VISAO MISAO OBJECTIVO SPORTIMOR FH KKN HOME FH LPV ARTIGOS FH MUZIKA LIA MENON FH RESPONDE

segunda-feira, 9 de julho de 2012

FESTA DEMOKRASIA HOTU ONA: SA IDA MAK ITA ATU HALO?


FESTA DEMOKRASIA HOTU ONA: SA IDA MAK ITA ATU HALO?

* Estanislau S. Saldanha, Staf Hanorin DIT

Ba sira nebee manan iha festa demokrasia, nee hanesan fiar ida husi povu tomak nian inklui mos sira nebee moris mukit, kiak ho halerik ho espetativas boot katak rezultadu festa demokrasia nee bele tulun muda sira nia moris ba diak. Nunee manandor sira tenki tanee as fiar sira nee, no halo planu ho asaun konkretu atu halao hodi “hamaran duni povu mukit ho halerik nain sira nian mataben, no muda sira nia moris ba “hamnasa” ho diak. Promesa sira nebee hatoo ona iha “festa laran” presiza reformula, tradus ho integra iha planu, programa, estrategia ho asaun riil hodi implementa duni. Maske nunee, planu ho programa diak presiza mos ema diak, kompetenti, neon mos, sensivu ho servisu tim nudar “serbidor” hodi halao ho diak no efetivu.

Ba sira nebee manan iha festa demokrasia, nee hanesan fiar ida husi povu tomak nian inklui mos sira nebee moris mukit, kiak ho halerik ho espetativas boot katak rezultadu festa demokrasia nee bele tulun muda sira nia moris ba diak. Nunee manandor sira tenki tanee as fiar sira nee, no halo planu ho asaun konkretu atu halao hodi “hamaran duni povu mukit ho halerik nain sira nian mataben, no muda sira nia moris ba “hamnasa” ho diak. Promesa sira nebee hatoo ona iha “festa laran” presiza reformula, tradus ho integra iha planu, programa, estrategia ho asaun riil hodi implementa duni. Maske nunee, planu ho programa diak presiza mos ema diak, kompetenti, neon mos, sensivu ho servisu tim nudar “serbidor” hodi halao ho diak no efetivu.

Kuaze fulan ida, Timor Leste tama iha festa demokrasia nebee simboliza husi kampanya partidu politiku sira iha teritoriu tomak. Iha festa nee, partidu politiku sira buka hatoo sira nia vantagen, hare husi lider, partidu ho programa hodi atrai povu hodi hili. Iha festa demokrasia nee mos movimente kareta ho ema makas. Mos mosu festa instan barak iha nivel familia, aldeia, suku, distritu ho too nasional. Karau, bibi, fahi ho manu barak mak “mate” hodi sustenta festa demokrasia nee. Kulmunizasaun husi festa demokrasia nee mak eleisaun jeral nebee halao iha 7 Juilu 2012 nebee lao diak ho hakmatek. Povu ho lider politiku sira hatudu nia maturidade politiku diak tebes. Ita hotu manan no povu hotu manan iha festa demokrasia nee. Nunee lisaun diak ida tan hodi hatudu ba mundu katak Timor Leste bele, no laos estadu failadu (failed state) ho demokrasia anarkismu. Nunee ita hotu merese hetan “aplaus ka basa liman” makas ho naruk, liu-liu ba ita nia povu mukit ho halerik nain sira iha area urbana ho area rural.

Maske rezultadu formal husi CNE/STAE seidauk hatoo maibe husi kontajen informal hatudu katak partidu boot tolu CNRT, Fretilin ho PD asegura ona nia fatin iha Parlamentu Nasional nudar “manandor” iha festa demokrasia Timor Leste nian. Nunee balu kontenti, ho hahu loke sampaina, maibe balu seluk fuan moras, stress, no toba la dukur. Buat sira nee hotu reazen normal, nudar “manandor” ho “lakondor”. Importante tebes kaer metin hanoin ida katak harii partidu politiku hodi serbii povu ho nasaun doben Timor Leste. Laos harii partidu politiku hodi buka kadeira ho riku deit, no serbii familia ho “kawan-kawan” ka grupu deit. Nunee sei halo ita elegante, laran luak no la eksesiva simu rezultadu festa demokrasia nee.

Lisaun boot ida husi governu Aliansa Maioria Parlamentar (AMP) nebee lao atu remata ona nia mandatu, forma husi situasaun ida kritiku, iha tempu nebee Timor Leste foin liu husi krizi 2006 ka sei iha krizi laran, no iha situasaun ida multi-partidariu, halo rekursu ho energia barak mak abzorve hodi responde ba krizi hanesan problema petisionariu, refugiadu ho simpton divizionismu boot hodi asegura unidade, estabilidade nasional ho implementasaun Timor Leste nudar nasaun direitu-demokratiku, no hamosu fali fiar katak Timor Leste ukun an nee loos ona, iha folin no povu tenki hetan dame, hamutuk ho moris diak. Governu tenki hamrik metin no la bele monu iha klaran. Governu AMP konsege responde duni ba nee, no susesu resolve buat barak hanesan temi iha nee. Nee mos tanba kontribuisaun kontinuada ho pozitivamente husi Fretilin nudar partidu opozisaun.

Maibe iha tempu hanesan mos governu AMP hasoru frazilidade konjuntur multi-partidariu iha sira nia laran, halo sira buka tane malu, la husik malu atu monu. Nunee problema esensial sira hanesan boa governasaun, efisiensia, efikas ho kombate korupsaun nebee Maun Boot Xanana promete iha eleisaun 2007 seidauk bele realiza diak. Mos agenda seluk hodi serbii interese povu nian hanesan edukasaun (kurikulu, fasilidade, kualidade mestri, lia hanorin, asesibilidade ho afordabilidade edukasaun nebee kualidade ba ema hotu), infrastrutura baziku (estrada, eletrisidade, bees mos, telekomunikasaun ho transporte publiku) ho desentralizasaun ho halao governasaun lokal ho poder lokal hodi asegura efetividade ho efikas servisu publiku ba interese povu nian.

Nunee importante tebes governu nebee forma husi festa demokrasia 2012 nee tenki diak, kompetenti, sensivu ho iha espiritu serbidor hodi rekonsolidiza rekursu ho energia tomak ba halo planu ho implementa planu diak, efetivu ho relevante hodi responde ba nesesidade povu nian. Partidu sira nebee tama atu kaer governu hodi kaer ukun tenki negosia figura hodi kaer governu, halo ho halao planu sira nee diak ho efetivu. La bele negosia hodi sustensa interese politika partidariu ho grupu elite deit, hodi ignora interese povu nian.

Ba sira nebee lakon, laos “rai naben ona”, “end of the world”, ka “kiamat”. Maibe simu nee elegante, laran luak ho konsidera hanesan “kemenangan tertunda”. Nunee buka investa, servisu makas tan, konsolidiza, no hakbesik an nafatin ba povu hodi hatene lo’loos sira nia hakarak ho halerik hodi tradus ba planu ho programa. Tanba lakon agora, bele manan aban bainrua, no manan agora bele lakon fali aban bainrua. Nee normal, demokrasia nian lalaok mak nee, ita hotu tenki simu, no hatama aan iha “mainan” demokrasia nee. Importante mos iha vida politika partidariu ho liga ho politik ukun, la iha ida “instan” ka lais, maibe via prosesu ida naruk, investa makas hodi ema hatene “vantajen komparativu ho kompetetivu, kbiit tranformador”, onestidade ho integridade moral atu simu naha todan ho halerik povu nian hodi muda ba diak. Nunee povu bele hatene ho tau fiar tanba sira konsidera imi bele, nunee sira bele konsidera hodi hili iha festa demoraksia sira tuir mai (tinan 2017).

Maske lakon, imi nia papel sei importante nafatin, mak tulun hodi hatoo hanoin, buka serbii tuir imi ida-idak nia kapasidade ho area, la presiza tama iha governu deit, hamutuk hodi tulun pusa agenda krusial: too ona, “basta”, “cukup” ka “enough” ba mataben, halerik ho moris mukit, violensia, ran suli, ho “mate aforsadu” (meninggal karena terpaksa). Too ona tempu hodi hametin demokrasia, ho haburas dezenvolvimentu iha Timor Leste hodi asegura estabilidade ho unidade nasional laran, sein sakrifika espiritu moris pluralismu; no komunga idea uniku: lori povu ho rai Timor Leste ba diak nebee povu moris hakmatek no prosperu”.

Ba povu Timor Leste, festa hotu ona, ita hotu fila ba vida normal, halao ita nia atividade rutina. Ba agrikultor sira fila ba servisu fatin, no buka sai agrikultor diak no sein dependenti ba ema seluk. Ba estudante sira fila ba eskola ho estuda didiak, buka sai estudante diak liu hotu. Ba funsionariu sira, fila ba servisu fatin, no buka sai servidor diak ida, ba ukun nain sira, nebee fila ba ukun, buka atu ukun didiak, hodi halo povu nebee halerik sai hamnsa.

Mai ita hotu hamutuk kaer liman, tane Timor Leste. Ita hamutuk hadia produtividade, kompetividade Timor Leste nian, no buka gradualmente hodi hakotu dependensia Timor Leste iha kualker forma, no buka Timor oan orguilu nudar, ema Timor oan, nebee hamrik metin iha nia rain, kultura ho identidade rasik. Hamutuk ita bele, ka hamutuk ita fiar aan, lao ba oin, hanesan belun partidu politiku sira balu nia “slogan” iha festa demokrasia nebee foin hotu no nia “tenda ita hahu atu sobu”. Timor Leste bele. ***

Sem comentários:

Enviar um comentário

Nota: só um membro deste blogue pode publicar um comentário.