira ne’e. Produtu final ne’e mak hamosu buat tuir sistema Amérika hanaran Intelligence Estimate, ka iha sistema Austrália bolu Intelligence Assesment.  Iha parte ne’e, depende ba seriedade, urjênsia informasaun ne’e, tenki iha klassifikasaun ba kada informasaun ne’ebé hato’o ba makaer-ukun sira. Iha parte klassifikasaun ne’e fasil bainhira dadus ne’e kuantitativu, katak iha ona númeru klaru. Maibé, dadus ka informasaun ne’e kualitativu, susar tebes atu fó klassifikasaun relevante.

Lian-ikus, servisu intelijênsia ne’e buat ida defísil tebes. Defísil tan servisu ne’e bele hamosu risku ba vida ajente sira bainhira sira halo operasaun iha terrenu tan sira-nia prezensa ka operasaun bele komprometidu, risku tan bele kria intelligence assessment/estimate ida ne’ebé exajeradu no mukit. Tan ne’e, servisu komunidade ne’e nian la’os hu-tun-hu-sae deit, maibé servisu ida tenki iha koñesimentu tékniku kle’an. Maibé, tenki iha mos koñesimentu oinsá halo kontra-intelijênsia, atu to’o iha ne’ebá tenki hatene ho kle’an lala’ok servisu intelijênsia etranjeira sira. Tenki iha formasaun espesífiku ba servisu ne’e, treina hatoman ajente sira ho senáriu oioin ba kada prosessu iha siklu intelijênsia.

                                       *Hakerek-nain:                                             
Lisensiadu iha Siênsia Polítika husi Universidade Flinders Austrália, Mestradu iha Diplomasia, Mestradu iha Assuntu Estratéjiku/Defeza husi Universidade Nasional Austrália.Kontribuinte Ativu ba Dili Institute of Strategic and International Studies:  www.disis-tl.org Artigu ne’e opiniaun pessoal, lareflekta pozisaun sedeit ka fatin ne’ebé hakerek-nain haknaar-an ba!

Sem comentários:

Enviar um comentário

Nota: só um membro deste blogue pode publicar um comentário.