VISAO MISAO OBJECTIVO SPORTIMOR FH KKN HOME FH LPV ARTIGOS FH MUZIKA LIA MENON FH RESPONDE

quinta-feira, 26 de abril de 2012

HUSI UNIVERSIDADE KRISTAL BA DILI INSTITUTE OF TECHNOLOGY


Tinan 10 DIT (10 Maiu 2002 – 10 Maiu 2012)
HUSI UNIVERSIDADE KRISTAL BA
 DILI INSTITUTE OF TECHNOLOGY
Estanislau S. Saldanha
* Reitor DIT, Koordenador Fundasaun DIT ho Membru Fundador DIT

Dili Institute of Technology (DIT) harii iha loron 10 Maiu 2002 hanesan instituisaun ensinu superior privadu ho non-profitu nebee oferese edukasaun, formasaun, peskiza ho servisu komunitariu iha Timor Leste. DIT mosu husi inisiativa husi Fundasaun Kristal nebee hakarak loke Universidade Kristal. Nunee Fundasaun Kristal husu Estanislau S. Saldanha sai konsultor hodi fasilita harii universidade nee. Iha tempu nebaa, Estanislau rekomenda ba Fundasaun Kristal hodi loke deit institutu ida ho naran Dili Institute of Technology (DIT), ho argumentu katak naran “Dili” fasil ba ema atu hanoin hetan, asosia ho komunidade Dili, no Timor Leste presiza duni institutu teknolojia ida nebee halao atividade hanorin, formasaun, peskiza ho servisu komunitaria iha area teknolojia, jestaun, komersiu, minarai ho turismu. Nunee bele tulun haforsa konyesimentu ho abilidade foin sae sira, tulun kresimentu ho ekuitabilidade ekonomia, haforsa kompetitividade nasional, i promove kultura ho identidade nasional Timor Leste nian.
Durante tempu preparasaun atu harii DIT, iha Grupu Trabalyu (kompostu husi João Câncio Freitas, PhD, Estanislau S.  Saldanha ho Hipolito Aparício) ho Fundasaun Kristal kona ba oinsaa jere institutu. Maibe too iha klaran, iha diferensa hanoin entre Grupu Trabalyu ho Fundasaun Kristal oinsaa jere DIT. Liu-liu Grupu Trabalyu hanoin katak DIT tenki jere hanesan instituisaun akademiku profesional, komunidade nian (community based institute), non-profitu, no fundador sira la bele fahe malu saham/profitu no la bele hetan osan ka salariu. Fundador sira so bele hetan salariu bainhira servisu no halao atividade operasional DIT nian. Osan nebee hetan husi DIT tenki reinvesta duni hodi hadia kualidade DIT nian. Nunee Fundasaun so fasilita harii DIT; hotu tiha, fundador sira hotu tama iha Board of Trustees hanesan membru permanenti. Board of Trustees nee sei iha mos repezentasaun husi igreja, universitariu, setor privadu, antigu alunu salesianu, organizasaun feto, staf, alumni ho estudante DIT. Diferensa hanoin konaba jestaun osan la konsege rezolve.  
Nunee membru Grupu Trabalyu ho membru Fundasaun Kristal balu (Agostinho Goncalves, Anselmo da Conceicão, Antonio Ximenes ho José Barreto) hamutuk hodi konvida Sra. Kirsty Sword Gusmão (Prezidenti Fundasaun Alola), ho Asosiasaun Veteranu Rezistensia nian (AVR) nebee reprezenta husi Dr. Paulo Assis Belo hodi harii Fundasaun DIT (F‑DIT) nebee sai sumbrinya ba Dili Institute of Technology (DIT). Fundasaun nee nia lider primeiru mak Estanislau S. Saldanha, no Sekretariu Anselmo da Conceicão (membru veteranu ho Fundasaun Kristal). Iha tempu nee Membru Fundador F-DIT mos desidi hodi hili no foti Sra. Kirsty Sword Gusmão hanesan Prezidenti Board of Trustees nebee nia membru balu hanesan Dom Carlos Ximenes Belo, SDB (Bispu Dioseza Dili iha tempu nebaa), Joao Mariano Saldanha, PhD, Helder da Costa, PhD, Edmundo Viegas, PhD, Milena Pires, Oscar Lima, Jorge Serano ho Americo Ferrojota. Nunee mos fundador sira mos foti Sr. João Câncio Freitas, PhD sai nudar Reitor DIT ba Periodu 2002-2006. Iha nee, F-DIT mos hatama dokumentu ofisial ba Ministeriu Edukasaun ho Tribunal Dili hodi loke dalan atu DIT bele halao nia atividade akademiku formal iha Timor Leste. Loron 10 Maiu hanesan loron moris DIT nian tanba iha loron nee Sua Exelencia Kay Rala Xanana Gusmão, nudar Prezidenti AVR, inaugura Dili Institute of Technology (DIT) hanesan instituisaun ensinu superior ida iha Timor Leste.    
Bainhira foin harii, DIT iha fakuldade (school) rua: (1) Fakuldade Enjenyaria ho Siensia (School of Engineering and Science) ho Departamentu Enjenyaria Sivil ho Enjenyaria Mekaniku; ho (2) Fakuldade Jestaun ho Komersiu (School of Business and Management) ho Departamentu Jestaun Rekursu Natural, Jestaun Turismu, ho Jestaun Publika. Momentu nebaa, numeru estudante besik 300, ho staf permanenti 8. Iha tempu nebaa DIT falta fasilidade hodi hanorin. DIT marka nia atividade primeiru iha uma ida iha Bebora, Dili, nebee hetan ona reabilitasaun hosi AVR. Uma nee kuartu tolu, sala ida ho sala hanorin ida. Antes hahuu atividade hanorin, DIT hetan mos fatin ida iha Eis Asrama Brimob Bairro Pite, Dili, no husu lisensa ba governu hodi uza fatin nee ba tinan lima. Nunee DIT foufoun hahuu hanorin iha kampus Bairro Pite ho  Bebora Dili ho fasilidade ho staf nebee menus tebes. Iha tempu kuaze hanesan, komunidade Oecusse via Jose Anuno ho João Muni mos hakarak loke Knua (Kampus) Rejional DIT nian iha Oecusse. Nunee DIT mos loke nia kampus rejional Oecusse iha tinan 2002. No prepara loke nia knua regional Baucau hodi oferese formasaun konstrusaun sivil ba veteranu ho foin sa’e sira iha parte leste.
Bainhira harii tiha, DIT hetan fiar ho tulun husi Victoria University, Australia. Universidade nee tulun fasilidade hanorin hanesan komputador, fotokopia, meza, kadeira, ho livru ba biblioteka. Sira mos halo formasaun ba staf DIT hamutuk nain walu iha Melbourne, Australia. ANZ Australia mos tulun komputador hodi harii lab komputador. Tuir mai DIT hetan tulun husi Canberra Institute of Technology (CIT), Australia, ho Rotary Club iha Melbourne. Nunee mos USAID/OTI oferese laboratoriu lingua, livru, projetor LCD, fotokopia ho motor.
Iha tinan 2004, DIT sosa rai besik hektar haat iha Aimutin, Dili, ho fasilidade kreditu husi Bank Mandiri Dili. Depois Governu Inglatera, Australia ho Nova Zelandia tulun hodi harii uma tolu hodi fasilita Fakuldade Enjenyaria ho Siensia (School of Engineering and Science) muda uluk ba knua foun nee iha tinan 2005. DIT mos harii Sentru Formasaun Auto-mekaniku nebee hetan tulun husi Governu Nova Zelandia ho Canberra Institute of Technology (CIT) Australia. DIT mos hetan suporta staf internasional husi Australian Volunteers International, Australia ho Volunteers Service Abroad, Nova Zelandia hodi tulun kapasitasaun staf iha area turismu, jestaun finansa, biblioteka, dezenvolvimentu kapasidade institusional, ho auto-mekaniku.
Iha tinan 2006, krizi politika mosu iha Timor Leste. Ida nee halo Timor oan barak terus, balu mate no barak lakon sasaan. Hanesan instituisaun ida iha Timor Leste, DIT mos nakdoko no la halao nia atividade, so Knua DIT Rejional Baucau ho Oecusse mak lao nafatin. Ho grasa Maromak no tulun husi komunidade nian, maske instituisaun ensinu superior barak iha Timor Leste lakon nia propriedade ho fasilidade hanorin, maibe DIT laduun lakon nia fasilidade hanorin. Maske nunee, DIT nia staf la bele servisu i estudante sira la bele eskola tanba seguransa laduun diak. Nunee estudante barak muda nia eskola ba universidade iha Indonezia. Iha Outubru 2006, foin hahuu prepara atu estabelese fila fali DIT iha Dili. Iha Novembru 2006, DIT hahuu fali atividade hanorin ho numeru estudante 186, ho staf limitadu. Nunee mos Estanislau S. Saldanha sai hanesan Reitor Interinu tanba João Câncio Freitas, PhD nia knaar nudar reitor hotu ona, no liu tiha krizi nia halao fali servisu seluk iha Projetu AUSAID. Iha tinan nee, estudante hotu la selu osan eskola tanba sira hotu hetan bolsa estudu husi DIT Solidarity Group ho Xanana Vocational Trust iha Australia.
Iha Outubru 2007, Board of Trustees foti Estanislau S. Saldanha hodi sai Reitor definitivu DIT nian ba periodu 2007-2011, no re-eleitu fali ba periodu Novembru 2011- Novembru 2015. Iha tinan 2007, DIT mos harii tan fakuldade rua: Fakuldade Turismu ho Ospitalidade (ho Departamentu Jestaun Tour and Travel, no Jestaun Otelaria) no Fakuldade Estudu Petroliferu (ho Departamentu Jestaun Petroliferu no Enjenyaria Petroliferu). Iha tinan 2008, DIT hetan akreditasaun husi Governu Timor Leste, bazeia ba avaliasaun husi peritu internasional sira. Iha prosesu nee, DIT hetan valor 92.88%. Iha 29 Novembru 2009, DIT halao graduasaun primeiru ho graduadu hamutuk 88. Too agora, DIT halo ona graduasaun badatoluk.
Agora DIT hamrik metin ona hanesan instituisaun superior privadu, non profitu ho akreditadu iha Timor Leste hodi dezenvolve siensia ho teknolojia, no oferese edukasaun, formasaun ho peskiza nebee kualidade ho relevante hodi serbii povu ho nasaun doben Timor Leste. Too Marsu 2012, estudante DIT liu ona 2000 no staf permanenti ho non permananeti liu 150.
DIT hanesan instituisaun ensinu superior ida iha Timor Leste nebee nia staf servisu permanenti iha DIT sein halao atividade iha instituisaun seluk iha oras servisu, maske sira hetan salariiu ida kiik. DIT mos instituisaun primeiru nebee introdus sistema trimestral hodi garante kualidade ho sustentabilidade operasaun, no posibiliza estudante hodi estudu hotu lalais. Nunee bele prienxe merkadu servisu nebee aas iha area nebee DIT oferese.
DIT mos hetan rekonyesimentu husi merkadu servisu, industria ho instituisaun akademiku internasional via dezenvolvimentu kooperasaun externa nebee intensivu ho metin liu tan iha area oi-oin via asinatura nota intendimentu oi-oin ho instituisaun sira iha Timor Leste, Australia, Indonezia, Nova Zelandia, Amerika ho Portugal. Ba oin DIT buka avalia nafatin nia standar, kurikulu, metodu hanorin ho avaliasaun atu hametin nafatin nia kualidade hodi responde ba ejizensia merkadu servisu ho pratika iha industria nebee dinamiku. Mos buka kompatibiliza nia sistema ho prosesu hanorin tuir pratika instituisaun ensinu superior iha rejiaun nee. Avaliasaun kontinuada nee halao ho parseria staf, estudante, governu, industria, seitor privadu, ho instituisaun ensinu superior seluk. 
DIT mos halao peskiza ho formasaun profesional iha area oioin iha Timor Leste. Atividade nee finansia ho servisu parseria ho Banku Mundial, USAID, AUSAID, British Council, NZAID, CIDA, IRI, the Asia Foundation,  JDRAC-Japaun, UNICEF, Victoria University, Australia, NORPLAN-Norway, The Box Hill Institute of TAFE, Canberra Institute of Technology, Australia, Universitas Dhyana Pura-Bali, Indonesia, Rotary Club Melborune, Shell Foundation, Xanana Vocational Trust, the University of Western Australia, Engineers Without Borders ho ConocoPhillips.  
Ba oin DIT sei kontinua review nia standar, kurikulu, metodu hanorin ho avaliasaun hodi responde ba ezizensia merkadu servisu, industria ho kompatabiliza nia kursu ho pratika instituisaun akademiku iha rai seluk. Nunee mos kontinua haforsa kapasidade staf nian, no hadia fasilidade hodi hametin kualidade akademiku iha DIT.
Buat sira nee hotu bele akontese tanba grasa wain Aman Maromak, tulun Matebian sira, ho suporta povu doben Timor Leste, no servisu disiplina, dedikasaun aas ho kohesiva familia boot DIT nian. HABURAS HO HAMETIN SIENSIA, TEKNOLOJIA HO FIAR HODI SERBII HO DIGNIDADE POVU HO NASAUN, nee mak tema selebrasaun dekada ida DIT iha 10 Maiu 2012. Atu selebra Dekada Ida DIT, Amo Bispu Dioseza Dili, Dom Alberto Ricardo konfirma ona atu halo misa agredesimentu iha 10 Maiu 2012 (09.00 dader) iha Knua DIT. Parabens.*

Sem comentários:

Enviar um comentário

Nota: só um membro deste blogue pode publicar um comentário.