Apaga husi Lista, Micato exije PR Taur esklarece, hakerek Jornal Independente

Dili. Hafoin Prezidente Republika kestiona konaba abilidade Maria Domingas  Alves Fernandes alias Micato nian, wainhira PM Kay Rala Xanana Gusmao apresenta lista V Governu Konstitusional, iha Palacio Prezidensial, Aitarak Laran, Dili, Segunda-Feira (06/08/2012). Tamba PM Kay Rala Xanana Gusmao, apaga Micato nia naran husi Lista V Governu Konstitusional. 

Hatan ba ida ne’e, Maria Domingas Fernandes Alves, deklarasaun ba Jornal Independente, ”husu atu Prezidente Republika esplika  ba publiku konaba kestaun abilidade hodi hasai nia husi lista estrutura V Governu Konstitusional nudar Ministra Defesa no Seguransa Nasional (MDSN)”, hakerek Jornal Independente, edisaun Quinta-Feira (09/08/2012, pajs.1 e 20). 

“Hafoin PM aprezenta lista proposta ne’e ba Prezidente Republika rezeita no kestiona hau nia abilidade, PM telephone hau dehan labele konvence Prezidente Republika, nune’e husu hau assume fila fali Ministra Solidariedade maibe hau rezeita tanba kadeira ne’e Sra. Isabel Guterres mak assume”, dehan Micato ba Jornal Independente, Quarta-Feira (08/08/2012). 

“Hau husu ba Sr. Kay Rala Xanana Gusmao ho Prezidente Republika  Taur Matan Ruak hodi esklarece ba publiku konaba abilidade  ne’ebe Prezidente Republika kestiona hodi hasai hau husi (lista estrutura V Governu Konstitusional) nudar Ministra Defesa no Seguransa Nasional (MDSN)”, kestiona ba Independente. 

“Micato konsidere kestaun abilidade ladun klaru e nakonu ho deskriminativu. Dehan abilidade ne’e kompara hau ho se? ou kestiona hau tanba buat seluk tan? tanba feto ka hau labele salva guarda interese  estadu nian”, haktuir Micato. 

Micato haktuir, durante sei assume kargu Ministra Solidariedade Sosial, nia hola parte ona iha membru Konseilu Estadu  hodi resolve problema deslokadus, kombatentes libertasaun nasional no seluk tan.

“Ka hau nia konviksaun ne’e FRETILIN, hau resolve IDPS, halo edificiu foun no halo jestaun diak, ministru defeza ne’e laos tenke ema military, ministru ne’e atu halo jestaun”, kestiona eis-Ministra Solidariedade Sosial ne’e.

Hatutan Micato, ”decisaun ikus Prezidente Republika ho PM tenki esklarece ba Publiku hodi povu tomak hatene, tanba hau feto labele halo pembunuhan karakter, ne’e diskriminasaun Estadu kontra CEDAW no Konstituisaun RDTL rasik”. 

"Tuir lolos Prezidente Republika asegura  demokrasia hodi kaer metin igualdade  ba partisipasaun feto no mane iha politika”. 

“Hau rezeita deklarasaun Prezidente Republika, hau iha kompania barak hodi bele dezenvolve rai ne’e, hau sakrifika an desde resistensia hodi servi povu, laos tenki sai membru governu”, hateten Micato ho Fiar an, hakerek Jornal Independente.

Lolos Micato pronto sai membru Governu tanba PM rasik mak kontaktu bainhira  partisipa hela serimonia inagurasaun iha distritu, laos nia parte  mak husu kargu iha Governu.

“Hau laos otonomista ka kriminozo mak bele ataka iha publiku, hau feto Timor, feto kombatente, hau rezeita hahalok ne’e”, lamenta Micato, hakerek Jornal Independente.

Prezidente Republika fó pose ba membru V Governu Konstitusional, unika la marka presensa mak Mica no Cirilio Cristovao ne’ebe mak atu troka mos la toma pose. Tuir Jornal Nacional Diário (JND) edisaun Quinta-Feira (09/08/2012, pajs.1  e 15)  katak, ”PM Kay Rala Xanana Gusmao mak sei kaer knar nafatin nudar Ministru Defesa no Seguransa Nasional (MDSN)”.

Fontes:

Jornal Independente, edisaun Quinta-Feira (1 e 20) e Jornal Nacional Diário (JND) pajs.1 e 15!

Informasaun seluk relasionados iha FH:

1. Grupo Parlamentar Feto lamenta hasai Micato http://forum-haksesuk.blogspot.com/2012/08/grupo-parlamentar-feto-lamenta-hasai.html
2. Diskriminasaun Feto: Deklarasaun Movimentu Feto Timor-Leste http://www.forum-haksesuk.blogspot.com/2012/08/diskriminasaun-feto-deklarasaun.html
3. Micato Rekusa Kargu MS no Isabel Nafatin, Salva maun Alin Lay no Pires iha lista V Governu Konstitusional http://www.forum-haksesuk.blogspot.com/2012/08/micato-rekusa-kargu-ms-no-isabel-nafatin.html
4. Prezidente Republika Kestiona MDSN no Maun Alin iha Membros V Governo Konstitusional * CNRT  deskontente konaba posisaun Independentes iha Governu http://www.forum-haksesuk.blogspot.com/2012/08/prezidente-republika-kestiona-mdsn-no.html