VISAO MISAO OBJECTIVO SPORTIMOR FH KKN HOME FH LPV ARTIGOS FH MUZIKA LIA MENON FH RESPONDE

quarta-feira, 6 de junho de 2012

Corrupção Eleitoral (2a): “Clandestina” Lawa-mento iha “Caixa” Partido Nia Laran


Martinho G. da Silva Gusmão

Corrupção Eleitoral (2a):  “Clandestina” Lawa-mento iha  “Caixa” Partido Nia Laran
 
Tuir lolos, iha plenária CNE nian, comissário sira maioria hanoin atu lalika halo CNRT hanesan bode expiatório (the scapegoat), maibe ba rona to’ok husi sira rasik kona ba saida mak mosu daudaun ne’e. Razão rua mak forte liu – (1) lei eleitoral, lei partido político no lei orçamento partido nian nebe mai husi FRETILIN no AMP mak mangame hela deit kona ba assunto “osan” ba partido sira no kona ba financimaneto eleitoral nian; CNE la’os iha posição nu’udar controlador (sa tan “investigador”) ba osan nebe tama sai iha partido sira nia “caixa”; (2) partido hotu-hotu halo ona “clandestina” lawa-mento (husi Macassae, “lawa” = osan) hodi hatama osan iha sira nia “caixa” ne’e duni CNE lalika hu’u arbitro ba CNRT de’it (tan sira nakloken ona ba publico), wainhira partido sira seluk hanesan FRETILIN, PD, PUN, ASDT, PSD no sira seluk mos hanesan de’it (karik?).
Ne’e duni, saida mak Presidente CNE nian declara ba publico nu’udar liafuan “normativo” ida! Maibe, wainhira Presidente CNE halo “acusação” ruma ba CNRT karik, ne’e hanesan surpresa naksalak ida ba publico (CNE la hanoin kona atu acusa partido CNRT); Dr. Faustino Cardoso mak haluha karik la temi FRETILIN nia naran, maibe comissário balun informa duni katak partido histórico ne’e mos halo “angariação” (... clandestina, tan ne’e mak Presidente GOPAC la foti reação?). Tuir lolos CNE hakarak de’it atu “promover o esclarecimento objectivo dos cidadãos acerca do acto eleitoral através dos meios comunicação social” (Lei 5/2008 art 8o alínea d]). Ida ne’e knar nu’udar educação eleitoral ka pedagogia eleitoral. La dun “objectivo” karik, tan Presidente CNE temi de’it CNRT no la hare FRETILIN?!
Tan ne’e mak mosu debate iha TVTL (23 Maio 2012). Moderadora Paula Rodrigues husu “se mak tem que controla osan husi ka iha partido político nia laran?” Nu’udar Comissário CNE nian ha’u hatan, katak lei la fo autoridade ba CNE atu controla ka investiga partido sira nia osan. Se CAC ka MP iha autoridade no poder atu halo, ida ne’e sira na’in rasik mak sei hatan. Ha’u nia liafuan iha TVTL “sira uluk halo, ita (CNE) la karolu, tan sa mak agora ita ba karolu fali ida ne’e (CNRT)?” Delegação ida husi CNE ba duni Bairo dos Grilhos lori hasoru CNRT atu buka hatene ka husu de’it informação. La’os halo investigação.
Iha caso ida interessante: ha’u rona informação katak CNRT sei fo hikas osan BTK nian. Tan sira companhia estrangeira, no lei bandu. Tuir lolos labele “gampangan” hanesan ne’e. Lei labele “namlele” atu hakruk fali ba “bapak” sira. Iha Indonésia ka Malaysia, Brasil ka rai seluk tan, BTK tem que “expulsa” (duni sai) husi Timor Leste. Tan sira involve iha política Timor Leste nian, wainhira ita la’os ona “Timor Timur propinsi Indonésia yang ke-27”. Nu’udar ema nebe iha gelar “sarjana hukum”, Dionísio Babo labele “inocente” fali. Inclui, hatama Francisco Kalbuady ba MP atu halo investigação, tan nia mak promotor ba “noite da angariação”. Maibe, se DR. Dionísio Babo, SH (dala ida tan SH = sarjana hukum), “gampang” de’it fo fila osan (?), hotu tiha la halo investigação ba Francisco Kalbuady no BTK (ka, companhia estrangeiro seluk tan iha laran) ne’e lição aat tebes ba ita hotu.

Se mak halo investigação no controla?

Wainhira ita hare didiak Lei 3/2004 no Lei 6/2008 ne’e ninia espírito, tuir lolos partido político rasik mak halo controla ba ninia an, ba ninia uma laran no ninia riku-soy. Kbiit no knar tomak iha partido político sira nia liman laran. Iha neba lei ko’alia kona ba:

Lei 3/2004 – artigo 27o
Organização contabilística
Lei 6/2008 – artigo 3o
Organização contabilística
a)              Tinan-tinan partido político sira halo inventario ba sira nia riku-soy tomak (imóveis e moveis);
b)              Halo descriminação (hakerek lolos tomak) kona ba osan hira mak partido simu (tuir artigo 20o)
c)              Halo descriminação kona ba despesa (hasai osan oinsa no kona ba saida nian);
d)              Halo descriminação kona ba operações de capital (oinsa mak “tanam modal): investimento hira, “debet” no “credit” ..
1.        Partido hotu-hotu halo sira nia contabilistica atu nune’e ema bele hatene sira nia situação financeira;
2.        Organização contabilistica hanesan tuir mai:
a)      Tinan-tinan partido político sira halo inventario ba sira nia riku-soy tomak (imóveis e moveis);
b)      Halo descriminação (hakerek lolos tomak) kona ba osan hira mak partido simu (tuir artigo 20o)
c)      Halo descriminação kona ba despesa (hasai osan oinsa no kona ba saida nian);
d)      Halo descriminação kona ba operações de capital (oinsa mak “tanam modal): investimento hira, “debet” no “credit” ...

            Hare didi’ak ba: Lei 3/2004 ba partido hotu-hotu. Maibe, Lei 6/2008 hatudu de’it ba partido sira nebe iha assento parlamentar atu halo “organização contabilistica” ba osan husi Estado no osan nebe sira hetan rasik. Husi lei ikus ne’e dehan katak, “A responsabilidade pela elaboração e apresentação das contas dos partidos políticos é dos órgãos estatuariamente competentes” (artigo 14o husi Lei 6/2008). Katak, partido iha rasik ona ninia estrutura mak iha knar no kbiit atu halo no hato’o contas partido nian. La’os ema seluk. La’os ema liur. Tan ne’e la’os CNE mak hola responsabilidade atu halo controla.
            Oinsa mak labele hamosu “mismanagement of public fund”? Lei fo nafatin kbiit no knar ba partido político atu halo “publicidade das contas” iha Jornal da Republica (Lei 3/2004 artigo 26o). Osan no riku-soy tomak nebe partido sira hetan, sei hatudu ba publico atu hatene. Lei 6/2008 fo knar ki’ik ida ba CNE atu halo “apreciação das contas” (artigo 15o, 16o). Baseia ba lei sira ne’e mak CNE halo Regulamento kona ba “Arrecadação, Aplicação de Recursos e Prestação de Contas dos Partidos Políticos” (Jornal da República, 10 de Nov. de 2008). Mosu karik buat ruma mak naksalak iha apreciação ne’e, CNE husu ba partido sira atu hadi’ak fali iha loron 10 nia laran. Mak iha karik indícios ba corrupção, CNE lori documento naksalak ne’e ba Ministério Publico atu halo investigação. Maibe, CNE rasik la halo no labele halo investigação.
Ne’e duni, wainhira Presidente GOPAC nian, Deputada Fernanda Borges, iha ona dados no factos kona ba osan hamutuk $ 2,653,650 nebe tama iha CNRT nia “caixa”, ida ne’e labele husu ba CNE atu tama fali CNRT nia uma laran atu buka tuir sasan sira iha neba. Lei fo de’it knar atu partido político mak hato’o rasik ba CNE ho liafuan “dever de colaboração” (Lei 6/2008 artigo 15o). Carta nebe GOPAC haruka ba CNE ne’e “salah alamat” (depois, “Cc” fali ba Presidente TR). Bele karik haruka uluk lai ba Procuradoria Geral da Republica (PGR), depois mak “Cc” ba CNE. GOPAC hanesan tiha “combatente” ida hasoru corrupção maibe tiru tun tiru sae hodi la asserta ba “target point”.

Party-based Economic Growth

Maibe, susar tebes atu partido ida-idak halo rasik “publicidade das contas” ka hatudu “dever de colaboração” ne’e!!! Tan sa mak sai tiha nune’e??? Giovanni Sartori iha ninia livro Parties and Party Systems: A Framework for Analysis (1976), hakerek ho liafuan hirak nune’e: “The single best explanation for today’s anger lies, I believe, in political corruption. Polities has never been, and will probably never be, immaculate ... But greed and corruption have recently reached unprecedented heights. Political corruption has indeed reached the point at which it corrupts politics”. Katak, susar boot tebes nebe ita hasoru ohin loron mak corrupção política. Político na’in sira husi hun too rohan la’os imaculada (sala laek no laran mos) ... maibe sira hotu buka di’ak ba nia an deit no corrupção ikus-ikus ne’e hakat to’o ona fatin nebe ita la kaer toman-ona. Bele dehan katak, corrupção política hakat to’o ona iha fatin nebe mak sobu rahun (corrupto) duni política rasik. Ho liafuan badak, partido político rasik mak la hatene lori sira nia an, la hare sira nia uma laran .... tan ne’e partido sira rasik mak corrupto político.
Ne’e duni, biar CNRT ne’e lidera husi carisma Xanana Gusmão fali, ka, FRETILIN ne’e hari’i husi lider histórico sira hanesan mate-bian Nicolau Lobato no Xavier do Amaral no herói sira seluk hanesan Ramos Horta no Mari Alkatiri ... maibe, wainhira nia partido político nebe tama iha jogo político ida hodi involve “osan” maka’as ... corrupção iha no buras nafatin. Política la’os imaculada. Xanana mos Gusmão nafatin, la’os Imaculada. Nune’e, devoção ba Xanana Gusmão nia carisma la significa katak ema hotu iha CNRT la halo corrupção. Ka, tan Xanana Gusmão aten-brani atu halo bebeik politica “per experimentum et probationem”, nia bele loke buat hotu ba ema hotu atu hatene atu nune’e koko to’ok partido sira seluk atu “transparente” hotu? Rona saida mak Jorge Serano no Rui Castro hateten sai ba publico, hatudu momos katak CNRT mak “transparente” ona ba sira nia angariação. Agora, partido político sira seluk “aten-brani” ka lae atu hatudu katak sira mos hetan suporta husi empresário sira?
Keta halo, tan Xanana nia política ne’e imaculada, mak halo katak devoto sira ne’e bele halo buat hotu nebe ema hare no mos la hare basá Xanana nia carisma bele taka buat hotu? Xanana ka FRETILIN sei manas no moris, wainhira hotu-hotu fakar ran ba ukun rasik an. Maibe, agora atu hisik kosar-wen ba moris di’ak, empresário sira mos hakarak lerek (to’o “bapak” sira mos mai hotu fali husi Indonésia). Maibe, empresário hisik kosar-wen oituan, balde ida nakonu kedas. Balde nakonu ne’e tan kosar-wen corrupção eleitoral?
Tuir ha’u nia hanoin, emprezario sira fo osan ba partido político hanesan parte ida husi “investimento” econômico (tanam modal, tanam saham). Caso hanesan harii edifício CNE bele sai exemplo – katak, empresário la hun la dikin bele manan projecto tan iha ona “investimento político” iha kotuk (ka, laran?). Empresa Altramor fo fali ho “investimento econômico” ba político na’in sira nebe tur hela iha kadunan. Iha lian Latim dehan, “do ut des” – “Ha’u fo buat ruma, atu nune’e O mos fo fila buat ruma”. Se halo CNE ninia edifício de’it la iha transparência ba comissário sira CNE nian, oinsa lerek atu hatudu partido nia osan ba CNE atu controla ka investiga? Tuir documento nebe ha’u hare kois, dehan katak Companhia Altramor sei halo hotu edifício CNE nian no entrega (28 Fevereiro 2012) hodi usa lolos ona iha eleição presidencial 2a ronda. To’o agora, besi mak reket ba baki, rai rahun mak suar ba partido sira nebe mai halo sorumotu iha Kolmera. Companhia mak hetan beneficia, ka, partido político balun mak beneficiado? Buat nebe claro ona, CNE mak xupa rai-rahun ka aku-desan!
Iha conversa particular ida ho Taur Matan Ruak (molok ba eleição presidencial), nia dehan ba ha’u katak nia lakohi “compromete” an ho partido político sira. TMR rejeita atu sai candidato husi FRETILIN ka PD ka CNRT. Tan, wainhira nia manan karik nu’udar PR, nia sei selu “tusan” atu atura partido sira nia maninga no manhosa. Ne’e duni, partido sira bele fo apoio, maibe TMR dehan kedas katak sei la hakruk ba partido sira. Iha posição ida ne’e, TMR hare katak Xanana Gusmão, Fernando Lasama, Mariano Assanami Sabino, Dudu, Riak Leman, L-7 no sira seluk tan mai fo apoio, maibe la lori CNRT, PD, PSD ka UNDERTIM nia naran oficial. Hanesan mos militante barak husi FRETILIN. Sira mai nu’udar ema sira nebe uluk hakarak fakar ran ba ukun rasik an, no agora sira hamutuk atu hisik kosar wen ba moris diak.
            Ha’u nia pergunta, tan sa mak TMR la hakarak hakruk ba partido sira nia movimentação? TMR hatan – “Amo, ita nia política ohin loron ne’e sai ona fatin ba crescimento econômico ba empresário sira”! A lias, sasukat (paradigm) ba ita nia democracia ne’e la seluk la let mak “party-based economic”. Ema tama partido la’os tan halo política, maibe atu buka moris. Dom Basílio do Nascimento dala ida dehan katak, “... tur iha governo ne’e hanesan primeiro imprego” nebe ema bele hetan iha moris. No ba moris tomak. Ne’e duni, wainhira partido ida lakon ka la kaer Governo ne’e hanesan “desemprego” boot ida. Nune’e mos Dona Maria Ângela Carrascalão iha TVTL dehan “promiscuidade” husi partido político no empresário. Liafuan “promiscuidade” dala ruma iha bahasa Indonésia hanesan “kumpul kebo” (karau sira toba hamutuk iha tahu laran) ka iha lian Alemanha dehan “samen leben”. Ida ne’e mak Jorge Serano dehan katak, “ami emprezario ne’e fo ba partido hotu-hotu, ami la hare ba cor político, no ami la iha cor política ...”, Rui Castro dehan “... fo husi leten, fo husi kraik, fo husi kotuk fo husi oin, fo husi sorin karuk fo husi sorin kuana”.
            Razão saida mak halo ema hobur lisuk política? Tuir ha’u nia hanoin, razão boot liu mak lei pensão vitalícia (LPV). Ha’u hatene katak Dr. Mari Alkatiri (FRETILIN) no Dr. Vicente Guterres (CNRT) dehan “inveja” (laran moras ba sira nia riku-soy), tan ha’u ko’alia bebeik kona ba LPV. Maibe, ha’u taka karau-kulit iha oin atu reafirma, katak, LPV ne’e mak “vírus” nebe hamaten democracia genuína (demokrasi yang asli; demokrasi yang sejati). Deputada Fernanda Borges dehan katak LPV ne’e “imoral”. Ne’e todan tebes. Ha’u hanoin, LPV ne’e hanesan “virus” aat nebe hamaten sistema no operação político iha Timor Leste. Vírus ida ne’e mai husi acto ultimo Deputado sira FRETILIN nian (molok hanahas mandato iha 2007) no kona da’et ba AMP (nebe kaer Governo foun). Depois, AMP ho ninia aliança maioria halo defesa metin ba LPV (no FRETILIN suporta) – hodi nune’e obriga ema barak no ema hotu hakarak hari partido bara-barak. Hodi povo nia moris, na’i-ulun político sira hada’u LPV.
            Ne’e duni, “financiamento” nebe hadulas no haleu partido político ho empresário sira ne’e sai hanesan investimento boot ida. Keta halo – ita nia política no ita nia sistema ho processo eleitoral ne’e mos hakruk ba “mercado livre” (free market) karik?
Hau hanoin, iha caso ida ne’e, povo tomak bele ona “investe” sira nia confiança ba Presidente da Republica, Taur Matan Ruak. Solução di’ak liu mak TMR halo “purificação política” tan partido político sira la’os imaculada. Penitencia mak hasai tiha LPV no tau fali lei seluk (compensação ka regalias ba periodo ruma) no halo legislação especifica kona ba financiamento campanha eleitoral. Nune’e mos, Deputado sira iha legislação tuir mai tem que aten-brani hodi hisik kosar-wen atu halo código eleitoral nebe metin no forte atu harii Estado (state-building).

*) Hakerek nain, Comissário CNE representante husi Igreja Católica; coordenador sub-comissão EDUCAÇÃO ELEITORAL (estudos, pesquisa & publicações).



Sem comentários:

Enviar um comentário

Nota: só um membro deste blogue pode publicar um comentário.