Campanha Eleitoral: “Linguagem Política” no Símbolo Religioso

Campanha Eleitoral: “Linguagem Política” no Símbolo Religioso

Martinho G. da Silva Gusmão

Iha campanha husi Taur Matan Ruak (TMR) no Lu-Olo (LO) mosu linguagem nebe tuir ema barak nia tilun no matan, tendencialmente, halo “manas”. Maski candidato 2 ne’e fou-foun la “ataca” malu. Maibe, ikus mai apoiante balun hahu hamanas situação. Husi ne’e mak udan ho anin declarações atu contra malu no ataca malu mos tama iha área nia laran. Ema mos hahu husu competência no capacidade CNE nian atu hatan; liu-liu balun dehan katak, “Pacto eleição pacifica 2012” no “hamulak” sira nebe CNE hala’o ne’e saugate deit.

Nune’e mos, uluk dehan TMR ninia apoiante sira usa símbolo religioso (estatua no imagem) hodi halo campanha iha dalan. Ba ida ne’e, Presidente CNE Dr. Faustino Cardoso Gomes mak halo ona declaração katak hahalok TMR ni’an ne’e contra regulamento. Maski, equipa suksesu TMR nian hato’o informação atu halo los hikas, maibe CNE hatan katak “fo hanoin de’it” kona ba regulamento mak bandu. Agora LO usa Bispo na’in 3 nia fotografia halo campanha (tuir lolos Dr. Ramos Horta mos lori Amo Papa Bento XVI nia foto halo campanha). Hasoru LO, ha’u mak halo declaração iha media Diaro Nacional (09/04/2012). Tuir regulamento kona ba campanha nian hatur iha N. 03/STAE/X/2011. Ida ne’e mak fo forsa ba Presidente CNE nian no ha’u. Nune’e, Presidente CNE no ha’u nia posição hanesan de’it – haka’it ba regulamento. La liu no la menus.

Maski nune’e, ema balun la concorda – halo telefone anônimo, sms no hakerek iha facebook. Artigo ida ne’e hakarak clarifica fali saida mak Presidente CNE no ha’u nia intenção atu ko’alia. Katak, hasai liafuan kroat no usa “símbolo religioso” ne’e viola regulamento.

“La’os CNE mak Hanorin”

            Forsa husi regulamento ida mak atu fo hanoin de’it ka hatudu dalan “pratico” deit. Regulamento la’os legislação nebe PN halo hodi fo kbiit no knar ba Tribunal ida atu fo “punição” (hanesan crime). Nudar regulamento ida, nia iha deit kbiit (fo knar ba CNE) atu halo de’it “correção” – katak, hahalok balun iha eleição nia laran la tuir ona espírito lei eleitoral nian. Ne’e duni, Presidente CNE ka ha’u “fo hanoin de’it”! Maibe, wainhira candidato ka partido político lakohi tuir mak ha’u dehan  katak na’i-ulun partido político sira la’os labarik ki’ik para CNE mak hanorin fali kona ba lei no regulamento eleitoral.

            Iha contexto ida ne’e, wainhira candidato sira iha campanha nia laran mak hasai liafuan kroat ka ataca malun, CNE fo hanoin de’it kona ba regulamento. Iha neba hateten katak (art 13^o):

1.       Durante a campanha eleitoral é proibido o uso de linguagem oral ou escrita (= wainhira iha campanha eleitoral nia laran labele hatene liafuan ka hakerek):

a)      Atentatória contra as instituições do Estado e a unidade da Republica Democrática de Timor Leste (= hakarak atu contra Estado ninia ai-rin no unidade RDTL nian). Exemplo, wainhira candidato balun ka ninia ema sira usa liafuan “Loromonu hasoru Lorosae” (tan halo ema hanoin fali crise 2006; haluha tiha katak iha tempo neba sira mak kaer ukun), “Militar ditadura”; “Otonomista iha candidato X nia kotuk”; ... nst!!!

b)      Incitadora da violência (= hamanas atu mosu violência), hanesan dehan se la manan, crise sei mosu; hakerek liafuan tolok aat iha didin-lolon hasoru candidato balun hodi hamosu violência; ataca no tuda uma população ka ataca convoi candidato sira nia ... iha categoria ida ne’e ita bele dehan katak dala ruma Radio partido nian mos hasai liafuan kroat nebe “violenta” ema nia tilun no fuan, hamosu ódio no vingança.

c)      Difamatória em relação a qualquer cidadão, candidato, partido político ou coligação partidária (= hafoer ema nia naran hasoru cidadão, candidato, partido ka coligação partidária); exemplo di’ak liu mak wainhira candidato ida dehan ida “la escola boot” (pendidikan rendah), seluk hatan “la’os Doutor deit mak bele manan funu”; “partido X otonomista deit mak nakonu – partido Y mesak mak defende ukun rasik an” ...

d)      Discriminatória em relação à raça, ao sexo, à ideologia, à crença religiosa, à posição social e a qualquer facto que atente contra os direitos humanos  (= discrimina ema seluk tuir raça, sexo, ideologia, ninia fiar religião, posição iha sociedade nia laran nebe contra direito humano). Parte ida ne’e la dun mosu barak.

Buat hirak ne’e hatada ona iha regulamento ba campanha eleitoral. Candidato sira no ninia equipa hatene ona. Nu’udar ema nebe povo sei fo fiar atu kaer knar Estado nian atu ukun Nação ida ne’e, sira hatene hotu buat hirak ne’e. Wainhira sira lakohi halo tuir, ida ne’e la’os ona CNE mak atu hanorin. Sira nu’udar elite, katak, matenek nain neon matak malirin hatene hotu ona sasan hirak ne’e.

“Bispo sira = Team Suksesu ba LO?”

            Uluk, wainhira candidato TMR nia apoiante (husi Na’i Feto no Cristo Rei) lori sira nia símbolo, Presidente CNE mak halo declaração. Nia halo los ona, tan regulamento dehan: “É proibido a candidatos, partidos políticos e coligações partidárias utilizar linguagem e identificar-se com crenças religiosas e seitas” (art 13^o no. 2). Nune’e mos, wainhira candidato Dr. Ramos Horta tau foto hamutuk ho Amo Papa Bento XVI, CNE hato’o ona nota hodi “fo hanoin”, katak, ida ne’e la tuir regulamento. Iha campanha eleitoral liu ba, ba candidato Fernando Lasama ninia equipa suksesu, ha’u mak husu atu labele halo campanha iha Campo Futebol Manatuto nian tan iha recinto Igreja Católica! Iha Baucau, LO halo campanha iha Missão Salesiano nian. Ha’u hatoo ba Presidente CNE atu haruka nota ba candidato ne’e.

            Wainhira Candidato LO nia equipa suksesu halo publicidade foto ho Bispo 3, tuir regulamento ida ne’e labele mosu. Dala ida tan: regulameto dehan “é proibido” (dilarang). Jornalista ida husi Diário Nacional husu, “Amo, keta Bispo sira sai fali equipa suksesu candidato FRETILIN nian karik?” Jornalista iha liberdade atu husu Comissário nebe deit; bele mos husu nafatin ba Presidente CNE. Maibe, iha loron ne’e kebetulan sira husu ha’u nia hanoin, tan dehan katak ha’u representa Igreja Católica iha CNE nia laran. Atu dehan uluk lai, katak, artigo 13^o no. 2 mosu (ha’u mos fo suporta maka’as ba artigo ida ne’e), tan iha eleição 2007, Candidato sira seluk (Fernando La sama de Araujo no Lucia M. Lobato) hatoo protesto kona ba Dr. Ramos Horta nebe hatudu ninia foto ho Amo Papa Bento XVI. Tuir ha’u nia hanoin, iha democracia nia laran ema bele usa símbolo religioso atu hatudu sira nia identidade rasik. Iha Indonésia, ema Islam usa sira nia símbolo religioso atu hari partido no halo campanha. Maibe, iha Timor Leste maski maioria católico ha’u prefere atu labele partidariza Igreja Católica.

            Relaciona ho Amo Bispo nia foto ho Candidato ida, ha’u fo hikas esclarecimento foun nian baseia ba Direito Canônico (DC art 285^o § 3; art 287^o § 2) nebe halo “proibição” (larangan), maibe mos “permissão” (izin) ba Amo-lulik ka Amo Bispo (titular boot liu) atu tama iha política.

Ida uluk (1), kona ba “proibição”  – ministro ordenados (Bispo no Padre) la bele (ka, bandu) sai nu’udar team sukses ka dirigente partido ruma (inclui sindacato ruma). Ne’e duni, wainhira candidato ida de propósito (secara sengaja), usa Amo Bispo nia foto atu halo campanha hodi fo hatene katak Bispo sira fo “apóia” tomak, ne’e katak bele hatama Bispo sira iha “causa”. Ema bele desconfia duni Bispo sira halo “contrato político” ho partido ruma. Maibe, wainhira Bispo sira la hatene, depois mak Candidato la husu licensa, ne’e katak “instrumentaliza” (manipula) Bispo sira atu manan poder. Uluk, iha 1982/83 wainhira Dom Martinho da Costa Lopes halo encontro sub-subar ho Xanana Gusmão iha Mehara, ABRI nia Intel bele hatene no kesar nia ba Vaticano (hanesan mos wainhira Dom Martinho ko’alia maka’as hasoru Orde Baru Soeharto). Nu’udar resultado, Soeharto no ABRI hato’o keixa no reclamação ba Vaticano, hodi nune’e Dom Martinho husik hela Timor Leste! Nia ho fuan boot simu, tan ninia “fiar” no “obediência” ba Amo Papa no ratio legis (razão legal) iha Igreja Católica nia laran. Dom Martinho ninia experiência hatudu oinsa mak iha nia moris laran mosu conflito de interesse nia laran, maibe liu-liu iha conflito moral nia laran wainhira ita temi kona ba “guerra justa” ka “just war” (ius in bello ka “justo iha funu laran” hasoru malu ho ius ad bellum ka “justo ba halo funu”). Ikus mai, nia mate iha Lisboa no la iha ema ida mak tau matan (so sarani ki’ak balun mak fo tulun), sa tan partido nia ema sira nebe uluk halai ba Portugal. Livro husi Rowena Lenox kona ba “Fighting Spirit of East Timor” (2000) hakerek frase ida nune’e ... “The story of Dom Martinho’s last days is one of exile and loneliness”.

Nune’e mos, Dom Carlos F.X. Belo, SDB iha momento barak hamosu conflito de interesse ho Vaticano. Iha caso ida ne’e, Dr. Mari Alkatiri bele los wainhira dehan “Bispo ne’e Vaticano mak hili, nia halo tuir Vaticano nia hakarak; ha’u povo mak hili, iha ne’e ha’u mak manda”. Hanesan ita hatene mos, katak, iha 1988 Amo Belo hakerek carta atu husu “referendum”! Jendral Beny Moerdani dehan kedas iha media nacional no internacional katak “Uskupku yang bloon” (my stupid Bishop). Tan, na’i-ulun político sira hakarak atu Bispo halo tuir deit Vaticano. Iha momento ida Amo Belo sente “terrorizado” (tauk la halimar), tan Beny Moerdani bele “joga” atu hasai tan Dom Carlos husi Timor Timur. Maibe, ikus mai Vaticano aprende husi “manipulação” (Militar Indonésia) nian, sira fo “suporta” (secara halus) ba Amo Belo (wainhira ukun an tiha, nia tem que hakruk ba Vaticano hodi husik hela Timor Leste wainhira política nain balun “desagrada” ho ninia hahalok). Padre sira iha Timor mos fo suporta maka’as ba nia (maski uluk sira laran moras tan Dom Martinho sai derepente deit). Militar Indonésio balun tensaun sae dehan “keluar dari mulut singa, masuk mulut buaya” (sai husi leão nia ibun, tama lafaek nia ibun), katak, haksoit sai husi Dom Martinho nia ibun, akasoti tama pali Dom Carlos nia ibun.

Agora, wainhira Bispo na’in 3 nia foto sai hanesan “proponente” ba Candidato ida, ne’e mos bele hatama Bispo sira iha “rai ku’ak laran”. Hela aat, tan Bispo sira la hatene katak líder sira visita, la’os tan laran diak, maibe tan politika. Maibe, furak tebes, katak, Dom Basílio do Nascimento, Dom Alberto Ricardo no Dom Norberto la halo reação tan sira hatene katak bele hamosu polemica naruk ho Amo Papa. Ita labele halo ema seluk sai “vitima” tan deit hakarak atu kaer ukun. Sa tan halo Bispo sira sai “vitima”, afinal Igreja Católica iha Timor Leste ba ema sarani hotu iha Timor Leste. Ne’e duni, ita hatene ka lae, maibe ida ne’e katak “violência” hasoru dignidade Bispo sira nian. Liu-liu wainhira visita ba Bispo sira ne’e hanesan “visita de cortezia” (Islam sira karik dehan silahturami), la’os visita política de’it. Ka visita LO ni’an ne’e hanesan “política de’it” atu nune’e bele transforma ba campanha política, no la’os tan nia sarani ida? Bele hotu! LO bele visita nu’udar líder político (hanesan TMR halo bebeik, nune’e mos Dr. Ramos Horta), no nu’udar sarani. LO iha direito. LO iha duni laran diak atu halo ida ne’e (atu bele hadi’ak fali relação ho Igreja Católica, liu-liu tan uluk kedas relação entre Igreja Católica no FRETLIN hamosu “fuan kanek” barak iha passado; caso ikus liu, wainhira Deputado Arsênio Bano dehan “bispo sira ba diskoteca, sarani sira hare”, nebe halo Dom Basílio no Dom Ricardo tersinggung maibe la halo reação iha publico nia let). Maibe, wainhira sai mos hanesan “instrumento” ba “publicidade” iha campanha eleitoral, ne’e hanesan viola Regulamento ba Campanha Eleitor art 13^o nian. Nune’e mos bele hamosu conflito entre Bispo sira ho Vaticano, tan Vaticano labele simu wainhira “titular Igreja particular” (katak Bispo) halo favoritismo ba candidato ka partido ida de’it. Hanesan wainhira ema dehan Bispo sira mak apóia PUN, ha’u mak halo esclarecimento eleitoral katak ne’e la los!

Keta halo, wainhira ka’er tiha ukun ema bele dehan LO ne’e hanesan PR ba Igreja Católica deit no la’os ba Islam sira ka Protestante sira. Bele hamosu confusão boot fali, tan iha FRETILIN nia laran mos Islam no Protestante mesak boot deit. Maibe, ema bele dehan mos, LO ne’e PR ba povo tomak no defende mos direito minoria (Islam no Protestante nian) nune’e agora kaer tiha ukun la precisa tan ona Igreja Católica. Confusão tan fali ona: kaer tiha ukun, haluha tiha Igreja nia kosar-wen. Susar be?! Caso sira nebe ha’u hatur iha leten hatudu deit oinsa mak Dom Martinho mate mesak, Dom Carlos sai husi Timor no ikus dehan fali Bispo sira ba discoteca tan iha susar nia laran, política nain sira husu tulun ba Bispo, diak tiha hateten at sira. Ne’e la educa povo iha nation building no state building nia laran! Ne’e la’os educação di’ak iha character building nia laran.

Tuir mai (2) permissão – katak, wainhira “titular eclesiastica” (Bispo) ida fo knar ba Amo-lulik ruma atu tama iha política atu halo/ defende interesse Igreja Católica nian, liu-liu hatada ba princípios hanesan “bem comum”, “solidariedade”, “subsidiaridade”, no “justiça e paz”. Exemplo, uluk Pe. Jovito do Rego iha CAVR; agora Pe. Rui Gomes iha F-FDTL no Pe. Nelinho iha PNTL nia laran. Knar iha CNE ne’e ha’u hetan tan Bispo sira mak haruka no tan lei kona ba Órgão da Administração Eleitoral (Lei no. 5/ 2006; junto Lei no. 6/ 2011) Timor Leste mak husu. Nune’e, wainhira Candidato ida usa Bispo na’in 3 nia foto atu hala’o campanha, ha’u iha obrigação atu defende Igreja Católica nia líder atu ema labele “instrumentaliza” Bispo ba atu halo competição eleitoral. Kebetulan – equipa suksesu husi FRETILIN mak halo (hanesan uluk Dr. Ramos Horta no TMR nia team halo). Kebetulan mos media balun halo pergunta ba ha’u. Iha razão 2 nebe ha’u usa: (a) ha’u iha obrigação tuir knar CNE atu halo “esclarecimento objetivo” no (b) tuir “obediência” atu defende Bispo. Ne’e duni, iha CNE ha’u hala’o knar Estado nian husi parte Igreja Católica nia contribuição. Exemplo, atu hala’o “Pacto ba Eleição Pacifica 2012”, Igreja Católica fo contribuição forte no suporta maka’as ba CNE, líder hotu no partido político tomak. Ne’e los!!! Maibe, atu fo de’it ba partido ida, ne’e sala!!!

Atu reafirma de’it katak, Bispo sira ne’e hanesan líder no símbolo religioso ba maioria absoluta povo Timor Leste nebe católico. Estado Timor Leste ne’e estado laico. Maibe, nação Timor Leste ne’e católico, tan maioria povo ne’e fiar iha religião católica. Nune’e, wainhira Bispo sira nu’udar “titular” (líder maximo) iha Igreja Católica halo afiliação política, sira viola ona DC. Maibe, wainhira candidato/ partido balun usa sira nia “imagem” (fotografia) nu’udar símbolo ba campanha eleitoral, ne’e hanesan viola ona lei no regulamento eleitoral nian. Hela diak liu, wainhira política labele instrumentaliza Igreja Católica.

Ne’e duni, la iha hanoin atu ataca ka hatun Candidato LO no FRETILIN. Buat nebe Presidente CNE Dr. Faustino Cardoso Gomes hatoo ba TMR no Dr. Ramos Horta ho ha’u hatoo ba LO, simplesmente atu “fo hanoin” kona ba regulamento.

Constituição RDTL nian dehan, “O Estado promove a cooperação com as diferentes confissões religiosas, que contribuem para o bem-estar do povo de Timor Leste” (art 12^o no. 2). Ne’e duni, se hakarak hasai “foto”, hela di’ak mos wainhira LO hamutuk ho Islam no Protestante no Seitas sira. Labele Bispo de’it. Se lae, ne’e bele mos hamosu “laran moras” husi Islam, Protestante no Seitas (barak) iha Timor Leste, no halakon unidade nacional. Maibe, ha’u la sugere atu halo foto ho Seitas. Basa, ida ne’e hamosu fali conflito ba Católico, Protestante no Islam. Ne’e duni, hela furak wainhira candidato hotu-hotu halo promoção kona ba tolerância inter-religioso, hodi hasai foto bara-barak ho Islam, Protestante. Labele Católico mesak de’it, depois husik fali Seitas bara-barak tama Timor Leste atu fo “sobu” sarani sira iha Igreja nia laran, hanesan deit?!

*) Hakerek nain – Comissário Representante Igreja Católica iha CNE; Coordenador ba sub-comissão EDUCAÇÃO ELEITORAL