Susesus 10 Nudar K’bit ba Xanana Atu Ukun Hikas iha 2012-2017

Husi: Jose Maria Guterres “Sukay”*

Kampanha Eleisaun Parlamentar remata ona iha loron 4/7/2012 horseik. Durante periodu kampanha eleitoral partidus politikus no koligasoens partidarias hato’o ida-idak ninia programas politikas wainhira ka’er governasaun ba periodu politika 2012-2017. Opsoens politikas 21 (partidus politikus no koligasoens partidarias) nudar instrumentus politikas atu povu fo’o fiar iha 7 Julhu 2012, sei hetan validasaun wainhira Tribunal Rekursu publika forsa politika nebe’e mak sei sai vensedor iha eleisaun parlamentar ne’e.

Hase’es-an husi intereses hotu, bazeia ba partisipasaun massa iha kampanha eleitoral ba eleisaun parlamentar 2012-2017, Hakerek’nain koko halo prediksaun politika ida katak sei mosu partidus ne’en mak sai nudar “enam besar”. Partidus hirak ne’e mak: CNRT, Fretilin, PD, KHUNTO, PDN no UDT.

Hakerek’nain halo prediksaun katak CNRT mak sei sai vensedor ba eleisaun parlametar 2012 ho razoens ka susesus 10 tuir mai ne’e:

Ida, solididade governasaun Aliansa Mayoria Parlamentar (AMP)

Iha governasaun modernu nebe agora dadaun nasaun barak adopta ba formasaun koligasaun ida ke forte, duru no to’o rohan, tuir matenek nain sira: presiza minimu partidu rua ka masimu partidu tolu  hodi asegura governu ida ukun to’o rohan. Maibe iha pratika rezultadu hatudu kontrariu. Iha nasaun balun maske koligasaun forma husi partidu rua to’o tolu maibe nia ukun la to’o rohan no monu deit iha dalan klaran tamba iha intereses no diversoens nebe’e la hanesan ka la kona malu. Exemplu, iha Japaun iha deit fulan rua nia laran, posizaun Primeiro Ministru bele troka to’o dala ha’at. Kazu hanesan akontese mos iha Fiji no nasaun Asia Pacific sira seluk. Maibe ba Timor-Leste iha exepsaun ba kontekstu koligasaun ba formasaun governu. Imajina, koligasaun AMP forma husi partidu lima nebe’e mai ho hanoin, hakarak no intereses keta-ketak maibe Xanana konsege lori koligasaun ne’e  to’o ba rohan. Signifika, Xanana iha karakter lideransa ida ke forte, duru no persistente. Maske rekonhese Timor-Leste iha frazilidade nia laran maibe Xanana bele jere no halo balansu ho diak. 

Rua , Establidade

Ita hotu hatene krizi Politika-Militar 2006 rezulta ema lubun lakon sira nia vida, uma barak hetan sunu ka ema barak lakon nia propridades pesoal. Krizi refere hamosu instablidade iha fatin barak, li-liu iha Cidade Dili, tamba jovens barak maka buka baku malu, tuda malu to’o oho malu. Ho krizi nebe akontese, Komunidade Internasional no Nasoens Unidas (UN) ho lian makas kondena Timor-Leste hanesan nasaun “Falhadu” (fail state) ou bele dehan nasaun nebe laiha futuru. Maibe komesa husi 2007  mai oin, wainhira Xanana Gusmao ka’er ukun nudar Primeiru Ministu,  establidade komesa repoin fila-fali. Lei no ordem komesa hatu’ur iha nia fatin. Xanana mos konsege minimiza kultura violensia nebe kada tinan rua-rua akontese iha Timor-Leste depois de Timor-Leste restaura ninia independensia iha tinan 2002.

Tolu, Resolve Problema Refujiadus

Impaktu husi krizi 2006 mos rezulta refujiadus rihun ba rihun nebe’e moris iha tenda okos iha kapital Dili. Atu resolve problema refujiadus hodi haruka fila ba ida-idak nia uma la’os fasil. Iha enkontru altu nivel entre Xanana Gusmao ho lideransa Nasoens Unidas (UN) no komunidade internasional konaba oinsa atu resolve problema refujiadus iha momentu neba’a, mosu versaun husi partes barak nebe’e pesimista katak baseia ba esperiensia nasaun barak iha mundu, pur ezemplu iha Afrika, presiza tinan 10 to’o 15 atu haruka refujiadus sira fila ba sira nia hela fatin. Ho kalma Xanana hatan ba internasional sira katak “hau la presiza tinan barak atu resolve kazu refujiadus. Hau presiza deit tinan rua ka tolu atu resolve problema refere. Realidade hatudu, iha tinan tolu nia laran Xanana konsege rezolve problema refujiadus hodi haruka ida-idak fila ba nia bairu. Sussesu ida ne’e halo parte internasional sira hakfodak, katak Timor-o’an bele resolve rasik nia problema, klaru iha kazu refere presiza Timor-o’an nebe’e iha vizaun luan (vizioner), Xanana Gusmao ninia lideransa hatudu katak nia iha kompetensia no abilidade atu ultrapassa problemas komplexu nebe’e nasaun no povu enfrenta.         

Ha’at, Resolve Problemas Petisionarius

Konsekuensia husi krizi 2006 mos rezulta forsa ativu (F-FDTL) barak mak sai husi Kuartel General. Kazu petisionario sai isu nasional no internasional tamba bele fo amesas ba establidade nasional iha kualker momentu. Ho lideransa Xanana Gusmao nian, hamutuk ho Taur Matan Ruak no hirarkia igreja Katolika, ikus mai kazu ne’e resolve ho diak no hetan sesesu.

Lima, pensaun ba Veteranus, Terseira Idade, Defisientes, Feto Faluk no sst

Katuas veteranu ida dehan ba hakerek-nain nune, “oan, uluk ami iha Ailaran, kuandu iha situasaun difisil, laiha hahan, lakon ema, lakon kilat tamba hetan atakes husi inimigu,  Xanana dehan ba ami nune, alin sira, labele lakon esperansa, luta nafatin, wainhira rai ne’e diak, hau sei foti osan husi ita nia riku soin iha Tasi laran hodi fahe ba imi oituan-oituan hodi goza molok ita mate”. Alem de pensaun ba veteranus, ferik-katuas, feto faluk, defisientes sira mos hetan pensaun nebe merese tamba sira laiha produktividade permanente.

Ne’en, Reforma Seitor Defesa no Seguransa

Iha governu anterior nia ukun, seitor defesa no seguransa la dun hetan attensaun maximu, buat hotu paradu hela iha nia fatin. Depois de Xanana ka’er pasta nudar Primeiru Ministru no Ministru Defesa no Seguransa, seitor rua ne’e komesa bok a’an no la’o neneik ba oin. Se uluk Kuartel General F-FDTL nia edefisio iha konteiner laran, agora F-FDTL iha rasik nia edefisiu ida ke diak, luxu no ho dignidade. Alem de infrastruturas nebe harí ona,  promosaun devizas ba membrus no ofisias sira mos la’o ho diak no hetan sessesu. Instituisaun rua ne’e mos komesa haruka nia elimentus ba trainning iha nasaun desenvolvidu sira hodi aumenta tan sira nia kapasidade, esperiensia no konhesimentu. Susesu sira ne’e hotu bele hetan tamba orientasaun husi Xanana nebe hetan supporta, esforsus no servisu makas husi Dr. Julio Tomas Pinto, Dr. Fransisco Guterres, Taur Matan Ruak, General Lere Annan Timur no sst hodi assegura Xanana nia politika iha area defeza no siguransa.

Hitu,  Eletrisidade

Tuir pontu de vista Dom Basilio de Nascimento (Bispo Diosese Baucau) katak “obra nebe sobre sai makas durante governasaun AMP maka elektrisidade. Povu komesa iha ona asesu ba elektrisidade. Amo Basilio tenik tan “naroman nebe agora dadaun sosiadade sente no goza bele eleva kualidade moris povu nian”. Iha Suco Afaloicai (Baguia) hau nia Tiu ida dehan nune “desde Portugues nia tempu, mai to’o iha Indonesia nia tempu, “Maromak” nunka mai tama iha ami nia uma. Depois ita ukun-an, liu husi governasaun AMP, “Maromak” lori duni naroman mai ami nia uma laran liu husi Xanana nia tulun. Tamba ne’e ami sei husu Maromak, Matebian no rai lulik sira atu fo vida naruk no isin diak nafatin ba Xanana hodi ukun rai ida ne’e. Ekspresaun espontania katuas ne’e fo hanoin mai ita katak oituan ka barak Xanana halo netik ona buat ruma ba povu ida ne’e maske sei iha mos failhansus iha aspeitus balun.

 

Walu, Sirkulasaun Osan ba Distritus

Desde Xanana ka’er ukun husi 2007 to’o agora povu komesa sente rezultadu husi dezenvolvimentu. Komesa husi implementasaun Pakote Referendum, tuir ba Pakote Desenvolvimentu Desentralizadu (PDD) no ikus liu pakote Emergensia. Sirkulasaun osan komesa la’o no espalha makas no luan, laos deit iha kapital Dili maibe kuaze ba distritu hot-hotu. Kolega ida dehan ba Hakerek’nain nune “ uluk kuandu Xanana seidauk ka’er ukun, ita atu ka’er ou hetan deit osan 100 ka 500 US$ mos susar para mate. Xanana ka’er tiha ukun, la’os deit 500 US$ maibe 5000-10.000 US$ mos ita bele hare ona. Tuir kolega ne’e, Xanana la’os deit hatene halo funu, maibe Xanana mos hatene halo desenvolvimentu no hatene intende povu nia terus no susar”.

Sia, Rejenerasaun da Lideransa

Xanana hatene nia-an. Xanana mos iha persistensia no konsistente ba saida mak nia koalia. Iha Fevereiru 2006, iha intervista ida ho media STL, Xanana dehan nune “agora hau mak presidente, tinan 2007, Ramos-Horta mak sei ba, depois de Horta, 2012, Taur Matan Ruak mak sei ba presidente. Iha ne’e Xanana hatudu nia “sense of statesmanship”, Xanana la’os deit koalia, maibe Xanana halo ho liman no ser determinador politika iha era demokrasia ne’e nia laran.

Sanulu, implementasaun Planu Estratejiku Desenvolvimentu Nasional (PEDN)

Hanesan Xanana koalia iha nia kampanhe katak PEDN hanesan Biblia ka mata dalan ba povu no nasaun Timor-Leste. PEDN laos mehi ka milagre nebe’e teki-teki monu deit husi lalehan tun mai rai. PEDN mosu hanesan resultadu ka inspirasaun husi viajem nebe’e Xanana la’o hadulas Timor-Leste tomak hodi husu povu ida-idak nia hanoin no hakarak kona saida maka nasaun no governu atu halo hodi responde ba povu tomak nia nesesidades.

Bazeia ba susesu sanulu nebe’e Hakerek’nain temi iha leten, no iha era demokrasia ne’e nia laran, Xanana nudar mos determinador politika iha palku politika nasional, maka deseju iha fulan hirak nia laran nebe’e indika katak Xanana hakarak lidera hikas governasaun Timor-Leste la’os impossible atu akontese. ***(03/07/12)

*Hakerek’nain nudar Alumnu Universidade Katolika Atma Jaya, Jakarta, Indonesia, hela iha Dili.