Jose Ramos Horta no Konflitu Iha Guine Bissau

Jose Ramos Horta no Konflitu Iha Guine Bissau

Sai kronista ba Sapo.tl duranti eleisaun prezidensial iha Timor Leste hanesan privilejiu bo'ot ida. Tamba hau bele ezerje hau nia funsaun nudar hakerek nain ou lia nain Timor nian halo didiak no profisional.

De faktu, ita hotu hare'e ho matan rasik atraves hosi meius sofistikadus hanesan Facebook, blog's, tv, Twiter, Youtube no seluk-seluk tan buat hotu-hotu nebe akontese iha Timor Leste duranti tempu kampanya to'o loron eleisaun iha primeira no segunda ronda eleisaun prezidensial iha Timor Leste.

Konserteza, nudar Timor oan, ita hotu-hotu haksolok. Tamba, dala ida tan, ita hatudu ba komunidadi internasional, Ita ninia: sivismu, pasivismu, maturidadi, responsabilidadi, sentidu de servi i sakrifika ba ita nia rain no Povo Timor. Ne'e duni, parabens ba Povo Timor.

Iha semana hirak liu ba, iha konversa halimar ho maluk guinense (ema Guine Bissau), hau hateten ba sira nune: "se imi presija presidenti ida diak no matenek, ami bele haruka Timor oan ida ba Guine Bissau tamba iha Timor Leste iha kedas kandidatus 12. Hosi 12 kandidatus, so 1 deit mak sei ba tur iha palasiu prezidensial. Konserteza, sira seluk ami sei la presija ona". Maibe, maluk guinense ne'e hateten fali mai hau nune: "se Timor presija presidenti, ami bele haruka guinense ida atu ba sai presidenti da republika iha Timor Leste". Hau hatan ba maluk guinense nune: "imi bele haruka imi nia ema 1 ba Timor mas nia ba hanesan refujiadu ou ba husu asilo politiku iha Timor Leste".

Jose Ramos Horta, actual Prezidenti da Republika de Timor Leste no Premio Nobel da Paz 1996, hetan terseiru lugar iha primeira ronda eleisaun prezidensial nebe foin liu iha dia 17 de Marsu 12. Maibe, Oras ne'e daudaun, Ramos Horta iha ona servisu foun -alias- atu sai hanesan mediador ba konflitus iha Guine Bissau. Konserteza, ne'e orgulhu ida ba rai no povo Timor. Tanba, ita bele hatudu exemplo diak ba mundu konaba ita nia partisipasaun ativa atu kria paz no estabilidadi iha mundu. Klaru ke ida ne mos laos barometer atu ita hare'e no sukat successu nebe Ramos Horta halo ona ba Timor no ba Mundo.

Iha Timor Leste, duranti Ramos Horta nia prezidensial (2007-2012), nia hatudu duni katak nia koloka interesse Nasional as liu interesse pessoal, grupu ou partidu. Ohin loron, ita moris iha Paz no Estabilidade tamba grasa hosi Premio Nobel da Paz 1996, Jose Ramos Horta.

Iha mundo, Jose Ramos Horta sempre kontribui ho ninia ideias, kritikas ba problemas nebe mosu desde hosi Medio Oriente, Afrika, Asia, Europeia no America.

Ne'e duni, Ita hotu husu atu Ramos Horta bele sai hanesan mediador diak no successu iha konflitus naruk nebe han vitima humana no material barak iha Guine Bissau. Tamba, Povo guinense presija moris diak no hakmatek hanesan mos Povo Timor nebe sempre deseja atu moris diak no hakmatek iha sira nia rain rasik.

Obrigado ba Ramos Horta tamba husik hela Paz no Harmonia ba Rai no Povo Timor e desejo grande sucessu iha ninia vida diplomatica. 

Celso Oliveira

http://presidenciais.sapo.tl