OINSA DESTINU GREATER SUNRISE IHA GOVERNO FOUN 2012-2017 NIAN LIMAN?

)* Gabriel Gaspar Aparicio

Antes atu komesa koalia kona ba kestaun Greater Sunrise uluk nanain ita hatene lai problema fronteira tasi/marítima ne’ebe ikus mai hamosu Tratadu tasi Timor (Timor Sea Treaty) no akordu hodi halo hamutuk campo gas Greater Sunrise iha área conjunta ho área territorial austrália ne’ebe fahe hanesan ba ninian produsaun, 50% ba Timor-Leste no 50% ba Australia (Unitisation of the Sunrise and Troubadour Fields: IUA; 2003 & Treaty between The Government of Australia and The Government of the Democratic Republic of Timor-Leste on Certain Maritime Arrangements in the Timor Sea : CMATS; 2006).

 

 Fronteira tasi nian entre Timor-Leste ho Australia la rejolvido desde tempo português nian ukun, okupasaun Indonésia no to’o tempo Timor-Leste ukun an. Australia ho Indonésia  determina sira nian fronteira tasi iha tinan 1972 bajeia ba convention on the continental shelf (Geneva, 1958) ne’ebe sira marka fronteira tasi besik costa sul de Timor, iha biban ne’eba Indonesia-Australia considera tasi klean 3 km de profundidade nudar subduction zone/zona subducção  (trench).  Depois Australia husu governo Portugal atu simu fronteira tasi iha zona subducção (versaun Indonesia-Australia) maibe jeolojistas portugueses sira fo hanoin ba governo Portugal katak tasi ne’ebe klean to’o 3 km de profundidade ne’e laos zona de subducção maibe ne’e acidente ida, ne’e hanesan ekpresaun morfologia deit. Ho Governo Portugal nian ulun toos nemak ikus sira bolu TIMOR GAP tamba laiha solusaun ba fronteira tasi. 

Iha tempo okupasaun Indonesia mosu mos konvensaun foun ida ne’ebe bolu UNCLOS (United Nations Convention on the Law of the Sea,1982) ne’ebe konsidera mos aspekto geologico hodi determina fronteira tasi. Ho nune’e Indonesia mos laaseita Australia nian ejijensia atu Timor-Leste (Timor-Timur tempo ne’eba) nian fronteira tasi ho Australia atu dada tuir deit akordu Indonesia-Australia iha tinan 1972. Ho disputa ne’ebe iha Australia-Indonesia halo akordu ida oinsa fahe recursos nebe iha tasi okos ne’ebe rejulta fahe  Indonesia 50%: Australia 50 % iha zona A, Indonesia 10%:Australia 90 % iha zona B no Indonesia 90%: Australia 10 iha zona C (hare iha figura). 

Iha fali tempo Timor-Leste ukun an, fronteira tasi Timor laiha akordu final ida ho Australia hodi decide lolos fronteira tasi ne’e. Ikus mai ita so halo akordu hanesan temi tiha iha leten. Iha akordu Timor entre Leste-Australia  intrega tiha zona B (husi akordu Indonesia-Australia 1989) ba Australia no zona C ba Timor-Leste sai nudar zona exclusiva no zona A sai área conjunta  (JPDA: Joint Petroleum Development Area) mak fahe 90% ba Timor-Leste e 10% ba Australia. 

kampo gás Greater Sunrise iha área tasi Australia nian 82% no 18% iha área konjunta. Se nun’e ntaun ita hanoin Australia laran diak tebes hodi fo kedas  50% ba ita no sira 50 %. Tebes duni sira laran diak???. Mai ita hare…

Atu dada linha fronteira entre nasaun rua tenki foti Median Line. Linha nebe agora iha ita halo kontinuasaun husi akordu Indonesia-Australia 1989, iha biban neba Australia suporta makas ba invasaun indonésia nian ba Timor-Leste e sira hatene ona gás nebe akumula iha tasi okos ninian ektensaun (pelamparan:width) tamba companhia woodside nudar operador halo nanis estudos iha 1974, nune fronteira tasi ba sorin karuk no sorin los sira halo  klot laos halo paralelo, se linha fronteira nemak dada los  paralelo kuaje greater sunrise sei tama hotu ba JPDA ou sai Timor-Leste nian hotu se ita determina los ona fronteira tasi.

Tebes duni área tasi ne’ebe ita disputa hela ho Australia ne’e ita nian los? Hakerek nain laos ema jurista hodi interpreta lei ne’ebe iha UNCLOS 1982 maibe hakerek nain hatudu faktus ne’ebe iha lei ne’e nia laran hodi ita hare lesuk. 

Tuir lei UNCLOS  1982 capitulu V  kona ba Exclusive Economic Zone (EEZ) artigu 57 ne’ebe menciona katak “Exclusive Economic Zone ninian naruk sei la liu 200 nautical miles (370 km: 230 miles) husi tasi ninin ilha nian ne’ebe sukat ba.

No UNCLOS 1982 capitulu VI kona ba Continental Shelf, husi rejumu artigu 76 fo sai  katak  nasaun ne’ebe ho continental shelf ninian direitu ba tasi sei to’o bordo (ujung) husi continental refere (outer edge of continental margin) ne’ebe inklui sasan sira iha rai okos,  continental slope ho continental rise rise.

Tuir peritus sira nebe halo peskiza iha Timor sira iha konlusaun rua kona ba Timor Trough. Peritus hanesan Audley-Charles (1968, 1975) defende katak zona subducção ne’e iha parte norte da ilha de Timor e peritus seluk hanesan Fitch (1972), Hamilton (1972,1973) no dados sismica husi Jacobson et al. (1981) defende zona subducção iha sul da ilha de Timor. 

Maibe, peritus (expert) sira mais recente (Charlton, Audley-Charles, Harris, Keep, etc) hateten katak bordo husi continental margin australia nian mak forma tiha ilha  Timor e ninian ekstensaun to’o norte husi costa norte de timor (entre ilha Timor ho ilha wetar) ne’ebe hatudu husi evedensia hanesan:

• Dados geofísica: seismic (Hughes,1996.

• Laiha subduction zone iha costa sul ne’ebe hatudu katak forma/morfologia 3 km profundidade tasi  Timor nee Laos trench (rejulta husi proseso subduction) maibe trough (rejulta husi fatuk nebe naksiluk an tamba processo colisão), Ida ne’ebe hetan suporta husi dados seismic hanesan husi Hughes. Mesmo que iha sul de Timor Trough iha depressaun hanesan continental slope maibe nee defini husi batimetria Laos husi aspekto geologiko.

• Fatuk sira iha ilha timor hanesan mos iha tasi timor nian okos (aspeto idade; fácies;).

• Minarai e gas ne’ebe mosu iha ilha Timor; tamba sekarik ilha Timor mak forma husi prisma acrecionario hanesan ilhas sira nebe mosu iha sul de Sumatra (e.g. Nias & Mentawai)  karik sei la mosu mina no gas iha ilha Timor.

Ho rajaun dados geologicos nebe temi iha leten hatudu ba ita katak mesmo que Australia prefere uja continental shelf  hodi determina limite fronteira tasi nian, mas Timor-Leste iha possibilidade bot atu bele manan. 

Tuir artigu 76 iha alinea 8 (UNCLOS 1982)  hateten “informasaun kona ba limite continental shelf nebe liu 200 nautical miles (370 km) ne’ebe surra husi tasi ninin  ilha nian sei intrega husi estado competente ba komisaun nebe sei trata limite continental shelf. Komisaun ne’e sei hato’o rekomendasaun ba estado competente kona ba asuntu estabelecemento limite husi sira nian continental shelf. Estado competente determina limite shelf bajeia ba rekomendasaun nee. Komisaun ne’e menciona iha Capitulo XI anekso II.

Iha anekso ne’e esplika katak Komisaun ne’e nia membro 21 pessoas komposto husi peritus geologia, geofisika no hidrografika. Komisaun ne’e hili husi nasaun sira ne’ebe hola parte iha diskusaun ne’e, ida ne’ebe asisti husi sekretaris geral ONU.

Entaun ohin loron mosu perguntas ba ita hotu, Saida mak akontese iha tempo ne’eba?, Será que Australia ho ninian hakarak ho Continental Shelf no Timor-Leste kria duni komisaun ne’e? ou, sira nian peritus sira hatene katak ilha Timor ho Australia ne’e iha placa continental ida (ONE CONTINENTAL PLATE) nemak bainhira Timor-Leste hatama keisa ba Tribunal Internasional Australia retira tiha nia an husi tribunal ne’e. Tuir Hakerek Nain nia hare, karik sira tauk bainhira sira obriga an ho Continental Shelf, sira sei lamanan tamba laiha evidencia no razoes forte hodi defende continental Shelf.

Tuir Artigu 74 no 83 UNCLOS nian hateten katak akordo limite fronteira marítima sei efetivo bainhira bajeia ba Lei Internasional nian, hanesan refere iha artigu 38 kona ba estatutu  Tribunal Internasional nian. Se kuando laiha acordo ba limite fronteira marítima mak nasaun ne’ebe halo diskusaun ba fronteira ho espírito de komprensaun  no koperasaun bele servisu hamutuk.

Bajeia ba artigu 74 no 83 UNCLOS nemak mosu Tratadu tasi Timor (Timor Sea Treaty) Sunrise IUA ho CMATS, tamba Timor-Leste ho Australia lahetan solusaun final ba  fronteira marítima.

Agora ita koalia kona ba greatersunrise ne’ebe sei sai disputa entre governo Timor-Leste ho operador ba Greater Sunrise (Woodside, etc). Oinsa distinu campo gas ne’e iha governo foun periode 2012-2017, saída mak governo foun ne’e atu halo? Governo foun tenki hili opsaun sira nebe agora iha ona, hanesan husik pipeline dada ba Australia, processo namlele iha Tasi leten (floating), dada mai Timor-Leste ou husik ba futuru.

Tuir hakerek nain nian hare, governo foun diak liu halo tuir nafatin pojisaun nebe governo atual foti, DADA MAI TIMOR OU HUSIK BA FUTURU. Tamba saída mak hakerek nain apoio pojisaun ne’e? iha rajaun hirak ne’ebe hakerek nain atu hato’o (alem de razões sira ne’ebe babain ita rona: bele fo beneficio ba ita nian povu liu husi campo de trabalho e taxa):

• Se quando campo gás greater sunrise mak lakonsege dada mai Timor-Leste ita lalika mehi atu iha futuru ita dada pipeline husi campo mina ou gás seluk nem gota (tetes) ida mos lasulin mai Timor-Leste, tamba greater sunrise ne’ebe nia reservas bot deit ita lakonsege lori mai do que campo mina ho gás ne’ebe kiik.

• Se quando pipeline husi greater sunrise ita konsege dada mai Timor-Leste ba oin kuando ita hetan tan mina no gás husi campo seluk iha tasi Timor iha possibilidade bota atu dada tan mai Timor-Leste.

• Kona ba reservas; antes ne’e companhia Woodside (ho joint venture) hateten greater sunrise iha 8 tcf (triliun cubic feet) gas no 300 milhões baril de condesate no ikus fali fo sai katak reservas ne’e iha deit 5,3 tcf gás no 225,9 milhões baril de condensate. Ne’e hatudu inkonsistensia husi companhia. Laos ida ne’e deit husi apresentasaun oral (hakerek nain hetan dados apresentação file powerpoint) husi peritus Australiana ida menciona katak campo gás Kelp Deep  ho Greater sunrise hamutuk iha reservas 20,2 tcf gas no 379 milhões baril de condensate, hakerek nain mos iha duvidas ba ida ne’e, oinsa nia bele determina katak iha 20,2 tcf gás ba campo rua ne’e (peskiza ne’e halo husi companhia ne’ebe?). Se kuando dados ne’ebe peritu australiana  hato’o ne’e los entaun ita iha reservas gás ne’ebe bot tebes.

• Hakerek nain laiha dados mais detalhos ba campo mina no gás sira ne’ebe iha tasi Timor, maibe husi relatório badak ho artigo ne’ebe publika sai, hamosu hakerek nain nian duvidas. Iha greater sunrise campo gás akumula iha fatuk Upper Plover ho Lower Plover formation (idade 250-142 milhões de anos) no iha Kelp deep gás akumula iha Permian Units (unidades fatuk iha pérmicas: idade 290-251 milhões de anos). Se nune’e  greater sunrise mos iha possibilidade atu bele hetan gás iha Permian units nomos iha Kelp Deep bele hetan gás ou mina iha Jurasic units (karik tenki hare mos ba aspeto técnico!). Ita mos laiha liu dados ba fatuk sira ne’ebe iha Cretaceous no Tertiary (142-1,81 milhões de anos) ne’ebe karik bele iha posibildade iha akumulasaun mina no gás (hare mos petroleum system ba área refere). Ida ne’e so bele hatene husi estudo sísmica, wellogging no analisa core  ho cutting ( dados furo/bor).

Ho razões sira iha leten hakerek nain prefere para governo foun periode 2012-2017 tenki mantein pojisaun atu dada pipeline mai Timor-Leste. Ita labele ansi ho desijaun ne’ebe halo lakon (rugi) ita. Ita keta ansi tamba tauk gás ho condensate husi Bayu-Undan atu maran iha iha 2024. Ita laiha estudo detalhos ba campo sira ne’ebe iha tasi Timor,  ida ne’e so informações husi parte ida deit (sepihak) husi companhia. Karik Autoridade Nacional de Petroleo (ANP) iha dados completos husi relatório companhia sira nian kona ba reservas mina no gas hira mak companhia sira iha ba (relatório ne’e tebes duni hanesan ho situasaun iha campo mina no gás???). Bele mos campo mina ho gás ne’e sei iha reservas ne’ebe bot ne’ebe companhia labele hateten sai sedu ba ita, buat hotu depende ba kondisaun ou aspetos geológicos. Ita keta ansi, tamba sei iha área barak ne’ebe iha JPDA ho área exclusiva ne’ebe sidauk fo bidding ba companhia, ne’ebe ita espera bele iha akumulasaun mina no gás.

Hakerek nain hakarak foti exemplo ida husi nasaun Kuwait ne’ebe nasaun kiik liu kompara ho Timor-Leste maibe ninian reservas mina iha 96,5 bilions barrel of crude oil no gás 52,7 Tcf ne’ebe inklui hanesan nasaun ho reservas mina bot liu iha mundo. Ida ne’e hatudu katak mina ho gás barak laos hare husi nasaun ninian bot maibe depende ba aspetos geológicos. Ho ida ne’e ba ita Timor-Leste atu labele hare ba ita nian área ne’ebe kiik maibe presija estudo mais ba ita nian riku soin hirak ne’e hodi ita mak hatene liu kona ba reservas hira mak ita iha.

Ikus liu hakerek nain sugere, luta nafatin dada pipeline mai Timor-Leste. Uluk kuando luta ba ukun rasik an ema dehan “Timor sidauk bele halo daun ida mos hakarak ukun an” maibe ikus ita ukun an duni. Ba oin ita lakohi rona bebeik ema dehan “YOU HAVE NO CAPACITY TO BRING PIPELINE TO YOUR COUNTRY”.

)* Criticas ou sugestões bele hato’o

ba endereço email: aghabius@yahoo.com