Grupo Parlamentar Feto lamenta hasai Micato

Dili. Forum Haksesuk (FH). Deklarasaun Prezidente Republika nian konaba, abilidade Maria Domingas Fernandes Alves alias Micato hodi kaer kargu nudar Ministra Defesa no Seguranca Nasional (MDSN) wainhira PM Kay Rala Gusmao apresenta lista V Governu Konstitusional ba Prezidente Republika iha Palacio Aitarak Laran, Dili, Segunda-Feira (06/08/2012). Deklarasaun Prezidente Republika nian ne’e publika iha media no hetan kedan reasaun husi movimentu Feto Timor-Leste ne’ebe  la satisfeitu no klasifika deklarasaun ne’e hanesan: “Deskriminasaun ba Feto (FH,08/08/2012)”.

Grupo Parlamentar Feto (GPF) mos la simu ho deklarasaun Prezidente Republika nian no lamenta tamba konsidere nudar deskriminasaun ba Feto Timor oan. Tuir koordenadora GPF ba Jornal Timor Post (TP) edisaun Quinta-Feira (09/08/2012, pajs.1 e 23) katak, ”tamba saida mak ita hanoin ida hanesan ne’e. Sé karik dehan backround military, tansa maka iha inisiu la hanoin kedas. Agora foti tiha nia (Micato) asumi pasta ba Ministra Defesa no Seguransa Nasional (MDSN), depois hasai tan fali. Hanesan feto lamenta tebe-tebes tanba hamate espiritu partisipasaun feto”, lia hirak ne’e kasu husi Josefa Pereira nudar Prezidente cesante GPF, quarta-feira (08/08/2012) iha uma Fukun Parlamentu Nasional (UFPN).

Hatutan tan Josefa Pereira, ”husik tok ba Ministra Micato bele asumi lai responsabilidade ba MDSN atu ita hare lai quando la iha mudansa maka foin bele fó  komentariu”. Tenik tan Josefa, ”ema barak  ladun konese  nia (Micato) relasiona ho kargu  Defeza nian tanba sira hanoin kardu Defeza no Seguransa ne’e sensitivu liu atu halo ninia implementasaun”.

“Agora komandante Jeral Longinhos Monteiro mós laos  backraund military no la liu tan academia military ne’e. Tanba ne’e ne’e, nusa tenki kestiona  Sra. Micato”, argument Josefa Pereira, deputada husi Bancada Fretilin. 

Josefa Pereira hateten tan, ”ita hakarak promove feto liu husi dalan sira ne’e, maibé nia (Micato) seidauk ba asumi responsabilidade, ita kestiona tiha uluk ona. Ne’e la los, hakerek Timor Post. “Iha tinan lima, PM fó fiar ba nia hodi resolve promblemas refujiadus ka IPD’s nudar Ministra Solidariedade  Sosial, ho sucesu resolve problema refujiadus rihun ba rihun iha governasaun AMP nian”, haktuir Josefa Pereira.

Iha fatin hanesan, deputada Angela Corvelho Sarmento, husi bankada CNRT, ”reforsa  liu tan katak labele  kestiona ho feto ninia kapasidade tanba feto mós bele asumi pasta iha Ministériu Defeza no Seguransa”. “Tanba hare ba esperiensia rai barak, feto iha kapasidade tuur hanesan Prezidente, Primeiru-Ministru no Prezidente Parlamento”, tenik Angela tuir Jornal Timor Post.

Tuir informasaun ne’ebe mak Jornal Nacional Diário (JND) hakerek katak, ”PM Kay Rala Xanana Gusmao mak sei asumi nafatin kargu nudar MDSN”, hakerek JND, edisaun Quinta-feira (pajs.1  15)".

Tuir matenek nain Timor oan balun, lakohi dehan naran katak, ”Micato ba MDSN ne’e imajen diak ba Timor-Leste iha mundu tanba feto ida mak kaer instituisaun Defesa no Seguransa”. Tenik tan,”Se Micato PR la simu, hatudu imajen ladiak  Timor-Leste nian iha Mundo, tamba Timor-Leste rasik ratifika konvensoens Internasionais nian konaba luta jender CEDAW no membru board rasik”!

Fontes:

Timor Post (pajs.1 e 23) e JND (pajs. 1 e 15)!

Informasaun seluk relasionados iha FH:

1. Diskriminasaun Feto: Deklarasaun Movimentu Feto Timor-Leste http://www.forum-haksesuk.blogspot.com/2012/08/diskriminasaun-feto-deklarasaun.html
2. Micato Rekusa Kargu MS no Isabel Nafatin. Salva maun Alin Lay no Pires iha lista V Governu Konstitusional http://www.forum-haksesuk.blogspot.com/2012/08/micato-rekusa-kargu-ms-no-isabel-nafatin.html
3. Prezidente Republika Kestiona MDSN no Maun Alin iha Membros V Governo Konstitusional * CNRT  deskontente konaba posisaun Independentes iha Governu. http://www.forum-haksesuk.blogspot.com/2012/08/prezidente-republika-kestiona-mdsn-no.html