VISAO MISAO OBJECTIVO SPORTIMOR FH KKN HOME FH LPV ARTIGOS FH MUZIKA LIA MENON FH RESPONDE

quarta-feira, 28 de março de 2012

“Comportamentos Eleitorais”: “Voto Sincero” vs “Voto Estratégico”


 “Comportamentos Eleitorais”:
 “Voto Sincero” vs “Voto Estratégico”

Martinho G. da Silva Gusmão

Lei eleitoral ba Presidente da Republica nian (LEPR), la dehan katak candidato ba PR mai husi partido, maibe mos la bandu wainhira partido ruma hatoo sira nia candidato rasik. Tan ne’e ita bele hasoru candidato sira husi partido, mak hanesan – Manuel Tilman (KOTA) Francisco Guterres “Lu-Olo” husi FRETILIN; Francisco Xavier do Amaral husi Bloku Proklamador (mai husi ASDT, PMD, PDRT; ikus mai “cancelado”); Francisco Gomes husi PLPA; Abílio da C. Abrantes de Araujo (husi PNT); Jose Luis Guterres husi Frenti-Mudansa; no mos Fernando La sama de Araujo husi PD. Candidato sira “independente” mak hanesan – General Taur Matan Ruak; Rogério Tiago F. Lobato; Maria do Céu L. Da Silva; Angelita Maria Francisca Pires; Jose Ramos Horta no Lucas da Costa.
Halo tiha apuramento nacional, Comissão Nacional de Eleições (CNE) hato’o ona ba Tribunal de Recurso, katak, candidato husi partido FRETILIN, Francisco Guterres “Lu-Olo” (ho voto 113, 635 ka 28.76%) no candidato independente General F-FDTL Taur Matan Ruak (119,462 ka 25.71%) mak hakat ba eleição daruak. Candidato sira seluk nebé bolu ita nia atenção mak Dr. Jose Ramos Horta (actual PR) ho voto 17.48% no Fernando de La sama Araujo (actual Presidente PN) ho voto 17.30%. Sira bele fo diferencia ba eleição daruak.
Loron hirak ne’e, candidato Ramos Horta no ‘La sama’ mak halo move no bolu ita nia atenção. Husi declaração ida ba declaração seluk, ita hein nafatin oinsa mak sira hakotu lia. Maibe, husi resultado nebé iha ita mos bele sukat comportamento eleitorais husi “eleitor” no “candidato” sira. Ne’e duni, ita rona “candidato” sira nia liafuan ne’e los, maibe mos buka hatene “eleitor” sira nia “lian” (aspiração, mehi no hakarak) ne’e mos los. Alvin Goldman nia hakerek “A Causal Responsibility Approach to Voting” (2002); K. Bawn nia hakerek 2: “Strategic Voting in an Old and a New Democracy” (1999) no “Voter Responses to Electoral Complexity” (1999) bele fo naroman mai ita atu hanoin saida mak mosu iha eleicao presidencial 17 de Março de 2012 liu ba.

Oferta husi Candidato/Partido no Resposta husi Eleitor

            Baibain ita dehan eleição hanesan “festa democracia”. Maibe, festa ne’e bidu-haksoit, han-hemu-hamnasa mak barak. Buat ida mak ema la halo iha festa laran mak tur hamutuk atu hanoin no ko’alia kona ba saida mak sira hakarak no mehi kona ba loron aban nian. Eleição ne’e hanesan lala’ok nebé maka’as liu festa, tan ema hakarak haré ba loron aban nian atu sai oinsa lerek. Atu ema bele haré didiak, sira rona no haré tuir sasukat sira hanesan: (1) “identificação ho partido”; (2) “temática relevante” sira; no (3) “personalidade” husi candidato (ka, iha psicologia dala ruma ema dehan “sex appeal”, ka carisma).
Ida uluk (1), wainhira ita hakarak haré ba identificação partido nian, mosu kedas figura na’in hat: Francisco Guterres Lu-Olo (FRETILIN), Fernando La sama de Araujo (PD), Jose Luis Guterres (Fenti-Mudansa), Manuel Tilman (KOTA) no Francisco Gomes (PLPA). Ho efeito tomak nebé ema hatudu, FRETILIN dala ida tan defini ona sira nia lócus classicus iha Baucau, Lospalos no Viqueque maski hetan mudansa oituan iha fatin seluk, liu-liu Suai. Husi biban seluk, PD tuba metin iha Ainaro, maibe halo “expansão” no loke oituan-oituan sira nia toos no natar ba fatin seluk. KOTA no PLPA, ho problema internal labele halo buat ida.
Tuir mai (2), ita haré kona ba temática sira nebé relevante, dala barak luan no complexa. La’os pacote ida nebé mais ou menos coerente no claro atu halo política publica ruma. Ho candidato bara-barak, sira tun ba base atu halo campanha. Buat hotu mesak furak, funan-renda, midar-sin ...! Dala ida rua, candidato sira hatama ho ai-manas lotuk oituan.
Maibe, keta haluha katak, resposta husi eleitor sira mos la’os simples. Iha sasukat 2 atu hatene resposta husi eleitor sira mak “voto retrospectivo” no “voto prospectivo”. Wainhira temi “voto retrospectivo” halo ema hanoin hikas lala’ok uluk nian husi candidato sira, bele to’o iha sira nia ligação ho governo. Wainhira ko’alia kona ba “voto prospectivo” halo ema atu haré ba loron aban bainrua nian, oinsa mak candidato sira liga ho governo no saida mak sira sei halo ba desenvolvimento. Resultado nebé ita hetan, hatudu ona oinsa mak ema haré kona ba sasukat 2 ne’e. Candidato sira hanesan Lu-Olo, Taur Matan Ruak, Ramos Horta no Lasama ninia voto barak ka oituan hatudu ona oinsa mak resposta husi eleitores ba sira nia lia-fuan no lala’ok iha campanha nia laran.
Ikus liu (3) mak personalidade husi candidato ida-idak. Resultado hatudu katak Francisco Guterres “Lu-Olo”, Taur Matan Ruak, Jose Ramos Horta no Fernando La sama de Araujo hetan nafatin resposta positivo.  Candidato na’in tolu (Lu-Olo, La sama no Ramos Horta) tama ona iha jogo tinan 2007, wainhira candidato Taur Matan Ruak fohin mak tama iha eleição 2012. Husi sira na’in hat ne’e, Lu-Olo hetan nafatin “voto” mais ou menos estável (iha 2007 ho 30.82%, iha 2012 ho 28.76%). La sama mos relativamente estável, tan iha 2007 nia hetan 19.17% no ba fali 2012 nia iha 17.30%! Maski iha mudansa, maibe sira nia discrepância numérica la (lakon) boot ida. Candidato Jose Ramos Horta mak hetan mudansa boot, tan iha 2007 ho 69.18%; iha 2012 ho 17.48%). Taur Matan Ruak hetan 25.71%, hatudu mos oinsa mak ninia personalidade sai sasukat atu eleitor sira tau voto ba nia.
Maibe, husi resultado ba votação nian, ita bele haré oinsa mak “vontade popular” ne’e hatudu nia an. Vontade popular ne’e bele mosu nu’udar “voto sincero” no “voto estratégico/ tático”. Maski haré ba simples hela, maibe di’ak liu ita hanoin didi’ak.

“Voto Sincero”: Tuba-rai metin

            Liafuan “voto sincero” hakarak hatudu katak eleitor sira hakarak de’it vota ba ninia candidato husi ninia partido. Iha ne’e ita bele hatudu ba candidato Lu-Olo husi FRETILIN no Fernando La sama de Araujo husi PD. Candidato 2 ne’e – di’ak ka aat – hametin ona sira nia base de apoio ba eleição hotu nebé sei mosu.
            Hanesan temi ona iha leten, voto sincero ba Lu-Olo dala ida tan redefini ninia lócus classicus (fatin baibain ona; “lumbung suara”) iha Baucau, Lospalos no Viqueque. Iha eleição 2007, Suai fo sira nia voto ba FRETILIN. Tinan 2012 mak candidato seluk foti tiha. Desafio boot nebé FRETILIN hetan mak sira “fera” oituan husi uma laran, husi kedas congresso 2006. Iha eleição 2012, mosu figura hanesan Rogério Tiago F. Lobato. Nia mesak de’it bele hasai 3.49% husi “uma laran”. Nune’e mos Frenti-Mudansa foti 1.99%. Husi ne’e mak voto ba Lu-Olo tun oituan se sukat ho 2007 nian. Maski nune’e, voto sincero nebé Lu-Olo/ FRETILIN hetan relativamente estável – 28.76%. Ho montante ida ne’e, FRETILIN defini ona sira nia forsa atu hasoru tan votação 2a ronda no mos eleição parlamentar iha fulan Junho tuir mai.
            Husi parte seluk, voto ba “La sama” mos defini ona militância husi geração foun ba partido foinsae sira nian. Iha eleicao 2007, La sama hetan 19.18%! Ba eleicao parlamentar, Partido Democrático 11.30%. Ba fali eleicao presidencial 2012, La sama hetan voto 17.30%. Ida ne’e de’it hatudu ona oinsa mak PD ninia militância hasoru mudansa, maibe mos redefini sira nia posição iha feira política nacional. Maski Maun Nando seidauk iha “sorte” atu hetan cadeira RDTL-1, maibe PD sai ona hanesan partido prometido, maski nakonu ho “foinsae” deit. Iha liafuan Latim dehan “per experimentum et probationem” (liu husi experiência no prova) PD sei bele la’o ba oin ho voto sincero nebé militante sira fo ba nia.
            Ita bele dehan, FRETILIN sukat ho ninia historia naruk iha luta nia laran, CNRT sukat ho Xanana Gusmão nia carisma. Maibe, PD halo ninia historia rasik, no sukat ninia recurso husi foinsae sira nia voto. Ho “voto sincero” nebé iha hela, PD bele ona sukat ninia forsa atu hasoru eleição parlamentar. Hanesan Presidente PD nian dehan “FRETILIN manan mos, PD ukun nafatin; CNRT manan mos, PD ukun nafatin”. Katak, iha eleição tuir mai, partido boot sira labele ona taka matan ba PD ninia potencia no energia. Maibe, PD mos sukat oinsa mak partido seluk tama iha “be merak laran”.

Voto Estratégico ka Voto Tático

Voto estratégico ka voto tático mosu husi eleitor nebé hanoin atu hili tuir sira nia “vontade popular” rasik. Ne’e duni, sira la haré no ba candidato ka partido rasik! Dala ruma, sira mos sei la hakruk ba “apelo” ka “aliança” nebe sira nia líder halo. Maski, eleitor sira bele mos sai hanesan militante ka simpatizante, adepto too diregente partido rasik, dala ruma sira bele hili “seluk” atu impende candidato/ partido rasik. Ho liafuan badak, voto estratégico/ tático dala barak mosu hanesan “move” ida atu impede candidato/ partido ruma atu manan.
Iha eleição 1a ronda, ita bele haré oinsa mak FRETILIN no PD hasoru “voto estratégico/ voto tático” (VE/VT) ne’e. FRETILIN hasoru kedas Rogério Lobato nian candidatura, Frenti-Mudansa ninia forsa no movimento internal nebé sei la simu sira nia lideransa rasik. Ida ne’e mak halo katak voto ba Lu-Olo la dun bok an ba oin hanesan 2007. Nune’e mos Lasama nia candidatura hetan desafio husi Prof. Dr. Lucas Rama-metan da Costa. Nia lori sai tiha 0.83% husi PD nia uma laran. Los duni, katak, numero ida ne’e oituan tebes, maibe professor ne’e hatudu oinsa ka saida mak voto estratégico ka voto tático ne’e ninia dinamika.
Ba fali eleição 2a ronda, VE/VT mosu liu husi “move” lubuk ida. Movimento hirak ne’e sei mosu hadulas no hale’u Lu-Olo no TMR, tan sira rua mak hakat ba votação iha fulan Abril (loron16) tuir mai. Bele dehan uluk ona, katak, Lu-Olo iha ona garantia ba 28.76% votos; no TMR 25.71%. Ne’e katak, hela 45.53% mak sai hanesan “zona livre” atu candidato na’in 2 ne’e bele buka dalan atu hetan. Hodi liafuan seluk, votante hamutuk 45.53% mak sei sukat saida mak VE/ VT ne’e. Nune’e mos, candidato Lu-Olo no TMR bele formula estratégia ka tática hodi bele hetan voto hirak ne’e.
Oinsa mak voto estratégico ka voto tático ne’e ohin loron la’o? Ida uluk (1), wainhira JHR no PD halo “aliança”, sira bele manobra 34.78% atu bele halo political bargaining ho candidato sira seluk, bele mos halo “boycotte” ka impedimento ba candidato balun atu manan, maibe mos atu loke dalan hodi fo voto ba TMR ka Lu-Olo. Dala ida tan, ne’e mak hanaran voto estratégico ka voto tático. Maski seidauk iha decisão lolos, maibe lia-anin hatudu ona katak sira atu fo voto ba Lu-Olo no FRETILIN. “Lia-anin” ne’e mak voto tático. Katak, hu-iis atu haré took oinsa mak reação husi FRETILIN rasik. Maibe mos hein took oinsa mak reação husi TMR. Ho ida ne’e, sira bele formula estratégia atu “fahe malu” poder. Iha Indonésia dala ruma mosu liafuan “politik dagang sapi” – hanesan ema fa’an karau, ne’e duni joga “folin” (karau bokur, folin boot; karau krekas folin baratu. Iha Timor: maski karau krekas, naran dikur naruk bele halo adat feto-san-uma-mane, folin sae maka’as). Maibe, iha Timor Leste mosu mos bloco seluk nebé halo “politik pedagang asongan” (katak, fa’an besi tua, fa’an surat tahan aat, fa’an kaleng restu, nst).
Tuir mai (2), tática nebé hanaran “crisis management” (Alvin Goldman) atu oinsa mak bolu “eleitor” sira nia hanoin atu decide didiak hodi fo sira nia voto. Iha ne’e Goldman kaer liafuan “crisis” la’os atu hamosu problema ka conflito, maibe atu fanu ema nia hanoin ka memória! Nia dehan katak liafuan “crisis” hatudu ba sentido foun: “to reason, to discern, to decide, to judge”. Maibe, nia mos dehan “crisis managment” mos atu halo ema fadigado ka atrapalhado. Iha bloco balun nebé hahu fo imagem la diak kona ba “militar” (hasai liafuan sira hanesan “usa farda nee halo tauk”, “teror”, “ditadura”, “ameasador”, “militar mak kaer ukun, nação sei sai aat”, “militerismo” no liafuan seluk tan) hodi hamosu “pânico” iha eleitor sira nia leet. Ida ne’e hanesan tática ida atu halo foer TMR nia imagem lori impede nia atu manan, basa nia mak usa “símbolo” nebé “livremente” (tuir lei) nia hola kona ba “militar”. Liu-liu atu fanu ema nia hanoin kona ba saida mak mosu iha 2006 (crise militar no política). Maibe, “bloco” ne’e rasik fase liman no fase oin, hanesan sira nia liman mos no laran mos (katak, kona ba crise militar 2006 ne’e sira uluk hela iha Lalehan ona, tan ne’e la iha sala; agora iha eleição 2012 ne’e mak sira tun mai rai atu haklaken damen no domin ba ema tomak nebé Nai Maromak hadomi). Ne’e duni, tática ka estratégia ida ne’e mosu atu confronta Lu-Olo no TMR. Maibe, too ohin loron candidato 2 (LO no TMR) ne’e rasik “taka ibun”. Nune’e mos, FALINTIL-FDTL no PNTL la hola reação, maski sira nia instituição mak sai hanesan “sasaran tembak”. So “bloco” mak halo ona campanha atu hodi “estabilidade” (damen no domin) nia naran, sira koko halo “instabilidade psicológica”. Balun mai dehan, “Amo, líder sira ne’e ohin dehan ida, aban ko’alia seluk ... ami agora hein deit atu halai ba Amo sira nia fatin hanesan uluk 2006 ne’e ona”; “Amo, ema sira be uluk halo politika iha rai-liur ne’e hatene hakail iha we-merak laran, sira kompak atu soran Lu-Olo no TMR, halo ita fuan kanek fali ...”!!!
Nota ki’ik ida: iha historia moderna, ditadura barak liu no “brutal liu” mak mai husi civil: Adolf Hittler, Lênin, Joseph Stalin, Mao Tse Tung, Pol Pot, Antonio Salazar, Soekarno no Ferdinand Marcos (atu temi deit balun nia naran), liu-liu dinastia Korea Sul (militar iha família nia liman laran) nebé hamosu sofrimento barak iha povo nia leet, kanek todan too ohin loron la kura. Militar oituan deit: Soeharto, Fidel Castro no Pinochet.
Nune’e mos (3), K. Bawn dehan katak iha demokrasia foun (nurak) mosu partido barak atu halo atrapalha deit. Partido ki’ik sira hahu halo “bloco” atu apoio Lu-Olo. Ida ne’e mos “strategic voting” ida atu Lu-Olo bele servisu maka’as, no partido ki’ik sira bele “numpang terkenal” liu husi “rombongan FRETILIN” nian; ka, hodi Mari Alkatiri nia liafuan “ROMANTIS = rombongan makan grátis”. Atrapalha, tan Lu-Olo ho Mari Alkatiri sei gasta tempo barak atu halo negociação política ho “romantis” hirak ne’e. Negociação la’o la di’ak, Lu-Olo sei lori naha todan barak. Negociação la’o diak atu fahe “poder”, Lu-Olo sei lori naha todan nafatin (wainhira eleito nu’udar PR foun). Ne’e mos hanesan estratégia ka tática ida atu oinsa mak “tulun malu atu manan”, maibe iha meja okos mos “fo liman ba malu” atu hetan netik ko’it oan ruma.
Ikus liu (4), K. Bawn dehan voto tático bele hamosu “complexity”, wainhira la haré didiak “floating mass” (massa mengambang). Ema hotu bele haré, katak, votante sira iha Timor Leste sei sukat “personalidade”, “programa” no “partido” nebe candidato sira hulan iha sira nia kbas leten. Agora ita hasoru ona candidato 2 nebé iha ona sira demarcação rasik: Lu-Olo husi partido FRETILIN, no TMR nudar candidato independente. Votante sira ne’e bele haré ba partido, bele mos haré ba ema, bele mos hatudu ba programa. Ninia resultado ikus nian, ita sukat la hetan. Tuir K. Bawn, iha “complexity” votante sira nia let, dala ruma resultado la sai tuir candidato nia “estratégia”. Ninia conseqüência, iha demokrasia tuan (an Old Democracy) nia laran, lakon ka manan sira bele simu malu nafatin; iha demokrasia foun (a New Democracy), manan deit mak diak, lakon mak mosu konflitu. Tan sa? Tan, wainhira atu manan “voto estratégico” ema sira nebé fo apoio ba candidato hakarak deit manan, no la prepara atu lakon. Ikus mai, sira fo sala ba ema seluk (liu-liu órgão eleitoral), maibe sira rasik dala ida tan fase liman no fase oin.

Liafuan ikus ...

            CNE halo ona “pacto ba eleição pacifica 2012”. Candidato balun nia ema mai dehan, “Ami la konfia ba saida mak CNE halo”. Maski, ema hotu iha rai liur “gaba mate-mean” CNE/ STAE nia serviço, tan organiza eleicao ida nebe pacifico teb-tebes iha Marsu 2012 ne’e, maski buat balun la’o la dun diak. Ohin loron, hare ona suksesu ida ne’e Deputado sira no nai-ulun político sira hahu sukit lia atu troka lei, kasu lia atu acusa CNE no STAE no seluk tan.
Husi biban seluk, ita nia candidato 2 – LO no TMR ne’e hemu hamutuk iha calis sofrimento ida hodi horuk sira nia mata-wen iha tinan barak nia laran, horon ho fuan ran sira nebé nakfakar naklekar iha Timor Leste tomak. Idealismo ida deit: povo nia soberania, povo nia dignidade. Uluk sira hako’ak kilat, taka farda nakles atu defende povo. Ohin loron, LO no TMR hasoru malu atu husu povo nia “voto”. Lu-Olo mak manan, hanesan Taur Matan Ruak mak manan; Taur Matan Ruak manan hanesan Lu-Olo mak manan. Maibe, ema seluk nebé hale’u sira mak agora toba la dukur, mehi la hetan atu oinsa mak hetan “poder” husi LO ka TMR nia luta no sofrimento. Ikus mai, se TMR mak ukun sira sei dehan “militar ditadura”, se Lu-Olo mak ukun sira sei dehan “civil ditadura”.
            Ita harohan ba Maromak deit atu tulun ita hotu, hasoru babeur husi ema sira nebé hanoin aat nação ida ne’e. Kaka’i anu-mai, fera ma rau-rau ena, rau-rau la’a. Anu-mai gi ga’a-wai anu-mata na le’e gi uaboku mutu-wee! Ta ge kol, ta ge sifa ... i anu-mai ho desara, mu’a falun Timor ere desar, i anu-mai naga nama naa, mu’a ere oo naga na ... (aplikasaun lian materna oituan).


*) Hakerek nain, Direitor CJP Diocese de Baucau, Comissário CNE representante husi Igreja Católica; coordenador sub-comissão EDUCAÇÃO ELEITORAL (estudos, pesquisa & publicações).

Sem comentários:

Enviar um comentário

Nota: só um membro deste blogue pode publicar um comentário.